Read obolo Ikan 28 Bible Online

Ikan 28 - obolo bible

Ikan 28

¹“Ire enyi igban̄ utọn̄ me ida Okumugwem Awaji kinyi, mè igbala chieen̄ ikirọ otutuuk ikọ geelek îtọbe ibe erọ, echi nkitumu inyi enyi chereyi, Okumugwem Awaji kinyi môbene enyi ifo inyọn̄ igak otutuuk ebi ido geelek òkup me linyọn̄.

²Otutuuk ugbana kechi môgbuku inu me lek kinyi, mè ikup melek kinyi, ire enyi igban̄ utọn̄ me ida Okumugwem Awaji kinyi:

³“Ugbana môkup inyi enyi me emen ama ile kinyi, mè ikup si inyi enyi me oron uko kinyi.

⁴“Ugbana môkup inyi nsabọn kinyi, mè ikup si me lek mfut ònan̄a me ijọn̄ kinyi, mè bọn anam kinyi, òrere bọn eriembuuk kinyi, mè bọn arọọn̄ kinyi, mè bọn ebot kinyi.

⁵“Ugbana môkup me lek akpa kinyi, mè fituru kinyi.

⁶“Ugbana môkup inyi enyi me emen inu geelek enyi ekirọ, me isisibi kinyi mè ikaka kinyi.

⁷“Okumugwem môrọ ibe enyi etim ekpan̄ ebi ochicha kinyi geelek ebi mênan̄abe ikeke iniweek ititim enyi akọn̄ me lek. Ema ije me oniin̄ ge inu akọn̄ me lek kinyi, oniin̄ jaaba ke ema ebeliliin̄ ikpọk iyiyala isibi itele enyi.

⁸“Okumugwem môria ugbana igwook enyi me lek, me emen uwu isun̄-mfut uko kinyi, mè iria si ugbana igwook me lek ubọk ikwaan̄ kinyi geelek. Okumugwem Awaji kinyi ìbogbagbana enyi me inyọn̄ ijọn̄ ya eyi ìbosa inyi enyi.

⁹“Okumugwem ìbosasan̄a enyi isibi isun̄ esese kubọk ebi kan̄ ìkup mbuban, kubọk înyan̄abe ibot inyi enyi ibe ke ọmọ môrọ, ire enyi ikirọ otutuuk ikọ geelek ọmọ Okumugwem Awaji kinyi otọbe ibe enyi erọ, mè ikiluk si ugwem igọọk me oniin̄ kan̄ geelek.

¹⁰Otutuuk ebi ido geelek me linyọn̄ mênenimun̄ ibe ke enyi ìre ebi eyi Okumugwem, mè ibene ikitet enyi ukpook me lek.

¹¹Okumugwem môrep ata inu igwook inyi enyi ogbogbo. Môchili enyi owot, inyi enyi emumana, mè irọ inyi anam kinyi imumana, mè irọ inyi ijọn̄ kinyi isibi mfut ogbogbo me inyọn̄ ijọn̄ ya eyi Okumugwem onyan̄abe ibot inyi ebi nte nte kinyi ibe ọmọ môsa inyi enyi.

¹²“Okumugwem môchili emen inyọn̄ ibook, òrere uwu isun̄-inu kan̄ ere îkisun̄ ogbogbo ata inu, mè ida ibot igwook me inyọn̄ ijọn̄ kinyi, me mgbọ kan̄, mè isa me ikeya igbana otutuuk ubọk ikwaan̄ kinyi geelek. Enyi ebekifọfọọk inu inyi ebi owuwa ido, ire, enyi kpebefọọk ene geege inu me ubọk.

¹³“Ire enyi ikirọ ikọ geelek Okumugwem otọbe ibe enyi erọ, echi emi nkinyi enyi ida cherekeyi ibe enyi ekerọ, Okumugwem môrọ enyi ebi ibot, enyi kpebere ebi ekikpukpulu. Môrọ si inyi enyi ekekup me agan̄ inyọn̄ gaalek, enyi kpebekikup me agan̄ irak.

¹⁴Ikatele irọrọ otutuuk ikan chi nkinyi enyi chereyi, kubọk ge. Ikatele Okumugwem, mè ìsi ìkitọbọ ebum ìnyi ofifi awaji, ikasisi si ikwaan̄ ìnyi ofifi awaji geege.

¹⁵“Ire, ire enyi kpegban̄ utọn̄ me ida Okumugwem Awaji kinyi, mè ire enyi kpekigbala chieen̄ ikirọ otutuuk ikọ geelek îtọbe ibe erọ, mè ikisun̄ orọmijọn̄ kan̄ echi emi nkinyi enyi cherekeyi, ufieek-otu kechi môkup melek kinyi, mè ibaak imeen̄ enyi:

¹⁶“Ufieek-otu môkup inyi enyi me emen ama ile kinyi, mè ikup si inyi enyi me oron uko kinyi.

¹⁷“Ufieek-otu môkup me lek akpa kinyi, mè ikup me lek fituru kinyi.

¹⁸“Ufieek-otu môkup inyi nsabọn kinyi, mè ikup si me lek mfut ònan̄a me ijọn̄ kinyi, mè bọn anam kinyi, òrere bọn eriembuuk kinyi, mè bọn arọọn̄ kinyi mè bọn ebot kinyi.

¹⁹“Ufieek-otu môkup inyi enyi me emen inu geelek enyi ekirọ, me isisibi kinyi mè ikaka kinyi.

²⁰“Ire enyi itele Okumugwem, mè isa me ikeya irọ ọmọ inu ikpak, Okumugwem ìboraria ufieek-otu mè wọlọwọlọ mè ogbo igwook enyi me lek me inu geelek enyi mêtetbe ubọk me lek ikirọ, mege enyi mêjijakabe isan̄a, mè ichep ita isi ge me ikafiatge mgbọ.

²¹Okumugwem môtap ùrioon̄ mè esese chieen̄ orukan̄ igak enyi lek, ge me udun̄ ge, mege môjijakabe enyi isan̄a me inyọn̄ ijọn̄ ya eyi enyi ebesi ibọkọ isak.

²²Okumugwem môria orukan̄ ejit òkitaka ene ijet ita igwook ichit enyi, mè ukan̄ òkibak ene me lek, mè nkukum, mè ijo uyok òkinyiaan̄ ene akpa, mè una ibot irerep, mè orukan̄ òkijọ mfut uti sabum ìboto, mè mbubeek. Ùrioon̄ kechi mônwaan̄ enyi ubọk me ebon mege enyi mêkwaan̄be ita kpai.

²³Akpa isinyọn̄ me ido kinyi ìbonye ikup kubọk ekwe, ibot geege ìkporep. Ijọn̄ ido kinyi ìbonye ikup kubọk okwukwut, inu geege ìkpotibi me inyọn̄ kan̄.

²⁴Kpan̄asi ibot obokirep igwook me ido kinyi, Okumugwem môrọ inyi mfuun̄ mè achiaan̄ ijọn̄ ikinan̄a me isinyọn̄ irep igwook me ijọn̄, mege enyi mêkwaan̄be isan̄a kpai.

²⁵“Okumugwem môrọ inyi ebi ochicha kinyi eketim ekpan̄ enyi. Ire enyi ije me oniin̄ ge isi akọn̄ me lek kiban̄, oniin̄ jaaba ke enyi ebeliliin̄ ikpọk iyiyala me isi kiban̄. Sa me ikeyi, enyi mênenikana inu ukpook inyi ebi otutuuk ido geelek me linyọn̄.

²⁶Enyi isikwaan̄ itutọmọ ikana ere, ebi kè unọn òwulu me inyọn̄, mè ebi kè ijo anam oron geelek mêneninu initaka nkwukwu kinyi. Kpunu ogwu òbokup irieen̄ ema isan̄a.

²⁷Okumugwem môria okporotu mè nkwukwuun̄, mbet echi òrọ ebi Ijipiti, igwook ijot enyi lek, igbaalek inya, mè ikwut-ntim òkison ene kubọk agbagbak, ire lek kpebekọt igwa.

²⁸Okumugwem môtap enyi iraak, mè itap enyi ǹnàan̄, mè itap si enyi sese.

²⁹Enyi mêkekitutun ikana me ejit ikarek kubọk ogwu ǹnàan̄ okitutun ikana me emen udun. Kpunu inu geege enyi mêtetbe ubọk me lek irọ eyi òboje ijaan̄. Kpan̄asi ikeya, usen geelek me ugwem kinyi, ebekifefeen̄ enyi, mè ikichichim enyi inọọn̄. Kpunu ogwu òbotap ubọk inyi enyi.

³⁰“Owu môtet obaak enenwaan̄ ikaan̄ ibodo me lek nwa, ofifi ogwu enerieen̄ môsisi itet igọọk ilaak. Owu mônama uwu, ire, òkpoboluk me emen. Owu môwop uko gerep, ire, òkpoborie utop mfut kan̄.

³¹Me chieen̄ kwun̄ gaalek, mêkpan̄ orie eriembuuk kwun̄, ire, owu òkpobotaka geege me lek. Mêtet owu inyinya akpan kwun̄ ibọkọ me unye, ire, kpebeyaka isa ijet owu. Me chieen̄ kwun̄ gaalek, mêkpulu arọọn̄ kwun̄ isa ikana inyi ebi ochicha kwun̄, ire, kpunu ogwu òbonyan̄a ema isibi inyi owu.

³²Me chieen̄ kwun̄, mêtet bọn ebirieen̄ kwun̄ mè bọn ebibaan̄ kwun̄ itọọn̄ ichon ikana itap me ofifi ido, chieen̄ kwun̄ môkekikup me oniin̄ usen geelek ikikpọ mgbọ ema mêgwube ikom ika, ire, ema kpebegwu ikom ika. Owu òkpobokọt ibene ubọk irọ inu geege ofolek.

³³Ebi ido enyi kperarak iriọọn̄ eberie mfut ònan̄a me ijọn̄ kinyi mè egwurugwu isi kinyi. Gaalek tukutuku mè unye ubọk mfeen̄ oboyaka inikup inyi enyi usen geelek me ugwem kinyi.

³⁴Inu geelek enyi mêsabe chieen̄ kinyi ikimun̄ ìbokitatap enyi iraak.

³⁵Okumugwem môria ijo okporotu, echi kpebekọt igwa, igwook enyi me akpatukot kinyi mè ukot kinyi. Ijo okporotu cha môbene me akajit ukot kinyi isi igwook me eden̄ ibot kinyi.

³⁶“Okumugwem môlilaba enyi melek ogwu ubọọn̄ kinyi, ogwu enyi etobe ibe ikikpulu enyi, isi itaak me ido enyi mè ebi nte nte kinyi kperarak iriọọn̄. Enyi mêkukup me ere keya ikitọbọ ebum inyi awaji echi esabe uti mè ewuuk irọ, mè ikisi ikwaan̄ inyi awaji cha.

³⁷Enyi mênenikana inu ukpook, mè inu ebekisa ito urọk, mè inu itiik, me etete ebi otutuuk ido cha ere Okumugwem môyiyalabe enyi isi tap.

³⁸“Enyi mêwop inu ijot uko kinyi gbak, ire, sọntiik gaalek ke enyi eberọkọ, mije, akaka ituuk ìbotataka otutuuk isan̄a.

³⁹Enyi mêwop uko gerep, mè ikpukpo olik gerep cha isibi, ire, enyi kpebegbeme gerep ònan̄a me lek. Enyi kpebenwọ si miin̄ geege ònan̄a me lek, mije ituuk ìbotataka otutuuk isan̄a.

⁴⁰Uti olifu ìbojojot otutuuk inyọn̄ ijọn̄ ido kinyi, ire, enyi kpebekaan̄ aran̄ olifu isa irọ inu geege, mije, mfut olifu cha ìbokigegen̄ isan̄a me nsek.

⁴¹Enyi mêkaan̄ bọn ebirieen̄ mè bọn ebibaan̄, ire, ema kpebekup melek kinyi, mije, ebekpukpulu ema isan̄a me akọn̄.

⁴²Otutuuk uti geelek òtibi me ijọn̄ kinyi mè otutuuk mfut uko kinyi geelek, ebi kè akaka ituuk ebejijibi inin̄ lek initaka isan̄a kpai.

⁴³“Ebi ichen ìluk me etete kinyi ebekpọkpọ ikibene me irek ifo isi, mè ikinye lek igak enyi, ire, enyi ebekpọkpọ ikisiki me irek ifo isi, mè ikiwọ igak ema.

⁴⁴Ogwu ichen obokifọọk inu inyi owu, ire, owu òkpobokifọọk inu inyi ọmọ. Ọmọ obokire ogwu ibot, sà owu obokire ogwu ebekikpukpulu.

⁴⁵“Otutuuk ufieek-otu chi môkup melek kinyi, mè ikikana igọọk enyi me ere geelek enyi ebenin̄, mè isoon̄ enyi, mè itutuku enyi mege ire lek môkpan̄be enyi isan̄a. Mije, enyi mîjit igbagban̄ utọn̄ inyi Okumugwem Awaji kinyi, mè ijit si irọrọ ikọ îtọbe ibe enyi erọ, mè isusun̄ orọmijọn̄ kan̄ echi înyibe enyi.

⁴⁶Ufieek-otu chi môre inu ijejeen̄ mè inu ukechieen̄ me lek kinyi mè lek bọn kinyi ire mgbọ geelek.

⁴⁷Mije enyi kpetọn̄ọ isi isa me ubelejit isi ikwaan̄ inyi Okumugwem Awaji kinyi mgbọ îgbanabe enyi,

⁴⁸eya orọ, enyi mêkisi ikwaan̄ inyi ebi ochicha kinyi, ebi Okumugwem oboria enyi itap me ubọk. Enyi ebekiraran̄ ọfiọọn̄, mè ikirak ebek, mè ikije njak, mè ikup me emen uga ugbọọri ikisi ikwaan̄ inyi ema. Ebi ochicha kinyi cha ebegọgọbọ enyi ọgbọn usun̄ me ebek, mè ikitutuku enyi mege enyi mêkwaan̄be isan̄a.

⁴⁹Okumugwem môsa ebi ido ge inan̄a me ujọn̄ọ ere me okputut linyọn̄ inu, ibe enetim enyi akọn̄ me lek. Usem ebi ido ya, enyi kpebekọt inọ. Ema ebejibi akọn̄ inin̄ enyi lek kubọk igo okibum itibi efet me unye, kpunu inu òbokọt ikput ema.

⁵⁰Ebi ido ya ìre ife unye-ejit. Kpekilibi chieen̄ ogwu ugane geege, kpekitoto si njijin nsabọn.

⁵¹Ema ebetataka anam kinyi isan̄a, mè irie mfut uko kinyi si isan̄a, mè itap enyi me uraafiọọn̄ mege enyi mêkwaan̄be ita. Ibene me lek akpa kinyi mè aya miin̄ kinyi mè aya aran̄ kinyi, ire lek bọn eriembuuk kinyi mè bọn arọọn̄ kinyi mè ebot kinyi, ema mêrie otutuuk isan̄a. Kpebetele geege inyi enyi, mege enyi mêkwaan̄be ita.

⁵²Ife cha ebekpakpa mbin akọn̄ ikana enyi me otutuuk ama ile kinyi geelek, mege otutuuk ubene ubene mgban ama kinyi ònyenye cha, echi enyi ekisa itoon̄ ejit me otutuuk inyọn̄ ijọn̄ kinyi, môgbugbọbe igwook me ijọn̄. Ema mêkpa mbin akọn̄ ikana otutuuk ama ile kinyi me otutuuk inyọn̄ ijọn̄ kinyi, eyi Okumugwem Awaji kinyi obosa inyi enyi.

⁵³“Mije mbin akọn̄ ya ebi ochicha kinyi mêkpabe ikana enyi, melek ukwook ema mêtapbe enyi me lek, enyi mêkitaka nsabọn kinyi mije una inorie. Enyi mêtaka ufuk bọn kinyi ebirieen̄ mè echi bọn kinyi ebibaan̄ ebi Okumugwem Awaji kinyi onyibe enyi.

⁵⁴Ikerere ogwu enerieen̄ ogwu òsisiki lek ichit mè ikaan̄ mmemem ejit ichit me etete kinyi, ìbonyenye ejit me lek ogwu ngwan̄ mè lek ogwu nwa ogwu îmabe enenen, mè lek ebi bọn ebi mêsikbe me ugwem.

⁵⁵Ìkpochieek ikpọkpọkọ usini me lek ufuk ebi bọn, echi ọmọ okitaka, isa iche inyi ene geege me lek kiban̄. Mije, ọmọ ìkpoyaka ikaan̄ ofifi inu ìborie igak ikeya, bak me lek uga uraafiọọn̄ eyi mbin akọn̄ ya ebi ochicha mêkpabe ikana ama ile kinyi môtapbe, mè tukutuku òboje me lek.

⁵⁶Ikerere ogwu enenwaan̄ ogwu òsisiki lek ichit mè ikaan̄ mmemem ejit ichit me etete kinyi, ogwu kpokọtbe ijak ukot inye me ijọn̄, mije isiki-lek mè mmemem ejit kan̄, inyi ọmọ ikasak ene geege unan me lek, ìbonyenye ejit me lek ogwu olom ogwu îmabe enenen, mè lek ebi bọn ebirieen̄ mè ebi bọn ebibaan̄.

⁵⁷Ìkpochieek inyinyi ema kubọk okpọkọ geege ikeyi me lek uga-gwun̄ òsibi ọmọ me lek, mè ìre gwun̄ enerieen̄ ọmọ omanbe. Mije, ọmọ me lek kan̄ ìkiweek igbagbaan̄ uga-gwun̄ ya melek gwun̄ enerieen̄ ya itaka me nlelet, bak me lek uga uraafiọọn̄ eyi mbin akọn̄ ya ebi ochicha mêkpabe ikana ama ile kinyi môtapbe, mè tukutuku òje me lek.

⁵⁸“Ire enyi kpebegbala chieen̄ ikirọ otutuuk ikọ Ikan chi egebe me emen ikpa yi, ibe enyi ekemin erieen̄ Okumugwem Awaji kinyi, òrere erieen̄ òkaan̄ umin mè ukpook,

⁵⁹Okumugwem môria ijo ùrioon̄ echi òkitet ene ukpook, mè ijo orukan̄ echi kpebekọt igwa, itap igak enyi melek ebi owot iman kinyi me lek. Orukan̄ chi ìbore unye unye orukan̄ echi òkibia ene me lek.

⁶⁰Okumugwem môyaka otutuuk uga ijo orukan̄ cha òfafiak ebi Ijipiti cha, echi enyi emun̄be mè ikitet ukpook me lek, isa inigwook ichit enyi lek, inyi ibia enyi me lek.

⁶¹Okumugwem môria si otutuuk esese chieen̄ ijo orukan̄ mè ijo ùrioon̄ geelek echi kpege me emen Ikpa Ikan yi igwook enyi me lek, mege enyi mêkwaan̄be ita.

⁶²Enyi ebi mgbọ ìwawa me otu ifuk kubọk ntoronyan̄ òkup me akpabin inyọn̄, enyi ebeyaka inisik inen mè inen gaalek, mije, enyi kpegban̄ utọn̄ me ida Okumugwem Awaji kinyi.

⁶³Ike înemebe Okumugwem irọrọ inyi inu ije ijaan̄ enyi me lek, mè enyi emumana me otu ifuk, ikeya si ke ìboneme ọmọ ijijijaka enyi, mè ikpan̄ enyi isan̄a. Ebejijim enyi isan̄a me inyọn̄ ijọn̄ ya ere enyi ebesi inin̄ ibọkọ isak.

⁶⁴“Okumugwem môyiyala enyi itọọn̄ itaak me otutuuk ido geelek, ibene me okputut linyọn̄ agan̄ ge isi ire okputut linyọn̄ agan̄ keyilọ. Ere cha ke enyi mêkup ikitọbọ ebum inyi ofifi awaji echi esabe uti mè ewuuk irọ, awaji echi enyi mè ebi nte nte kinyi kperarak imun̄.

⁶⁵Me etete ebi ido cha enyi mêkupbe, enyi kpebekaan̄ esuuk, kpunu si ere akajit ukot kinyi obojak, mè isiki efuuk. Okumugwem môrọ inyi ejit kinyi ikikup inyọn̄ inyọn̄. Môkilọk enyi imumun̄ inu òkup enyi me ejit, ire, chieen̄ kinyi ìkpomun̄. Ugwem kinyi môrook enyi.

⁶⁶Ugwem kinyi ìkabogele igwook mgbọ geege. Enyi ebekiluk me uga ukpook mkpa eririeen̄ mè ikarek. Enyi kpeberiọọn̄ mè ìre enyi ekwakwaan̄, mè ìre enyi ekup me ògat ugwem.

⁶⁷Mije uga ukpook òbojot enyi ejit, melek ukpook inu chieen̄ kinyi obokimun̄, me ewelegwe, enyi mêkitumu ibe, ‘Soso egwe gwat lek fit ma!’ Me ikakwun̄, enyi mêkekitumu ibe, ‘Soso egwe gwat lek wele ma!’

⁶⁸Okumugwem môtaak enyi me uji ile ikọp okwaan̄ okwaan̄ igwu ikom ifo Ijipiti, òrere ije eyi ntumube inyi enyi ibe ke enyi kpebekpọk ije ofifi. Me ere ya, enyi mênenikinyam lek kinyi inyi ebi ochicha kinyi kubọk usun̄ ebirieen̄ mè usun̄ ebibaan̄. Ire, kpunu ogwu òbolep enyi.”