Read obolo Ikan 31 Bible Online

Ikan 31 - obolo bible

Ikan 31

¹Mosis onenisibi ikeke, mè itumu ikọ kechi inyi otutuuk ebi Ijeren.

²Ìtumu inyi ema ibe, “Mgbọ keyi, emi nra ikan iso efit mè akọp acha iba. Emi m̀kpayaka ikọt ikikpulu enyi ike îgbebe. Okumugwem si îra iwuwuuk lek itumu inyi emi ibe ke emi m̀kpasaba okwaan̄ Jodan yi.

³Okumugwem Awaji kinyi me lek kan̄ oboje me isi kinyi isa enyi isaba okwaan̄ itoon̄, mè ijijaka otutuuk ido chi geelek isan̄a me isi kinyi. Enyi mênenibọkọ ijọn̄ kiban̄ isak. Josuwa ire ogwu òboje me isi kinyi kubọk Okumugwem otumube.

⁴Okumugwem ìborọ ebi ido chi inu yaage îrọbe Siyon mè Ôgu, ebi ubọọn̄ iba ebi Amọ, melek ido kiban̄ echi îjijakabe isan̄a kpai.

⁵Okumugwem ìbokakana ife cha itap enyi me ubọk, inyi enyi erọ ema inu nnyibe enyi ida ibe erọ.

⁶Gaalek ìnye lek, mè ìkat ejit. Ikatet ukpook, ikafieek si owot me isi kiban̄. Mije, îre Okumugwem Awaji kinyi obokije melek kinyi. Ìkposan̄a enyi chieen̄ me lek, ìkpojijit si enyi mgbọ geege.”

⁷Mosis onenigwen Josuwa isibi, mè initumu inyi ọmọ me isi otutuuk ebi Ijeren ibe, “Tet lek nye, mè kat ejit, mije, îre owu obosa ife chi ije isi inin̄ inyọn̄ ijọn̄ ya eyi Okumugwem onyan̄abe ibot inyi ebi nte nte kiban̄ ibe ke ọmọ môsa inyi ema. Îre owu obodọmọ ijọn̄ ya inyi ema me ìrot.

⁸Okumugwem me lek kan̄ ìbokije me isi kwun̄, mè ikup melek kwun̄. Ìkposan̄a owu chieen̄ me lek, ìkpojijit si owu itele mgbọ geege. Eya orọ, katet ukpook, kafefieek si owot.”

⁹Mosis onenige Ikan yi itap me ikpa, mè isa ikana itap me ubọk ebi ngwugwa, ìrere bọn ebirieen̄ kè Libai, ebi ìkiben okop inyan̄a-ibot Okumugwem, ema melek otutuuk ebi ugane Ijeren.

¹⁰Mosis oneninyi ema ida ibe, “Me òta acha jaaba geelek, òrere acha ekifuk urieek ichep, me mgbọ ijọk Uwu Nlak,

¹¹me mgbọ otutuuk ebi Ijeren ekinu me isi Okumugwem Awaji kinyi me ere îgobobe isun̄ inyi Erieen̄ kan̄, enyi mêkifuk Ikan yi isibi inyi otutuuk ebi Ijeren.

¹²Ìgbaan̄ ema otutuuk ene ìtitiin̄, ebirieen̄ mè ebibaan̄ mè asasa nsabọn, mè otutuuk ebi ichen ìkiluk me ama ile kinyi geelek, inyi ema otutuuk enọ Ikan chi, mè ekween̄ ubọk ekitet ukpook me lek Okumugwem Awaji kinyi, mè egbala si chieen̄ ekerọ otutuuk Ikan chi.

¹³Sa me ikeyi, otutuuk bọn owot iman kinyi ìbenu me ukot geelek, ebi kpewuuk lek iriọọn̄ Ikan yi, mênọ, mè ikween̄ si ubọk ekitet ukpook me lek Okumugwem Awaji kinyi otutuuk ujọn̄ọ mgbọ enyi mêlukbe me inyọn̄ ijọn̄ ya eyi enyi ebesaba okwaan̄ Jodan isibọkọ isak.”

¹⁴Okumugwem onenitumu inyi Mosis ibe, “Mgbọ keyi, usen mkpa kwun̄ îra igbet. Eya orọ, gwen Josuwa, mè ọmọ melek kwun̄ enu enekeke me isi Atanga Chinichini, inyi m̀faka ikwaan̄ ǹtap ọmọ me ubọk.” Mosis mè Josuwa enenigbaan̄ ije isi ikeke me isi Atanga Chinichini.

¹⁵Okumugwem onenikana isibi me isi Atanga Chinichini me emen ujọn̄ọ efit oduku inyọn̄. Ujọn̄ọ efit oduku inyọn̄ ya ìkeke me otu isotu Atanga ya.

¹⁶Okumugwem onenitumu inyi Mosis ibe, “Mgbọ keyi, owu mônikwu igọọk ebi nte nte kwun̄. Osikwu inan̄a, ife chi mênenibene ikijijen̄e ikana ikigọọk ofifi awaji echi ebi ido ya, ebi ema ebesi iluk me etete kiban̄, ekitọbọ ebum inyi. Sa me ikeya, ema mênenitele emi, mè ijijaka inyan̄a-ibot eyi nnyan̄abe melek kiban̄.

¹⁷Emi mâneninaan̄ ejit me lek kiban̄ uyok uyok, mè ijit si ema me usen keya. M̀kpayaka inyi ema isi ofifi. Ema mênenikana inorie inyi ebi geelek ìmumun̄ ema. Owuwa uyeke uyeke ufialek mè uyọrọlek mônenikikeme ema, ire lek ema mêkinina lek ibe, ‘Òbe ìkare mije Awaji kiji otelebe eji orọ nke nke inu kechi okinirọ eji ikeyi?’

¹⁸Me atikọ, emi m̀bajijit ema itele, ǹkabayaka itap ubọk inyi ema ofifi, mije ijo inu ema erọbe bak me lek ema etelebe emi, mè ikana isi ikitọbọ ebum inyi ofifi awaji cha.

¹⁹“Eya orọ, ìge okwa keyi ìnyi lek kinyi, mè ìsa ìkijeen̄ otutuuk ebi Ijeren, inyi ema ekekọt. Eyi mônenikana ata-ikọ n̄a ikeme ema.

²⁰Mije, nsisasa ife chi isi itap me inyọn̄ ata ijọn̄ ya òkisibi anam mè mfut uti, eyi nnyan̄abe ibot inyi ebi nte nte kiban̄, mè ema isinirie inorie ijọn̄ ya ijot, mè imiin̄ ufuk, ema mênenikana isi ikitọbọ ebum inyi ofifi awaji, mè ijijaka inyan̄a-ibot nnyan̄abe melek kiban̄.

²¹Mgbọ ya, owuwa uyeke uyeke ufialek mè uyọrọlek isinikikeme ema, okwa keyi mônenikeke ata-ikọ ikeme ema. Bak me lek, bọn owot iman kiban̄ ebekikọkọt okwa yi, kpebewuuk. Mije, emi nriọọn̄ inu òkup ema me ejit mgbọ keyi isan̄a kpai, sabum mbanisasa ema isi igwook me inyọn̄ ijọn̄ ere nnyan̄abe ibot ibe mâsa inyi ema.”

²²Mosis ogege okwa ya usen yaage, mè ijeen̄ otutuuk ebi Ijeren ike ekikọt.

²³Okumugwem oneninyi Josuwa gwun̄ kè Nun ida ibe, “Tet lek nye, mè kat ejit, mije, îre owu obosa ebi Ijeren isi inin̄ inyọn̄ ijọn̄ ya eyi emi nnyan̄abe ibot ibe mâsa inyi ema. Emi mâkup melek kwun̄.”

²⁴Mgbọ Mosis ogebe otutuuk ikọ Ikan chi itap me emen ikpa isan̄a, ibene me adasi isi ire òta,

²⁵inenitumu inyi ebi otoko kè Libai, ebi ìkiben okop inyan̄a-ibot Okumugwem, ibe,

²⁶“Ìbọkọ Ikpa Ikan yi ìsa ìsi ìsun̄ me agba lek okop inyan̄a-ibot Okumugwem Awaji kinyi, inyi ikup me ere ya kubọk inu ata-ikọ ikeme enyi.

²⁷Mije, emi me lek n̄a nriọọn̄ ibe ke enyi ìre ife unye-ibot, mè ire si ebi òkpaka. Ire enyi ikikpaka ibot inyi Okumugwem me chieen̄ n̄a, me mgbọ keyi nkupbe me ògat ugwem me etete kinyi, ìbonikukup mgbọ mâkwube inan̄a itele enyi?

²⁸Ìgwen otutuuk ebi ugane otoko kinyi geelek, mè ìgwen si otutuuk ebi ibot ikwaan̄ kinyi geelek, ìnititiin̄ me isi n̄a, inyi ǹtumu otutuuk ikọ chi geelek ǹtap ema me utọn̄, inyi inyọn̄ mè ijọn̄ egọọk enọ, mè ekeke ata-ikọ ekeme ema.

²⁹Mije, nriọọn̄ ibe, nsikwu inan̄a itele enyi, ke enyi ebekiluk bukubuku ugwem, mè isibi itele oniin̄ nnyibe enyi ida ibe enyi ekeje. Sa me ikeya, ogbogbo uyọrọlek mônenikikeme enyi me òta kan̄. Mije, enyi mêkirọ ijo inu me chieen̄ Okumugwem, mè ikirọ inyi ọmọ ikinaan̄ ejit mije ijo ubọk irọ-inu kinyi.

³⁰“Mosis onenifuk okwa ya îgebe isibi me isi otutuuk ebi Ijeren, ibene me ibebene isi ire òta kan̄: