Read obolo Ikan 27 Bible Online

Ikan 27 - obolo bible

Ikan 27

¹Mosis onenikeke melek ebi ugane Ijeren, mè ininyi otutuuk ene ida ibe, “Ìgbala chieen̄ ìkirọ otutuuk inu chi nkinyi enyi ida cherekeyi ibe ekerọ.

²Me usen enyi mêsababe okwaan̄ Jodan itoon̄ me inyọn̄ ijọn̄ Okumugwem Awaji kinyi obosa inyi enyi, ìbeen̄ ewuuk ile ìgwugwuun̄, mè ìsa abọt ìchọkọ lek ìrọt,

³mè ìge otutuuk ikọ Ikan yi me lek ewuuk cha, mgbọ enyi mêsababe inin̄ inyọn̄ ijọn̄ ya Okumugwem Awaji kinyi obosa inyi enyi, òrere ata ijọn̄ òkisibi anam mè mfut uti, kubọk Okumugwem Awaji ebi nte nte kinyi otumube inyi enyi.

⁴Me usaba agan̄ okwaan̄ Jodan ya, mgbọ enyi isire lek ogoon̄ Eban, ere ya ke enyi ebebeen̄ ewuuk ile cha igwugwuun̄, mè isa abọt ichọkọ akpalek kiban̄ irọt, kubọk nkinyi enyi ida cherekeyi.

⁵Ìsa ewuuk ìnama si ntook ngwugwa ìnyi Okumugwem Awaji kinyi me ere ya. Ewuuk cha ìbore echi kpesa okwukwut ibum.

⁶Enyi mêsa ewuuk òkup ototuuk, echi kpekpọkpọkọ, inama ntook Okumugwem Awaji kinyi. Îre me inyọn̄ ntook ya ke enyi ebekigwa ngwugwa ewọwọp iriọk inyi Okumugwem Awaji kinyi.

⁷Îre si me inyọn̄ ntook ya ke enyi ebekigwa ngwugwa eyi esuuk, mè ikikup me ere ya igbaan̄ irie inorie ngwugwa cha, mè ikibele lek kinyi ejit me isi Okumugwem Awaji kinyi.

⁸Otutuuk ikọ Ikan yi, enyi ebegege isibi ijaan̄ lek, me lek ewuuk cha enyi ebenebe igwuun̄.”

⁹Mosis onenikeke, ọmọ melek ebi ngwugwa ebi otoko kè Libai, mè initumu inyi otutuuk ebi Ijeren ibe, “Enyi ebi Ijeren, ìriaan̄ otu, mè ìgban̄ utọn̄! Cherekeyi enyi mîkana ebi eyi Okumugwem Awaji kinyi.

¹⁰Eya orọ, ìgban̄ utọn̄ me ida Okumugwem Awaji kinyi, mè ìkirọ ikọ îtọbe ibe erọ, mè ìkisun̄ orọmijọn̄ kan̄, kubọk nkinyi enyi ida cherekeyi.”

¹¹Me usen ya, Mosis oneninyi ebi Ijeren ida ibe,

¹²“Enyi isisaba okwaan̄ Jodan itoon̄, ebi otoko kechi ebekeke me inyọn̄ ogoon̄ Gerijim mgbọ ebekigbana otutuuk ebi ene. Otoko cha ìre otoko kè Simiọn, otoko kè Libai, otoko kè Juda, otoko kè Isaka, otoko kè Josefu, mè otoko kè Benjamin.

¹³Ebi otoko kechi ebekeke me inyọn̄ ogoon̄ Eban mgbọ ebekitan̄a ufieek-otu inyi ebi ene. Ema ìre ebi otoko kè Ruben, mè otoko kè Gadi, mè otoko kè Ase, mè otoko kè Jebulọn, mè otoko kè Dan, mè otoko kè Nafitali.

¹⁴“Ebi otoko kè Libai mênenikitaan̄ ukpo me unye ida ikitan̄a ufieek-otu inyi otutuuk ebi Ijeren ekenọ, ibe,

¹⁵“ ‘Môfieek inyi ene geelek òsasa uti mè ìre okwukwut irọ mkpọmfaka, eyi òrere ubọk ikwaan̄ ogwu usọ, mè ire si mbuban inu me isi Okumugwem, ilet isun̄ inyi lek kan̄.’ “Otutuuk ene mêchechieek igwook ibe, ‘Ikup ikeya!’

¹⁶“ ‘Môfieek inyi ene geelek òkpọkpọ ogwu ute mè ogwu uga isiki chieen̄.’ “Otutuuk ene mêchechieek igwook ibe, ‘Ikup ikeya!’

¹⁷“ ‘Môfieek inyi ene geelek òjujujuk ewuuk okike ijọn̄ ogwu melek kan̄.’ “Otutuuk ene mêchechieek igwook ibe, ‘Ikup ikeya!’

¹⁸“ ‘Môfieek inyi ene geelek òsasa ogwu ǹnàan̄ ije ilọ oniin̄ me oniin̄ ije kan̄.’ “Otutuuk ene mêchechieek igwook ibe, ‘Ikup ikeya!’

¹⁹“ ‘Môfieek inyi ene geelek òfefieek oyerebet ifeen̄ ogwu ichen, mè ebi kpà-nte, mè ebi nwakpa.’ “Otutuuk ene mêchechieek igwook ibe, ‘Ikup ikeya!’

²⁰“ ‘Môfieek inyi ogwu enerieen̄ geelek òtetet nwa ogwu ute ilaak, mije, ene ya îchili njak ogwu ute.’ “Otutuuk ene mêchechieek igwook ibe, ‘Ikup ikeya!’

²¹“ ‘Môfieek inyi ogwu enerieen̄ geelek òlalaak anam geelek.’ “Otutuuk ene mêchechieek igwook ibe, ‘Ikup ikeya!’

²²“ ‘Môfieek inyi ogwu enerieen̄ geelek òlalaak ogwu ngwan̄ enenwaan̄, mè ìre gwun̄ nga kan̄, mè ìre gwun̄ nte kan̄.’ “Otutuuk ene mêchechieek igwook ibe, ‘Ikup ikeya!’

²³“ ‘Môfieek inyi ogwu enerieen̄ geelek òlalaak ogwu uga-nwa.’ “Otutuuk ene mêchechieek igwook ibe, ‘Ikup ikeya!’

²⁴“ ‘Môfieek inyi ogwu enerieen̄ geelek òlelet ikpan̄ ogwu melek kan̄.’ “Otutuuk ene mêchechieek igwook ibe, ‘Ikup ikeya!’

²⁵“ ‘Môfieek inyi ene geelek òbọbọkọ ikpoko ibe ọmọ môsi ikpan̄ ogwu ikalọge inu geege.’ “Otutuuk ene mêchechieek igwook ibe, ‘Ikup ikeya!’

²⁶“ ‘Môfieek inyi ene geelek ogwu ìkakisun̄ ikọ Ikan yi, ìkakirọrọ si ema.’ “Otutuuk ene mêchechieek igwook ibe, ‘Ikup ikeya!’