Read obolo Ikan 7 Bible Online

Ikan 7 - obolo bible

Ikan 7

¹“Mgbọ Okumugwem Awaji kinyi môsabe enyi initap me inyọn̄ ijọn̄ ya eyi enyi ebenin̄, môrieen̄ ido jaaba ìwawa igak enyi, mè inye lek enenen si igak enyi, isan̄a me isi kinyi. Ido chi ìre ido ebi Et, mè ebi Girigas, mè ebi Amọ, mè ebi Kenan, mè ebi Pereji, mè ebi Ifi, mè ebi Jebus.

²Okumugwem Awaji kinyi isikana ema itap enyi me ubọk, mè enyi isinitim akọn̄ ikpan̄ ema, enyi ebejijijaka ema isan̄a kpai kubọk inu oniin̄ akọn̄. Ikagọọk ema ìgbaan̄ ìnyan̄a ibot, ikakakaan̄ si ejit nsan me lek kiban̄ kubọk ge.

³Enyi kpebere ugot melek kiban̄. Bọn ebibaan̄ kinyi ekabat bọn ebirieen̄ kiban̄ me lek olom, bọn ebirieen̄ kinyi si ekado bọn ebibaan̄ kiban̄ me lek nwa.

⁴Mije, bọn kiban̄ cha mêrọ inyi bọn kinyi etele emi, mè ekana egọọk ekesi etọbọ ebum enyi ebi kè ofifi awaji. Sa me ikeya, uyok uyok unaan̄-ejit Okumugwem môbubum ichit enyi, mè ichep enyi isan̄a kpai me ikafiatge mgbọ.

⁵Kpan̄asi ikeya, inu enyi eberọ ìre ikeyi: Ìgbugbọ ntook ngwugwa kiban̄ geelek ìgwook, mè ìkpukpuku si ewuuk mfaka kiban̄ cha egwugwuun̄be, mè ìchon otutuuk uti yọk Asera ìgwook.

⁶Mije, enyi ìre ido òkup mbuban isa inyi Okumugwem Awaji kinyi. Okumugwem Awaji kinyi ìgogobo enyi isibi me etete otutuuk ido geelek òkup me linyọn̄ keyi, ibe enyi enere ebi kan̄, òrere ife ìsibi esese ọmọ okaan̄be.

⁷“Ìkare bak me lek enyi ewabe me otu ifuk igak otutuuk ebi ido geelek ke Okumugwem oma enyi, mè igobo si enyi inyi lek kan̄. Mije, îre enyi ese ichit me otu ifuk me etete otutuuk ebi ido geelek.

⁸Îre mije Okumugwem omun̄be enyi me chieen̄, mè iweek si irọrọ inyan̄a-ibot eyi înyan̄abe melek ebi nte nte kinyi iso, orọ îsabe me unye-ubọk kan̄ itaba enyi isibi me ido Ijipiti, ere enyi ekupbe me usun̄, me irak mkpulu ogwu Fero.

⁹Eya orọ, ìriọọn̄ ibe ke Okumugwem Awaji kinyi ore Awaji. Ọmọ ore Awaji ògbegbe utoon̄-ejit, ogwu òkisun̄ inyan̄a-ibot kan̄, mè ikikaan̄ ata ejit me lek ebi ìmun̄ ọmọ me chieen̄ mè ebi ìkirọ ikọ geelek îtọbe, mege ire ukot kiban̄ geelek.

¹⁰Ire, me lek ebi ìchacha ọmọ, ìkikpekpe ema mkpukpe kiban̄ isi mè isi, mè ikijijaka ema isan̄a. Ìkakifiat mgbọ.

¹¹Eya orọ, ìgwuun̄ chieen̄ ìkirọ ikọ îtọbe, mè orọmijọn̄ mè ikan chi geelek nkinyi enyi cherekeyi.

¹²“Ire enyi igban̄ utọn̄ me lek ikan chi, mè igwuun̄ chieen̄ ikisun̄ ikan chi, Okumugwem Awaji kinyi môsun̄ inyan̄a-ibot kan̄ mè ata ejit kan̄ melek kinyi kubọk înyan̄abe ibot inyi ebi nte nte kinyi ibe ke ọmọ môrọ.

¹³Okumugwem môma enyi, mè igbana enyi, mè imumana enyi iwa me otu ifuk. Mônyi enyi ogbogbo nsabọn, mè irọ inyi ijọn̄ kinyi isibi mfut ogbogbo. Akpa kinyi môto owuwa mfut, aya miin̄ kinyi mè aran̄ kinyi ìbokigbugbuk. Bọn eriembuuk kinyi mè bọn arọọn̄ mè ebot kinyi, kpeberiọọn̄ otu ifuk, me inyọn̄ ijọn̄ ya eyi înyan̄abe ibot inyi ebi nte nte kinyi ibe ke ọmọ môsa inyi enyi.

¹⁴Enyi mêre ebi egbanabe igak otutuuk ebi ido geelek. Kpunu ene geege me etete ebirieen̄ kinyi mè ebibaan̄ kinyi òbore òra. Kpunu si anam kinyi geege òbore òra.

¹⁵Okumugwem môsan̄a otutuuk orukan̄ geelek isan̄a enyi me lek. Ìkpotele ibe geege me lek otutuuk ijo orukan̄ cha enyi emun̄be me Ijipiti ifiak enyi. Kpan̄asi ikeya, ìboria orukan̄ cha igwook me lek otutuuk ebi ìchacha enyi.

¹⁶Otutuuk ebi ido geelek Okumugwem Awaji kinyi okanabe itap enyi me ubọk, ìkpakpan̄ ema ìsan̄a kpai. Ikato ema nsan kubọk ge. Ikatọbọ ebum ìnyi awaji kiban̄, mije, eya ìbokana ufe inyi enyi.

¹⁷“Usini mgbọ, enyi mêkitumu me ejit kinyi ibe, ‘Eyi ebi ido chi ewabe igak eji ikeyi, eji ebejeje ikọt irieen̄ ema isibi?’

¹⁸Ikatet ukpook me lek ife cha. Ìriọọn̄ ubọk ìkeek inu Okumugwem Awaji kinyi orọbe ogwu Fero mè otutuuk ebi Ijipiti.

¹⁹Osusut cha echi enyi esabe chieen̄ kinyi imun̄, mè inu ukechieen̄ cha mè uyeke uyeke inu cha echi Okumugwem Awaji kinyi orọbe, mè inisa me unye ubọk melek ikpele unye isan̄a enyi isibi me Ijipiti, Okumugwem Awaji kinyi môrọ si ikeya me lek otutuuk ife chi ebi enyi ekifieek owot me lek mgbọ keyi.

²⁰Ògak ge, Okumugwem Awaji kinyi môria si uwuson igwook me etete kiban̄, inyi ililaba ema mege ire lek, ebi geelek ìsisik me lek kiban̄, ebi ìlilileek, mè ilọ enyi chieen̄ cha, mêkwaan̄be isan̄a kpai.

²¹Ikatet ukpook me lek kiban̄, mije, Okumugwem Awaji kinyi, ogwu òkup me etete kinyi, ìre Awaji òmimin mè ikaan̄ ukpook.

²²Okumugwem Awaji kinyi ìborieen̄ ido chi isan̄a enyi me isi sọnja sọnja. Okumugwem ìkpotele ibe enyi ekọt ekpan̄ otutuuk ebi ife cha esan̄a ugwat ugwat, inyi anam afa ikamumana ìwa ìgak enyi ubọk.

²³Ire, Okumugwem Awaji kinyi môkana ema itap enyi me ubọk, mè itap uga wọlọwọlọ me etete kiban̄ mege enyi mêkpan̄be ema isan̄a kpai.

²⁴Ọmọ môkana ebi ubọọn̄ kiban̄ itap enyi me ubọk, inyi enyi ekpan̄ ema esan̄a, mè ekayaka ìkinọnọ erieen̄ kiban̄ geege me linyọn̄ keyi. Kpunu ene geege òbokọt ikeke ida enyi, mege enyi mêkpan̄be ema otutuuk isan̄a kpai.

²⁵Otutuuk mkpọmfaka awaji kiban̄ cha, enyi ebewọwọp itaka ikọọk me ukan̄. Ikakaan̄ ulọk geege me lek alata araran̄ mè alata okuket òkup me lek mkpọmfaka cha, ikakpukpulu si ìsak, inyi ikakana ufe ìnyi enyi. Mije, ema ìre mbuban inu me lek Okumugwem Awaji kinyi.

²⁶Ikamọnọ mbuban inu geege ìtap me emen uwu kinyi. Ikaan̄ ogwu irọ, ene ya môkana inu oniin̄ akọn̄, kubọk mbuban inu cha orebe. Kpan̄asi ikeya, ìjọ ejit me lek inu cha, mè ìlibi lek kubọk òchichaka inu. Mije, inu cha ìre inu ebejijijaka isan̄a kubọk inu oniin̄ akọn̄.