Read obolo Jọn 9 Bible Online

Jọn 9 - obolo bible

Jọn 9

¹Mgbọ Jisọs okije me oniin̄, imumun̄ ogwu enerieen̄ ge òrere ǹnàan̄ bene me imaman kan̄.

²Ebi udun̄ kan̄ enenido ọmọ ibe, “Ogwu Ijejeen̄, ìre ijo inu kè ekene orọ emanbe ogwu enerieen̄ yi ǹnàan̄? Ìre ijo inu eyi kan̄ gaalek orọ? Sà ìre ijo inu eyi ogwu ute mè ogwu uga?”

³Jisọs ofọfọọk ema ibe, “Ìkare mije ijo inu ogwu enerieen̄ yi orọbe, ìkarere si mije ijo inu ogwu ute mè ogwu uga erọbe, orọ mè eman ogwu enerieen̄ ya ǹnàan̄. Ire, eman ogwu enerieen̄ yi ǹnàan̄, inyi ebi ene emun̄ ikwaan̄ ukechieen̄ eyi Awaji oborọ me emen ogwu enerieen̄ yi.

⁴Eya orọ, mgbọ keyi îrebe ikarek, îkup me uyọt ibe emi melek kinyi esi ikwaan̄ enyi ogwu òraria emi inu. Mije, eririeen̄ òkinu mgbọ ene geege ìkpoyaka ikọt isi ikwaan̄.

⁵Mgbọ keyi nkupbe me linyọn̄, emi nre utoon̄ linyọn̄.”

⁶Jisọs itutumu ikọ ya isan̄a, ichocho ataak igwook me ijọn̄, mè ifuku ataak ya melek ntitaak, inyi ikup ibat ibat, mè ikọbọ isa ichiọọk ogwu enerieen̄ ya me chieen̄,

⁷mè itumu inyi ibe, “Je si gwọk isi kwun̄ me emen udọn̄ mun̄ ekigwen Silowam” (eyi òsisibi “Eraria”). Ogwu enerieen̄ ya ojeje isi igwọk isi me emen udọn̄ mun̄ ya. Chieen̄ kan̄ obobolo. Ibebene ikimọọn̄ inu, mè igwu ikom ifo.

⁸Ebi melek kan̄ elukbe me ere ge, mè ebi ìrarak imun̄ ọmọ okikweek me agba oniin̄ ibeek inu ebebe, “Ìre ìkafat ìre ogwu enerieen̄ òkikup me agba oniin̄ ikibeek inu ya ore ogwu?”

⁹Usini ene ebebe ke îre ọmọ. Usini ene ebebe ke ìkare ọmọ; ke ogwugwu ìbebet lek kan̄. Ire, ogwu enerieen̄ ya okekitumu ibe ke ọmọ ore ene ya.

¹⁰Ebi ife cha enenido ọmọ ibe, “Ìre chieen̄ kwun̄ ìjeje ichili, mè owu òkomọọn̄ inu?”

¹¹Ogwu enerieen̄ ya ofọfọọk ibe, “Enerieen̄ ge ekigwen Jisọs ocho ataak igwook me ijọn̄, mè ifuku ntitaak melek ataak ya, mè ikọbọ ichiọọk emi me chieen̄, mè ibe emi ǹje ǹsi ǹgwọk isi me udọn̄ mun̄ Silowam. Nsisi igwọk isi, mè ibene ikimọọn̄ inu mgbọ yaage.”

¹²Ife cha enenido ọmọ ibe, “Enerieen̄ ya ìkup me owa?” Ifọfọọk ibe ke ọmọ ìkariọọn̄ ere îkupbe.

¹³Ebi ene enenisa ogwu ǹnàan̄ Jisọs ogwabe ya inu me isi ebi Farisi.

¹⁴Usen Jisọs ofukube ntitaak isa igwa chieen̄ ogwu ǹnàan̄ ya ìre Usen Mbuban.

¹⁵Ebi Farisi cha enenikido ogwu enerieen̄ ya ibe ikpa-nu ubọk îsabe ibene ikimọọn̄ inu. Ogwu enerieen̄ ya onenikpa inyi ema ibe ke ogwu enerieen̄ ya ìkọkọbọ ntitaak ichiọọk ọmọ me chieen̄, ọmọ osisi igwọk isi, mè ibene ikimọọn̄ inu.

¹⁶Usini ebi Farisi cha ebebe, “Ire ikeya, ogwu òrọrọ inu ya ìkanan̄a me lek Awaji, mije, ìkasun̄ ikan Usen Mbuban.” Ire, usini kiban̄ ekekido ibe, “Ìre ogwu ijo ìbojeje ikọt irọ ikpele inu ukechieen̄ òkup ikeyi?” Sa me ikeyi, wọlọwọlọ oninin̄ me etete kiban̄. Ema echeche lek irek iba.

¹⁷Ebi Farisi cha enenido ogwu enerieen̄ ya ibe, “Ke chieen̄ kwun̄ ke ene ya ochili. Ìre keke ke owu okeek ofolek ene ya?” Ogwu enerieen̄ ya ofọfọọk ibe, “Ene ya ìre ogwu nriran.”

¹⁸Ebi ibot ebi Ju chi kpekọt ichieek si ibe ke îkaan̄ mgbọ ogwu enerieen̄ ya orebe ǹnàan̄, mè iyaka inibene ikimọọn̄ inu. Eya orọ, ema eraria ikwaan̄ igwen ogwu ute mè ogwu uga.

¹⁹Mgbọ ogwu ute mè ogwu uga enube, ebi ibot ebi Ju cha enenido ema ibe, “Ìre gwun̄ kinyi ire eyi? Ìre ogwugwu ke enyi ebe ke eman ǹnàan̄? Ìre ìjeje iyaka inikimọọn̄ inu mgbọ keyi?”

²⁰Ife cha efọfọọk ema ibe, “Eji mîriọọn̄ ibe ke gwun̄ enerieen̄ yi ìre gwun̄ kiji, mè iriọọn̄ si ibe ke eman ọmọ ǹnàan̄.

²¹Ire, eji kperiọọn̄ ike îsabe ibene ikimọọn̄ inu. Eji kperiọọn̄ si ogwu òrọrọ inyi chieen̄ kan̄ ichili. Enyi me lek kinyi, ìdo ọmọ ma, mije, îmin iso ogwu òbokọt itumu ikọ ibot kan̄.”

²²Ogwu ute mè ogwu uga ya etumu ikọ ya, mije, ema ekifieek owot me lek ebi ibot ebi Ju. Mije ebi ibot ebi Ju mîwuuk lek itumu ifieek ibe, ene geelek òtutumu isibi ibe ke Jisọs ore Karais ya, ke ebelalap ene ya isibi me uwu ntitiin̄ kiban̄.

²³Ukpook ya orọ mè nte ogwu enerieen̄ ya mè nga ogwu enerieen̄ ya etumu ibe ke gwun̄ kiban̄ îmin inin̄ ene, mè ebi ibot ebi Ju cha edo ọmọ ikọ me otu kan̄ gaalek.

²⁴Ebi Ju enenikpọk igwen ogwu enerieen̄ ya òso mgbọ iba, mè itumu inyi ibe, “Tumu atikọ, mè nyi Awaji umin. Mije, eji mîriọọn̄ ibe ke enerieen̄ yi, ogwu otumube ibe ke îre ọmọ ogwa owu, ìre ogwu ijo.”

²⁵Ogwu enerieen̄ ya ofọfọọk ibe, “Emi ǹkariọọn̄ mè ene ya ìre ijo ene, mè ìkare. Ire, inu ge gaalek nriọọn̄be ìre: Me adasi mgbọ, emi ìre ogwu ǹnàan̄. Ire, me mgbọ keyi, emi gwa ǹkimọọn̄ inu!”

²⁶Ema enenido ọmọ ibe, “Ìre keke ke îrọ owu me lek? Ìre ìjeje ichili owu chieen̄?”

²⁷Ogwu enerieen̄ ya ofọfọọk ibe, “Mwuuk lek ikpa inyi enyi, enyi kpeweek igbagban̄. Keke orọ enyi eweekbe ikpọkpọk inọ òso mgbọ iba? Ìre enyi si ekiweek igọgọọk ikana ebi udun̄ ene ya?”

²⁸Ebi ibot ebi Ju cha ebebene ikitumu ikọ unyechieen̄ inyi ogwu enerieen̄ ya, mè ibe ọmọ, “Owu ore ogwu udun̄ kan̄. Eyi kiji, eji ìre ebi udun̄ kè Mosis.

²⁹Eji mîriọọn̄ ibe ke Awaji îtumu ikọ inyi Mosis. Ire ogwu enerieen̄ yi, eji kperiọọn̄ ere înan̄abe inu.”

³⁰Ogwu enerieen̄ ya ofọfọọk ibe, “Lei, ikayaka ìtumu ma. Ìre ene ogwu òchichili emi chieen̄ ke enyi ekibe ke enyi kperiọọn̄ ere înan̄abe inu?

³¹Eji otutuuk mîriọọn̄ ibe ke Awaji ìkakigban̄ utọn̄ me lek uriaak ebi ijo ife; ke ìkigban̄ utọn̄ me lek uriaak ebi ìkimin ọmọ, mè ikirọ inu ọmọ okiweek.

³²Karake inyọn̄ obenebe, ìre ekene orak inọ ibe ke îkaan̄ ogwu òrarak irọ inyi chieen̄ ogwu emanbe ǹnàan̄ ichili?

³³Ire ogwu enerieen̄ yi kpomonan̄a me lek Awaji inu, kpomokọt irọ inu geege.”

³⁴Ebi ibot ebi Ju cha egagana inyi ogwu enerieen̄ ya ibe, “Ìre owu, ene ogwu òlọlọ ijọn̄ bene me karake emanbe owu oyaka ibonikijeen̄ eji inu?” Ema elalap ogwu enerieen̄ ya isibi me emen uwu ntitiin̄ kiban̄.

³⁵Jisọs oneninọ ibe ke ebi ibot ebi Ju mîlap ogwu enerieen̄ ya isibi me uwu ntitiin̄ kiban̄. Mgbọ îmun̄be ogwu enerieen̄ ya, inenido ọmọ ibe, “Ìre ochieek me lek Gwun̄ Ebilene?”

³⁶Ogwu enerieen̄ ya otutumu inyi Jisọs ibe, “Ogwu Nte, ìre ekene ore ene ya? Tumu nyi emi, inyi ǹchieek me lek.”

³⁷Jisọs ofọfọọk ogwu enerieen̄ ya ibe, “Owu omun̄ ene ya mgbọ keyi. Me atikọ, îre ene ya okitumu ikọ melek kwun̄ mgbọ yi.”

³⁸Ene ya otutumu inyi Jisọs ibe, “Ogwukaan̄ n̄a, nchieek me lek kwun̄.” Ikọ ya òkitata ene ya me otu, itọtọbọ ibot inyi Jisọs.

³⁹Jisọs onenitumu ibe, “Emi ǹnu me linyọn̄ keyi inenikpọk mbum inu ebilene ekirọ, inyi, ebi ǹnàan̄ esa me ikeya emọọn̄ inu, mè ebi ìkimọọn̄ inu eyaka ekana enin̄ ǹnàan̄.”

⁴⁰Usini ebi Farisi ebi ìkukup me ere ya, mè inọ ikọ ya Jisọs otumube, enenido ọmọ ibe, “Ìre òbebe? Ìre eji mîgọọk inin̄ ǹnàan̄ si?”

⁴¹Jisọs ofọfọọk ema ibe, “Mebe enyi ìre ebi ǹnàan̄, ene geege kpomotip enyi oyerebet ijo inu. Ire, mije enyi ekitumu ibe ke enyi mîkaan̄ chieen̄ isasa imọọn̄ inu, itip-oyerebet ijo inu îbia me ibot kinyi.”