Read obolo Jọn 18 Bible Online

Jọn 18 - obolo bible

Jọn 18

¹Mgbọ Jisọs oriaakbe uriaak ya isan̄a, ọmọ mè ebi udun̄ kan̄ enanan̄a me ere ya ije isaba iteke Kidọrọn, isi inin̄ emen uko ge ewopbe uti olifu me emen me usaba agan̄ ya.

²Judas ogwu òleleke Jisọs inyi ekpan̄ îriọọn̄ si ere ya, mije, Jisọs mè ebi udun̄ kan̄ mîwuuk lek ikisi ere ya isi isiki efuuk.

³Mgbọ Jisọs mè ebi udun̄ kan̄ ekupbe me ere ya, Judas osasa urum ebi akọn̄ mè usini ebi ìkibem Uwu Mbuban, ebi ebi ibot ngwugwa mè ebi Farisi eriabe ibe enetet Jisọs, igbaalek ije inu me ere ya. Otutuuk ife cha mîkaan̄ ukan̄ nlak, mè mkpukan̄, mè nroon̄ akọn̄ me ubọk isa inu.

⁴Jisọs orọriọọn̄ otutuuk inu òbosibi inyi ọmọ mgbọ ya, mè inan̄a me etete ebi melek kan̄ isibi ije isi ikweek ife cha, mè ido ema ibe, “Ìre ekene ke enyi ekiweek?”

⁵Ema efọfọọk ibe ke ema ekiweek Jisọs ogwu Najeret. Jisọs obebe ema, “Emi ire ene ya.” Judas ogwu òboleke Jisọs inyi ekpan̄ òwa si melek ife cha okekebe.

⁶Mgbọ Jisọs otumube inyi ema ibe, “Emi ire ene ya,” ema eririki, mè itọp lek inyi udun̄, mè irurọn̄ọ me ijọn̄.

⁷Jisọs okpọkpọk ido ema ibe, “Ìre ekene ke enyi ekiweek?” Ema efọfọọk ibe ke ema ekiweek Jisọs ogwu Najeret.

⁸Jisọs ofọfọọk ema ibe, “Ntumu inyi enyi ibe ke emi nre ene ya. Ire emi ke enyi ekiweek, ìtet emi, mè ìtele ebi melek n̄a chi, mè efon.”

⁹Ikọ yi onenirọ iso ikọ Jisọs otumube inyi ogwu Ute ibe, “Otutuuk ebi owu onyibe emi, kpunu ene geege ògagak emi ichep.”[28]

¹⁰Mgbọ ya, Saimọn Pita owọwọọk oge akọn̄ kan̄ isibi, mè ikep gwun̄ uwu ogwu òban Awaji utọn̄ agan̄ ulom ifieek. Erieen̄ ogwu enerieen̄ ya ìre Malikọs.

¹¹Jisọs ogagana inyi Pita ibe, “Ben oge akọn̄ kwun̄ tap me emen ogan. Ìre òkaweek ibe emi ǹnwọ inu ònan̄a me emen ekpen̄ ufialek eyi Nte n̄a obe emi ǹnwọ?”

¹²Ebi akọn̄ cha melek ogwu ibot kiban̄, mè ebi ìkibem Uwu Mbuban etetet Jisọs ibọp,

¹³mè isa ọmọ idasi inu me isi kè Anas ogwu nte nwa kè Keyefas ogwu òban Awaji me acha ya.

¹⁴Keyefas yi ore ogwu òtutumu inyi ebi Ju ibe ke mônwọn ibe ene ge ikwu mkpa me ibot otutuuk ene.

¹⁵Saimọn Pita mè ofifi ogwu udun̄ kè Jisọs ekekije igọọk Jisọs me udun̄. Mije ogwu òban Awaji oriọọn̄be ogwu udun̄ kè Jisọs keyilọ ya isi, etetele inyi ogwugwa ije iraka inin̄ emen oyet egep ya igọọk Jisọs.

¹⁶Ire, Pita okekeke me otunchit me oyet. Ogwu udun̄ kè Jisọs ogwu ogwu òban Awaji oriọọn̄be isi ya onenisi itumu ikọ melek gwun̄ enenwaan̄ òkibem otunchit ya, mè isa Pita iraka inin̄ emen oyet egep ya.

¹⁷Gwun̄ enenwaan̄ òkibem otunchit ya onenitumu inyi Pita ibe, “Me atikọ, owu ìre ene ge me lek ebi udun̄ ene yi.” Pita ofọfọọk ibe, “Emi ǹkare!”

¹⁸Ebi ìkisi ikwaan̄ me oyet egep ya, mè ebi ìkibem ere mîsọk ukan̄ me oyet egep ya, mije utọọk, mè ikeke ikana ukan̄ ya ikigwele. Pita ogọgọọk ema ikeke me ere ya ikigwele ukan̄ ya.

¹⁹Otutuuk mgbọ ya, ogwu òban Awaji okekido Jisọs ikọ ofolek ebi udun̄ kan̄ mè ijejeen̄ kan̄.

²⁰Jisọs ofọfọọk ibe, “Emi ǹkatumu ikọ geege me nlelet. Ikọ geelek ntumube, îre me isi ogbogbo ene ke ntumu. Njeen̄ inu me uwu ntitiin̄ me uwu ntitiin̄, mè ijeen̄ si inu me Uwu Mbuban ere otutuuk ebi Ju enikititiin̄.

²¹Ìre keke orọ okido emi ikọ? Gwen ebi ìnọnọ ikọ ntumube do. Mije, ìkakaan̄ ogwu melek kiban̄ ikariọọn̄ge inu ntumube.”

²²Jisọs itutumu ikeya, ene ge me lek ebi ìkibem Uwu Mbuban, ogwu òkeke iriaak me ere ya otatap ọmọ ada me isi, mè igana inyi ọmọ ibe, “Ìre ikeya ke okitumu ikọ inyi ogwu òban Awaji?”

²³Jisọs otutumu inyi ogwu ene ya ibe, “Ire ntumu ikọ ilọ, îgbe ibe owu òsan̄a amọn me lek. Ire, ire ntumu atikọ, ìre keke orọ mè owu òsulu emi?”

²⁴Anas oneniria Jisọs ikeya, melek olik cha esabe ibọp ọmọ, ijet Keyefas ogwu òban Awaji.

²⁵Mgbọ Saimọn Pita okekebe me ere ya ikigọọk igwele ukan̄, usini ebi ìkup me ere ya enenido ọmọ ibe, “Ìre owu òkafat ìre ene ge me etete ebi udun̄ kè Jisọs?” Pita okakan̄ ibe, “Ìkare emi!”

²⁶Ene ge me lek bọn uwu ogwu òban Awaji ya òrere ulọk melek ogwu Pita ofieekbe utọn̄ ya onenido Pita ibe, “Ìre ìkafat ìre owu melek kè Jisọs ke mmun̄ me emen uko olifu ya?”

²⁷Pita okpọkpọk ikan̄, mè ibe, “In̄-in̄, ìkare emi!” Mgbọ yaage ikọ ya otabe Pita me otu, unọn obebene isan̄a amọn.

²⁸Me agan̄ egwe, ebi ife cha enenisa Jisọs inan̄a me uwu kè Keyefas isi uwu kè Pailet, ogwu ibot mkpulu ebi Rom etobe ibe ikikpulu agan̄ ya. Mije ogwu ibot ya ikarege ogwu Ju, otutuuk ebi Ju ìgọgọọk isi ere ya kpenin̄ uwu ya. Mije, ininin̄ uwu ya môchaka ema mbuban me lek, mè irọ inyi ema ekakọt ìgọọk ìrie ijọk Iraraka ya.

²⁹Eya orọ Pailet me lek kan̄ onanan̄a me uwu isibi inu inikweek ema me oyet, mè ido ema ibe, “Ìre kpasi ikan ke ene yi orọn̄?”

³⁰Ema efọfọọk ibe, “Ire ene yi ìkare ijo ene, eji kpemesa inu me isi kwun̄.”

³¹Pailet otutumu inyi ema ibe, “Enyi me lek kinyi ìsa ọmọ ìfo ìsi ìsibi oyerebet me ibot ìgọọk me lek ikan kinyi.” Ema efọfọọk ibe ke ema kpekaan̄ unye ifefieek oyerebet mkpa inyi ene.

³²Inu yi ìrọ ikeya, inyi ikọ Jisọs otumube ibak ojelek mkpa ọmọ obokwu irọ iso.

³³Pailet ogwugwu ikom inin̄ uwu, mè inigwen Jisọs ido ibe, “Ìre owu ore ogwu ubọọn̄ ebi Ju ya?”

³⁴Jisọs ododo Pailet ibe, “Ìre idodo ya ìnan̄a me ekiket kwun̄, sà ìre òkitumu inu onọbe me otu ebi ofifi ife?”

³⁵Pailet otutumu inyi Jisọs ibe, “Ìre emi ìre ogwu Ju? Îre ebi kinyi mè ebi ibot ngwugwa kinyi esa owu inu me isi n̄a. Ìre keke ke orọ ilọ?”

³⁶Jisọs ofọfọọk Pailet ibe, “Me atikọ, ogboon̄ ubọọn̄ n̄a ìkare eyi linyọn̄ keyi. Ire mkpulu n̄a more eyi linyọn̄ keyi, kè ebi ikwaan̄ n̄a etim akọn̄, inyi ebi Ju ekakọt ìtet emi. Ire, mkpulu n̄a ìkare eyi linyọn̄ keyi.”

³⁷Pailet obebe Jisọs, “Ire ikeya, owu ìre ubọọn̄ ma!” Jisọs ofọfọọk ibe, “Owu otumu itat ibebe ke emi ìre ubọọn̄. Inu òrọrọ emanbe emi inu me linyọn̄ keyi ìre inenitumu atikọ ichili ibook inyi ebilene. Eya orọ, ene geelek òrere ogwu atikọ okigban̄ utọn̄ me lek ikọ n̄a.”

³⁸Pailet ododo Jisọs ibe, “Ìre keke ire atikọ?” Idodo ikọ ya isan̄a, inanan̄a isibi isi itumu inyi ebi Ju cha ibe, “Ǹkamun̄ inu geege eyi ene yi orọbe ilọ.

³⁹Ire, îre orọmijọn̄ kinyi ibe emi ǹkensan̄a ogwu mkpọn ge ǹsibi me uwu mkpọn ǹnyi enyi me mgbọ ijọk Iraraka geelek. Mgbọ keyi, ìre môneme enyi ibe emi ǹsan̄a ‘ogwu ubọọn̄ ebi Ju’ ǹnyi enyi?”

⁴⁰Ema etataan̄ ukpo itumu ibe, “Kasan̄a ogwa! San̄a Barabas sibi nyi eji!” Barabas yi ìre ogwu ògọgọọk itap wọlọwọlọ me ama.