Read obolo Jọn 7 Bible Online

Jọn 7 - obolo bible

Jọn 7

¹Mgbọ eyi orakabe, Jisọs onenikijijen̄e ikana me agan̄ Galili. Ìkaweek isisi agan̄ Judia mije ebi ibot ebi Ju ìkup me agan̄ ya ekiweek isasan̄a ugwem kan̄.

²Me mgbọ ijọk Uwu Nlak ogbetbe,

³ebi ngwan̄ kè Jisọs enenitumu inyi Jisọs ibe, “Yaka nan̄a me ere keyi gọọk je-nu si Judia, inyi ebi udun̄ kwun̄ ìkup me agan̄ keya eyaka egọọk emun̄ inu ukechieen̄ chi okirọ.

⁴Mije, ene geelek òkiweek ibe ebi ene eriọọn̄ ogwu ọmọ orebe ìkakirọ inu me nlelet. Eya orọ, mgbọ owu owuwuuk lek ikirọ inu ukechieen̄ chi, san̄a lek kwun̄ sibi jeen̄ otutuuk ebi linyọn̄.”

⁵Ebi ngwan̄ kè Jisọs etumu ikọ yi, mije, ema me lek kiban̄ kpechieek me lek kè Jisọs.

⁶Eya orọ, Jisọs otutumu inyi ema ibe, “Mgbọ Awaji osun̄be inyi emi ìkakem-nu. Eyi kinyi, mgbọ geelek ìre ata mgbọ.

⁷Ebi linyọn̄ kpebekọt icha enyi. Ire, ema mîcha emi, mije nkitumu inyi ema ibe ke irọrọ kiban̄ îfieek.

⁸Enyi ìgọọk ìje ìsi ijọk ya, ke emi m̀kpasi, mije, mgbọ n̄a ìkakem-nu.”

⁹Itutumu ikọ yi isan̄a, ibabia me Galili, ìkagọọk isi Judia.

¹⁰Ire, mgbọ ebi ngwan̄ kan̄ enan̄abe isi ijọk ya, Jisọs me lek kan̄ onwenween̄ lek inan̄a igọọk isi ijọk ya me Jeruselem me nlelet, ìkasan̄a lek kan̄ ìsibi me isi ene.

¹¹Sabum înirere Jeruselem, ebi ibot ebi Ju mîbebene ikiweek ọmọ, mè ikidido ibe, “Ìre ene yi ìkup me ere owa mọnọ?”

¹²Ukpatu ofolek kan̄ okekikana me etete urum ebi ene ìnunu ijọk ya. Usini ene ebe ke îre ata ene, sà usini ebe in̄-in̄, ke îre ogwu ofiaan̄.

¹³Ire, kpunu ene geege òkọkọt itumu ikọ ibak ọmọ me isi ene, mije, ema ekifieek owot me lek ebi ibot ebi Ju.

¹⁴Mgbọ otu ifuk usen ijọk ya ojebe inire ìkike iba, Jisọs onunu me oyet egep Uwu Mbuban me Jeruselem, mè ibene ikijeen̄ inu.

¹⁵Ijejeen̄ kan̄ okeke ebi ibot ebi Ju chieen̄ enenen. Ema ekekido ibe, “Ìre ene yi ìjeje iriọọn̄ inu ikeyi me ere ìkasisi ìkween̄ inu geege?”

¹⁶Jisọs ofọfọọk ema ibe, “Ijejeen̄ eyi nkijeen̄ ìkanan̄a me unye n̄a, ìnan̄a me ubọk Awaji ogwu òraria emi inu.

¹⁷Ire, ogwu iweek irọrọ nkeek eyi Awaji, ene ya môriọọn̄ mè ìre inu nkijeen̄ ìnan̄a me ubọk Awaji, mè ìre me unye n̄a gaalek.

¹⁸Mije, ogwu geelek òkitumu ikọ me unye eyi kan̄ ìkiweek umin inyi lek kan̄. Ire, ogwu geelek òkiweek ibe ebi ene esa umin enyi ogwu òraria ọmọ inu, ene ya ore ogwu òkitumu atikọ, kpunu ofiaan̄ geege me emen ene ya.

¹⁹Ìre Mosis ìkafat ìnyi enyi Ikan? Ire, kpunu ene geege me lek kinyi òkisun̄ Ikan cha. Ìre keke orọ enyi ekiweek ikpakpan̄ emi?”

²⁰Ife cha efọfọọk ọmọ ibe, “Ijo erumun̄ òwa me ibot kwun̄! Ìre ekene okiweek ikpakpan̄ owu?”

²¹Jisọs otutumu inyi ema ibe, “Ikwaan̄ ukechieen̄ ge gaalek nrọbe me etete kinyi me Usen Mbuban oke otutuuk kinyi chieen̄.

²²Enyi mîkifieek bọn kinyi afi me Usen Mbuban igọọk me lek Ikan Mosis onyibe enyi.[11] (Ire, me atikọ, orọmijọn̄ yi ìnan̄a me ubọk ebi nte nte kinyi me ukot ikaan̄, ìkanan̄a me ubọk kè Mosis me lek kan̄.)

²³Ire enyi ikifieek bọn kinyi afi me Usen Mbuban, inyi enyi ekafiat Ikan Mosis onyibe enyi ofolek ifefieek afi, ìre keke orọ enyi ekinaan̄ ejit me lek n̄a mije nrọbe inyi otutuuk lek ene inye me Usen Mbuban?

²⁴Ikayaka ìkisa inu chieen̄ kinyi okimun̄ gaalek ìfieek oyerebet ìnyi ene. Ìkisibi unen oyerebet ìgọọk me lek atikọ.”

²⁵Me ike mgbọ ya, usini ebi Jeruselem ebebene ikidido lek kiban̄ ibe, “Ìre ìkafat ìre ene yi ke ebi ibot ebi Ju ekiweek ikpakpan̄?

²⁶Ìkpọ ma, ke ọmọ ire ogwu òkitumu ikọ inyi ebi ene me eden̄ ama, kpunu ogwu òkọkọt isan̄a amọn inyi. Ìre ebi ibot ebi Ju mîra iweek iriọọn̄ ibe ke ene yi ore Karais ya me atikọ mọnọ[12]?

²⁷Mgbọ Karais ya mônube, kpunu ogwu òboriọọn̄ ere înan̄abe. Ire ogwugwu, eji mîriọọn̄ ere înan̄abe.”

²⁸Jisọs okukup me emen Uwu Mbuban ya ere îkijeen̄ ebi ene inu, mè itaan̄ ukpo itumu ibe, “Iin̄, enyi mîriọọn̄ emi, mè iriọọn̄ si ere nnan̄abe. Ire, ǹkanu me ere yi me unye eyi lek n̄a, eraria emi inu. Ogwu òraria emi inu ore ogwu atikọ. Ire, enyi kperiọọn̄ ọmọ.

²⁹Emi nriọọn̄ ogwu òraria emi inu, mije, ǹnan̄a me lek kan̄ inu. Îre ọmọ oria emi inu.”

³⁰Mgbọ ebi ibot ebi Ju cha enọbe ikọ Jisọs otumube, ema eweweek itetet ọmọ me ubọk unye isi ikpan̄. Ire, kpunu ogwu òkọkọt ije isi itet ọmọ, mije, mgbọ mkpa kan̄ ìkakem.

³¹Ire, owuwa ene me etete urum ene cha echechieek me lek kan̄, mè ikibe, “Ire ogwu Mesaya ya inu, ìre môrọ uyeke uyeke inu ijejeen̄ igak echi ene yi orọbe?”

³²Mgbọ ebi Farisi enọbe ubọk owuwa ene ekitumu ata ikọ ikeyi ibak Jisọs, ema melek ebi ibot ngwugwa eraria ebi ìkibem Uwu Mbuban ibe esi etet Jisọs me ubọk unye esa enu inyi ekpan̄.

³³Mgbọ ebi ife cha enube, Jisọs otutumu ibe, “Emi m̀bagọọk enyi ikup sọnja mgbọ, mè iyaka ifo igọọk ogwu òraria emi inu.

³⁴Mgbọ keya, enyi mêweek emi, ire, enyi kpebekọt iweek emi imun̄. Ere mbakup, enyi kpebekọt inu.”

³⁵Ebi ibot ebi Ju ekekitumu me lek kiban̄ ibe, “Ìre ere owa ke ogwu enerieen̄ yi obosi eyi eji kpebekọt iweek ọmọ imun̄? Ìre ìbosi igọọk ebi kiji ebi ìluk me ido ebi Giris ikup, mè ikijeen̄ ebi Giris cha inu mọnọ?

³⁶Eyi îtumube ibe ke eji mêweek ọmọ, ire, ke eji kpebekọt iweek ọmọ imun̄, mè ibe si ke ere ọmọ obokup, ke eji kpebekọt inu, ìre ikọ kechi ìsibi keke ni?”

³⁷Me òta usen ijọk ya, eyi òrere usen òmimin ichit me lek ijọk Uwu Nlak ya, Jisọs onanan̄a ikeke, mè ikitaan̄ ukpo itumu inyi ebi ene ibe, “Ene geelek ebek orakbe, inu me lek n̄a ininwọ mudim.

³⁸Ene geelek òchechieek me lek n̄a, ogbuuruk eyi mun̄ òkinyi ene ugwem môkinan̄a me ibot ejit ene ya ikigbuk isibi, kubọk egebe me emen Ikpa Mbuban.[13]”

³⁹Jisọs ìtumu ikọ ya ibak Ekwukwu Awaji ogwu ebi geelek ìchechieek me lek kan̄ mêbọkọbe. Mege inire ike mgbọ Jisọs okitumu ikọ ya, Awaji ìkanyi-nu ebi ìchechieek me lek kan̄ Ekwukwu Mbuban, mije, Awaji ìkabene-nu Jisọs ìfo inyọn̄ ìsi ìtap me irek ujamgbugbo.

⁴⁰Mgbọ ebi ife cha enọbe ikọ ya Jisọs otumube, usini me lek ebi urum ene cha ekekitumu ibe, “Me atikọ, ogwu enerieen̄ yi ore ogwu Nriran ya ogwu òbonunu.”

⁴¹Usini me lek kiban̄ ebebe, “Îre ọmọ ore Karais ya!” Ire, usini kiban̄ ekekido ibe mè ìre Karais ìbojeje inan̄a me Galili;

⁴²ke Ikpa Mbuban ìtumu ibe ke Karais ya ìbonan̄a isibi me owot iman kè Debit me Beteleyem, ama ere emanbe Debit.

⁴³Sa me ikeya, ifan̄a oninin̄ me etete ife cha, mije kè Jisọs.

⁴⁴Usini ene eweweek itetet ọmọ me ubọk unye isi ikpan̄. Ire, kpunu ogwu òjeje inin̄ ọmọ lek isi itet.

⁴⁵Mgbọ ebi ìkibem Uwu Mbuban cha egwube ikom ika, ebi ibot ngwugwa mè ebi Farisi enenido ema ibe, “Ìre keke orọ enyi kpetet ogwu enerieen̄ ya isa inu?”

⁴⁶Ema efọfọọk ibe, “Eji kperarak imun̄ ene geege òtutumu ikọ kubọk ogwu enerieen̄ ya okitumu.”

⁴⁷Ebi Farisi cha edodo ebi mbem cha ibe, “Ìre ene ya îfiaan̄ enyi si itap ebot?

⁴⁸Ìre îkaan̄ ene ge me etete ebi ibot ebi Ju, mè ìyaka ire eji ebi Farisi ogwu enyi eweekbe imun̄ ibe ke îchieek me lek ogwu enerieen̄ yi?

⁴⁹Me atikọ, kpunu ebi ibot ebi Ju geege ìchechieek me lek ene yi. In̄-in̄, îre urum ebi ikike chi ekariọọn̄ge inu geege me emen Ikan kè Mosis gaalek echieek me lek ene yi. Unaan̄-ejit Awaji me ibot ife chi okupbe.”

⁵⁰Ogwu Farisi ge ekigwen Nikodimọs, ogwu òsisi lek kè Jisọs me eririeen̄ ya, onenido ebi ibot cha melek kan̄ ekupbe me ere ya ibe,

⁵¹“Ìre înen me Ikan kiji ibe eji etip ene oyerebet me mgbọ eji kpenọnọ ikọ otu ene ya, mè iweek iriọọn̄ inu ene ya okirọ?”

⁵²Ema efọfọọk Nikodimọs ibe, “Ìre owu si ònan̄a me agan̄ Galili? Ire òkariọọn̄, kpọk si kween̄ inu egebe me Ikpa Mbuban jaan̄ lek, ke owu môweek imun̄ ibe ke kpunu ere geege egebe ibe ke îkaan̄ ogwu Nriran òbonan̄a me Galili isibi.” [

⁵³Eya iraraka, otutuuk ene ekpọkpọk iyat me ere ya, ogwu ikup, ofo uwu kan̄.