Read obolo Jọn 14 Bible Online

Jọn 14 - obolo bible

Jọn 14

¹Jisọs onenitumu inyi ebi udun̄ kan̄ ibe, “Ikachieek ibe ejit isisaak enyi. Ìtoon̄ ejit me lek Awaji, mè ìtoon̄ ejit me lek n̄a si.

²Owuwa agwut òwa me uwu nte n̄a. Ire kpomore ikeya, kè emi ntumu nnyi enyi. Mgbọ yi, mânisi ere ya isi inen̄e irek isun̄ iban enyi.

³Ire nsi inen̄e irek isun̄ inyi enyi isan̄a, mâgwu ikom inu inikpulu enyi, inyi enyi enegọọk emi ekup me ere mbakup.

⁴Enyi mîriọọn̄ oniin̄ ekisa isi ere ya mbasi.”

⁵Tọmọs onenibe ọmọ, “Okaan̄-ene, eji kperiọọn̄ ere owu obosi. Ìre eji ebejeje iriọọn̄ oniin̄ ya?”

⁶Jisọs ofọfọọk ema ibe, “Emi nre oniin̄, mè atikọ, mè ugwem. Kpunu ene geege òbokọt inu me lek Nte n̄a, îtata ìjeje itibi me lek n̄a.

⁷Ire enyi meriọọn̄ emi me atikọ, kè enyi eriọọn̄ Nte n̄a si. Bene me mgbọ keyi, enyi mîriọọn̄ Nte n̄a, mè imun̄ si Nte n̄a.”

⁸Filip onenibe ọmọ, “Okaan̄-ene, jeen̄ eji Ogwu Nte, inyi eji emun̄, mè ijot eji owot.”

⁹Jisọs ofọfọọk ibe, “Filip, ìre owu òkariọọn̄ emi si karake emi melek kinyi ekupbe mege inire chereyi? Ene geelek òmumun̄ emi îmun̄ si Nte n̄a. Ìre keke orọ enyi enibe emi ǹjeen̄ enyi Nte n̄a?

¹⁰Ìre owu òkachieek ibe ke emi ǹkup me emen kè Nte n̄a; ke Nte n̄a ìkup si me emen n̄a? Ikọ chi nkitumu, ìkanan̄a me unye eyi n̄a gaalek. Îre Nte n̄a ogwu òkup me emen n̄a okirọ ikwaan̄ kan̄ sa me lek n̄a.

¹¹Eya orọ, ìchieek ikọ nkitumu ibe ke ǹkup me emen kè Nte n̄a; ke Nte n̄a ìkup si me emen n̄a. Ire enyi kpechieek mije ikọ otu n̄a gaalek, ìchieek mije ikwaan̄ ukechieen̄ chi enyi ekimun̄.

¹²Me atikọ, ǹkitumu inyi enyi ibe ke ene geelek òchechieek me lek n̄a, môrọ inu chi nkirọ, mè irọ igak echi nkirọ, mije, emi mânifo igọọk Nte n̄a.

¹³Inu geelek enyi mêbeekbe me erieen̄ n̄a, mârọ inyi enyi, inyi ebi ene ekenyi Nte n̄a umin sa me lek inu emi ogwu Gwun̄ nrọbe.

¹⁴Ire enyi ibeek inu geelek me erieen̄ n̄a, emi mârọ inyi enyi.

¹⁵Ire enyi ima emi, enyi mêkisun̄ ikan nnyibe enyi.

¹⁶“Mâbeek Nte n̄a ibe iria ofifi ogwu ukarajit ijet enyi inyi inigọọk enyi ikup ire mgbọ ikakaan̄ge itata.

¹⁷Ogwu Nteme yi ìre Ekwukwu Awaji, ogwu òkijeen̄ ene atikọ. Ebi linyọn̄ kpebekọt ibọkọ Ogwu Nteme yi itap, mije, ema kpebemun̄ ọmọ, kpeberọriọọn̄ si ọmọ. Ire, enyi mêriọọn̄ ọmọ, mije, ọmọ ìbokup melek kinyi, mè iluk si me emen kinyi.

¹⁸Emi m̀kpatele enyi kubọk bọn kpà-nte, mâgwu ikom inu me lek kinyi.

¹⁹Sọnja mgbọ isiraka, ebi linyọn̄ kpebeyaka imun̄ emi ofifi. Ire, enyi mêmun̄ emi. Mije emi nkupbe me ugwem, enyi si mêkup me ugwem.

²⁰Me usen ya, mgbọ Ekwukwu Awaji mônube, enyi mêriọọn̄ ibe ke emi ǹkup me emen kè Nte n̄a, enyi ekukup me emen n̄a, emi nkukup si me emen kinyi.

²¹Ogwu geelek òbọbọkọ ikọ n̄a itap, mè ikirọ ikọ cha, ogwugwa ore ogwu òmumun̄ emi me chieen̄. Ogwu geelek òmumun̄ emi me chieen̄, Nte n̄a mômun̄ ene ya me chieen̄. Emi si mâmun̄ ene ya me chieen̄, mè isa lek n̄a ijeen̄ ene ya.”

²²Judas (ìkare Judas Isikariọt) onenido Jisọs ibe, “Okaan̄-ene, ìre keke orọ obosa lek kwun̄ ijeen̄ eji gaalek, mè itele ebi linyọn̄?”

²³Jisọs ofọfọọk ibe, “Ogwu ima emi, ene ya môkirọ ikọ n̄a. Nte n̄a môma ene ya. Emi melek Nte n̄a si mênu inigọọk ene ya iluk ibia.

²⁴Ogwu ikamage emi, ene ya ìkporọ ikọ n̄a. Ikọ chi enyi ekinọ emi nkitumu, ìkare emi me lek n̄a nkitumu, îre ikọ Nte n̄a ogwu òraria emi inu obe emi ǹtumu ke nkitumu.

²⁵Ntumu ikọ chi otutuuk inyi enyi me mgbọ keyi emi melek kinyi ekupbe.

²⁶“Ire, Ogwu Nteme, òrere Ekwukwu Mbuban ogwu Nte n̄a môriabe inu me erieen̄ n̄a, môjeen̄ enyi otutuuk inu, mè ikeek si enyi otutuuk inu ntumube inyi enyi.

²⁷Esuuk ke ntele ibe ikup melek kinyi. Esuuk n̄a ke nnyi enyi, ìkare ojelek esuuk eyi ebi linyọn̄ ekinyi ke emi nnyi enyi. Ikasisaak ejit kinyi, ikatet si ukpook.

²⁸“Enyi mîra inọ emi ntumube inyi enyi ibe ke mâninan̄a itele enyi. Ire, mâyaka igwu ikom inu me lek kinyi. Ire enyi imun̄ emi me chieen̄, enyi mêbele ejit ibe ke emi mânifo igọọk Nte n̄a, mije, Nte n̄a îmin igak emi.

²⁹Nra itumu inu chi inyi enyi me mgbọ keyi ema kperọrọ-nu, inyi mgbọ ema isinirọ iso, enyi mênenichieek ikọ n̄a.

³⁰Mgbọ keyi, m̀kpayaka itumu owuwa ikọ melek kinyi, mije, ogwu òkikpulu linyọn̄ keyi òkinu. Ogwu òkikpulu linyọn̄ yi ìkakaan̄ unye me lek n̄a kubọk ge.

³¹Ire, ǹkiweek ibe ebi linyọn̄ eriọọn̄ ibe ke emi mma Nte n̄a, mè ikirọ otutuuk inu geelek ike Nte n̄a obe emi ǹrọ. Mgbọ yi, ìnan̄a ìkeke mè eji eneje enan̄a me ere keyi.”