Read obolo Jọn 5 Bible Online

Jọn 5 - obolo bible

Jọn 5

¹Sọnja mgbọ iraraka, Jisọs oneninan̄a me Galili ije isi Jeruselem igọọk isi ijọk mfaka ebi Ju.

²Me Jeruselem, îkaan̄ udọn̄ mun̄ ge òkukup me agba lek otunchit eyi ekigwen Otunchit Arọọn̄. Ekigwen udọn̄ mun̄ ya Betisaida me usem ebi Iburu. Mîsa ewuuk inama ogwe go ikana udọn̄ mun̄ ya.

³Owuwa ebi ìkifiak esese chieen̄ orukan̄ mîkinu otu udọn̄ mun̄ ya inililam ikana me emen ogwe cha, bene me ebi ǹnàan̄, mè ebi akọọk, re lek ebi ngọm otutuuk, [ikikup ikpọ mgbọ mun̄ ya môbubukube.

⁴Me mgbọ me mgbọ, ogwu osat Okumugwem îkinu inibubuku mun̄ ya. Mgbọ ogwu osat isinibubuku mun̄ ya, ogwu geelek òdadasi inin̄ emen mun̄ ya, Awaji îra igwa orukan̄ geelek òkifiak ene ya isan̄a.]

⁵Ene ge me lek ebi ìkup me otu mun̄ ya îkup me ijọn̄ orukan̄ akọp acha ita mè jeeta.

⁶Mgbọ Jisọs omun̄be ogwu enerieen̄ ya olaakbe me ere ya, mè inọ ibe ke orukan̄ ya îfiak ọmọ ijọn̄ọ mgbọ, inenido ene ya ibe, “Ìre oweek ibe lek kwun̄ inye?”

⁷Ogwu enerieen̄ ya ofọfọọk Jisọs ibe, “Ogwu Nte, ǹkakaan̄ ene geege òtatap ubọk inyi emi, mè ǹkọt ǹnin̄ emen mun̄ yi mgbọ geelek ogwu osat Okumugwem obubukube mun̄. Ìkire sabum mbare emen mun̄ ya, ofifi ene îra idasi inin̄ me isi n̄a.”

⁸Jisọs onenibe ọmọ, “Nan̄a keke, kat ufo kwun̄, mè je fo.”

⁹Mgbọ yaage, lek ogwu orukan̄ ya onyenye, inanan̄a ikeke, mè ikat ufo kan̄, mè ije ifo. Inu ya ìrọ me Usen Mbuban.

¹⁰Eya orọ, ebi ibot ebi Ju etutumu inyi ogwu enerieen̄ ya ibe, “Chereyi ìre Usen Mbuban, Ikan îgban owu ibeben ufo kwun̄ me Usen Mbuban.”[8]

¹¹Ogwu enerieen̄ ya ofọfọọk ema ibe ke ogwu ògwagwa ọmọ obe mè ọmọ ikat ufo kan̄, mè ije ifo.

¹²Ife cha enenido ọmọ ibe, “Ìre ekene ire ene ya òtutumu ibe owu òkat ufo kwun̄, mè òben òsa òje òfo?”

¹³Ogwu egwabe ya ìkakọt ìriọọn̄ ogwu ògwagwa ọmọ, mije, Jisọs îkwala inin̄ etete ogbogbo ebi ene me ere ya, mè ilọ ọmọ chieen̄.

¹⁴Ire, sọnja mgbọ iraraka, Jisọs onenisi imun̄ ogwu enerieen̄ ya me oyet egep Uwu Mbuban, mè itumu inyi ọmọ ibe, “Kpọ, lek kwun̄ înye mgbọ keyi. Kayaka ìrọ ijo inu ofifi, inyi inu òfefieek igak ikeya ikarọ owu.”

¹⁵Ogwu enerieen̄ ya onanan̄a me ere Uwu Mbuban ya isibi, mè isi itumu inyi ebi ibot ebi Ju cha, ibe ke îre Jisọs ogwa ọmọ.

¹⁶Mije Jisọs orọbe owuwa inu chi me Usen Mbuban, ebi ibot ebi Ju ebebene ikisisaak ọmọ.

¹⁷Jisọs onenitumu inyi ema ibe, “Mege inire cherekeyi, Nte n̄a ìkisisi ikwaan̄ kan̄ mgbọ geelek. Ikeya si, emi m̀bakisisi ikwaan̄ eyi n̄a mgbọ geelek.”

¹⁸Mije ikọ yi Jisọs otumube, ebi Ju erọriọọn̄ itap efuuk igak adasi mgbọ ikiweek ike ebesa itet ọmọ ikpan̄, mije, îchaka ikan Usen Mbuban. Ògagak otutuuk, ìkigwen Awaji Nte kan̄, mè isa me ikeya ibene lek kan̄ isun̄ ìkike melek Awaji.

¹⁹Jisọs ofọfọọk ema ibe, “Ǹkitumu atikọ inyi enyi ibe ke Gwun̄ ìkpokọt irọ inu geege me ibot kan̄. Inu îmun̄be ogwu Ute okirọ, eya gaalek ke ìborọ, mije, inu geelek Ute okirọ, eya si ke ogwu Gwun̄ okirọ.

²⁰Mije, Ute îmun̄ ogwu Gwun̄ me chieen̄, mè ijeen̄ ogwu Gwun̄ otutuuk inu îkirọ. Me atikọ, môke enyi chieen̄ imumun̄ ibe ke Ute môjeen̄ ogwu Gwun̄ inu ògagak echichi enyi ekimun̄.

²¹Mije, kubọk Ute okijomo ebi ìkwakwaan̄, mè ikinyi ema ugwem, ikeya si ke ogwu Gwun̄ okinyi ene geelek òneneme ọmọ ugwem.

²²Ògak ge, Ute ìkakisibi oyerebet me ibot ene geege. Ire, îkana otutuuk oyerebet geelek itap me ubọk ogwu Gwun̄,

²³inyi otutuuk ene ekenyi ogwu Gwun̄ umin kubọk ekinyi ogwu Ute umin. Ene geelek ikaminge ogwu Gwun̄, ìkamin si ogwu Ute ogwu òraria ogwu Gwun̄ ya inu.

²⁴“Me atikọ, ǹkitumu inyi enyi ibe, ene geelek ònọnọ ikọ n̄a, mè ichieek me lek ogwu òraria emi inu, ene ya îkaan̄ ugwem ikakaan̄ge itata. Kpebetip si ọmọ oyerebet geege. Ire, ọmọ îsaba inan̄a me mkpa inin̄ me ugwem.

²⁵Me atikọ, ǹkitumu si inyi enyi ibe ke mgbọ òkinu me isi, mgbọ ya îrere isan̄a, mgbọ ebi ìkwakwaan̄ mênọbe ida Gwun̄ Awaji. Ebi geelek ìnọnọ mêgat ugwem.

²⁶Mije, ike Awaji Ute me lek kan̄ orebe ogbuuruk ere ugwem okinan̄a isibi, ikeya si ke îrọ inyi ogwu Gwun̄ ire si ogbuuruk ere ugwem okinan̄a isibi.

²⁷Awaji Ute înyi si ogwu Gwun̄ unye ibe ikisibi ene oyerebet me ibot, mije, ogwu Gwun̄ ya ìre Gwun̄ Ebilene.

²⁸“Ikachieek ibe ikọ chi ike enyi chieen̄, mije, mgbọ òkinu me isi, mgbọ otutuuk ebi ìkwakwaan̄ mênọbe ida n̄a,

²⁹mè inan̄a me udọn̄-ufuun̄ kiban̄ ijomo. Ebi ata irọrọ mêjomo me mkpa inin̄ me ugwem ikakaan̄ge itata. Ire, ebi ijo irọrọ mêjomo me mkpa, mè inibọkọ itip-oyerebet.

³⁰Me lek n̄a gaalek, emi m̀kpakọt irọ inu geege. Ire, ǹkifieek oyerebet inyi ebi ene ubọk Nte n̄a otumube ibe emi m̀fieek. Ifieek-oyerebet n̄a si ìre unen, mije, ìkare inu òneme emi ke nkirọ. Îre inu ogwu òraria emi inu oweekbe ke nkirọ.”

³¹“Ire emi nkeke ata-ikọ inyi lek n̄a, ikọ n̄a ìkpokeke.

³²Ire, îkaan̄ ofifi ene òkekeke ata-ikọ inyi emi. Nriọọn̄ ibe ke ikọ ogwu ene ya otumube me ibot n̄a ìre atikọ.

³³Ene ya ìre Jọn, ogwu enyi eriabe bọn ikwaan̄ kinyi isi lek. Jọn îtumu si ikọ ofolek atikọ ya inyi enyi.

³⁴Ìkare kubọk ǹkichachiaan̄ ubọk iweek ata-ikọ ebilene. Ire, ǹkitumu ikọ ibak ata-ikọ kè Jọn, inyi enyi esa me lek keya echieek, mè enwọnọ itip-oyerebet Awaji.

³⁵Mgbọ Jọn okupbe melek kinyi, ìkup kubọk mkpukan̄ òkilomo, mè ikinyi utoon̄. Sọntiik mgbidim mgbọ ya, enyi mîchieek me lek ikọ kan̄, mè ibele ejit me lek utoon̄ înyibe enyi.

³⁶“Ofifi si, nkaan̄ ata-ikọ ge eyi òlolobo igak ata-ikọ kè Jọn. Ata-ikọ ya ìre ikwaan̄ ukechieen̄ echi Nte n̄a onyibe emi unye ibe emi ǹrọ, echi nkirọ si ifo isi mgbọ yi. Îre ikwaan̄ chi okijeen̄ ibe, me atikọ, ke îre Nte n̄a oria emi inu.

³⁷Nte n̄a ogwu òraria emi inu si îkeke ata-ikọ ofolek n̄a inyi enyi. Ire, enyi kperarak inọ ida Nte n̄a, enyi kpemumun̄ si ọmọ isi mè isi.

³⁸Kpunu si Ikọ kè Nte n̄a me emen kinyi, mije, enyi kpechieek me lek ogwu Gwun̄ ogwu îriabe inu.

³⁹Enyi ekigwuun̄ chieen̄ ikween̄ inu egebe me Ikpa Mbuban, mije, enyi ekikeek ibe ke enyi mêkaan̄ ugwem ikakaan̄ge itata inan̄a me emen ikọ cha egebe. Me atikọ, ǹkitumu inyi enyi ibe ke otutuuk inu egebe me Ikpa Mbuban ìkitumu ikọ ofolek n̄a.

⁴⁰Ire, enyi mîkikween̄ Ikpa Mbuban isan̄a, mè ijit si inunu me lek n̄a inikaan̄ ugwem ikakaan̄ge itata.

⁴¹“Emi ǹkakiweek itọn̄ ebilene.

⁴²Ire, nriọọn̄ ojelek ife enyi erebe. Nriọọn̄ si ibe ke enyi kpema Awaji me ejit kinyi.

⁴³Ìkpọ, emi ǹnu me erieen̄ kè Nte n̄a. Ire, enyi ejijit emi. Ire, ire ofifi ene inu me erieen̄ eyi lek kan̄ gaalek, enyi mêbọkọ ene ya itap.

⁴⁴Enyi ebejeje ichieek me lek n̄a, ire enyi ikima ibe ebilene eketọn̄ enyi mgbọ geelek, me ere enyi kpekirọ inu geege òborọ inyi Awaji, ogwu ọmọ gaalek orebe Awaji, ikitọn̄ enyi?

⁴⁵“Ikakeek ibe ke îre emi mbafieek enyi ikọ me isi kè Nte n̄a. Îre Ikan kè Mosis ogwu enyi etoon̄be ejit me lek ya obofieek enyi ikọ me isi kè Nte n̄a.

⁴⁶Ire ibe enyi mîchieek me lek inu Mosis ogebe, kè enyi echieek si me lek n̄a, mije, îre inu òfo me lek n̄a ke Mosis oge.

⁴⁷Ire, ike enyi kpechechieek me lek inu Mosis ogebe, ìre enyi ebejeje inichieek me lek ikọ nkitumu inyi enyi?”