Read obolo Jọn 16 Bible Online

Jọn 16 - obolo bible

Jọn 16

¹“Ǹkitumu otutuuk ikọ chi inyi enyi, inyi enyi ekanan̄a ìrọn̄.

²Mije, ebi ibot ebi Ju mêlap enyi isibi me uwu ntitiin̄ kiban̄. Me atikọ, mgbọ òkinu mgbọ ebi ene mêkpan̄be enyi, mè ikeek ibe ke ata ikwaan̄ ire eya ema ekirọ inyi Awaji.

³Ema eberọ enyi inu chi, mije, ema kperiọọn̄ Nte n̄a, kperiọọn̄ emi si.

⁴Nra itumu inu chi inyi enyi, inyi, mgbọ inu chi isinirọ iso, enyi mêkeek ibe ke emi mwuuk lek itaba enyi ubọk me utọn̄. Ǹkatumu ikọ chi ìnyi enyi bene me ibebene, mije, emi melek kinyi ekup.

⁵“Mgbọ keyi, mânigwu ikom ifo igọọk ogwu òraria emi inu. Ire, kpunu ene geege me lek kinyi òdodo emi ibe ìre emi m̀basi owa?

⁶Kpan̄asi ikeya, enyi ekifieek ejit mije ikọ chi ntumube inyi enyi.

⁷“Ire, ǹkitumu atikọ inyi enyi, ifofo n̄a ìbosa nnwọn ijet enyi. Mije, ire ǹkanan̄a ìfo, Ogwu Nteme ya ìkponu inigọọk enyi ikup. Ire, ire nnan̄a ifo, mâria ọmọ ijet enyi.

⁸Isinu, mônirọ inyi ebi linyọn̄ eriọọn̄ inu ofolek ijo inu, mè ata irọrọ, mè oyerebet eyi Awaji obosibi me ibot ebilene.

⁹Òfo me lek ijo inu, môrọ inyi ebi linyọn̄ eriọọn̄ ibe ke ema mîrọ ijo inu, mije ema ekachieekge me lek n̄a.

¹⁰Òfo me lek ata irọrọ, môrọ inyi ebi linyọn̄ eriọọn̄ ibe ke emi ìre ogwu ata irọrọ sa me lek ifofo eyi mbafo igọọk Nte n̄a me ere enyi kpebeyaka imun̄ emi ofifi.

¹¹Òfo me lek oyerebet, môrọ inyi ebi linyọn̄ eriọọn̄ ibe ke Awaji môsibi oyerebet me ibot kiban̄, mije, Awaji îwuuk lek itip ogwu òkikpulu linyọn̄ keyi oyerebet.

¹²“Îkaan̄ owuwa inu matumube inyi enyi. Ire, enyi kpebekọt igobo otutuuk itet me mgbọ keyi.

¹³Mgbọ Ekwukwu òkijeen̄ ene atikọ ya isinu, môjeen̄ enyi otutuuk atikọ. Ìkpotumu ikọ eyi ibot kan̄. Îre ikọ înọbe ke ìbotumu. Môtumu si inu òborọ me mgbọ òkup me isi inyi enyi.

¹⁴Môrọ si inyi ebi ene enyi emi Gwun̄ Awaji umin, mije, inu geelek ìbonichili ijeen̄ enyi ìbonan̄a me ubọk n̄a.

¹⁵Otutuuk inu geelek Nte n̄a okaan̄be ìre echi n̄a. Eya orọ ntumube ibe ke inu geelek Ekwukwu òkijeen̄ ene atikọ ya obochili ijeen̄ enyi ìre inu ònan̄a me ubọk n̄a.

¹⁶“Sọnja mgbọ isiraka, enyi kpebeyaka imun̄ emi. Ire, sọnja mgbọ isiyaka iniraka, enyi mêyaka imun̄ emi.”

¹⁷Usini ebi udun̄ kan̄ ekekidido lek kiban̄ ibe, “Ìre kpasi ikọ ke îkitumu ikeyi ibe, ‘Sọnja mgbọ enyi kpebeyaka imun̄ emi ofifi. Sọnja mgbọ isiyaka iniraka, enyi mêyaka imun̄ emi, mije, m̀basi lek Nte n̄a’?”

¹⁸Ema ekpọkpọ ikidido lek kiban̄ ibe, “Ìre sọnja mgbọ ya îtumube ìsibi keke? Ikọ cha îkitumu, eji kpekọt igobo itet.”

¹⁹Jisọs orọriọọn̄ ibe ke ema ekiweek idodo ọmọ ikọ òfo me lek ikọ ya, mè inido ema ibe, “Ìre enyi ekido lek kinyi ikọ ofolek ikọ ya ntumube ibe, ‘Sọnja mgbọ, enyi kpebeyaka imun̄ emi, sọnja mgbọ si isiyaka iniraka, enyi mêyaka imun̄ emi’?

²⁰Me atikọ, ǹkitumu inyi enyi ibe, mgbọ enyi ebekito ito, mè ikifieek ejit, îre mgbọ keya ke ebi linyọn̄ ebekinwọọn̄ unwọọn̄. Enyi mêkup me ufieejit, ire, ufieejit kinyi môkana unwọọn̄.

²¹Ìkup kubọk enenwaan̄ òboman gwun̄. Ogwu enenwaan̄ ya ìkifieek owot ufiak uman, mije, mgbọ kan̄ îkem. Ire, isiman gwun̄ ya ito, îra iwuuk otutuuk ujat cha, mije unwọọn̄ ibe ke ọmọ îman aya gwun̄ isibi me linyọn̄.

²²Ikeya si ke îkup me lek kinyi. Mgbọ keyi ìre mgbọ ufieejit inyi enyi. Ire, mâyaka ikpọk imun̄ enyi. Mgbọ ya, enyi mênwọọn̄ unwọọn̄, kpunu ene geege òbobọkọ enyi unwọọn̄ kinyi.

²³Me usen ya si, enyi kpebeyaka ido emi inu geege. Me atikọ, ǹkitumu inyi enyi ibe, inu geelek enyi mêbeekbe me erieen̄ n̄a, Nte n̄a môrọ inyi enyi.

²⁴Mege inire mgbọ keyi, enyi kpebeek emi inu geege me erieen̄ n̄a. Ìbeek, ke mênyi enyi, inyi unwọọn̄ kinyi ijot.

²⁵“Mgbọ keyi, ǹkitumu ikọ me urọk inyi enyi. Ire, mgbọ òkinu mgbọ m̀kpayaka ikitumu ikọ me urọk inyi enyi. Mgbọ ya, m̀bakitutumu ikọ ofolek kè Nte n̄a ichili ibook isi ge inyi enyi.

²⁶Me Usen ya, îre enyi me lek kinyi ebebeek Nte n̄a inu me erieen̄ n̄a, ìkare emi mbabeek inu me ibot kinyi.

²⁷Iin̄, Nte n̄a îmun̄ enyi me chieen̄ enenen, mije enyi emun̄be emi Gwun̄ Awaji me chieen̄, mè ichieek si ibe ke emi ǹnan̄a me agba lek Awaji inu.

²⁸Emi ǹnan̄a me agba lek Nte n̄a inu me linyọn̄. Mgbọ keyi, mâniyaka igwu ikom inan̄a me linyọn̄ ifo igọọk Nte n̄a.”

²⁹Ebi udun̄ kan̄ enenitumu inyi ọmọ ibe, “Mgbọ keyi, înwọn eji me lek, mije, obene ikitumu ikọ ichili, òkayaka ìtumu ikọ geege me urọk.

³⁰Mgbọ keyi, eji mîmun̄ ibe ke owu oriọọn̄ inu geelek, mè iriọọn̄ si otutuuk idodo geelek ebi ene ekaan̄be me emen ejit kiban̄. Eya orọ, eji mîchieek ibe ke owu ònan̄a me agba lek Awaji inu me atikọ.”

³¹Jisọs obebe ema, “Ìre enyi mîtolek inichieek mgbọ keyi?

³²Ire, mgbọ òkinu, mgbọ ya îra irere isan̄a, mgbọ mêyiyalabe enyi, ogwu ikup ofo uwu kan̄. Mgbọ ya, enyi mêyat itele emi. Ire, emi m̀kpakup emi gaalek, mije, Nte n̄a môkup melek n̄a.

³³“Eya orọ, ǹkitumu ikọ chi inyi enyi, inyi enyi ekup melek n̄a, mè ekaan̄ esuuk, mije, enyi mêmun̄ ufialek me linyọn̄ keyi. Ire, ìkat ejit, mije, emi nra itim ikpan̄ linyọn̄.”