Read obolo Jọn 10 Bible Online

Jọn 10 - obolo bible

Jọn 10

¹Jisọs onenitumu inyi ema ibe, “Me atikọ, ogwu ibonin̄ ere ekisun̄ arọọn̄, mè itele otunchit, mè isi isaba ikana me ere ikarege oniin̄ inin̄, ene ya ìre ogwu inọ, mè ire si ogwu òkibọkọ ene inu me unye.

²Ire, ogwu òjeje me otunchit inin̄ emen ere îkisun̄ arọọn̄ kan̄, ene ya ore ogwu òkikpukpo arọọn̄ cha me atikọ.

³Ene ya si ke ogwu òkibem ere ya okichili otunchit ya inyi, arọọn̄ cha mîra ikigban̄ utọn̄ me ida kan̄. Ọmọ îra ikigwen arọọn̄ kan̄ cha me erieen̄ me erieen̄, mè ikisa ema ije isibi.

⁴Ọmọ isisan̄a otutuuk arọọn̄ kan̄ cha isibi, îra ikije me isi kiban̄, ema mîra ikije igọọk ọmọ me udun̄, mije, ema mîriọọn̄ ida kan̄.

⁵Ema kpebegọọk ofifi ene. Kpan̄asi ikeya, ema ebelilibi inan̄a, mije, ema kperiọọn̄ ida ofifi ene ya.”

⁶Jisọs ìtumu ikọ yi me urọk. Ire, ife cha kpekọt igobo ikọ îkitumu inyi ema itet.

⁷Eya orọ, Jisọs okpọkpọk itumu inyi ema ibe, “Me atikọ, emi nre otunchit ere ekisun̄ arọọn̄ ya.

⁸Ebi geelek ìdadasi inu me isi n̄a ìre ebi inọ mè ebi ìkibọkọ ene inu me unye. Eya orọ si arọọn̄ cha kpegban̄ utọn̄ me ida kiban̄.

⁹Emi nre otunchit ya. Ogwu geelek òjeje me lek n̄a inin̄, mênyan̄a ene ya isibi. Ene ya môkije inin̄ ere ya, mè ikije isibi, mè ikaan̄ inu geelek òkukup ọmọ me uyọt.

¹⁰Ogwu inọ isinu, ìkibum inin̄ uwu, mè ochiin̄ inu, mè òkpan̄ ene, mè ojijaka inu ogwook. Ire, emi ǹnu, inyi ebi ene enan̄a me lek n̄a ekaan̄ ugwem, mè ekaan̄ ejot egak.

¹¹“Emi nre ata ogwu òkpukpo arọọn̄. Ata ogwu òkpukpo arọọn̄ îbem lek ikwukwu mkpa mije arọọn̄ kan̄.

¹²Ire, ogwu egwegwen me ọkọ ibe inikpukpo arọọn̄, ìkire isimun̄ ibo oron okinu ibonikpan̄ arọọn̄ cha, îra ilibi itele arọọn̄ cha, mije, ìkare ọmọ okaan̄ arọọn̄ cha. Ibo oron ya îra inu inikpan̄ usini arọọn̄ cha, mè iyiyala echi òsisik.

¹³Ene ya ìlibi inan̄a, mije, egwegwen ọmọ me ọkọ. Eya orọ si, arọọn̄ cha ìkakup ọmọ me uyọt.

¹⁴“Emi nre ata ogwu òkpukpo arọọn̄. Emi nriọọn̄ arọọn̄ n̄a, arọọn̄ n̄a si orọriọọn̄ emi.[16]

¹⁵Ike Nte n̄a oriọọn̄be emi, emi nrọriọọn̄ si Nte n̄a, ikeya si ke nriọọn̄ arọọn̄ n̄a, mè ibem lek ikwukwu mkpa mije arọọn̄ n̄a.

¹⁶Nkaan̄ si ofifi owuwa arọọn̄ echi ikakupge me etete urum arọọn̄ kechi, mâtitiin̄ echa si igbaalek. Ema si mêgban̄ utọn̄ me ida n̄a. Mgbọ ya, inu òboyaka inikup ìbore urum arọọn̄ ge mè ogwu òkpukpo arọọn̄ ge.

¹⁷Inu òrọrọ Nte n̄a ima emi ìre ke emi mbem lek iyayaka ugwem n̄a ito, mè ikpọk imọnọ si me mgburudun̄ mgbọ.

¹⁸Kpebesasan̄a ugwem n̄a me unye, îre emi gaalek mbasa me nkeek n̄a iyaka ugwem n̄a ito. Mije, nkaan̄ unye ikakana ugwem n̄a ito, mè ikaan̄ si unye ikpọkpọk imọnọ ugwem ya. Îre Nte n̄a onyi emi unye ibe emi ǹrọ ikeya.”

¹⁹Ikọ ya Jisọs otumube okpọkpọk itap wọlọwọlọ me etete ebi ibot ebi Ju. Ema echeche lek kiban̄ irek iba.

²⁰Owuwa kiban̄ ekekitumu ibe, “Ijo erumun̄ me ibot ene yi. Eya okirama ọmọ iraak. Ikayaka ìgban̄ ikọ îkitumu.”

²¹Ire, usini me lek kiban̄ ekekitumu ibe, “Ikọ îkitumu ìkare ikọ ogwu ijo erumun̄ okupbe me ibot okitumu. Ìre ijo erumun̄ môkọt irọ inyi ogwu ǹnàan̄ imọọn̄ inu?”

²²Inenire mgbọ ebi Ju ekirie ijọk Igwọgwọk Uwu Mbuban, me Jeruselem. Mgbọ ya ìre mgbọ utọọk.

²³Usen ge me emen ijọk ya, Jisọs onenije isi emen ọfọ ge me Uwu Mbuban ekigwen ọfọ kè Solomọn.

²⁴Ebi ibot ebi Ju egbagban ikana ọmọ okokop, me ikido ọmọ ibe, “Ìre owu òbolet eji inu me lek isi ire mgbọ owa? Ire owu ore Karais ya, tumu isi ge nyi eji, inyi ibook eji chieen̄.”

²⁵Jisọs ofọfọọk ema ibe, “Mwuuk lek itumu inyi enyi. Ire, enyi kpechieek. Inu ukechieen̄ echi nkisa me erieen̄ kè Nte n̄a irọ okitumu ogwu nrebe isibi.

²⁶Ire, enyi kpechieek, mije, enyi kpekup me otu ifuk urum arọọn̄ n̄a.

²⁷Arọọn̄ n̄a îkigban̄ utọn̄ me ida n̄a. Emi nriọọn̄ arọọn̄ n̄a, arọọn̄ n̄a okekigọọk emi me udun̄,

²⁸emi nkekinyi ema ugwem ikakaan̄ge itata. Ema si kpebechep, mije, kpunu ogwu òbokọt ibọkọ ema isan̄a emi me ubọk.

²⁹Nte n̄a ogwu òsasa ema inyi emi omin ichit. Eya orọ, kpunu ogwu òbokọt ibọkọ ema isan̄a me ubọk kè Nte n̄a ogwu òkibem ema.

³⁰Mije, emi mè Nte n̄a ìre ge.”

³¹Mgbọ ebi ibot ebi Ju cha enọbe ikọ ya, ema ekpọkpọk iteen̄ ewuuk ibesa itọbọ ọmọ ikpan̄.

³²Ire, Jisọs otutumu inyi ema ibe, “Nsa unye kè Nte n̄a irọ owuwa ikpele ikwaan̄ ukechieen̄ me etete kinyi. Ìre mije eyi owa me lek otutuuk inu cha nrọbe ke enyi ekiweek isasa ewuuk itọbọ emi ikpan̄?”

³³Ife cha efọfọọk ọmọ ibe, “Ìkare mije inu cha geege. Owu otumu mbuban ikọ. Mije, owu, ebilene ikike, okitumu ibe ke owu ìre Awaji.”

³⁴Jisọs ofọfọọk ema ibe, “Ìre kpege me emen Ikpa Ikan kinyi ibe ke Awaji me lek kan̄ îtumu inyi ebilene ibe ke ọmọ ìbe ke enyi ekup kubọk Awaji[17]?

³⁵Otutuuk ene mîriọọn̄ ibe ke inu egebe me Ikpa Mbuban ìre atikọ ire mgbọ geelek. Eya orọ, ire Awaji itumu ibe ke ebilene ikike ebi ọmọ oriabe etip kan̄ ijet ekup kubọk Awaji,

³⁶sà emi ogwu Ogwu Nte ogobobe isibi isun̄ inyi lek kan̄, mè isan̄a iria inu me linyọn̄ ya ye? Ìre enyi ejeje ibe ke emi ntumu mbuban ikọ, mije ntumube ibe ke emi ìre Gwun̄ Awaji?

³⁷Ire ìkare inu Nte n̄a okirọ ke nkirọ, ikachieek me lek n̄a.

³⁸Ire, ire enyi imun̄ ibe ke îre inu Nte n̄a okirọ ke emi nkirọ, ubọk geelek enyi kpechieek me lek n̄a, ìchieek me lek ata-ikọ eyi inu ukechieen̄ cha, inyi enyi ekọt ekween̄, mè egobo etet ibe ke Nte n̄a òwa me emen n̄a okupbe, emi si nkukup me emen kè Nte n̄a.”

³⁹Mije ikọ keyi Jisọs otumube, ife cha ekpọkpọk iweek itetet ọmọ ikpan̄. Ire, ifọfiọọk isibi me ubọk kiban̄, mè inwọnọ.

⁴⁰Jisọs oneninan̄a me ere ya igwu ikom isaba okwaan̄ Jodan isi ikup me ere Jọn ògwook mun̄ okupbe ikigwook ene mun̄ mgbọ îbenebe ikwaan̄ kan̄.

⁴¹Mgbọ Jisọs okupbe me ere ya, owuwa ene enunu me lek kan̄, mè ikitumu ibe, “Me atikọ, ubọk geelek Jọn ìkarọ inu ukechieen̄ geege, otutuuk inu îtumube ibak ogwu enerieen̄ yi ìre atikọ.”

⁴²Owuwa ebi ìnunu me ere ya echechieek me lek kan̄.