Read obolo Jọn 3 Bible Online

Jọn 3 - obolo bible

Jọn 3

¹Îkaan̄ ogwu enerieen̄ ge, ogwu Farisi, ekigwen Nikodimọs. Ọmọ ìre ogwu Oru ebi Ju.

²Usen ge, ogwu enerieen̄ yi osisi lek kè Jisọs me eririeen̄, mè itumu inyi ibe, “Ogwu Ijejeen̄, eji mîriọọn̄ ibe ke owu ìre ogwu ijejeen̄ ogwu Awaji oriabe inu, mije, kpunu ene geege òbokọt ikirọ inu ukechieen̄ chi owu okirọ, ire Awaji ìkakeke ìnyi ene ya.”

³Jisọs onenifọọk ọmọ ibe, “Ǹkitumu atikọ inyi owu, kpunu ene geege òbokọt imun̄ mkpulu eyi Awaji îtata mè ekpọkpọk ene ya iman.”

⁴Nikodimọs onenido Jisọs ibe, “Ìre ebejeje ikpọk ene iman me mgbọ ene okanbe isan̄a? Me atikọ, ene ìkpokọt ikpọk inin̄ owot ogwu uga, mè ogwu uga ikpọk ọmọ iman òso mgbọ iba.”

⁵Jisọs oyayaka ifọọk ọmọ ibe, “Ǹkitumu atikọ inyi owu ibe, ire kpekpọk ene iman inan̄a me mun̄ mè Ekwukwu Mbuban, ene ya ìkpokọt inin̄ mkpulu eyi Awaji.

⁶Kpọ, ogwu emanbe me anam akpalek ìkaan̄ anam akpalek. Ogwu emanbe me Ekwukwu Mbuban îkaan̄ Ekwukwu Mbuban me emen kan̄.

⁷Eya orọ, kachieek ibe ike owu chieen̄ ibe ke ǹtumu inyi owu ibe ke mêkpọkpọk enyi iman.

⁸Efet isikiwut, ìkiwut ifo agan̄ geelek òneneme ọmọ. Owu môkọt inọ ida kan̄, ire, owu òkporiọọn̄ ere înan̄abe inu, mè ere îkiwut ifo. Ikeya si ke îkup me lek ebi emanbe me Ekwukwu Mbuban.”

⁹Nikodimọs oyayaka ido ọmọ ibe, “Ìre inu yi ìbojeje irọ?”

¹⁰Jisọs onenibe ọmọ, “Ke owu ìre ogwu ijejeen̄ me etete ebi Ijeren? Ìre keke orọ òkakọt ìgobo inu chi ìtet?

¹¹Me atikọ, ǹkitumu inyi owu ibe ke eji ekitumu ikọ ofolek inu eji eriọọn̄be inyi enyi, mè ikikpa si inu eji esabe chieen̄ kiji imun̄ ijeen̄ enyi. Ire, enyi kpechieek ikọ kiji geege.

¹²Mgbọ ntumube ikọ ofolek inu òkirọ me linyọn̄ keyi inyi enyi, enyi kpekọt ichieek. Ire nnitumu ikọ ofolek emen inyọn̄ inyi enyi, ìre enyi ebejeje ikọt ichieek?

¹³Kpunu ene geege òrarak inene ifo emen inyọn̄, ilọ me lek Gwun̄ Ebilene, ogwu ònanan̄a me emen inyọn̄ inu.

¹⁴Ike Mosis obenebe ijijinu, esabe ekwe irom, me otu ọfọkọ ifo inyọn̄ me emen èwê, ikeya si ke mêbene emi Gwun̄ Ebilene, ifo inyọn̄,

¹⁵inyi ene geelek òchechieek me lek n̄a ikaan̄ ugwem ikakaan̄ge itata.

¹⁶“Mije Awaji îmun̄ ebi linyọn̄ me chieen̄ enenen, mè inyi ọkpọkpọ Gwun̄ ge kan̄, inyi ene geelek òchechieek me lek Gwun̄ ya ikachep, ire, ikaan̄ ugwem ikakaan̄ge itata.

¹⁷Awaji ìkaria Gwun̄ kan̄ ìnu me linyọn̄ ibe initip ebi linyọn̄ oyerebet. Ire, ìria inu, inyi ọmọ inan̄a me lek Gwun̄ ya inyan̄a ebi linyọn̄.

¹⁸Ene geelek òchechieek me lek Gwun̄ ya, kpetip ene ya oyerebet. Ire, ene geelek ikachieekge me lek Gwun̄ ya, mîwuuk lek itip ene ya oyerebet isan̄a, mije îjitbe ichechieek me lek ọkpọkpọ Gwun̄ ge Awaji oriabe inu.

¹⁹Inu esabe ifieek oyerebet ya ìre, ke Utoon̄ înu me linyọn̄, ire, ebilene ema udun igak utoon̄, mije, otutuuk irọrọ kiban̄ ìre ijo ijo.

²⁰Ene geelek òkirọ ijo inu ìkichacha utoon̄ ya. Ìkakichieek inunu me lek utoon̄ ya, mije, ìkitet ukpook ibe ke utoon̄ ya mônikpọk mbum ijo irọrọ kan̄.

²¹Ire, ogwu geelek òkirọ atikọ îkibele ejit inunu me lek utoon̄ ya, inyi ebi ene esa me lek utoon̄ ya ekemọọn̄ ibe ke inu geelek ọmọ orọbe ìre inu Awaji okiweek.”

²²Mgbọ Jisọs otumube ikọ isan̄a melek kè Nikodimọs, ọmọ mè ebi udun̄ kan̄ eneninan̄a me Jeruselem ije isi agan̄ Judia, mè ikup me ere ya sọnja mgbọ ikigwook ene mun̄.

²³Me ike mgbọ ya, Jọn ìkup me ama Ayenọn me agba lek ama Salim ikigwook ene mun̄, mije, mun̄ îwa me ere ya. Ebi ene si ekpọkpọ ikisibi inu iniweek igwogwook mun̄.

²⁴(Inu yi îrọ iraka sabum enitet Jọn itap me mkpọn.)

²⁵Usini ebi udun̄ kè Jọn ògwook mun̄ enenibene ikigọọk ogwu Ju ge iwut ifan̄a me lek orọmijọn̄ igwọgwọk lek eyi ebi Ju ekirọ.

²⁶Ebi udun̄ kè Jọn cha enenisa ikọ ya inu me lek kè Jọn, mè initumu inyi ibe, “Ogwu Ijejeen̄, ene ya ogwu ochichinibe me usaba okwaan̄ Jodan, mè ikpa inu ofolek kan̄ inyi ebi ene me ere ya, ene ya òkigwook si ebi ene mun̄. Otutuuk ene mêkigbuku igọọk.”

²⁷Jọn ofọfọọk ema ibe, “Kpunu inu geege ene geege obokọt ikaan̄, îtata mè ìre Awaji onyi ene ya.

²⁸Enyi me lek kinyi mînọ mgbọ nkitumu ibe ke emi ǹkare Karais ya, ire, ke emi ìre ogwu Awaji oriabe inu ibe idasi inu ininen̄e oniin̄ isun̄ iban Karais ya.

²⁹Ìkpọ si, ogwu òdo nwa ore ogwukaan̄ nwa. Unene òkitap ubọk inyi ogwu òdo nwa me mgbọ ijọk ido-nwa ìkigban̄ utọn̄ me lek ida ogwu unene kan̄, òrere ogwu òdo nwa ya. Isinọ ida ogwu unene, unwọọn̄ îra ijot ejit kan̄. Mgbọ keyi, îre ojelek unwọọn̄ ya ke emi nkaan̄. Mgbọ keyi ke unwọọn̄ n̄a ya ojot ikem.

³⁰Eya orọ, ogwu enerieen̄ ya môkpọkpọ ikimin, mè ikitaan̄ etip, ire, emi m̀bakigegele isiki.

³¹“Ogwu ònan̄a me emen inyọn̄ inu obene igak otutuuk ene. Ogwu ònan̄a me linyọn̄ ìre ogwu linyọn̄, mè ikitumu si ikọ kubọk ogwu linyọn̄. Eya orọ, ogwu ònan̄a me emen inyọn̄ inu omin igak otutuuk ene.

³²Ogwu ònan̄a me emen inyọn̄ îkpa inu geelek ọmọ osabe chieen̄ kan̄ imun̄, mè isa utọn̄ kan̄ inọ, inyi ebilene. Ire, kpunu ogwu òchechieek ikọ kan̄.

³³Ire, ene geelek òchechieek ikọ kan̄ îsa me lek ikọ ya irọ inye ibe ke Awaji ìre ogwu atikọ.

³⁴Mije, ogwu Awaji oriabe inu ìkitumu ikọ Awaji. Ogwugwa si ke Awaji onyi Ekwukwu kan̄ òjot òjot.

³⁵Awaji Ute îmun̄ ogwu Gwun̄ me chieen̄ enenen, mè ikana otutuuk inu geelek itap ogwu Gwun̄ ya me ubọk isan̄a.

³⁶Ene geelek òchechieek me lek Gwun̄ ya îkaan̄ ugwem ikakaan̄ge itata, ire, ene geelek òjijit Gwun̄ ya ìkpokaan̄ ugwem ya, mije, unaan̄-ejit Awaji òwa me ibot ene ya.”