Read obolo Jọn 6 Bible Online

Jọn 6 - obolo bible

Jọn 6

¹Mgbọ eya orakabe, Jisọs onenisaba okwaan̄ oyô Galili (eyi ekigwen si okwaan̄ oyô Taiberias).

²Ogbogbo ebi ene egọgọọk si ọmọ isaba okwaan̄ ya, mije owuwa uyeke inu ema emun̄be Jisọs orọbe mgbọ îgwabe ebi orukan̄.

³Jisọs onenije inene agba ogoon̄ ge isi isiki ikweek, ọmọ mè ebi udun̄ kan̄.

⁴Mgbọ ya îgbet mgbọ ebi Ju ekirọ mfaka ijọk Iraraka.

⁵Mgbọ Jisọs onibene chieen̄ imun̄ ogbogbo ebi ene cha ekigbuku inu me lek kan̄, inenigwen Filip ido ibe, “Ìre owa ke eji ebekọt ilep inorie òboso ife chi?”

⁶Jisọs ìdo ikọ ya isasa itọ Filip ikpọ, mije, ọmọ me lek kan̄ îwuuk lek irọriọọn̄ inu îborọ.

⁷Filip onenifọọk ibe, “Ìrere esa efit dinari iba (òrere ikpoko onyan̄ ogwu ikwaan̄ ge oborie onyan̄ jeeta) ilep fituru, ìkposo eyi ife chi geelek ebesasa ilaka ubọk me otu.”

⁸Ofifi ene me lek ebi udun̄ kan̄, òrere Anduru, ngwan̄ kè Saimọn Pita, onenitumu inyi Jisọs ibe,

⁹“Îkaan̄ gwun̄ enerieen̄ ge me ere yi òkakaan̄ asabọn owut fituru go esabe akpa balì irọ, mè asabọn ufuk irin̄ iba. Eya ìboje ire owa me lek ife chi ìwawa ikeyi?”

¹⁰Jisọs onenibe ema esi etumu enyi ife cha ibe esiki ekweek. Ife cha esisiki ikweek me inyọn̄ mbubet òjojot me ere ya. Me etete ife cha, ebirieen̄ gaalek ìre obop ene go.

¹¹Jisọs onenibọkọ fituru cha, mè inyi Awaji itọn̄, mè isa inyi ibe esa esi eche enyi ife cha ìsisiki ikweek me ere ya, mè enyi ene geelek ike îweekbe. Ubọk yaage si ke îbọkọ ufuk irin̄ iba cha, mè inyi Awaji itọn̄, mè isa inyi ibe esi eche enyi ife cha.

¹²Mgbọ otutuuk kiban̄ eriebe inorie ya ijot, Jisọs onenibe ebi udun̄ kan̄ eje ekana eteen̄ okpọkọ fituru echi etakabe isik, mè ekachieek ibe okpọkọ geege ichep.

¹³Ebi udun̄ kan̄ eteteen̄ okpọkọ fituru balì cha ife cha etakabe isik, ijojot akọp mè okwun iba.

¹⁴Mgbọ ife cha emun̄be inu ukechieen̄ ya Jisọs orọbe, ema ebebene ikitumu ibe, “Me atikọ, ene yi ore ogwu Nriran ya ogwu òbonu me linyọn̄.”

¹⁵Jisọs orọriọọn̄ ibe ke ife cha mênitet ọmọ me unye isa irọ ubọọn̄, mè ichak lek ida ibọkọ ifo inyọn̄ ogoon̄ isi ikup, ọmọ gaalek.

¹⁶Me agan̄ ikakwun̄ usen ya, ebi udun̄ kè Jisọs enenije isibi atasuk,

¹⁷mè isi inin̄ uji ge ikọp isaba okwaan̄ oyô ya ibesi Kapanọm, ema gaalek. Jisọs kpunu melek kiban̄. Egwe onenifit ema me okwaan̄ ya.

¹⁸Efet okekiwut unye unye, mè itap ogbururu me okwaan̄ oyô ya.

¹⁹Mgbọ ema ekọpbe inu òbet lek ewuuk ije go mè ìre gweregwen inin̄ emen okwaan̄ oyô ya, ema ebebene chieen̄ imun̄ Jisọs okije ukot ukot me isi mun̄ itap me lek uji kiban̄. Ukpook otetet ema enenen.

²⁰Ire, Jisọs obebe ema, “Ikatet ukpook, ke emi ke îre.”

²¹Ema etetele mè ọmọ isaba inin̄ uji. Ikafiin̄ mgbọ, ema ekọkọp itoon̄ me atasuk ere ema ebesi.

²²Me ofit iwele kan̄, ogbogbo ebi ene ìkup me atasuk agan̄ Jisọs mè ebi udun̄ kan̄ enan̄abe ya eweweek iriọọn̄ ibe ke îre uji ge gaalek okup me atasuk ya mgbọ ebi udun̄ kè Jisọs ekọpbe inan̄a; ke Jisọs ìkagọọk ema ìnin̄ uji ya.

²³Ìkafiin̄ mgbọ, usini uji ònan̄a me ama Taiberias onenikọp itoon̄ me agba lek ere ife cha ekupbe irie inorie ya mgbọ Okaan̄-ene ogbanabe isan̄a.

²⁴Mgbọ ogbogbo ebi ene cha eniweek iriọọn̄ ibe ke Jisọs ìkayaka ìkup me ere ya; ke ebi udun̄ kan̄ si kpunu, ema eneninin̄ emen uji cha, mè ikọp isaba isi Kapanọm isi iweek Jisọs.

²⁵Mgbọ ife cha eweekbe Jisọs imun̄ me usaba agan̄ okwaan̄ oyô ya, ema edodo ọmọ ibe, “Ogwu Ijejeen̄, ìre kpa mgbọ ke osaba inire agan̄ keyi?”

²⁶Jisọs ofọfọọk ema ibe, “Me atikọ, ìkare mije inu ukechieen̄ nrọbe cha ke enyi ekiweek emi, îre mije inorie ya enyi eriebe, mè irie ijot, ke enyi enikiweek emi.

²⁷Ikakpan̄ lek kinyi ìnyi ikwaan̄, mije inorie echi òkifafiat. Ìkisi ikwaan̄ ìweek inorie eyi môfukbe, mè inyi ene ugwem ikakaan̄ge itata, eyi emi Gwun̄ Ebilene mânyibe enyi. Mije, Awaji Ute ìnyi emi unye nkisa irọ ikwaan̄ ukechieen̄ chi, inyi ebi ene esa me ikeya eriọọn̄ ibe ke ọmọ îbọkọ emi itap.”

²⁸Ema enenido Jisọs ibe, “Ìre keke ke eji eberọ, inyi eji ekọt erọ inu Awaji okiweek?”

²⁹Jisọs ofọfọọk ema ibe, “Inu Awaji okiweek ìre ene ichechieek me lek ogwu Awaji oriabe inu.”

³⁰Ife cha enenido ọmọ ibe, “Ire ikeya, ìre kpasi inu ukechieen̄ ke oborọ ijeen̄ eji, inyi eji emun̄, mè echieek me lek kwun̄? Rọ-nu, inyi eji emun̄.

³¹Mije, ebi nte nte kiji mîrie inorie ònan̄a me emen inyọn̄, eyi ekigwen mana, me emen èwê, kubọk egebe me Ikpa Mbuban ibe ke Awaji ìsa inorie ònan̄a me emen inyọn̄ ikpukpo ebi ene.”[9]

³²Jisọs onenifọọk ema ibe, “Me atikọ, ìkare Mosis onyi ebi nte nte kinyi inorie ònan̄a me emen inyọn̄ ya. Îre Nte n̄a okinyi enyi atata inorie eyi ònan̄a me emen inyọn̄.

³³Mije, inorie eyi Awaji onyibe ebilene ìre ogwu ònanan̄a me emen inyọn̄ inu, mè inikinyi ebi linyọn̄ ugwem eyi ikakaan̄ge itata.”

³⁴Ema enenibe ọmọ, “Ogwu Nte, bene me mgbọ keyi fo isi, kinyi eji inorie yi usen geelek.”

³⁵Jisọs onenitumu inyi ema ibe, “Emi nre inorie eyi òkinyi ene ugwem. Ene geelek ònunu me lek n̄a ìkpoyaka iran̄ ọfiọọn̄. Ene geelek òchechieek me lek n̄a, ebek ìkpoyaka irak.

³⁶Ire, kubọk mwuukbe lek itumu inyi enyi, enyi mîsa chieen̄ kinyi imun̄ emi, ire, enyi kpechieek me lek n̄a.

³⁷Otutuuk ebi geelek Nte n̄a onyibe emi mênu me lek n̄a. Ene geelek ònunu me lek n̄a, emi m̀kpalap isan̄a.

³⁸Mije, ǹkanan̄a me emen inyọn̄ ìnu inenirọ nkeek n̄a, ǹnu inenirọ nkeek ogwu òraria emi inu.

³⁹Nkeek Awaji ogwu òraria emi inu ìre, mè emi nkafiin̄ ene geege me lek otutuuk ebi ọmọ onyibe emi. Ire, mè emi ǹjomo ema me mkpa me mgburudun̄ Usen ya.

⁴⁰Ofifi si, nkeek kè Nte n̄a ìre ke ene geelek òtotoon̄ emi ogwu Gwun̄ ejit me lek, mè ichieek me lek n̄a môkaan̄ ugwem ikakaan̄ge itata. Emi mâjomo si ene ya me mkpa me mgburudun̄ Usen ya.”

⁴¹Mije Jisọs otumube ibe ke ọmọ ore inorie eyi ònan̄a me emen inyọn̄, ebi Ju ebebene ikinunuun̄,

⁴²mè ikibe, “Ìre ìkare Jisọs gwun̄ kè Josefu ire ogwu? Eji mîriọọn̄ ogwu ute mè ogwu uga ijaan̄. Ìjeje iyaka initumu ibe ke ọmọ ìnan̄a me emen inyọn̄ inu?”

⁴³Jisọs onenibe ema, “Ikayaka ìnunuun̄ me etete kinyi.

⁴⁴Kpunu ene geege òbokọkọt inu me lek n̄a, îtata mè Nte n̄a ogwu òraria emi inu ìtataba ene ya inu me lek n̄a. Ene geelek ònunu me lek n̄a, mâjomo ene ya me mkpa me mgburudun̄ Usen ya.

⁴⁵Mîge si me emen ikpa ebi nriran ibe ke Awaji me lek kan̄ obokijeen̄ ema inu.[10] Eya orọ, ogwu òkigban̄ ikọ me otu kè Nte n̄a, mè ikikween̄ inu inan̄a me ubọk kè Nte n̄a, ogwugwa okinu me lek n̄a.

⁴⁶“Me atikọ, kpunu ene geege òrarak imun̄ Nte n̄a. Îre ogwu ònan̄a me lek Ogwu Nte gaalek omun̄ Ogwu Nte.

⁴⁷Ǹkitumu atikọ inyi enyi ibe ke ene geelek ogwu òchechieek me lek n̄a îkaan̄ ugwem ikakaan̄ge itata.

⁴⁸“Emi nre inorie òkinyi ene ugwem.

⁴⁹Ebi nte nte kinyi mîrie mana me emen èwê. Ire, ema mîkwaan̄ si.

⁵⁰Mgbọ yi, ìkpọ, inorie eyi ònan̄a me emen inyọn̄ ire eyi. Ikaan̄ ogwu irie inorie keyi, ene ya ìkpoyaka ikwu.

⁵¹Emi nre inorie ya òkinyi ene ugwem, eyi ònan̄a me emen inyọn̄. Ire ene irie inorie yi, ene ya môluk ugwem ire mgbọ ikakaan̄ge itata. Inorie yi ìre akpalek n̄a eyi mâsabe inyi me ibot ugwem ebi linyọn̄.”

⁵²Ebi Ju enanaan̄ ejit enenen, mè ibene ikiwut ifan̄a me lek kiban̄ ibe, “Ìre ene yi ìbojeje isa akpalek kan̄ inyi eji etaka?”

⁵³Jisọs otutumu inyi ema ibe, “Ǹkitumu atikọ inyi enyi ibe, ire enyi kpetaka akpalek Gwun̄ Ebilene, mè inwọ eje kan̄, enyi kpebekaan̄ ugwem me emen kinyi kubọk ge.

⁵⁴Ene geelek òtataka akpalek n̄a, mè inwọ eje n̄a, ene ya okaan̄ ugwem ikakaan̄ge itata. Emi mâjomo si ene ya me mkpa me mgburudun̄ Usen ya.

⁵⁵Mije, akpalek n̄a ìre ata inorie, eje n̄a si ìre ata inu inwọnwọ.

⁵⁶Ene geelek òtataka akpalek n̄a, mè inwọ eje n̄a, ene ya môkup me emen n̄a, emi si nkukup me emen ene ya.

⁵⁷“Ubọk Nte n̄a ogwu òkup me ugwem oriabe emi inu, emi si nluluk ugwem mije kè Nte n̄a, ikeya si, ene geelek òtataka akpalek n̄a môluk ugwem mije n̄a.

⁵⁸Akpalek n̄a yi ore inorie ya eyi ònan̄a me emen inyọn̄. Ebi nte nte kinyi mîrie mana, mè ikwaan̄ isan̄a. Ire, ene geelek òrerie inorie keyi môluk ugwem ire mgbọ ikakaan̄ge itata.”

⁵⁹Jisọs ìtumu ikọ yi mgbọ îkijeen̄ inu me uwu ntitiin̄ ebi Ju òkup me Kapanọm.

⁶⁰Mgbọ owuwa me lek ebi ìkigọọk Jisọs me udun̄ enọbe ikọ ya, ema etutumu ibe, “Eyi ìre uyọt uyọt ijejeen̄. Ìre ekene obokọt ibọkọ itap?”

⁶¹Jisọs orọriọọn̄ ibe ke ebi udun̄ kan̄ mêkinunuun̄ mije ijejeen̄ ya, mè ido ema ibe, “Ìre ijejeen̄ yi înaan̄ enyi ejit?

⁶²Ire ikeya, mgbọ enyi mêmun̄be emi Gwun̄ Ebilene nkinan̄a me ijọn̄ inene ifo emen inyọn̄ ere nkupbe me adasi mgbọ, enyi eberọrọ?

⁶³Îre Ekwukwu Awaji okinyi ene ugwem. Akpalek ikike ìkakup me lek inu geege. Ikọ chi ntumube inyi enyi okinyi ene Ekwukwu melek ugwem.

⁶⁴Ire, owuwa ene me etete kinyi kpechieek me lek n̄a.” Bene me ibebene, Jisọs îriọọn̄ ebi ekachieekge me lek kan̄, mè iriọọn̄ si ogwu òboleke ọmọ inyi ekpan̄, me etete ebi udun̄ kan̄.

⁶⁵Inenitumu inyi ema ibe, “Îre mije keyi ke ntumu inyi enyi ibe ke kpunu ene geege òbokọt inu me lek n̄a, îtata mè Nte n̄a ìtataba ene ya inu me lek n̄a.”

⁶⁶Bene me mgbọ yi, owuwa ebi udun̄ kan̄ egwugwu ikom ifon. Kpeyaka igọọk ọmọ ije ofifi.

⁶⁷Jisọs onenido akọp mè ene iba ebi Otuchieen̄ kan̄ ibe, “Ìre enyi mêgọọk ilibi itele emi si?”

⁶⁸Saimọn Pita ofọfọọk ọmọ ibe, “Okaan̄-ene, ìre ekene ke eji ebegọọk? Îre owu okaan̄ ikọ òkinyi ene ugwem ikakaan̄ge itata.

⁶⁹Eji mîchieek me lek kwun̄, mè iriọọn̄ ibe ke owu ore Ogwu Mbuban ya ònan̄a me lek Awaji inu.”

⁷⁰Jisọs ofọfọọk ema ibe, “Emi me lek n̄a ngobo enyi akọp mè ene iba. Ire, ene ge me lek kinyi ìre Yọk!”

⁷¹Jisọs ìtumu ikọ ya ikpọ isi kè Judas gwun̄ kè Saimọn Isikariọt, òrere ene ge me lek akọp mè ene iba ebi Otuchieen̄ kan̄. Ọmọ yi ore ogwu òleleke Jisọs inyi ekpan̄ me mgburudun̄ mgbọ.