Read obolo Ikan 25 Bible Online

Ikan 25 - obolo bible

Ikan 25

¹“Ire ebi ene ikaan̄ gọlọgọlọ, agan̄ iba cha esa gọlọgọlọ kiban̄ esi uwu oyerebet, inyi esibi oyerebet me ibot kiban̄, mè efieek oyerebet enyi ema. Mêfieek oyerebet inwọn ogwu ikalọge ikan, mè ifieek oyerebet itip ogwu òlọlọ ikan.

²Ire otu oyerebet ido ibe esa njijan̄ esulu ogwu oyerebet otipbe, ogwu ibot oyerebet môbe ogwu enerieen̄ ya ilaak me ijọn̄ me isi kan̄, mè esulu ọmọ otu ifuk njijan̄ òkekem me lek ikan îrọn̄be.

³Ekasulu ìwa ìraka akọp otu njijan̄ ini. Ire isulu iwa igak ikeya, eya mônenisiki ngwan̄ kwun̄ me isi ogbo ama.

⁴“Katobo otu eriembuuk ìchit me mgbọ îkijak mfufe isan̄a me lek akpa.

⁵“Ire ebi ngwan̄ ebirieen̄ ikigbaan̄ iluk me ere ge, ene ge me lek kiban̄ onenikwu itele ogwu nwa, ìkakaan̄ gwun̄. Nwakpa kan̄ ìkponan̄a isibi itele uwu ya isi ibat ofifi ene me oyet. Ogwu ngwan̄ ogwu olom ya obomọnọ ọmọ me lek nwa uwu, inyi isa me ikeya irọ ikan ngwan̄ olom iso.

⁶Adasi gwun̄ enerieen̄ ogwu enenwaan̄ ya môboman ìbochieek erieen̄ ogwu ngwan̄ ogwu òkwukwu, inyi erieen̄ kan̄ ikachep me ido Ijeren.

⁷Ire, ire ngwan̄ ogwu òkwukwu ya ìkaweek ibọbọkọ nwakpa ogwu ngwan̄ me nwa uwu, ogwu nwakpa ya môsa ikọ ya isi isi ebi ugane me otunchit ama, mè isi ikpa inyi ema ibe, ‘Ngwan̄ nlom n̄a îjit isasan̄a erieen̄ ogwu ngwan̄ isibi me ido Ijeren. Ìkaweek irọrọ ikan ngwan̄ olom iso me lek n̄a.’

⁸Ebi ugane ama kiban̄ mêneniria ikwaan̄ igwen ngwan̄ ogwu òkwukwu ya, mè itumu ikọ melek kan̄. Ire itet otu inye ikitumu ibe ke ọmọ ìkaweek imọmọnọ ogwu enenwaan̄ ya me lek nwa uwu,

⁹nwakpa ogwu ngwan̄ ya mônenije isi lek kan̄, me isi ebi ugane cha, mè itet ikpukot kan̄ agan̄ ge iwọọk isan̄a me ukot kan̄, mè icho ataak igwook ọmọ me isi, mè itumu ibe, ‘Ikeyi ke ekirọ ogwu enerieen̄ ikaweekge isasan̄a isi ototun̄ ukan̄ ogwu ngwan̄ isibi.’

¹⁰Bene me mgbọ ya, me Ijeren, ebekigwen ototun̄ ukan̄ ogwu enerieen̄ ya, ototun̄ ukan̄ ogwu ewọọkbe ikpukot me ukot.

¹¹“Ire ebirieen̄ iba ikitim etim, nwa ogwu ene ge me lek kiban̄ onunu ibonitap ubọk inyan̄a ogwu olom, mè ikana ubọk itet ogwu enerieen̄ keyilọ me lek ebirieen̄,

¹²ebefefieek ubọk kan̄ isan̄a. Kpebeto ọmọ nsan kubọk ge.

¹³“Kagbaan̄ ewuuk itọ-inu òlolobo ikem mè eyi ìkalobo ìkem ìkaan̄ me emen akpa kwun̄ ìkisa ìtọ inu ìnyam ìnyi ene.

¹⁴Kagbaan̄ alala itọ-inu òmimin ikem mè eyi ìkamin ìkem ìkaan̄ me uwu kwun̄ ìkisa ìtọ inu ìnyam ìnyi ene.

¹⁵Ìkisa ewuuk òlolobo ikem mè itat, mè alala òmimin ikem mè itat ìkitọ inu ìnyam ìnyi ene, inyi enyi eluk ujọn̄ọ ugwem me inyọn̄ ijọn̄ Okumugwem Awaji kinyi obonyi enyi.

¹⁶Mije, ebi ìkirọ inu chi, òrere ebi kpekirọ atikọ, ìre òchichaka inu me isi Okumugwem Awaji kinyi.

¹⁷“Ikawuuk inu ebi Amalek erọbe enyi me oniin̄, mgbọ enyi enan̄abe me ido Ijipiti ikije isibi.

¹⁸Ema enanan̄a isibi inichichini enyi me oniin̄ ije kinyi, me mgbọ lek kinyi owọbe, efuuk otabe enyi me emen, mè ijibi akọn̄ inin̄ lek ebi kinyi ebi ìgbegbeen̄ me agan̄ udun̄, mè ikpan̄ ema isan̄a. Ife chi kpekaan̄ ukpook Awaji me emen!

¹⁹Okumugwem Awaji kinyi isirọ inyi enyi enwọnọ me ubọk otutuuk ebi ochicha kinyi, ebi ìkukup ikana enyi me inyọn̄ ijọn̄ ya eyi Okumugwem Awaji kinyi obonyi enyi ibe enyi ebọkọ esak me ìrot, mè ininyi enyi utelelek, enyi ebejijijaka ebi Amalek isan̄a kpai me irak ura. Ikawuuk inu yi kubọk ge!