Read obolo Ikan 24 Bible Online

Ikan 24 - obolo bible

Ikan 24

¹“Ire ogwu enerieen̄ imọnọ ogwu enenwaan̄ ido me lek nwa, mè inimun̄ inu ge me lek ogwu enenwaan̄ ya eyi òrọrọ ibe inu kan̄ ikayaka ìneme ọmọ, mè inige ikpa iyaak-olom itap ogwu enenwaan̄ me ubọk, mè ijit ọmọ, mè irieen̄ ọmọ isibi me uwu,

²ogwu enenwaan̄ ya oneninan̄a me uwu ya isibi, ofifi enerieen̄ onenimun̄, mè inimọnọ ido,

³ogwu olom òso iba ya si onenicha ogwu enenwaan̄ ya, mè ige si ikpa iyaak-olom itap ọmọ me ubọk, mè irieen̄ si isibi me uwu kan̄. Isan̄a me ikeya, ikerere ibe ke ogwu olom òso iba ya ìkwukwu itele ogwu enenwaan̄ ya,

⁴ogwu olom ogwu adasi ya ìkpoyaka ikpọk isi imọnọ ogwu enenwaan̄ ya ido me lek nwa. Mije, ogwu enenwaan̄ ya îwuuk lek ififila lek kan̄. Eyi ìre mbuban inu me isi Okumugwem. Ene geege ikatap ijo inu me inyọn̄ ijọn̄ eyi Okumugwem Awaji kinyi obosa inyi enyi me ìrot.

⁵“Enerieen̄ geelek òdodo aya nwa ìkposi akọn̄, ìkporọrọ si ofifi chieen̄ ikwaan̄ geege. Ìbokup me uwu kan̄ isiki efuuk otuuk kè acha ge, mè ikirọ ejit ikibele aya nwa kan̄.

⁶“Ire ofọọk inu inyi ene, kabọkọ ene ya ewuuk ikọk-akpa kan̄ ìtet ìkaan̄ me nsọọn̄, ikerere gwun̄ ewuuk eyi ekitet ikaan̄ me ubọk ya. Mije, eya ìre ichichit ene ya ebek ugwem.

⁷“Ene geelek òchichiin̄ ogwu Ijeren ogbo kan̄ ge isa irọ usun̄, mè ìre isa isi inyam, eneniweek iriọọn̄, ekpakpan̄ ogwu òkup ikeya. Sa me ikeya, enyi mênenisan̄a ukot ijo inu keya isan̄a me etete kinyi.

⁸“Ire orukan̄ inyakpa ifiak ene, ìgbala chieen̄ enenen me lek, mè ìmun̄ ibe ke enyi mîrọ otutuuk inu geelek ebi ngwugwa, ìrere ebi otoko kè Libai, mêtemebe enyi, kubọk emi nnyibe ema ida ibe erọ. Ikalọlọ irọrọ otutuuk inu geelek ema mêtemebe enyi.

⁹Ikawuuk inu Okumugwem Awaji kinyi orọbe Miriam me oniin̄ ije kinyi, mgbọ enyi enan̄abe me Ijipiti isibi.

¹⁰“Ikaan̄ inu geelek ofọọkbe inyi ogwu melek kwun̄, kasaba ìnin̄ emen uwu kan̄ ìsi ìmọnọ inu nsọọn̄ ene ya ochieekbe ibe ke ọmọ môsa inyi owu òtet òkaan̄ mege ire mgbọ ọmọ môyakabe inu ya ikpe owu.

¹¹Keke me oyet ban, inyi ọmọ isa ubọk kan̄ gaalek isi imọnọ inu nsọọn̄ ya isa isibi ijet owu me oyet.

¹²Ire ogwu ene ya ire ogwu ugbọọn̄, kabọkọ inu nsọọn̄ ya ìsi ìtet ìkaan̄ ìwele egwe.

¹³Ire inu nsọọn̄ ya ire ofọnti ilaak, kalọlọ ikekiyaka ofọnti nsọọn̄ ya înyibe owu inyi ogwu urieek ya ikakwun̄ geelek, inyi ikisa ichit lek ilaak me eririeen̄. Osirọ ikeya, ogwu urieek ya môkitọn̄ owu, owu mônenikana ogwu ata irọrọ me chieen̄ Okumugwem Awaji kwun̄.

¹⁴“Kafeen̄ ogwu ugbọọn̄ mè ìre ogwu una, ogwu owu ogwenbe me ọkọ, mè ìre ogwu Ijeren ogbo kwun̄, mè ìre ogwu ichen òluk melek kinyi me ama ile kinyi geelek me inyọn̄ ijọn̄ kinyi.

¹⁵Mun̄ ibe ke owu okpe ogwu ọkọ kwun̄ mkpukpe ikwaan̄ kan̄ usen geelek sabum ura ònonim, mije ọmọ orebe ugbọọn̄. Otutuuk ugwem kan̄ ìbieen̄ me lek mkpukpe ubọk ikwaan̄ usen ya. Ire òkakpe ọmọ mkpukpe ikwaan̄ kan̄, ọmọ mônina lek inyi Okumugwem, eya mônenikana ijo inu ikeme owu.

¹⁶“Ute ìkporaka mkpa ibot ogwu gwun̄ ikwu. Gwun̄ si ìkporaka mkpa ibot ogwu ute ikwu. Ene geelek ìbokwu mkpa ibot ijo inu kan̄.

¹⁷“Kajit ebi ichen mè ebi kpà-nte unen kiban̄. Kabọkọ si ekwut ichit-lek ogwu nwakpa ìtet ìkaan̄ kubọk inu nsọọn̄ mije urieek îkaan̄be owu.

¹⁸Ikawuuk ibe ke îkaan̄ mgbọ enyi erebe ebi usun̄ me ido Ijipiti, Okumugwem Awaji kinyi onenitaba enyi isibi me ere ya. Îre mije keya ke nkinyi enyi ida ibe enyi ekerọ ikeyi.

¹⁹“Me mgbọ ekirọkọ inu me uko, enyi isikisọp akpa me uko kinyi, mè ikikpulu ika, ire ikaan̄ echi òyayaak igwook me ijọn̄ me uko, ikakigwu ìkom ìsi ìkpulu. Ìkijuuk echa ìtele ìnyi ebi ichen, mè ebi kpà-nte, mè ebi nwakpa. Echicha ìkup inyi ema. Ire enyi ikirọ ikeyi, Okumugwem Awaji kinyi môgbana enyi me emen ikwaan̄ geelek ubọk kinyi okirọ.

²⁰Enyi isikigbeme mfut uti olifu kinyi, ikakigbeme otutuuk ìsan̄a. Ìkijuuk geelek òsisik ìtele ìnyi ebi ichen, mè ebi kpà-nte, mè ebi nwakpa.

²¹Enyi isikigbeme gerep me uko gerep kinyi, ikakigbala uko ya. Ìkijuuk geelek òsisik ìtele ìnyi ebi ichen, mè ebi kpà-nte, mè ebi nwakpa.

²²Ikawuuk ibe ke îkaan̄ mgbọ enyi erebe ebi usun̄ me ido Ijipiti. Îre mije keya ke nkinyi enyi ida ibe enyi ekerọ ikeyi.