Read obolo Jọn 15 Bible Online

Jọn 15 - obolo bible

Jọn 15

¹Jisọs onenitumu inyi ebi udun̄ kan̄ ibe, “Emi nre atata olik gerep, Nte n̄a ore ogwu òkikpọ chieen̄ me lek uko gerep ya.

²Agọọk geelek òkup me lek n̄a, mè ìkato mfut, Nte n̄a îra ikisọp ifiin̄. Ire, agọọk geelek òtoto mfut, Nte n̄a îra ikikpaan̄ lek ijaan̄, inyi ikito owuwa mfut.

³Ire enyi, enyi mîtana isan̄a sa me lek ikọ ntumube inyi enyi.

⁴Ìkup me emen n̄a, ke emi mâkup si me emen kinyi. Ike agọọk geege ìkpokọt ito mfut me lek kan̄ gaalek îtata ìkukup me lek olik gerep ya, ikeya si, enyi kpebekọt ito mfut geege me lek kinyi, îtata enyi ekukup me emen n̄a.

⁵Emi nre olik gerep ya, sà enyi ere otu agọọk. Ire ene ikup me emen n̄a, emi nkukup me emen ene ya, ene ya môto owuwa mfut. Isan̄a me lek n̄a, enyi kpebekọt irọ inu geege.

⁶Ene geelek ikakupge me emen n̄a, ene ya ìkup kubọk otu agọọk efieekbe itọp ifiin̄, ikukup ichiaak. Ojelek otu agọọk òchachiaak ikeya, ekikpukpulu itap me ukan̄, mè iwọp itaka iriọk.

⁷Ire enyi ikup me emen n̄a, mè ikọ n̄a ikup me emen kinyi, ìbeek inu geelek òkup enyi me uyọt, ke mêrọ inyi enyi.

⁸Ire enyi ito owuwa mfut, ebi ene mêmun̄ ibe ke enyi ìre ebi udun̄ n̄a, mè isa me ikeya inyi Nte n̄a umin.

⁹“Ike Nte n̄a omun̄be emi me chieen̄, ikeya si ke emi mmun̄ enyi me chieen̄. Eya orọ, ìkup me emen imumechieen̄ n̄a.

¹⁰Ire enyi ikirọ ikọ n̄a, enyi mêkup me emen imumechieen̄ n̄a, kubọk emi nrọbe ikọ kè Nte n̄a, mè ikup me emen imumechieen̄ kè Nte n̄a.

¹¹Ǹkitumu ikọ yi inyi enyi, inyi unwọọn̄ nkaan̄be ikup me emen kinyi, kubọk îkupbe me emen n̄a, mè unwọọn̄ kinyi ijot.

¹²Ikan nnyibe enyi ìre ikeyi: Ìmun̄ lek kinyi me chieen̄, kubọk emi mmun̄be enyi me chieen̄.

¹³Imumechieen̄ òmimin ichit, eyi ene môkọtbe ikaan̄ me lek ebi unene kan̄ ìre ene ya isasa lek kan̄ inyi ibe ekpan̄ mije ebi unene kan̄. Kpunu ofifi imumechieen̄ òmimin igak ikeya.

¹⁴Ire enyi ikirọ ikọ n̄a, enyi ìre ebi unene n̄a.

¹⁵Mgbọ keyi, ǹkayaka ìgwen enyi ebi usun̄, mije, ogwu usun̄ ìkakiriọọn̄ inu ogwu nte uwu kan̄ okirọ. Kpan̄asi ikeya, ǹkigwen enyi ebi unene n̄a, mije, mkpa inu geelek nkween̄be me ubọk kè Nte n̄a inyi enyi.

¹⁶“Ìkare enyi egobo emi. Îre emi ngobo enyi, ibe enyi esi erọ ata ikwaan̄ eyi òbofufuk. Enyi isirọ ikeya, Nte n̄a mônyi enyi inu geelek enyi mêbeekbe me erieen̄ n̄a.

¹⁷Eya orọ, ikan nnyibe enyi ìre ikeyi: Ìmun̄ lek kinyi me chieen̄.

¹⁸“Ire ebi linyọn̄ icha enyi, ikawuuk ibe ke ebi linyọn̄ mîdasi icha emi.

¹⁹Mebe enyi ìre ebi linyọn̄, kè ebi linyọn̄ èma enyi kubọk ebi kiban̄. Ire, enyi kpere ebi linyọn̄, mije, ǹgogobo enyi isibi me linyọn̄. Îre eya orọ mè ebi linyọn̄ echa enyi.

²⁰Ikawuuk ikọ ntumube inyi enyi ibe ke ogwu usun̄ ìkakimin ìgak ogwu ute-uwu.[25] Ire ebi linyọn̄ itutuku emi, mêtutuku enyi si. Ire ema ibọkọ inu njeen̄be ema itap, mêbọkọ si eyi enyi mêjeen̄be ema itap.

²¹Ebi linyọn̄ eberọ enyi otutuuk inu chi bak me lek enyi erebe ebi n̄a, mije, ema cha kperiọọn̄ Awaji ogwu òraria emi inu.

²²Mebe emi ǹkanu ìnitumu ikọ ìnyi ema, kpemetip ema oyerebet mije ijo inu. Ire, mgbọ keyi nnube initumu ikọ inyi ema, kpunu inu ema ebesa ikwek lek kiban̄, ire ema ikirọ ijo inu ifo isi.

²³“Ogwu icha emi, îcha si Nte n̄a.

²⁴Mebe ǹkarọ ikwaan̄ ukechieen̄ echi ene geege ikarakge ìrọ me etete kiban̄, kpemetip ema oyerebet mije ijo inu. Ire, mgbọ keyi, ubọk geelek otutuuk kiban̄ esabe chieen̄ imun̄ ikwaan̄ ukechieen̄ nrọbe, ema mîcha emi, mè icha si Nte n̄a igbaalek.

²⁵Ire, otutuuk inu chi ìkirọ iso inu egebe me Ikpa Ikan kiban̄ ibe, “ ‘Ema mîcha emi me nkarọge ijo inu geege.’[26]

²⁶“Ire, Ogwu Nteme ya òrere Ekwukwu òkijeen̄ ene atikọ, ogwu mâriabe inan̄a me agba lek kè Nte n̄a ijet enyi mônu. Isinu, môrọ inyi enyi eriọọn̄ ogwu emi nrebe.

²⁷Ire, enyi me lek kinyi si, mêtumu ogwu emi nrebe isibi inyi ebi ene, mije, enyi mîgọọk emi ikup bene me ibebene.”