Read obolo Jọn 21 Bible Online

Jọn 21 - obolo bible

Jọn 21

¹Mgbọ usen inen mè inen orakabe, Jisọs okpọkpọk isibi me isi ebi udun̄ kan̄ me agba okwaan̄ oyô Taiberias. Ikeyi ke inu ya orọ:

²Me ike mgbọ ya, Saimọn Pita, mè Tọmọs ogwu ekigwen Didimọs, mè Natanien ogwu Kena eyi òkup me Galili, mè bọn ebirieen̄ iba kè Jebidi, mè ofifi ene iba ebi udun̄ kè Jisọs egbaan̄ ikup me ere ge.

³Pita onenitumu inyi ema ibe ke ọmọ mônisi njin. Ema ebebe, “Ire ikeya, eji mêgọọk owu isi.” Ema eninin̄ uji ikọp isibi okwaan̄ isi mbọm. Ire, eririeen̄ usen ya, ema kpetet kubọk ufuk irin̄ ge.

⁴Me otu ewelegwe, Jisọs onenikeke me agba okwaan̄ oyô ya. Ire, ebi udun̄ kan̄ cha kperiọọn̄ ibe ke îre ọmọ okeke me ere ya.

⁵Jisọs onenibọn̄ọ ema ido ibe, “Ebi une n̄a, ìre enyi mîtet irin̄?” Ema efọfọọk ibe, “In̄-in̄, eji kpetet kubọk ge.”

⁶Jisọs onenibe ema, “Ìtọp njin me agan̄ ubọk ulom kinyi, ke enyi mêtet irin̄.” Ema ebeben njin itọp me agan̄ ulom ya. Mgbọ ema ebenebe njin ya ikitaba, irin̄ îwa me emen njin ya enenen, mè isa ulobo kan̄ ikeme njin ya. Ema kpekọt itaba njin ya itap me uji.

⁷Ogwu udun̄ kè Jisọs ge ya, ogwu Jisọs omun̄be me chieen̄, otutumu inyi Pita ibe, “Kpọ, Okaan̄-ene ke îre!” Mgbọ yaage Pita onọbe ogwu melek kan̄ otumube ibe ke ene ya ìre Okaan̄-ene, igwagwat lek imọnọ ofọnti inyọn̄ îwọọkbe isun̄ itobo me ebon, mè iwulu irọn̄ me mun̄, mè igwọk igọọk Jisọs.

⁸Ebi udun̄ kan̄ kechilọ ekọkọp me uji, mè ikitaba njin ya emen mun̄ emen mun̄ inire otu ijọn̄, mije, ere ema ekupbe itọp njin ya ìkajọn̄ọ ere me otu ijọn̄, ìkup kubọk akọp ejit go mè okpọkọ gaalek.

⁹Mgbọ ema enube inire ijọn̄, ema enenimun̄ mbubuuk ukan̄ okigeen̄ me ere ya, mè imun̄ irin̄ ekiwọwọp me emen ukan̄ ya, mè imun̄ si fituru inen mè inen me ere ya.

¹⁰Jisọs onenibe ema, “Ìsa usini irin̄ enyi etetbe ìna.”

¹¹Saimọn Pita owuwulu inin̄ emen uji, mè isi itaba njin ya, melek irin̄ me lek, itoon̄ me ijọn̄. Irin̄ îwa ijot lek njin ya gboi. Otutuuk efit irin̄ ile mè akọp go mè ita okup me emen njin ya. Ire, kubọk chieen̄ njin ge ìkagbeme me lek.

¹²Jisọs ogwegwen ema ibe, “Ìna ìnirie inorie ewelegwe!” Kpunu ene geege òkọkọt ido ọmọ ibe, “Ìre owu ìre ekene?” Mije, ema mîriọọn̄ ibe ke îre Okaan̄-ene.

¹³Jisọs onunu, mè inimọnọ fituru cha iche inyi ema, mè inyi ema irin̄ cha si igbaalek. Ema etataka.

¹⁴Eyi ore òso mgbọ ita Jisọs osibibe me isi ebi udun̄ kan̄ karake îjomobe me mkpa.

¹⁵Mgbọ ema eriebe inorie ya isan̄a, Jisọs onenigwen Saimọn Pita ido ibe, “Saimọn, gwun̄ kè Jọn, ìre omun̄ emi me chieen̄, me atikọ, igak otutuuk inu chi geelek?” Pita ofọfọọk ọmọ ibe, “Iin̄, Okaan̄-ene, owu oriọọn̄ ibe ke mmun̄ owu me chieen̄.” Jisọs otutumu inyi ibe, “Ire ikeya, kpọ chieen̄ me lek bọn arọọn̄ n̄a.”

¹⁶Jisọs okpọkpọk ido Pita ibe, “Saimọn, gwun̄ kè Jọn, ìre omun̄ emi me chieen̄ me atikọ?” Pita okpọkpọk ifọọk si ibe, “Iin̄, Okaan̄-ene, owu oriọọn̄ ibe ke mmun̄ owu me chieen̄.” Jisọs otutumu inyi Pita ibe, “Kpukpo arọọn̄ n̄a.”

¹⁷Jisọs okpọkpọk ido si Pita òso mgbọ ita ibe, “Saimọn, gwun̄ kè Jọn, ìre omun̄ emi me chieen̄?” Idodo ya Jisọs odobe Pita òso mgbọ ita ibe, “Ìre omun̄ emi me chieen̄,” ofefieek Pita me lek enenen. Ifọfọọk Jisọs ibe, “Okaan̄-ene, owu oriọọn̄ inu geelek. Owu orioon̄ si ibe ke mmun̄ owu me chieen̄.” Jisọs otutumu si inyi Pita ibe, “Nyi arọọn̄ n̄a inorie.

¹⁸Me atikọ, mgbọ owu okupbe ijija, owu gaalek okitobo fanti kwun̄, mè ikinen̄e lek kwun̄ isun̄, mè ikije isi ere geelek òneneme owu. Ire, osikan, owu môbene ubọk kwun̄, inyi ofifi ene itobo owu olik me ebon, mè isa owu ije isi ere owu okaweekge isisi.”

¹⁹Jisọs ìtumu ikọ ya isasa ijeen̄ ojelek mkpa Pita obokwu, eyi òbonyi Awaji umin. Itutumu ikọ chi isan̄a, inenitumu inyi Pita ibe, “Gọọk emi!”

²⁰Pita oraraan̄ chieen̄ me udun̄, mè imun̄ ogwu udun̄ kè Jisọs ya ogwu Jisọs omun̄be me chieen̄ okije igọọk ema. (Ogwugwu ore ogwu òyayaka lek ibieen̄ me lek kè Jisọs me lek ikasi mgbọ ema ekupbe ikirie inorie, mè ido Jisọs ibe, “Okaan̄-ene, ìre ekene ire ogwu òboleke owu inyi ekpan̄?”)

²¹Mgbọ Pita omun̄be ogwu enerieen̄ yi okigọọk ema, Pita ododo Jisọs ibe, “Okaan̄-ene, sà ogwugwu ye?”

²²Jisọs ofọfọọk ibe, “Ire mweek ibe mè ene ya ikup me ugwem mege ire mgbọ mâgwube ikom inu, ìre eyi owa ogbaan̄ owu me lek? M̀be owu, gọọk emi!”

²³Mije keyi, ukpatu obebene ikitaan̄ ikana me etete ebi ìchechieek me lek kè Jisọs ibe ke ogwu udun̄ kè Jisọs yi ìkpokwu. Ire, Jisọs me lek kan̄ ìkatumu ibe ke ene ya ìkpokwu. Ire, ikọ îtumube ìre, “Ire mweek ibe ene ya ikup me ugwem mege ire mgbọ mâgwube ikom inu, ìre eyi owa ogbaan̄ owu me lek?”

²⁴Ogwu udun̄ kè Jisọs yi ogwu ekitumu ikọ yi ibak ore ogwu òkpakpa otutuuk inu chi, mè ige si itap me ikpa. Otutuuk kiji mîriọọn̄ ibe ke inu chi îkpabe ìre atikọ.

²⁵Jisọs îrọ si owuwa inu echi ekagege me emen ikpa yi. Ire ibe ege otutuuk cha etap me ikpa, emi ǹkakeek ibe ke otutuuk linyọn̄ môkọt ita otutuuk ikpa echi mêgebe inu cha itap.