Read obolo Ikan 3 Bible Online

Ikan 3 - obolo bible

Ikan 3

¹“Eji enenigwu ikana inin̄ oniin̄ ekije isi Basan. Ôgu, ogwu ubọọn̄ Basan, melek utut ebi akọn̄ kan̄ enunu inichichini eji, mè initim eji akọn̄ me lek me Ederei.

²Okumugwem onenitumu inyi emi ibe, ‘Ikatet ukpook me lek kan̄, mije, nra ikana ọmọ itap enyi me ubọk, ọmọ mè utut ebi akọn̄ kan̄ cha, mè otutuuk ijọn̄ kan̄. Ìrọ ọmọ inu yaage enyi erọbe Siyon ogwu ubọọn̄ Amọ, òkiluk me Esibon.’

³“Okumugwem Awaji kiji onenikana si Ôgu, ogwu ubọọn̄ Basan, melek otutuuk ebi akọn̄ kan̄ itap eji me ubọk. Eji echochon ema igwook, kpetele kubọk ene ge ikeyi me ògat ugwem.

⁴Me akọn̄ ya, eji mîbọkọ otutuuk ama ile kiban̄ cha. Kpunu kubọk ama ge ikeyi òsisik. Eji mîbọkọ akọp ama ile gweregwen, òrere otutuuk agan̄ Arigobu me emen ido Basan ere Ôgu okikpulu.

⁵Otutuuk ama chi geelek, ewawak ubene ubene mgban ikat ikana, mè itap otunchit esabe nga okwukwut ile itọkọ ikam me lek, inyi inye. Eji mîbọkọ si ogbogbo asabọn ama echi kpewak mgban ikana.

⁶Eji esasa otutuuk ama kiban̄ mè otutuuk ebirieen̄ kiban̄ mè ebibaan̄ kiban̄ mè nsabọn kiban̄ irọ inu oniin̄ akọn̄, ike eji erọbe me lek kè Siyon ogwu ubọọn̄ Esibon.

⁷Ire, eji ekpukpulu anam kiban̄ mè otutuuk inu geelek eji efumbe me emen ama kiban̄ cha inyi lek kiji.

⁸“Me irak akọn̄ ya ke eji ebọkọ ijọn̄ me ubọk ebi ubọọn̄ Amọ iba chi me usaba agan̄ okwaan̄ Jodan agan̄ mbum-ura, ibene me lek iteke ijọn̄ okwaan̄ Anọn isi ire lek ogoon̄ Emọn.

⁹Ogoon̄ Emọn ke ebi Sidọn ekigwen Siriọn, sà ebi Amọ ekigwen Seniri.

¹⁰Eji ebọbọkọ otutuuk ama ile òkup me òla inyọn̄ ogoon̄, mè otutuuk ido Giliadi, mè otutuuk ido Basan mege isi igwook me Saleka mè Ederei, òrere ama ile echi òkup me irak mkpulu kè Ôgu me ido Basan.”

¹¹Ôgu ogwu ubọọn̄ ido Basan ore òta ene òsisik me lek otutuuk ebi Refa, òrere ebi ujọn̄ọ ile cha. Okop esabe ifuun̄ ọmọ, esa okwukwut irọ. Okop ya îjọn̄ọ iraka ejit iba mè agbagba otubọk iba, mè iwele iso ejit ge. Okop ya ọmọ òwa me Raba, ama ebi Amọn, okupbe.

¹²“Me lek ijọn̄ chi eji ebọkọbe me mgbọ ya, nnenisa oke ijọn̄ òkup me ntut agan̄ inyọn̄ ama Aroweri òkup me agba iteke ijọn̄ Anọn, mè okpọkọ ido ogoon̄ ogoon̄ ebi Giliadi, mè ama ile kiban̄, inyi ebi otoko kè Ruben mè ebi otoko kè Gadi.

¹³Okpọkọ ijọn̄ ebi Giliadi òsisik, igbaalek ototuuk ido Basan, ere ogwu ubọọn̄ Ôgu okikpulu, ke nsa inyi okpọkọ ebi otoko kè Manasi.” Ekigwen otuuk agan̄ Arigobu òkup me ido Basan ijọn̄ ebi Refa.

¹⁴Jairi ogwu owot iman kè Manasi otim akọn̄ ibọkọ otutuuk ijọn̄ agan̄ Arigobu, òrere ido Basan, mege isi igwook me oke ijọn̄ ebi Gesuru melek ebi Maaka, mè inisa erieen̄ kan̄ igwen ere ya. Îre mije keya ke ekigwen agan̄ ya Asabọn Ama kè Jairi mege inire chereyi.

¹⁵Ebi otoko kè Makiri ke nsa agan̄ Giliadi inyi.

¹⁶Ebi otoko kè Ruben mè ebi otoko kè Gadi ke nnyi oke ijọn̄ òbene me otubọk agan̄ Giliadi mè inyana isi igwook me eden̄ iteke ijọn̄ okwaan̄ Anọn, òrere oke ijọn̄ ya, mè ilibi inene isi ire iteke ijọn̄ okwaan̄ Jabọk, eyi òkup me oke ijọn̄ ebi Amọn.

¹⁷Okike ijọn̄ ebi otoko ita chi ìbene me lek okwaan̄ Jodan ire lek iteke ijọn̄ Araba me agan̄ ichep-ura, mè ibene me okwaan̄ Galili me agan̄ inyọn̄ iraka isi igwook me lek okwaan̄ Uchi me agan̄ osiki, mè iraka isi ire ebon ogoon̄ Pisiga me agan̄ mbum-ura.

¹⁸“Nneninyi enyi ida ibe, ‘Okumugwem Awaji kinyi îra inyi enyi ijọn̄ yi me ìrot. Ire, otutuuk ebirieen̄ kinyi ebi ìkaan̄ efuuk ititim akọn̄ mêkwaan̄ nroon̄ akọn̄ me lek, mè idasi ije me isi ebi ngwan̄ kinyi, ìrere ebi Ijeren, isa ema isaba okwaan̄ itoon̄.

¹⁹Ire, ebi nwa kinyi mè asa nsabọn kinyi mè anam kinyi mêbia me ama ile cha nnyibe enyi. Nriọọn̄ ibe ke enyi mîkaan̄ anam iwa enenen, ire, enyi mêtele ema nu.

²⁰Enyi mêsa ebi ngwan̄ kinyi ije mege ire mgbọ Okumugwem mônyibe ema utelelek kubọk înyibe enyi, inyi ema mêbọkọbe ijọn̄ ìrot eyi Okumugwem Awaji kinyi obonyi ema me usaba agan̄ okwaan̄ Jodan. Enyi isirọ ikeya isan̄a, enyi geelek mênenigwu ikom ika inu me inyọn̄ ijọn̄ kinyi eyi nnyibe enyi.’

²¹“Me ike mgbọ ya, nneninyi Josuwa ida ibe, ‘Owu ora isa chieen̄ kwun̄ imun̄ otutuuk inu Okumugwem Awaji kinyi orọbe me lek ebi ubọọn̄ iba chi. Ikeya si ke ìborọ me lek otutuuk ebi ubọọn̄ geelek mè ido kiban̄ geelek me ere enyi ebeje iraka.

²²Ikatet ukpook me lek kiban̄ geege, mije, îre Okumugwem Awaji kinyi me lek kan̄ okitim akọn̄ ibot kinyi.’

²³“Mgbọ ya, nneniriaak Okumugwem, mè ibeek ibe,

²⁴‘Jei, Ogwukaan̄-ene Okumugwem, owu obene ikijeen̄ emi gwun̄ usun̄ kwun̄ umin kwun̄ mè unye ubọk kwun̄. Ìre kpasi awaji okup me emen inyọn̄ mè ìre me linyọn̄ keyi ogwu òbokọt ikirọ ojelek inu kechi, mè ikirọ ikpele uyeke ikwaan̄ kechi owu okirọ?

²⁵Soso, nye lek tele ibe emi ǹsaba okwaan̄ Jodan ǹtoon̄, mè ǹsa chieen̄ n̄a m̀mun̄ ata ijọn̄ òkup me usaba agan̄ ya, òrere atalek uja ido ogoon̄ ogoon̄ ya, mè m̀mun̄ si ogoon̄ Lebanọn.’

²⁶“Ire, mije kinyi, Okumugwem onanaan̄ ejit me lek n̄a, ìkachieek iboyaka inọ emi ida. Kpan̄asi ikeya, Okumugwem ìyaka inifọọk emi ibe, ‘Îkem! Kayaka ìkpọk ìsan̄a amọn ìbak ikọ keyi me utọn̄ n̄a.

²⁷Je si nene inyọn̄ ogoon̄ Pisiga, mè kana chieen̄ kpọ agan̄ ichep-ura, mè agan̄ inyọn̄, mè agan̄ osiki, mè agan̄ mbum-ura. Sa chieen̄ kpọ ijọn̄ ya, mè mun̄ ubọk îkupbe, mije, owu òkposaba okwaan̄ Jodan yi.

²⁸Kana ikwaan̄ tap Josuwa me ubọk, mè rọ ọmọ nye, mè tap ọmọ efuuk me owot. Mije, îre ọmọ obosa ife chi isaba okwaan̄ Jodan, mè isa ijọn̄ ya eyi owu obomun̄ inyi ema me ìrot.’

²⁹Ikeya ke eji ebia me iteke ijọn̄ òkup me agba lek Bet Peyọ.”