Read obolo Jọn 13 Bible Online

Jọn 13 - obolo bible

Jọn 13

¹Sabum înire usen ijọk Iraraka, Jisọs îriọọn̄ ibe ke îkem mgbọ ọmọ obotele linyọn̄ keyi, mè ifo igọọk ogwu Ute. Bene me ibebene, ọmọ îma ebi ìchechieek me lek kan̄ me linyọn̄ enenen. Eya orọ, me mgbọ keyi, inenichili otutuuk imumechieen̄ kan̄ ijeen̄ ema.

²Me otu ikakwun̄ usen ya, ema enenigbaan̄ ikweek ikirie inorie. Sabum mgbọ ya, Yọk îwuuk lek itap me ejit kè Judas Isikariọt, gwun̄ kè Saimọn, ibe ileke Jisọs inyi ekpan̄.

³Jisọs îriọọn̄ ibe ke Nte kan̄ îkana otutuuk inu itap ọmọ me ubọk, mè iriọọn̄ si ibe ke ọmọ ìnan̄a me lek Awaji inu; ke ọmọ ìboyayaka ifo si igọọk Awaji.

⁴Eya orọ, inanan̄a ikeke me lek ikasi inorie ya, mè iwọọk ofọnti inyọn̄ kan̄ isan̄a, mè imọnọ ekwut ikpo itobo me ebon.

⁵Itotobo ekwut ya me ebon isan̄a, ibeben mun̄ itọkọ igwook me emen okwa, mè ibene ikigwọk ebi udun̄ kan̄ ukot, mè ikitet utọn̄ ekwut ikpo ya isa ikituku mun̄ isan̄a me ukot kiban̄.

⁶Mgbọ îrebe lek kè Saimọn Pita, Saimọn Pita ododo ọmọ ibe, “Okaan̄-ene, ìre owu obonigwọk emi ukot?”

⁷Jisọs ofọfọọk ọmọ ibe, “Owu òkariọọn̄-nu inu nkirọ me mgbọ keyi. Ire, mgbọ isikem, owu môriọọn̄.”

⁸Pita obebe ọmọ, “In̄-in̄, owu òkpogwọk emi ukot.” Jisọs obebe ọmọ, “Îtata ǹgwọgwọk owu ukot, owu melek n̄a kpebeyaka igbaan̄ inu irọ.”

⁹Saimọn Pita obebe ọmọ, “Okaan̄-ene, ire ikeya, ìkare ukot n̄a gaalek ke obogwọk, gwọk ubọk n̄a mè ibot n̄a gbaalek si.”

¹⁰Jisọs ofọfọọk ọmọ ibe, “Ogwu isiken mun̄ isan̄a, îre ukot gaalek ogbe ibe egwọk, mije, otutuuk lek ene ya ìtatana ikup. Ire enyi, enyi etatana ikup. Ubọk geelek, ìkare otutuuk kinyi etana.”

¹¹Jisọs îriọọn̄ ogwu òboleke ọmọ inyi ekpan̄. Eya orọ îtumube ibe ke ìkare otutuuk kiban̄ etana.

¹²Mgbọ îgwọkbe ukot ebi udun̄ kan̄ cha isan̄a, inenimọnọ ofọnti inyọn̄ kan̄ ya itap, mè isi isiki ikweek me irek kan̄, mè inido ema ibe, “Ìre enyi mîtet ibot me lek inu ya nrọbe inyi enyi?

¹³Ike enyi ekigwen emi Ogwu Ijejeen̄ melek Okaan̄-ene, enyi mîgwen itat, mije, ogwu nrebe ire eya.

¹⁴Ire emi Ogwu Ijejeen̄ kinyi mè Okaan̄ kinyi nnigwọk enyi ukot, îgbe ibe ge ikigwọk ge ukot me etete kinyi.

¹⁵Sa me ikeyi, emi nra ijeen̄ enyi inu ikween̄-inu, inyi enyi ekerọ ike emi nrọbe inyi enyi.

¹⁶Me atikọ, ogwu usun̄ ìkakimin ìgak ogwu ute-uwu. Ikeya si, gwun̄ ikwaan̄ ìkakimin ìgak ogwu òraria ọmọ ikwaan̄.

¹⁷Mgbọ keyi enyi eriọọn̄be inu chi, Awaji môgbana enyi, ire enyi ikirọ inu chi.

¹⁸“Ìkare otutuuk kinyi ke ikọ n̄a cha okup inyi. Nriọọn̄ ebi ngobobe. Ire, inu egebe me emen Ikpa Mbuban môrọ iso ike egebe ibe, ‘Ogwu òkigọọk emi igbaan̄ irie inorie îkana ogwu ochicha inyi emi.’[24]

¹⁹Ǹkikpa inu yi inyi enyi me mgbọ keyi inu yi ikarọge-nu, inyi, ikaan̄ mgbọ inu yi isimọnọ irek, enyi mêsa me ikeya ichieek ibe ke Emi Ìre Ogwu Nrebe.

²⁰Me atikọ, ene geelek òbọbọkọ ogwu nriabe inu itap, ìbọkọ emi itap. Ene geelek òbọbọkọ emi itap, ìbọkọ ogwu òraria emi inu itap.”

²¹Mgbọ Jisọs otumube ikọ ya isan̄a, ekwukwu kan̄ osisisik enenen. Itutumu inyi ema ibe, “Me atikọ, ene ge me lek kinyi môleke emi inyi ekpan̄.”

²²Ebi udun̄ kan̄ ebebene ikiriraan̄ chieen̄ ikana, ge ikpọ ge, ge okpọ ge, mije, ema kperiọọn̄ ogwu Jisọs okitumu ikọ ya ibak.

²³Ene ge me lek ebi udun̄ kan̄ cha, ogwu Jisọs omun̄be me chieen̄, ìkweek irek me agba lek kè Jisọs me lek ikasi ya.

²⁴Saimọn Pita onenisa ubọk itọ inyi ogwu enerieen̄ ya ibe ido-nu Jisọs ogwu îkitumu ikọ ya ibak.

²⁵Ogwu enerieen̄ ya oyayaka lek ibieen̄ me lek kè Jisọs, me ido ọmọ ibe, “Okaan̄-ene, ìre ekene ke îre?”

²⁶Jisọs ofọfọọk ibe, “Nsijiin̄ okpọkọ fituru me emen efeek usun̄, ogwu mâsabe inyi ore ene ya.” Inenijiin̄ okpọkọ fituru ya me emen efeek usun̄, mè isa inyi Judas Isikariọt gwun̄ kè Saimọn.

²⁷Mgbọ yaage Judas obọkọbe fituru ya, Setan oninin̄ emen kan̄. Jisọs otutumu inyi ọmọ ibe, “Inu ya oborọ, gwat lek rọ.”

²⁸Ire, kpunu ene geege me lek ebi ìkwekweek me lek ikasi ya òkọkọt iriọọn̄ inu òrọrọ Jisọs otumube ikọ ya inyi Judas.

²⁹Ubọk Judas orebe ogwu òkisun̄ ikpoko kiban̄, usini kiban̄ ekikeek ibe ke Jisọs ìtumu inyi Judas ibe isi ilep inu ema mêsabe igbaalek irie ijọk ya. Usini ene ekikeek ibe ke ìbe isi iche ikpoko inyi ebi ugbọọn̄.

³⁰Mgbọ yaage Judas obọkọbe fituru ya, inanan̄a me uwu ya isibi. Mgbọ ya, egwe îfit.

³¹Mgbọ Judas onan̄abe isibi, Jisọs otutumu inyi ebi udun̄ kan̄ ibe, “Mgbọ yi, ebilene mêmun̄ umin Gwun̄ Ebilene, mè inan̄a me lek kan̄ imun̄ si umin eyi Awaji.

³²Ebi ene isimun̄ umin eyi Awaji inan̄a me lek Gwun̄ Ebilene, Awaji me lek kan̄ môchili umin eyi Gwun̄ Ebilene ijeen̄ ebilene me ikafiatge mgbọ.

³³“Bọn n̄a, m̀bagọọk enyi ikup sọnja mgbọ gaalek. Ike ntumube inyi ebi ibot ebi Ju, ikeya si ke nkitumu inyi enyi mgbọ keyi. Enyi mêweek emi, ire, ere mbasi ikup, enyi kpebekọt inu.

³⁴“Mgbọ keyi, ǹkinyi enyi aya ikan. Ìmun̄ lek kinyi me chieen̄. Ike mmun̄be enyi me chieen̄, enyi si, ìmun̄ lek kinyi me chieen̄.

³⁵Ire enyi imun̄ lek kinyi me chieen̄, otutuuk ene mêsa me ikeyi iriọọn̄ ibe ke enyi ìre ebi udun̄ n̄a me atikọ.”

³⁶Saimọn Pita onenido Jisọs ibe, “Okaan̄-ene, ìre ere owa ke obosi?” Jisọs ofọfọọk ibe, “Ere mbasi, enyi kpebekọt igọọk emi isi mgbọ keyi. Ire, mgbọ isikem, enyi mênu.”

³⁷Pita okpọkpọk ido Jisọs ibe, “Okaan̄-ene, ìre keke orọ emi m̀kpakọtbe igọọk owu ije mgbọ keyi? Mbem lek ikwukwu mkpa mije kwun̄.”

³⁸Jisọs obebe Pita, “Ìre obem lek me atikọ ikwukwu mkpa mije n̄a? Me atikọ, ǹkitumu inyi owu ibe, sabum unọn obosan̄a amọn me eririeen̄ yi, owu môjit emi mgbọ ita.”