Read obolo Jọn 12 Bible Online

Jọn 12 - obolo bible

Jọn 12

¹Mgbọ îsikbe usen gweregwen gaalek me lek ijọk Iraraka ya, Jisọs onenire Betani, ama ere Lajọrọs ogwu Jisọs ojomobe me mkpa, olukbe.

²Ema enenitem inorie ijọk inyi Jisọs me usen ya. Mata ore ogwu òkibeben inorie ijet ebi ichen me lek ikasi. Lajọrọs ogọgọọk ebi ichen cha ikweek irek me lek ikasi ya ikirie inorie.

³Meri oneniben òjot òjot iko aran̄ unye otu ewe ge òkidun̄u olu utop utop, isa inibum igwook Jisọs mè ukot, mè isa ijeek ibot kan̄ ituku aran̄ ya me ukot kè Jisọs. Esa inwan̄ ònan̄a me lek uti ekigwen nâdì irọ aran̄ ya, kpewọlọ ofifi inu geege me lek. Olu aran̄ ya okpọkpọk ichit emen uwu ya.

⁴Ire, Judas Isikariọt, ene ge me lek ebi udun̄ kè Jisọs, ogwu ònenileke Jisọs inyi ekpan̄ me mgburudun̄ onenibe,

⁵“Sà ichep keyi ye? Ìre kpemekọt inyam aran̄ yi, mè isa ikpoko ònan̄a me lek iche inyi ebi ugbọọn̄? Otu ifuk ikpoko esabe ilep aran̄ ya ìre efit dinari ita[18].”

⁶Judas ìkatumu ikọ ya mije ebi ugbọọn̄, ìtumu ikọ ya, mije, ọmọ ìre ogwu inọ. Ubọk ọmọ orebe ogwu òkisun̄ akpa ikpoko ebi udun̄ kè Jisọs, îkinween̄ lek itap ubọk me emen akpa ya imọnọ ikpoko isa irọ inu eyi akpalek kan̄.

⁷Jisọs onenitumu inyi ọmọ ibe, “Juuk ogwu enenwaan̄ ya tele, ke îtat ubọk îsun̄be aran̄ yi iban mgbọ mkpa n̄a.

⁸Ebi ugbọọn̄ melek kinyi ekikup mgbọ geelek. Ire, emi m̀kpakup melek kinyi mgbọ geelek.”

⁹Mgbọ ema ekupbe me uwu ya, ogbogbo ebi Ju eweweek iriọọn̄ ibe ke Jisọs òwa me ere ya, mè igbuku inu me ere ya ibenikpọ Jisọs melek Lajọrọs ogwu Jisọs ojomobe me mkpa.

¹⁰Mije keya, ebi ibot ngwugwa etọtọt ibe ke mêkpan̄ si Lajọrọs igbaalek.

¹¹Mije, îre sa me lek kan̄ ke owuwa ebi Ju etele ebi ibot kiban̄, mè ikana igọọk isi ichieek me lek kè Jisọs.

¹²Me ofit iwele kan̄ mgbọ ogbogbo ebi Ju ebi ìnanan̄a inu mije ijọk Iraraka ya enọbe ibe ke Jisọs òkinu me Jeruselem,

¹³ema eteteen̄ nlak ikaan̄ me ubọk, mè igbuku inin̄ oniin̄ isi ichichini ọmọ, mè ibene ikitaan̄ ukpo unwọọn̄ ibe, “Osana! Awaji igbana ogwu ònunu me erieen̄ Okumugwem, Awaji igbana ogwu Ubọọn̄ ebi Ijeren!”[19]

¹⁴Jisọs onenimun̄ gwun̄ inyinya akpan ge, mè inene inyọn̄ isiki ikweek, kubọk egebe me Ikpa Mbuban ibe,

¹⁵“Enyi ebi ama Sayọn, ikatet ukpook. Ìkpọ, ogwu ubọọn̄ kinyi òkinu, ìkilibi me inyọn̄ gwun̄ inyinya akpan inu.”[20]

¹⁶Me mgbọ inu chi okimọnọ irek, ebi udun̄ kè Jisọs kpekọt iriọọn̄ inu îsibibe. Ire, mgbọ Jisọs okwube iraka, mè ijomo me mkpa, mè inene ifo emen inyọn̄, mgbọ ya ke ema enigobo itet ibe ke mîwuuk lek ige otutuuk inu cha ibak Jisọs me emen Ikpa Mbuban, mè igobo itet si ibe ke ebilene mîrọ ọmọ otutuuk inu cha iso, kubọk egebe me emen Ikpa Mbuban.

¹⁷Ebi melek kan̄ ekupbe me Betani ya ekekikpa ikana ere geelek ibe ke Jisọs îgwen Lajọrọs isibi me udọn̄-ufuun̄, mè ijomo ọmọ me mkpa.

¹⁸Mije ukpatu ya ema enọbe, owuwa ene enanan̄a isibi igọọk isi ichichini Jisọs.

¹⁹Mgbọ ebi Farisi emun̄be ubọk ebi ene ekigbuku igọọk Jisọs, usini me lek kiban̄ ekekibe ema, “Ìre enyi erariaan̄ ere? Ìkpọ ubọk otutuuk ebi linyọn̄ ekanabe igọọk ene yi!”

²⁰Îkaan̄ usini ebi Giris ìgọgọọk inu Jeruselem inenitọbọ ebum inyi Awaji me emen ijọk ya.

²¹Ife chi enunu me lek kè Filip ogwu ònan̄a me Betisaida, me agan̄ Galili, mè ibe ọmọ, “Dee, eji ekiweek imumun̄ Jisọs.”

²²Filip osisi itumu inyi Anduru. Anduru melek kan̄ enenigbaan̄ ije isi itumu inyi Jisọs ibe, “Îkaan̄ ebi Giris ìkiweek imumun̄ owu.”

²³Jisọs ofọfọọk ema ibe, “Îkem mgbọ ebi ene ebenyi Gwun̄ Ebilene umin.

²⁴Me atikọ, ǹkitumu inyi enyi ibe, ire kpetap nkwukwuuk akpa me ijọn̄, mè ikwu, ìkibia si me lek nkwukwuuk ge ya gaalek. Ire, isitap nkwukwuuk akpa me ijọn̄, mè ikwu, îra itibi isibi, mè òto owuwa akpa.

²⁵Ikeya si, ene geelek òkibọọk ugwem kan̄ me linyọn̄ keyi ìkpofuk ugwem. Ire, ene geelek ikasage ugwem kan̄ ìgwen inu geege me linyọn̄ keyi, ene ya môkaan̄ ugwem kan̄ ire mgbọ ikakaan̄ge itata.

²⁶Ogwu iweek isisi ikwaan̄ inyi emi, ene ya inu inigọọk emi. Ere geelek mbakup ke ene ya si obokup. Ikeya si, ene geelek òsisi ikwaan̄ inyi emi môkaan̄ umin inan̄a me ubọk kè Nte n̄a.

²⁷“Mgbọ yi, ejit îsisik emi, ǹkariọọn̄ inu mbatumu. Ìre mâbe Nte n̄a inyan̄a emi isibi me emen ufialek òbonu inyi emi mgbọ keyi mọnọ? In̄-in̄, m̀kpatumu, mije, îre bak me lek ufialek òbonu mgbọ keyi ke emi nnu linyọn̄.

²⁸Ute, jeen̄ ebilene umin kwun̄.” Ikọ ya itata ọmọ me otu, ida ge onanan̄a me isinyọn̄ ikitumu ibe, “Nra ijeen̄ ebilene umin n̄a. Mâyaka ikpọk ijeen̄ si igbaalek!”

²⁹Usini ebi ìkeke me ere ya, mè inọ ida ya ebebe ke isinyọn̄ osan̄a amọn. Usini kiban̄ ebebe ke îre ogwu osat ge otumu ikọ inyi Jisọs.

³⁰Ire, Jisọs onenitumu inyi ema ibe, “Ida ya ìtumu ikọ mije kinyi, ìkare mije n̄a.

³¹Mgbọ keyi ore mgbọ ebesibi oyerebet me ibot ebi linyọn̄ keyi. Mgbọ keyi, Awaji môlap ogwu òkikpulu linyọn̄ keyi isan̄a me irek kan̄.

³²Ire emi, mgbọ ebi ene isibene emi ifo inyọn̄ isan̄a me ijọn̄, mâtaba otutuuk ebilene inu me lek n̄a.”

³³Jisọs ìtumu ikọ yi isasa ijeen̄ ojelek mkpa ọmọ obokwu.

³⁴Ebi urum ene cha etutumu inyi ọmọ ibe, “Eji mînọ inan̄a me Ikpa Mbuban ibe ke Karais ìkpokwu.[21] Owu òjeje ibe ke mêbene Gwun̄ Ebilene ifo inyọn̄? Ire ikeya, ìre ekene ore Gwun̄ Ebilene yi?”

³⁵Jisọs onenitumu inyi ema ibe, “Utoon̄ ya môgọọk enyi ikup sọnja inyi isi. Eya orọ, ìkije ije mgbọ enyi ekaan̄be utoon̄ ya, sabum udun ònokana òchit enyi. Mije, ogwu òkije me emen udun ìkakiriọọn̄ agan̄ îkije isi.

³⁶Mgbọ utoon̄ yi okupbe me etete kinyi, ìchieek me lek utoon̄ ya, inyi enyi ekana bọn eyi utoon̄.” Jisọs itutumu ikọ ya isan̄a, ijeje inan̄a me etete ife cha, mè isi ilet inan̄a me chieen̄ kiban̄.

³⁷Ebi ibot ebi Ju kpechieek si me lek kè Jisọs, ubọk geelek Jisọs orọbe owuwa inu ukechieen̄ chi me isi kiban̄.

³⁸Eyi îrọ iso ikọ Asaya ogwu nriran otumube ibe, “Okumugwem, ekene ochieek me lek etip eji elookbe? Sà ìre ekene ke Okumugwem ochili unye kan̄ ijeen̄?”[22]

³⁹Ema kpekọt ichieek si me lek kè Jisọs, kubọk Asaya otumube me ofifi ere ibe,

⁴⁰“Awaji îchit ema chieen̄, mè irọ inyi ejit kiban̄ inye, inyi ema ekakọt ìsa chieen̄ kiban̄ ìmọọn̄ inu, mè ekakọt si ìsa ejit kiban̄ ìgobo inu ìtet, mè ìtet ibot, mè ìgwu ìkom ìnu, inyi ọmọ igwa ema.”[23]

⁴¹Asaya ìtumu ikọ ya, mije, îmun̄ ujamgbugbo kè Jisọs, mè isa me ikeya itumu ikọ ya ibak ọmọ.

⁴²Ubọk geelek si, owuwa ebi ibot ebi Ju mîchieek me lek kan̄ me mgbọ ya. Ire, kpekọt itumu isibi me isi ebi ene ibe ke ema mîchieek me lek kè Jisọs, mije ukpook ibe ke ebi Farisi mêlap ema isibi me uwu ntitiin̄ kiban̄,

⁴³mije, ema mîma ibe ebi ene etọn̄ ema igak eyi Awaji obotọn̄ ema.

⁴⁴Jisọs onenitaan̄ ukpo itumu ibe, “Ogwu geelek òchechieek me lek n̄a, ìkachieek me lek n̄a gaalek. Ire, ene ya ìchieek si me lek ogwu òraria emi inu.

⁴⁵Ogwu imun̄ emi, îmun̄ si ogwu òraria emi inu.

⁴⁶Eyi emi nnube linyọn̄, ǹnu kubọk utoon̄, inyi ene geelek òchechieek me lek n̄a ikayaka ìkup me emen udun.

⁴⁷“Ire, ene geelek ònọnọ ikọ n̄a, mè ijit irọrọ, emi m̀kpasibi ene ya oyerebet me ibot. Mije, emi ǹkanu inenisibi oyerebet me ibot ebi linyọn̄. Kpan̄asi ikeya, ǹnu ineninyan̄a ebi linyọn̄ isibi me emen ijo inu.

⁴⁸“Ire, îkaan̄ ogwu òbosibi oyerebet me ibot ene geelek òjijit emi, mè ijit si ikọ n̄a. Îre ikọ n̄a ya eyi nkitumu obotip ene ya oyerebet me mgburudun̄ Usen ya.

⁴⁹Me atikọ, ǹkakpọkpọ ìkeek ikọ me ejit n̄a ìkitumu. Îre Nte n̄a ogwu òraria emi inu okijeen̄ emi ikọ mbatumu, mè ike mbasa itumu.

⁵⁰Nriọọn̄ ibe ke ikọ chi Nte n̄a okijeen̄ emi okisa ene isi itap me ugwem ikakaan̄ge itata. Eya orọ, kpunu ikọ geege emi nkitumu inyi enyi, eyi ikarege ikọ Nte n̄a obe emi ǹtumu.”