Read obolo Jọn 2 Bible Online

Jọn 2 - obolo bible

Jọn 2

¹Mgbọ egwe iba orakabe, enenito ijọk ido-nwa me ama Kena eyi òkup me agan̄ Galili. Nga kè Jisọs îgọọk isi ere ya.

²Mîgwen si Jisọs mè ebi udun̄ kan̄ ibe egọọk enu ijọk ya.

³Mgbọ miin̄ ogakbe ene ita me ere ijọk ya, nga kè Jisọs onenitumu inyi Jisọs ibe ke ebi ichen cha kpeyaka ikaan̄ miin̄ ebenwọ.

⁴Jisọs obebe ogwu uga, “Ogwu enenwaan̄, ìre eyi owa ogbaan̄ owu melek n̄a me lek? Juuk emi tele ke mgbọ n̄a ìkakem-nu.”

⁵Ogwu uga otutumu inyi ebi ìkisi ikwaan̄ me ere ya ibe, “Inu geelek îtumube ibe enyi erọ, ìrọ.”

⁶Îkaan̄ ugọn̄ ewuuk gweregwen òkup me ere ya, echi ekisa itap mun̄ igwọk lek igọọk me lek orọmijọn̄ ebi Ju. Usini me etete ugọn̄ cha îkinin̄ akọp iko mun̄ jeeta, usini okinin̄ efit iko mun̄ mè akọp iba.

⁷Jisọs onenitumu inyi ebi ikwaan̄ cha ibe, “Ìtap mudim ìjot ugọn̄ chi.” Ema etatap mudim ijot otu otutuuk ugọn̄ cha.[6]

⁸Jisọs onenibe ema, “Ìchibi usini me lek ìsa ìjet ogwu ibot ijọk ya.” Ema echichibi isa ijet ene ya.

⁹Ogwu ibot ijọk ya obọbọkọ mudim ya erọbe mè ikana miin̄ ituun̄ ikpọ. Ìkariọọn̄ ere miin̄ ya onan̄abe inu. Ire, ebi ikwaan̄ cha ebi ìchichibi mudim ya mîriọọn̄ ere înan̄abe. Ogwu ibot ijọk ya onenigwen ogwu òdo nwa ya ida ibọkọ,

¹⁰mè itumu inyi ibe, “Otutuuk ene ekidasi isan̄a ata miin̄ isibi inyi ebi ene enwọ. Isinwọ miin̄ iwa enenen, mîra inisan̄a echi ikanwọnge isibi. Ire, eyi kwun̄, òyaka ìnitet ata miin̄ ikaan̄ mege inire mgbọ keyi.”

¹¹Inu ukechieen̄ keyi, eyi Jisọs orọbe me Kena eyi òkup me Galili, ore adasi inu ukechieen̄ îrọbe. Ebi ene esasa me lek inu yi iriọọn̄ ujamgbugbo kan̄. Ebi udun̄ kan̄ echechieek me lek kan̄.

¹²Mgbọ ijọk ya otabe, Jisọs mè ogwu uga mè ebi ngwan̄ kan̄ ebirieen̄ mè ebi udun̄ kan̄ enanan̄a ifo Kapanọm isi ikup sọntiik usen inen mè inen.

¹³Mgbọ ijọk Iraraka ogbetbe, Jisọs onanan̄a isi Jeruselem.

¹⁴Mgbọ îjebe isi Uwu Mbuban me Jeruselem, imumun̄ ebi ene ekinyam eriembuuk, mè arọọn̄, mè ekerekwukwu, mè imun̄ si usini ene ekweekbe me lek owuwa ikasi ikinwene ikpoko.

¹⁵Imọmọnọ olik isa irọ njijan̄, mè isa ilap ema otutuuk melek arọọn̄ kiban̄, mè eriembuuk kiban̄ isibi, mè iyiyala ikpoko ebi ìkinwene ikpoko, mè ibene otutuuk ikasi kiban̄ itọp ikana ichit,

¹⁶mè itumu inyi ebi ìkinyam ekerekwukwu ibe, “Ìgwat lek ìkpulu otutuuk unọn kinyi chi ìsibi me ere yi! Ikayaka ìsa uwu Nte n̄a ìrọ oyet ewe!”

¹⁷Mgbọ ebi udun̄ kan̄ emun̄be inu yi, ema enenikeek ibe ke mîge me Ikpa Mbuban ibe, “Ulọk nkaan̄be me lek Uwu kwun̄ ìkiyok emi me ejit kubọk ukan̄.”[7]

¹⁸Ebi ibot ebi Ju enenido Jisọs ibe, “Ìre kpasi inu ukechieen̄ ke owu môkọt irọ isa ijeen̄ eji ibe ke owu okaan̄ unye isasa ikirọ otutuuk inu chi?”

¹⁹Jisọs ofọfọọk ema ibe, “Ìgbugbọ Uwu Mbuban yi ìto me ijọn̄. Emi mâsa egwe ita gaalek iyaka inama ibene ikeke.”

²⁰Ebi Ju cha efọfọọk ọmọ ibe, “Ìre uwu yi esabe akọp acha ini mè gweregwen inama ke obe ke owu môsa usen ita gaalek inama isan̄a?”

²¹Ire, Uwu Mbuban eyi Jisọs okitumu ikọ ya ibak ìre akpalek kan̄.

²²Mgbọ Jisọs okwube, mè ijomo me mkpa ke ebi udun̄ kan̄ enikeek ikọ ya îtumube. Mgbọ ya si ke ema enichieek inu egebe me emen Ikpa Mbuban, mè ichieek si otutuuk ikọ Jisọs otumube inyi ema.

²³Me ike mgbọ ijọk ya Jisọs okupbe me Jeruselem, owuwa ene emumun̄ owuwa uyeke uyeke inu îkirọ, mè itoon̄ ejit me lek kan̄.

²⁴Ire, Jisọs me lek kan̄ ìkatoon̄ ejit me lek kiban̄, mije, îriọọn̄ inu òkup ebilene me ejit.

²⁵Ìkakup me uyọt ibe ene geege inikpa inu ebilene erebe inyi ọmọ, mije, ọmọ me lek kan̄ îriọọn̄ inu geelek òkup ebilene me ejit isan̄a kpai.