Read obolo Jọn 4 Bible Online

Jọn 4 - obolo bible

Jọn 4

¹Ebi Farisi eneninọ ibe ke ebi ìkigọọk Jisọs me udun̄ mè ebi ìkisi lek kan̄ ibe igwook ema mun̄ mîwa enenen igak ebi ìkisi lek kè Jọn.

²Me atikọ, ìkare Jisọs me lek kan̄ okigwook ebi ife cha mun̄, îre ebi udun̄ kan̄ ekigwook ife cha mun̄.

³Mgbọ Okaan̄-ene Jisọs onọbe ikọ ya ebi ene ekitumu ibak ọmọ, inanan̄a me agan̄ Judia igwu ikom ifo agan̄ Galili.

⁴Oniin̄ ema ejebe ìre oniin̄ ekije itibi agan̄ Sameria.

⁵Ema enenije ire ama ge me Sameria ekigwen Saika, me agba lek ijọn̄ Jekọp ochebe inyi Josefu ogwu gwun̄.

⁶Udọn̄ mun̄ kè Jekọp me ere ya okupbe. Jisọs onenisi isiki ikweek me otu udọn̄ mudim ya, mije, lek kan̄ îwọ enenen ubọk îjebe ujọn̄ọ ije ya. Îre ejit ikarek ke ema eje inire otu udọn̄ mun̄ ya.

⁷Ogwu enenwaan̄ Sameria ge ojeje inu me otu mudim ya ibonichibi mun̄. Jisọs obebeek ogwu enenwaan̄ ya ibe, “Soso, che sọnja mudim nyi emi ǹnwọ.”

⁸(Me ike mgbọ ya, ebi udun̄ kan̄ mînin̄ emen ama isi ilep inorie.)

⁹Ogwu enenwaan̄ ya ofọfọọk ọmọ ibe, “Owu ìre ogwu Ju, emi ìre enenwaan̄ Sameria. Owu òjeje inibeek emi mudim?” (Ìtumu ikọ ya mije ebi Ju mè ebi Sameria kpekigbaan̄ inu irọ.)

¹⁰Jisọs ofọfọọk ogwu enenwaan̄ ya ibe, “Ire owu moriọọn̄ uche Awaji ochebe inyi ebilene, mè iriọọn̄ si ogwu òkibeek owu mudim yi, kè owu òbeek emi mudim eyi òkinyi ene ugwem, mè emi nnyi owu si.”

¹¹Ogwu enenwaan̄ ya onenibe ọmọ, “Ogwu Nte, owu òkakaan̄ inu geege obosa ichibi mun̄. Udọn̄ mun̄ yi si îdọk enenen. Ìre mun̄ òkinyi ene ugwem yi ìbonan̄a owu me owa?

¹²Ìre owu omin igak Jekọp nte kiji ogwu òrọrọkọ udọn̄ mun̄ yi inyi eji, mè ichibi si mudim me emen inwọ, ọmọ mè bọn kan̄, mè arọọn̄ kan̄, mè eriembuuk kan̄ otutuuk?”

¹³Jisọs ofọfọọk ọmọ ibe, “Ebek môkpọk irak ogwu geelek ònwọnwọ mun̄ ònan̄a me emen udọn̄ yi.

¹⁴Ire, mege ire mgbọ ikakaan̄ge itata, ebek ìkpoyaka irak ene geelek ònwọnwọ mun̄ eyi emi nkinyi. Me atikọ, mun̄ mânyibe ene ya môkana ogbuuruk me emen ene ya, eyi mun̄ ugwem okigbuk isibi me emen, mè inyi ene ya ugwem eyi ikakaan̄ge itata.”

¹⁵Ogwu enenwaan̄ ya onenibe ọmọ, “Ogwu Nte, nyi emi mun̄ ya ǹnwọ, inyi ebek ikayaka ìrak emi, mè nkayaka ìkinu ere yi ìnichibi mun̄.”

¹⁶Jisọs obebe ogwu enenwaan̄ ya, “Fo, mè si gwen nlom kwun̄ sa gwu kom na.”

¹⁷Ogwu enenwaan̄ ya otutumu inyi Jisọs ibe ke ọmọ ìkakaan̄ olom. Jisọs obebe ọmọ, “Owu otumu atikọ ibe ke òkakaan̄ olom.

¹⁸Mije, olom go ire echa okaan̄be. Ogwu okibat mgbọ keyi si ìkare nlom kwun̄. Eya orọ, ikọ otumube mgbọ yi ìre atalek atikọ.”

¹⁹Ogwu enenwaan̄ ya otutumu inyi Jisọs ibe, “Ogwu Nte, mgbọ keyi, emi mmun̄ ibe ke owu ìre ogwu nriran.

²⁰Ebi nte nte kiji ekitọbọ ebum inyi Awaji me inyọn̄ ogoon̄ keyi, ire, enyi ebi Ju eyaka inibe ke îre Jeruselem ore ere otutuuk ene ebekitọbọ ebum inyi Awaji.”

²¹Jisọs onenitumu inyi ogwu enenwaan̄ ya ibe, “Ogwu enenwaan̄, ǹkitumu atikọ inyi owu, mgbọ òkinu mgbọ ebi ene kpebeyaka ikitọbọ ebum inyi Ogwu Nte me inyọn̄ ogoon̄ keyi, mè ìyaka ire me Jeruselem.

²²Enyi ebi Sameria kperiọọn̄ inu enyi ekitọbọ ebum inyi. Ire, eji ebi Ju mîriọọn̄ ogwu eji ekitọbọ ebum inyi, mije, unyan̄a ìbonan̄a me etete kiji ebi Ju ire otutuuk ene lek.

²³Ire, mgbọ òkinu, mgbọ ya si îrere isan̄a, mgbọ ata ebi ìkitọbọ ebum inyi Ogwu Nte, ebekitọbọ ebum inyi ọmọ me ekwukwu mè atikọ. Mije, îre ebi ìkup ikeya ke Ogwu Nte okiweek.

²⁴Awaji ìre ekwukwu. Eya orọ, ebi ìkitọbọ ebum inyi ọmọ ebekitọbọ ebum inyi ọmọ me ekwukwu mè atikọ.”

²⁵Ogwu enenwaan̄ ya otutumu inyi Jisọs ibe, “Nriọọn̄ ibe ke ogwu Mesaya (òrere Karais) mônu. Isinu, mônikpa inu geelek iwele inyi eji.”

²⁶Jisọs otutumu inyi ogwu enenwaan̄ ya ibe, “Emi ogwu òkitumu ikọ melek kwun̄ mgbọ yi, emi nre ene ya.”

²⁷Mgbọ yaage, ebi udun̄ kan̄ enanan̄a me emen ama ere ema esibe isi ilep inorie ika inu. Îke ema chieen̄ inenimun̄ Jisọs okikpa ikọ melek ogwu enenwaan̄ ya. Ire, kpunu ene geege me etete kiban̄ òkọkọt ido ogwu enenwaan̄ ya ibe, “Òkiweek keke?” Kpunu si ogwu òkọkọt ido Jisọs ibe, “Òjeje ikigọọk ogwu enenwaan̄ ya ikpa ikọ?”

²⁸Ogwu enenwaan̄ ya otetele ugọn̄ mudim kan̄, mè igwu ikom ilibi inin̄ emen ama, mè isi ikitumu inyi ebi ene ibe,

²⁹“Ìna, ìnikpọ ogwu òkpakpa otutuuk inu geelek nrọbe me ugwem n̄a inyi emi. Ene yi ìkpolọlọ irere Karais ya!”

³⁰Ebi ene egbugbuku inan̄a me emen ama ya isibi inikpọ ogwu ene ya.

³¹Mgbọ ogwu enenwaan̄ ya onan̄abe inin̄ emen ama ya, ebi udun̄ kè Jisọs ekekiriaak Jisọs ibe, “Ogwu Ijejeen̄, soso, na rie inorie ma!”

³²Jisọs ofọfọọk ema ibe, “Nkaan̄ inorie mbarie eyi enyi kperiọọn̄ inu geege ofolek.”

³³Ebi udun̄ kan̄ ekekidido lek kiban̄ ibe mè ìre îkaan̄ ogwu òsasa inorie ijet ogwugwu me udun̄ kiban̄ mọnọ?

³⁴Jisọs onenitumu inyi ema ibe, “Inorie n̄a ìre irọrọ nkeek Awaji ogwu òraria emi inu, mè irọrọ ikwaan̄ înyibe emi isan̄a.

³⁵Enyi ekito urọk ibe, ire mfut ìkaso onyan̄ ini, kpekirọkọ. Ire, ǹkitumu inyi enyi ibe, ìbene chieen̄ ìkpọ emen uko. Inu geelek îren̄e isan̄a, mè ikikup ikpọ irọrọkọ.

³⁶Mgbọ yi, ogwu òkirọkọ inu me uko òkibọkọ mkpukpe kan̄, mè ikirọkọ mfut eyi ugwem ikakaan̄ge itata. Sa me ikeyi, ogwu òwowop mè ogwu òrọrọkọ mêgbaan̄ ibele ejit.

³⁷Ikeyi ke urọk eyi ekito ibe ke ene ge owop, sà ofifi ene orọkọ, osa ìrọ iso.

³⁸Mije, ǹria enyi ibe enyi esi erọkọ mfut me uko eyi enyi kpesi ikwaan̄ geege me emen. Îre ebi ofifi ife esi otutuuk unye ikwaan̄ cha, enyi enenisi irọkọ mfut eyi unye ikwaan̄ ife cha esibe.”

³⁹Owuwa ebi Sameria ìnan̄a me ama ya echechieek me lek kè Jisọs, mije ata-ikọ ogwu enenwaan̄ ya otumube ibe ke Jisọs îkpa otutuuk inu geelek ọmọ orọbe me ugwem kan̄ inyi ọmọ.

⁴⁰Mgbọ ebi Sameria cha enube inimun̄ Jisọs, ema ebebeek ọmọ ibe igọọk ema ikup. Jisọs ogọgọọk ema ikup egwe iba.

⁴¹Mgbọ ebi ama ya enọbe ikọ Jisọs okitumu, owuwa kiban̄ echechieek si me lek kan̄ igbaalek ebi ìchechieek me adasi mgbọ ya.

⁴²Ema ekekitumu inyi ogwu enenwaan̄ ya ibe, “Ìkayaka ìre mije ikọ owu otumube inyi eji gaalek ke eji echieek me lek kè Jisọs. Mgbọ yi, eji mîsa utọn̄ kiji gaalek inọ ikọ îtumube, mè iriọọn̄ ibe, me atikọ, ke ene yi ore Ogwu Unyan̄a ya òboninyan̄a otutuuk ebi linyọn̄.”

⁴³Mgbọ egwe iba cha orakabe, Jisọs onanan̄a me Saika ya ije isi agan̄ Galili.

⁴⁴(Jisọs me lek kan̄ îra iwuuk lek itumu ibe ke ogwu nriran ìkakikaan̄ umin me ama kan̄.)

⁴⁵Mgbọ Jisọs orebe Galili, ebi agan̄ ya ebọbọkọ ọmọ itap, mije, mgbọ ema esibe ijọk Iraraka me Jeruselem, ema mîgọọk imun̄ si otutuuk inu îrọbe me ere ya.

⁴⁶Jisọs oyayaka ikpọk ije isi Kena, me Galili, ama ere îrọbe inyi mudim ikana miin̄. Ogwu ibot ikwaan̄ ge òwa si me ama ya ogwu lek ogwu gwun̄ ikanyege. Gwun̄ ya ìkup me Kapanọm.

⁴⁷Mgbọ ogwu ibot ikwaan̄ ya onọbe ibe ke Jisọs înan̄a me Judia inu me Galili, ineninan̄a ije isi lek kan̄, mè ibeek ibe inu inigwa gwun̄ kan̄ ya òfafiak ire lek îbokwukwu.

⁴⁸Jisọs otutumu inyi ọmọ ibe, “Enyi kpekichieek me lek n̄a, îtata enyi emumun̄ uyeke uyeke inu ijejeen̄, mè inu ukechieen̄.”

⁴⁹Ogwu ibot ikwaan̄ ya obebe ọmọ, “Ogwu Nte, nye lek na mgbọ keyi gwun̄ ya ikatọbọge nu.”

⁵⁰Jisọs otutumu inyi ogwu ibot ikwaan̄ ya ibe, “Je fo, ke gwun̄ kwun̄ môgat ugwem.” Ogwu enerieen̄ ya ochechieek ikọ ya Jisọs otumube, mè igwu ikom ifo.

⁵¹Mgbọ îkije me oniin̄, ebi usun̄ kan̄ elilibi inikweek ọmọ, mè ikpa inyi ibe ke lek gwun̄ kan̄ înye; ke ọmọ me ugwem.

⁵²Ogwu enerieen̄ ya ododo ibe mè ìre ike mgbọ owa ke lek gwun̄ ya obene inye? Ema efọfọọk ibe ke îre mgbọ òfuk-mgbọ osulube ge eyi ejit ikarek iyakwut òraraka ke ukan̄ òbabak gwun̄ ya me lek otele.

⁵³Nte gwun̄ ya onenisi ikeek ibe ke îre ike mgbọ ya ke Jisọs otumu inyi ọmọ ibe ke gwun̄ kan̄ môgat ugwem. Mije keya, ọmọ mè otutuuk ebi uwu kan̄ echechieek me lek kè Jisọs.

⁵⁴Eyi ore òso uyeke inu iba eyi Jisọs orọbe. Ìrọ inu yi mgbọ înan̄abe me Judia ika inu me Galili.