Read obolo Jọn 11 Bible Online

Jọn 11 - obolo bible

Jọn 11

¹Me ike mgbọ ya, ogwu enerieen̄ ge, ogwu Betani, ekigwen Lajọrọs, onenifiak orukan̄ enenen. Ogwu enerieen̄ yi îkaan̄ ngwan̄ ebibaan̄ iba ekigwen Meri mè Mata.

²Meri ngwan̄ kè Lajọrọs ogwu lek ikanyege yi ore ogwu òsasa aran̄ utop olu iken Okaan̄-ene Jisọs me ukot, mè isa ijeek ibot kan̄ ituku.

³Ebi ngwan̄ enenwaan̄ iba chi, eneniria etip ijet Jisọs ibe, “Okaan̄-ene, lek ogwu unene kwun̄ ya omabe ìkanye.”

⁴Mgbọ Jisọs obọkọbe etip ya, itutumu ibe, “Orukan̄ yi ìkare eyi mkpa, ìborọ inyi ebi ene emun̄ unye Awaji, mè enyi emi Gwun̄ Awaji itọn̄.”

⁵Jisọs îma ngwan̄ ita chi, ìrere Mata mè Meri mè Lajọrọs, enenen.

⁶Ire, mgbọ îbọkọbe etip orukan̄ kè Lajọrọs, ìkaran lek, mè ìlibi ìsi Betani. Kpan̄asi ikeya, ìbabia me ere îkupbe ya egwe iba itoon̄ me inyọn̄.

⁷Mgbọ egwe iba cha orakabe, inenitumu inyi ebi udun̄ kan̄ ibe, “Eji enegwu ekom esi Judia.”

⁸Ire, ebi udun̄ kan̄ ebebe, “Ogwu Ijejeen̄, ke usen inen keyi ke ebi ibot ebi Ju eweek itetet owu ikpan̄ me Judia. Owu òjeje iboyaka igwu ikom isi ere ya mgbọ keyi?”

⁹Jisọs ofọfọọk ema ibe, “Utoon̄ egwe ìkikup akọp mè mbubak mgbọ iba me usen. Ogwu geelek òkije ije me ejit ikarek ìkakitọbọ ukot me lek inu geege, mije, ìkisa utoon̄ egwe eyi linyọn̄ keyi imọọn̄ inu.

¹⁰Îre ogwu òkije ije me eririeen̄ okitọbọ ukot me lek inu, mije, kpunu utoon̄ îkisa imọọn̄ inu.”

¹¹Mgbọ îtumube ikọ ya isan̄a, inenitumu inyi ebi udun̄ kan̄ ibe, “Lajọrọs ogwu unene kiji îlaak. Ire, mânisi ere ya isi itimi ọmọ me ilaak.”

¹²Ebi udun̄ kan̄ ebebe ọmọ, “Okaan̄-ene, ire Lajọrọs ìkilalaak, lek kan̄ mônye.”

¹³Ikọ ya Jisọs otumube ìsibi ibe ke Lajọrọs îkwu. Ire, ebi udun̄ kan̄ ekeek ibe ke Jisọs ìbe ke Lajọrọs ìkilaak ata ilaak ikike.

¹⁴Eya orọ, Jisọs onenitumu ibook ema chieen̄ ibe, “Lajọrọs îkwu.

¹⁵Ire, mije kinyi, emi mbele ejit ibe ke ǹkakup me ere ya mgbọ îkwube. Eyi môrọ inyi enyi echieek me lek n̄a. Mgbọ yi, eji eneje esi ere îkupbe.”

¹⁶Mgbọ ya, Tọmọs ogwu ekigwen Didimọs (eyi òsisibi bọn m̀gban iba) onenitumu inyi ebi melek kan̄ ibe, “Ìna mè eji egọọk Okaan̄-ene eje. Ire iyaka isibi mkpa, eji egọọk ọmọ èkwu.”

¹⁷Mgbọ ema ejebe isi ire Betani, Jisọs oneniweek iriọọn̄ ibe ke mîra ifufuun̄ Lajọrọs karake egwe ini òraraka.

¹⁸Nan̄a me Betani si re Jeruselem ìkajọn̄ọ ere ìso ewuuk ije iba.

¹⁹Eya orọ, owuwa ebi Ju mînan̄a me Jeruselem inu Betani inigọọk ikat Mata mè Meri ejit, mije ngwan̄ kiban̄ enerieen̄ òkwukwu.

²⁰Mgbọ Mata onọbe ibe ke Jisọs òkinu, inanan̄a ije isibi isi ikweek ọmọ me oniin̄. Ire, Meri obabia me uwu.

²¹Mgbọ Mata ochichinibe Jisọs, ibebe ọmọ, “Okaan̄-ene, mebe owu mokup, ngwan̄ n̄a kpomokwu.

²²Ire, nriọọn̄ ibe, ìrere mgbọ keyi ngwan̄ n̄a okwube iraka, inu geelek owu obeekbe me ubọk Awaji, ke Awaji ìborọrọ inyi owu.”

²³Jisọs obebe ọmọ, “Ngwan̄ kwun̄ môjomo me mkpa.”

²⁴Mata ofọfọọk ibe, “Iin̄, nriọọn̄ ibe ke ngwan̄ n̄a môjomo me mkpa me mgburudun̄ Usen ya.”

²⁵Jisọs otutumu inyi ọmọ ibe, “Emi nre ijojomo me mkpa, mè ire si ugwem. Ene geelek òchechieek me lek n̄a, ìrere ene ya ìkwukwu, môgat ugwem.

²⁶Ofifi si, ene geelek òkup me ugwem mè ichieek me lek n̄a, ene ya ìkpoyaka ikwu.” Itutumu ikeya isan̄a, idodo Mata ibe, “Ìre owu ochieek me lek ikọ yi?”

²⁷Mata ofọfọọk ọmọ ibe, “Iin̄, Okaan̄-ene, nchieek ibe ke owu ore Karais ya, òrere Gwun̄ Awaji, ogwu ekikpọ chieen̄ ibe ìbonu me linyọn̄.”

²⁸Ikọ yi itata Mata me otu, igwugwu ikom ifo uwu, mè isi igwen Meri ogwu ngwan̄ ida ibọkọ, mè itumu inyi ibe, “Ogwu Ijejeen̄ înu, mè ido emi ibe sà owu ye?”

²⁹Mgbọ Meri onọbe ikọ ya, igwagwat lek inan̄a ikeke jîp, mè ilibi isibi igọọk Jisọs me oniin̄.

³⁰Me ike mgbọ ya, Jisọs ìkaninin̄ emen ama ya nu, ìkup si me ere ya Mata ochichinibe ọmọ.

³¹Mgbọ ebi ìkup me uwu ito ya ikikat Meri ejit emun̄be ike Meri onan̄abe ikeke jîp, mè isibi oyet, ema ekikeek ibe ke ìbosi ito ito me ere efuun̄be Lajọrọs. Eya orọ, ema enanan̄a isibi igọọk ọmọ me udun̄.

³²Mgbọ Meri orebe ere Jisọs okupbe, mè imun̄ ọmọ, ibeben lek kan̄ isulu me ijọn̄ me ukot kan̄, mè ibe ọmọ, “Okaan̄-ene, mebe owu mokup, ngwan̄ n̄a enerieen̄ kpomokwu.”

³³Mgbọ Jisọs omun̄be ubọk Meri okito ito, mè imun̄ si ubọk ebi Ju ebi melek Meri enube cha ekigọọk ito ito, îsisik ọmọ lek enenen.

³⁴Inenido ema ibe, “Ìre ere owa ke enyi efuun̄ ogwu enerieen̄ ya?” Ema efọfọọk ọmọ ibe, “Okaan̄-ene, na si kpọ.”

³⁵Jisọs ototo ito.

³⁶Ebi Ju ìkekeke me ere ya ebebe, “Jei, ene yi îmun̄ Lajọrọs me chieen̄ me atikọ.”

³⁷Usini ife cha ekekitumu ibe, “Kè ene yi ogwu òrọrọ mè ogwu ǹnàan̄ imọọn̄ inu okọt orọ si inyi Lajọrọs ikakwu.”

³⁸Mkpa kè Lajọrọs okpọkpọk isisik Jisọs lek enenen, ijeje isi ere efuun̄be Lajọrọs. Îre emen ǹkororok ge ke efuun̄ Lajọrọs, mè isa ikpele ewuuk ichit otu.

³⁹Jisọs oneninyi ida ibe ekpukpọt ewuuk ya esan̄a me otu udọn̄ ya. Ire, Mata ngwan̄ kè Lajọrọs ogwu òkwukwu ya obebe, “Okaan̄-ene, olu nkwukwu ene ya môdun̄u enenen, mije, usen ini ire eya îkupbe me emen udọn̄-ufuun̄.”

⁴⁰Jisọs otutumu inyi Mata ibe, “Ìre ǹkatumu ìnyi owu ibe ire ochieek me lek n̄a, ke owu mômun̄ ujamgbugbo eyi Awaji?”

⁴¹Ikeya ke ema enikpukpọt ewuuk ya isan̄a me otu udọn̄-ufuun̄ ya. Jisọs obebene chieen̄ ikpọ inyọn̄, mè ibe, “Nte n̄a, ntọn̄ owu, mije, owu onọ emi ida.

⁴²Nriọọn̄ ibe ke owu òkekinọ emi ida mgbọ geelek. Ire, ǹkitumu ikọ kechi mije ife chi ìkekeke me ere yi, inyi ema echieek ibe ke îre owu oria emi inu.”

⁴³Jisọs itutumu ikọ ya isan̄a, itataan̄ ukpo itumu ibe, “Lajọrọs, sibi na!”

⁴⁴Mgbọ yaage, Lajọrọs ogwu òkwukwu ya onanan̄a me udọn̄-ufuun̄ ya isibi inu inikeke, melek ekwut okuket esabe ikat ọmọ me lek, bene me ibot re ubọk mè ukot, mè eyi esabe ichit ọmọ isi. Jisọs onyinyi ife cha ida ibe, “Ìtọn̄ọ ekwut-ufuun̄ cha ìsan̄a me lek, inyi ije ifo.”

⁴⁵Owuwa me lek ebi Ju ebi ìgọgọọk Meri inu me ere ya, mè imun̄ inu ya Jisọs orọbe, echechieek me lek kan̄.

⁴⁶Ire, usini kiban̄ egwugwu ikom ifo, mè iben inu ya Jisọs orọbe isi ikpa inyi ebi Farisi.

⁴⁷Mgbọ ebi Farisi mè ebi ibot ngwugwa enọbe inu ya òrọrọ, ema egwegwen ntitiin̄ ebi Oru ebi Ju. Mgbọ ema etitiin̄be, ema ekekido lek kiban̄ ibe, “Mgbọ keyi, ìre keke ke eji ekirọ? Ene yi ìkpọkpọ ikirọ owuwa owuwa inu ukechieen̄ ifo isi.

⁴⁸Ire eji ikpọkpọ iriaan̄ ere ikeyi, mè itele ibe ikirọ inu chi ifo isi, otutuuk ebi kiji mêkana igọọk ọmọ. Sa me ikeyi, ebi Rom mênenigbugbọ Uwu Mbuban kiji, mè ijijaka ido kiji.”

⁴⁹Ene ge me etete kiban̄ ekigwen Keyefas, ogwu òrere ogwu òban Awaji me acha ya onanan̄a ikeke, mè itumu inyi ema ibe, “Enyi kperiọọn̄ inu geege.

⁵⁰Ìre enyi kperiọọn̄ ibe ke mônwọn me lek kinyi ire ene ge ikwu me ibot otutuuk ene, igak otutuuk ido ichechep?”

⁵¹Keyefas ìkakpọkpọ ìkeek ikọ ya ìtumu. Ubọk ọmọ orebe ogwu òban Awaji me acha ya, îre nriran ke îben ibe ke Jisọs môkwu mkpa me ibot otutuuk ido ebi Ju.

⁵²Ìkare me ibot ebi Ju gaalek ke Jisọs obokwu. Ìbokwu si me ibot otutuuk bọn Awaji geelek ìluk me ere geelek me linyọn̄, inyi egbaan̄ ema etitiin̄, mè ema enekana ere otoko ge.

⁵³Mije ikọ ya Keyefas ogwu òban Awaji otumube, ebi ibot ebi Ju ebebene me usen ya ikitọt ubọk ema ebesa itet Jisọs ikpan̄.

⁵⁴Eya orọ, Jisọs ìkayaka ìkọt ìkijijen̄e me etete ebi Ju. Kpan̄asi ikeya, ikpekpebe lek ifo agan̄ emen èwê isi ikup me ama ekigwen Iferem, ọmọ me ebi udun̄ kan̄.

⁵⁵Mgbọ mfaka ebi Ju, òrere ijọk Iraraka ogbetbe, owuwa ebi ene enanan̄a me agan̄ geelek, me ata mgbọ, inu me Jeruselem, inyi ema enekaan̄ irek egwọk lek sabum ijọk ya ònobene.

⁵⁶Ema enenikisa chieen̄ ikpọ ikana ikiweek Jisọs. Mgbọ ema erebe oyet egep Uwu Mbuban, ema ekekidido lek kiban̄ ibe, “Ìre ene yi môkat ejit inu ijọk yi mọnọ? Ìre enyi ekekeek?”

⁵⁷Ire, sabum mgbọ ya, ebi ibot ngwugwa mè ebi Farisi mînyi ida ibe ene geelek òmumun̄ Jisọs me ere geelek, inu inilook ema, inyi ema esi etet ogwugwu.