Read obolo Ikan 26 Bible Online

Ikan 26 - obolo bible

Ikan 26

¹“Enyi isire inyọn̄ ijọn̄ Okumugwem Awaji kinyi obosa inyi enyi me ìrot, mè ibọkọ isak, mè inin̄ iluk,

²mè iniwop uko, mgbọ irọkọ inu me uko isire, ene geelek môtiten̄e usini me lek adasi mfut ònan̄a me ijọn̄ ya itaak me emen okwun, mè iben isa ije isi me ere Okumugwem Awaji kinyi ogobobe isun̄ ibe ekemin Erieen̄ kan̄.

³Osire ere ya, owu môje isi lek ogwu ngwugwa òkup me ikwaan̄ ike mgbọ ya, mè tumu inyi ibe, ‘Ǹkitumu isibi me isi Okumugwem Awaji kwun̄ cherekeyi ibe ke ukot n̄a înijak me inyọn̄ ijọn̄ ya eyi Okumugwem onyan̄abe ibot inyi ebi nte nte kiji ibe ke ọmọ môsa inyi eji.’

⁴“Ogwu ngwugwa mônenibọkọ owu okwun ya me ubọk iyik me ijọn̄ me isi ntook ngwugwa Okumugwem Awaji kinyi.

⁵Me ere ya, me isi Okumugwem Awaji kinyi, owu mônenitumu isibi ibe, ‘Nte n̄a ìre ogwu Aram òkijijen̄e ikana, mè ije ikeya inire ido Ijipiti, mè iluk me ere ya, ọmọ mè ene inen mè inen gaalek ebi melek kan̄, mè inikup me ere ya ikana ikpele ido òkakaan̄ unye, mè inimumana iwa me otu ifuk.

⁶Ire, ebi Ijipiti erọrọ eji nnaan̄, mè itutuku eji, mè inyi eji uga unye ikwaan̄ isa irọ inyi eji ebọkọ ukwook, kubọk ekirọ ebi usun̄.

⁷Eji etoto ito igwen Okumugwem Awaji ebi nte nte kiji, Okumugwem onọnọ ida kiji, mè imun̄ si ukwook kiji, mè kwulukwulu kiji, mè tukutuku kiji geelek.

⁸Okumugwem onenisan̄a eji isibi me Ijipiti sa me unye ubọk, mè ikpele unye, mè uga ukpook îtapbe ijot ido ya, mè owuwa uyeke uyeke inu ijejeen̄, mè ogbogbo nke nke inu îsabe isulu ema osusut,

⁹mè inisa eji inu inire ere keyi, mè ininyi eji ata ijọn̄ keyi òkisibi anam mè mfut uti.

¹⁰Eya orọ, mgbọ keyi, nsa adasi mfut kechi ònan̄a me ijọn̄ ere owu Okumugwem onyibe emi, ijet owu.’ Ositumu ikeya isan̄a, owu môneniyaka okwun ya iyik me isi Okumugwem Awaji kwun̄, mè itọbọ ibot inyi ọmọ.

¹¹Owu mônenikibele lek kwun̄ ejit, owu mè ebi otoko kè Libai, melek ebi ichen ìluk me etete kinyi, mije otutuuk ata inu Okumugwem Awaji kwun̄ onyibe owu mè otutuuk ototun̄ ukan̄ kwun̄.

¹²“Òso acha ita geelek, òrere acha irek ge me akọp irek, owu osititiin̄ irek ge me akọp irek me lek mfut uko kwun̄ isan̄a, owu môsa inyi ebi otoko kè Libai, mè ebi ichen, mè ebi kpà-nte, mè ebi nwakpa ìkup me etete kinyi, inyi ema ekaan̄ inu ebekirie ijot owot me ama ile kinyi geelek.

¹³Osirọ ikeya isan̄a, owu môtumu me isi Okumugwem Awaji kwun̄ ibe, ‘Nra isan̄a irek ge me akọp irek, òrere inu òkup mbuban, isibi me uwu n̄a, mè isa inyi ebi otoko kè Libai, mè ebi ichen, mè ebi kpà-nte, mè ebi nwakpa, kubọk onyibe ida ibe erọ. Nrọ ikọ otọbe iso, ǹkatele geege, ǹkawuwuuk si geege.

¹⁴Ǹkamọnọ geege me lek ìrie me mgbọ nkifieek ejit, ǹkamọmọnọ si ìrie me mgbọ mbuban ochakabe emi me lek, ǹkasasa si usini me lek ìcho ìnyi ebi ìkwakwaan̄. M̀gbagban̄ utọn̄ me ida kwun̄, owu Okumugwem Awaji n̄a, mè irọ otutuuk inu ike owu onyibe emi ida.

¹⁵Eya orọ, kup me emen inyọn̄ ere nluk mbuban kwun̄, siki chieen̄ kpọ ebi kwun̄ Ijeren, mè gbana ema, mè gbana si ijọn̄ owu onyibe eji, kubọk onyan̄abe ibot inyi ebi nte nte kiji, òrere ata ijọn̄ òkisibi anam mè mfut uti.’

¹⁶“Cherekeyi, Okumugwem Awaji kinyi ìkinyi enyi ida ibe enyi egbala chieen̄ ekerọ orọmijọn̄ chi mè ikan chi me otutuuk ejit kinyi, mè otutuuk ibot ejit kinyi.

¹⁷Owu ora isa otu kwun̄ itumu isibi, cherekeyi, ibe ke Okumugwem ore Awaji kwun̄, ke owu môkije me oniin̄ kan̄, mè ikigbala chieen̄ ikirọ orọmijọn̄ kan̄, mè ikọ geelek îtọbe, mè ikisun̄ ikan kan̄, mè ikisiki ibot inyi ọmọ.

¹⁸Cherekeyi si, Okumugwem îtumu isibi ibe ke enyi ìre ebi kan̄ ebi ìsisibi esese, kubọk îtumube inyi enyi. Îtumu si ibe enyi ekerọ ikọ ọmọ otọbe.

¹⁹Okumugwem îtumu si isibi ibe, me itọn̄, mè umin, mè erieen̄ kinyi itataan̄ etip, ke ọmọ môbene enyi ifo inyọn̄ isaba iraka otutuuk ido geelek ọmọ orombe, inyi enyi enekana ife ìkup mbuban isa inyi Okumugwem Awaji kinyi, kubọk îtumube inyi enyi.”