Read obolo Ikan 6 Bible Online

Ikan 6 - obolo bible

Ikan 6

¹“Echichi ìre ikọ Okumugwem Awaji kinyi otọbe, mè orọmijọn̄ kan̄ mè ikan kan̄ echi îdọmọbe ibe emi ǹjeen̄ enyi, mè enyi ekesun̄ mgbọ enyi isisaba inin̄ inyọn̄ ijọn̄ ya eyi enyi ebesi ibọkọ isak.

²Sa me ikeya, enyi mêkitet ukpook Okumugwem Awaji kinyi, mè ikisun̄ otutuuk orọmijọn̄ chi mè ikọ îtọbe echi emi nkinyi enyi usen geelek me ugwem kinyi, enyi mè bọn kinyi mè bọn bọn kinyi, inyi enyi mêluk ujọn̄ọ ugwem.

³Enyi ebi Ijeren, ìnọ ikan chi, mè ìgbala chieen̄ ìkisun̄, inyi inu ikije ijaan̄ me lek kinyi, inyi enyi emumana enenen me otu ifuk me inyọn̄ ijọn̄ ya, òrere ata ijọn̄ òkisibi anam mè mfut uti, ike Okumugwem Awaji ebi nte nte kinyi otumube.

⁴“Enyi ebi Ijeren, ìnọ! Okumugwem Awaji kiji, Okumugwem ìre ge.[2]

⁵Ìma Okumugwem Awaji kinyi me otutuuk ejit kinyi, mè otutuuk ibot ejit kinyi, mè otutuuk unye kinyi.

⁶Ìtap inu chi geelek nkitumu inyi enyi me emen ejit kinyi.

⁷Ìjeen̄ nsabọn kinyi inu chi, mè ìkitumu ikọ ofolek inu chi mgbọ enyi esikibe ikweek irek me uwu, mè mgbọ enyi ekije me ejit oniin̄, mè mgbọ enyi esikibe ilaak, mè mgbọ enyi enan̄abe ikeke.

⁸Ìtobo inu chi me ubọk kinyi kubọk inu ijejeen̄, ìbọp ema si ìkam me inyọn̄ okwut isi kinyi me agbagba chieen̄ iba kinyi.

⁹Ìge inu chi me ubọk afọn̄ uwu kinyi mè lek otunchit kinyi.

¹⁰“Okumugwem Awaji kinyi môsa enyi isi itap me inyọn̄ ijọn̄ înyan̄abe ibot inyi ebi nte nte kinyi Ebereyam, mè Ajiki, mè Jekọp, ibe ke ọmọ môsa inyi enyi, melek ama ile cha òmimiin̄ mè ijaan̄, eyi enyi kpenama,

¹¹mè ogbogbo uwu echi ata inu ojotbe emen, echi ìkare enyi etap, mè udọn̄ mun̄ echi ikarege enyi erọkọ, mè ogbogbo uko gerep mè uko olifu echi ikarege enyi ewop. Enyi isinirie otutuuk inu chi ijot owot,

¹²ìgbala chieen̄, inyi enyi ekawuuk Okumugwem ogwu òsasan̄a enyi me Ijipiti isibi me irek usun̄.

¹³Ìkitet ukpook me lek Okumugwem Awaji kinyi, mè ìkisi ikwaan̄ ìnyi ọmọ, mè ìkisa erieen̄ kan̄ gaalek ìnyan̄a ibot.

¹⁴Ikakilibi ìkana ìgọọk ofifi awaji geege me etete awaji ebi ìluluk ikana enyi me ere ya.

¹⁵Mije, Okumugwem Awaji kinyi ogwu òkup me etete kinyi ìre Awaji mba-ejit. Ire enyi ikilibi ikana, Okumugwem mônaan̄ ejit uyok uyok inyi enyi, mè ichep enyi isan̄a me inyọn̄ ijọn̄ ya înyibe enyi.

¹⁶Ikatọ Okumugwem Awaji kinyi ìkpọ, kubọk enyi erọbe me Masa.

¹⁷Ìgbala chieen̄ ìkirọ otutuuk ikọ geelek Okumugwem Awaji kinyi otọbe inyi enyi, mè inu geelek îtemebe enyi, mè orọmijọn̄ kan̄, kubọk înyibe enyi ida.

¹⁸Ìkirọ inu ònenen mè inwọn me chieen̄ Okumugwem, inyi inu ije ijaan̄ me lek kinyi, inyi enyi ekọt enin̄ inyọn̄ ata ijọn̄ ya, eyi Okumugwem onyan̄abe ibot isasa inyi ebi nte nte kinyi, ibe ire eyi kiban̄.

¹⁹Enyi mêrieen̄ otutuuk ebi ochicha kinyi cha isibi me inyọn̄ ijọn̄ ya, kubọk Okumugwem otumube ibe ke môrọ.

²⁰“Me mgbọ òkup me isi, bọn kinyi isinido enyi ibe, ‘Nteme cha mè orọmijọn̄ cha mè ikan cha Okumugwem Awaji kiji otọbe ibe enyi ekerọ ìjeje ìjeje?’

²¹Enyi mêfọọk ema ibe, ‘Eji enin̄ usun̄ inyi ogwu Fero me Ijipiti, ire, Okumugwem onenisa me unye ubọk isan̄a eji isibi me Ijipiti.

²²Eji esasa chieen̄ kiji imun̄ otutuuk owuwa inu ukechieen̄ mè uyeke uyeke inu ijejeen̄ òkakaan̄ ukpook mè urimi, echi Okumugwem orọbe me Ijipiti, mè irọ si me lek ogwu Fero mè lek otutuuk ebi ototun̄ ukan̄ kan̄,

²³mè isa me ikeya isan̄a eji isibi me ido ya, inyi ọmọ isa eji inu, mè ininyi eji inyọn̄ ijọn̄ ya eyi înyan̄abe ibot ibe ke ọmọ môsa inyi ebi nte nte kiji.

²⁴Okumugwem oneninyi eji ida ibe eji ekesun̄ otutuuk ikan kechi, mè eketet ukpook me lek kan̄, Okumugwem Awaji kiji, inyi inu ikije ijaan̄ me lek kiji, mè eji efuk ugwem, ike îkupbe cherekeyi.

²⁵Ire eji igwuun̄ chieen̄ ikisun̄ otutuuk ikan chi me isi Okumugwem Awaji kiji, kubọk înyibe eji ida ibe eji ekerọ, eya mônenijeen̄ ibe ke eji ìre ebi ata irọrọ.’