Read obolo Ikan 29 Bible Online

Ikan 29 - obolo bible

Ikan 29

¹Echichi ore ikan inyan̄a-ibot eyi Okumugwem onyibe Mosis ida ibe inyan̄a melek ebi Ijeren me ido Mowabu, isọkọ me lek inyan̄a-ibot eyi îwuukbe lek inyan̄a melek kiban̄ mgbọ ema ekupbe me ogoon̄ Orebu.

²Mosis onenigwen otutuuk ebi Ijeren ititiin̄, mè initumu inyi ema ibe, “Enyi me lek kinyi mîsa chieen̄ kinyi imun̄ otutuuk inu Okumugwem orọbe me ido Ijipiti, me lek ogwu Fero mè lek otutuuk ebi ikwaan̄ kan̄, mè otutuuk ijọn̄ ido kan̄.

³Enyi mîsa chieen̄ kinyi imun̄ uga osusut, mè inu ukechieen̄, mè ikpele uyeke uyeke inu cha Okumugwem orọbe.

⁴Ire, mege inire cherekeyi, Okumugwem ìkachili enyi ejit, inyi enyi ekọt egobo inu chi etet. Ìkachili enyi chieen̄, inyi enyi ekọt emọọn̄. Ìkachili si enyi utọn̄, inyi enyi ekọt enọ inu inu chi osibibe.

⁵Otuuk kè akọp acha ini ke nsa enyi ije itibi emen èwê, ofọnti mè ekwut kinyi ìkagwak ìta enyi me lek, ikpukot òkup enyi me ukot ìkagwak ìta enyi me ukot.

⁶Enyi kpetaka fituru geege, enyi kpenwọ miin̄ ikike, kpenwọnwọ si unye miin̄. Ire, Okumugwem înyi enyi inu geelek òkup enyi me uyọt, inyi enyi esa me ikeya eriọọn̄ ibe ke ọmọ ore Okumugwem Awaji kinyi.

⁷Mgbọ enyi ejebe mege inire ere keyi, Siyon ogwu ubọọn̄ Esibon mè Ôgu ogwu ubọọn̄ Basan ejijibi akọn̄ isibi inikweek eji. Ire, eji etitim ikpan̄ ema,

⁸mè ibọkọ ijọn̄ kiban̄, mè isa ikana inyi ebi otoko kè Ruben, mè ebi otoko kè Gadi, mè okpọkọ me lek ebi otoko kè Manasi me ìrot.

⁹Ìkisun̄ ikan inyan̄a-ibot chi, inyi inu geelek enyi ekirọ ikije ijaan̄.

¹⁰“Me cherekeyi, enyi otutuuk ene ekeke me isi Okumugwem Awaji kinyi, ebi ibot kinyi, mè ebi ibot otoko kinyi, mè ebi ugane kinyi, mè ebi ibot akọn̄ kinyi, melek kinyi otutuuk ebi Ijeren,

¹¹mè asa nsabọn kinyi, mè ebi nwa kinyi, mè ebi ichen ìkiluk me etete kinyi me emen m̀gba-ǹgwele ukan̄ kinyi ikikep iye inyi enyi, mè ikichibi mun̄ inyi enyi.

¹²Enyi ekeke me ere yi inenibọkọ inyan̄a-ibot Okumugwem Awaji kinyi itap, mè ibọkọ si ufieek-otu kan̄ òje me lek inyan̄a-ibot ya, eyi Okumugwem Awaji kinyi obonyan̄a melek kinyi cherekeyi, itap.

¹³Okumugwem ìbonyan̄a ibot melek kinyi, inyi ọmọ isa me ikeya irọ ijot, me cherekeyi, ibe ke enyi ìre ebi kan̄, ke ọmọ ìre si Awaji kinyi, kubọk îtumube inyi enyi, mè inyan̄a si ibot òfo me lek inyi ebi nte nte kinyi Ebereyam, mè Ajiki, mè Jekọp.

¹⁴Ìkare enyi gaalek ke Okumugwem okirọ inyan̄a-ibot keyi mè ufieek-otu òje me lek inyi.

¹⁵Okumugwem ìkirọ inyan̄a-ibot yi melek kinyi ebi ìkikeke me ere yi melek kiji cherekeyi, me isi Okumugwem Awaji kiji, mè ikirọ si melek ebi kpegọọk eji ikup me ere yi cherekeyi, òrere ebi ebeman me ukot òkup me isi.

¹⁶“Enyi me lek kinyi mîriọọn̄ ojelek ugwem eji elukbe me Ijipiti, mè iriọọn̄ si ike eji esabe ije itibi owuwa ido me oniin̄ ije kiji.

¹⁷Enyi mîsa chieen̄ kinyi imun̄ òchichaka inu kiban̄ cha òrere mkpọmfaka kiban̄ cha esabe uti mè ewuuk ikọ, mè echi esabe alata okuket mè alata araran̄ itọkọ, echi òkup me ama kiban̄ cha.

¹⁸Okumugwem ìrọ inyan̄a-ibot yi melek kinyi, inyi ikakaan̄ enerieen̄ geege mè ìre enenwaan̄ geege, mè ìre ototun̄ ukan̄ geege, mè ìre otoko geege, me etete kinyi, ebi ìjijit Okumugwem Awaji kiji me ejit kiban̄ me cherekeyi, mè ikana igọọk isi ikitọbọ ebum inyi awaji ebi ofifi ido cha, inyi ikakaan̄ ene geege me etete kinyi òrere olulut mè mfut uti òkpan̄ ene.

¹⁹Ire ikaan̄ ogwu òkup ikeya, ònọnọ otutuuk ufieek-otu cha isan̄a, mè ikikeek ibe ke kpunu ufialek geege òbore ọmọ lek, ubọk geelek ọmọ okirọ inu òneme ọmọ, ijo inu ene ya mônenisa mkpa ijet otutuuk ene iso, ebi ata ene mè ebi ijo ene.

²⁰Okumugwem ìkpoma itetele inyi ene ogwu òkup ikeya. Ìbonanaan̄ ejit uyok uyok inyi ene ya, mè ikaan̄ ejit mba me lek kan̄, mè ida otutuuk ufieek-otu egebe me emen Ikpa Ikan yi igwook ọmọ me lek, mè itutuku si erieen̄ ene ya isan̄a me irak ura yi.

²¹Okumugwem môsan̄a ene ya isibi me otoko ebi Ijeren isun̄ esese, mè itap ùrioon̄ igak ọmọ lek, igọọk me lek otutuuk ufieek-otu echi inyan̄a-ibot ya, echi egebe itap me emen Ikpa Ikan yi.

²²“Me ukot òkinu me isi, bọn kinyi ebi ìbenu me udun̄ kinyi, mè ebi ichen ìnan̄a me ujọn̄ọ ere inu, mêmun̄ otutuuk ufialek echi òrọrọn̄ ikeme ido kinyi, mè owuwa ijo orukan̄ echi Okumugwem osabe isulu enyi osusut, mè ido enyi ikọ ofolek.

²³Otutuuk ijọn̄ kinyi ìbokup kubọk ijọn̄ esabe biridọni mè uchi igwook ichit, mè itap ukan̄ iwọp. Kpebewop inu geege, kpunu si inu geege òbotitibi isibi. Kubọk mbubet geege ikeyi ìkpotitibi. Ijọn̄ kinyi ìbochat ikup kubọk ijọn̄ Sodọm mè Gomora, mè ijọn̄ Adima mè Seboyim, ama echi Okumugwem osabe me uga unaan̄-ejit kan̄ ijijaka isan̄a kpai.

²⁴Ebi otutuuk ido geelek mêkido ibe, ‘Ìre keke orọ mè Okumugwem irọ ojelek inu òkup ikeyi me lek ijọn̄ yi? Ìre keke osa uga uyok uyok unaan̄-ejit keyi inu ni?’

²⁵“Ufọọk-otu mônenire, ‘Îre mije ife chi etelebe inyan̄a-ibot Okumugwem Awaji ebi nte nte kiban̄ onyan̄abe melek kiban̄ mgbọ îsan̄abe ema isibi me Ijipiti.

²⁶Ife chi etetele Okumugwem, mè isi ikitọbọ ebum inyi ofifi awaji, mè ikisi ikwaan̄ inyi ema, awaji echi ema kperarak iriọọn̄, awaji echi Okumugwem ìkanyinyi si ema.

²⁷Îre mije keya ke Okumugwem onaan̄ ejit uyok uyok me lek ijọn̄ yi, mè inida otutuuk ufieek-otu egebe me emen Ikpa yi igwook me lek ijọn̄ yi.

²⁸Okumugwem ìsa me ikpele ijo ejit mè uyok uyok unaan̄-ejit ijibi ema ukot isan̄a me inyọn̄ ijọn̄ kiban̄, mè itọọn̄ ema itaak me ofifi ido, ike îkupbe chereyi.’

²⁹“Inu echi òkup me nlelet ìkup inyi Okumugwem Awaji kiji, ire, inu echi echilibe ibook ìkup inyi eji mè bọn kiji mege ire mgbọ geelek, inyi eji ekọt ekerọ otutuuk inu òkup me emen Ikan yi.