Read obolo Jọn 20 Bible Online

Jọn 20 - obolo bible

Jọn 20

¹Me agan̄ egwe, me usen ògọọk Usen Mbuban, sabum egwe onitoon̄, Meri ogwu Magidala onenije isi udọn̄ ere efuun̄be Jisọs. Mgbọ îrebe ere ya, imumun̄ ibe ke mîkpukpọt ewuuk esabe ichit otu udọn̄-ufuun̄ ya isan̄a.

²Igwugwu ikom mgbọ yaage, mè ilibi ekot ekot isi ilook Saimọn Pita melek ogwu udun̄ kè Jisọs ya, ogwu Jisọs omun̄be me chieen̄, ibe, “Ìkpọ, ebi ene mîniben nkwukwu Okaan̄-ene isan̄a me emen udọn̄-ufuun̄. Eji kperiọọn̄ ere ebenbe isi isun̄.”

³Pita mè ogwu udun̄ keyilọ ya enanan̄a ilibi isi udọn̄-ufuun̄ ya isi ikpọ.

⁴Mgbọ ema ekilibi, ogwu udun̄ keyilọ ya olilibi iraka Pita, mè idasi isi ire udọn̄-ufuun̄ ya,

⁵mè igele ikwuun̄ ikitaak chieen̄ ikpọ emen udọn̄ ya, mè imun̄ ekwut okuket cha esabe ikat Jisọs ifuun̄ olaakbe ikeya me emen udọn̄ ya. Ire, ọmọ me lek kan̄ ìkanin̄ emen udọn̄ ya.

⁶Saimọn Pita onenire mgburudun̄, mè iraka inin̄ emen udọn̄ ya, mè imun̄ si ekwut okuket cha olaakbe,

⁷mè imun̄ si eyi esabe ikat ọmọ me ibot okatbe ikup esese me agan̄ ge, ọmọ gaalek.

⁸Ogwu udun̄ keyilọ ya, ogwu òdadasi inire otu udọn̄-ufuun̄ ya, onenigọọk inin̄ emen udọn̄ ya, mè imun̄ otutuuk inu cha, mè ichieek ibe ke Jisọs îjomo me mkpa.

⁹Mege inire mgbọ ya, ebi udun̄ kè Jisọs kpekọt igobo itet inu egebe me Ikpa Mbuban ibe ke Jisọs môjomo me mkpa.

¹⁰Ebi udun̄ kè Jisọs iba cha enenigwu ikom ifo uwu kiban̄.

¹¹Ire, Meri ogwu Magidala okpọkpọk isi ere ya, mè ikeke me otu udọn̄ ya ikito ito. Mgbọ îkito ito ya, inenikwuun̄ isi, mè itaak chieen̄ ikpọ emen udọn̄ ya,

¹²mè imun̄ ebi osat Awaji iba, etapbe ofọnti okuket, mè isiki ikweek me ere mgbọ emaan̄be nkwukwu kè Jisọs, ogwu ge okweek me agan̄ ibot, ogwugwulọ okweek me agan̄ ukot.

¹³Ebi osat cha enenido Meri ibe, “Ogwu enenwaan̄, ìre keke orọ okito ito ikeyi?” Meri ofọfọọk ema ibe ke ebi ife ge mîniben nkwukwu Okaan̄ kan̄ isan̄a me udọn̄-ufuun̄ yi; ke ọmọ ìkariọọn̄ ere ebenbe isi isun̄.

¹⁴Ikọ ya me otu kan̄, iraraan̄ chieen̄ me udun̄, mè imun̄ Jisọs okekebe me ere ya. Ire, ìkariọọn̄ ibe ke îre Jisọs.

¹⁵Jisọs ododo ọmọ ibe, “Ogwu enenwaan̄, ìre keke orọ okito ito? Ìre ekene ke okiweek?” Ubọk ere ya orebe emen uko, Meri ìkikeek ibe ke Jisọs ìre ogwu òkisi ikwaan̄ me uko ya. Eya orọ, idodo ọmọ ibe, “Ogwu nte, ire owu oben nkwukwu kan̄ isan̄a, soso, sa emi si jeen̄ ere osun̄be, inyi ǹsi m̀ben.”

¹⁶Jisọs onenigwen ọmọ “Meri!” Meri oririki, mè igwu ikom, mè ilibi igọọk Jisọs, mè itaan̄ ukpo igwen ọmọ me usem Iburu, “Raboni!” (eyi òsisibi Ogwu Ijejeen̄).

¹⁷Jisọs obebe Meri, “Kakpọkpọ ìgọbọ emi ìkaan̄, mije, ǹkasi-nu lek Nte n̄a. Kpan̄asi ikeya, fo si look ebi ngwan̄ n̄a ibe ke emi gwa ǹkisi lek Nte n̄a, mè Nte kinyi, òrere Awaji n̄a, mè Awaji kinyi.”

¹⁸Meri ogwu Magidala ya onenisa etip isi ilook ebi udun̄ kè Jisọs kechilọ ibe ke ọmọ îmun̄ Okaan̄-ene, mè ikpa si inu îtumube melek kan̄ inyi ema.

¹⁹Me ikakwun̄ usen ya, òrere usen ògọọk Usen Mbuban, otutuuk ebi udun̄ kan̄ etititiin̄ me uwu, mè igon otutuuk isotu, mije ukpook ebi ibot ebi Ju. Jisọs okpọkpọ ikana isibi, mè ikeke me etete kiban̄, mè ibe ema, “Esuuk ikup inyi enyi!”

²⁰Mgbọ îtumube ikọ ya isan̄a inyi ema, inenijeen̄ ema ubọk kan̄ ere egonbe itibi, mè agba nkan̄ kan̄ ere echimbe itibi. Mgbọ ebi udun̄ kan̄ emun̄be Okaan̄-ene, ejit obebele ema enenen.

²¹Jisọs okpọkpọk itumu inyi ema ibe, “Esuuk ikup inyi enyi! Ike Nte n̄a oriabe emi inu, ikeya si ke emi nkiria enyi isibi mgbọ keyi.”

²²Ikọ keya itata ọmọ me otu, ichocho efuuk igwook ema me lek, mè ibe ema, “Ìbọkọ Ekwukwu Mbuban.

²³Ene geelek enyi etelebe ijo kan̄ inyi, Awaji môtele si ijo ene ya inyi ene ya. Ene geelek enyi kpetele ijo kan̄ inyi, Awaji ìkpotele si ijo ene ya inyi ene ya.”

²⁴Tọmọs ogwu ekigwen Didimọs, ene ge me lek ebi akọp mè ebi otuchieen̄ iba kè Jisọs, kpunu me ere ya mgbọ Jisọs osibibe me isi ebi otuchieen̄ kan̄.

²⁵Mgbọ ebi udun̄ kan̄ ekpabe inyi Tọmọs ibe ke ema mîmun̄ Okaan̄-ene, Tọmọs obebe, “Îtata m̀mumun̄ akpat omimin cha me ubọk kan̄, mè itap otubọk n̄a me ere ya, mè itap ubọk n̄a me akpat unan eyi òkup ọmọ me agba nkan̄ ya, m̀kpachieek ibe ke enyi ekitumu atikọ.”

²⁶Mgbọ nde ge orakabe, ebi udun̄ kan̄ ekpọkpọk ititiin̄ iso isi me uwu ya, Tọmọs melek kiban̄. Egogon si otutuuk isotu. Jisọs okakana isibi me etete kiban̄, mè ibe ema, “Esuuk ikup inyi enyi!”

²⁷Inenitumu inyi Tọmọs ibe, “Kpọ ubọk n̄a ire eyi. Sa otubọk kwun̄ na tap me ere keyi, mè nyana ubọk kwun̄ tap si me agba nkan̄ n̄a, mè kayaka ìkaan̄ ejit iba. Chieek!”

²⁸Tọmọs otutumu inyi Jisọs ibe, “Ogwukaan̄ n̄a mè Awaji n̄a!”

²⁹Jisọs onenibe ọmọ, “Ke otolek inichieek mgbọ keyi osabe chieen̄ kwun̄ imun̄ emi? Ire, uga ubelejit okup inyi ebi ìchechieek me ekasasage chieen̄ ìmun̄.”

³⁰Jisọs îrọ si ofifi owuwa uyeke inu ijejeen̄ echi ekagege me emen ikpa yi.

³¹Ire, echi egebe me emen ikpa yi, ege, inyi enyi esa me lek kechi echieek ibe ke Jisọs ore Karais ya, òrere Gwun̄ Awaji, mè esa me lek ichechieek ya ekaan̄ ugwem ikakaan̄ge itata inan̄a me lek erieen̄ kan̄.