Read obolo Ikwaan̄ 17 Bible Online

Ikwaan̄ 17 - obolo bible

Ikwaan̄ 17

¹Pọọlu mè Sailas enenije itibi emen ama Amfipolis mè Apolonia, mè inire ama Teselonaika. Uwu ntitiin̄ ebi Ju ge òwa me ama ya.

²Pọọlu ojeje isi uwu ntitiin̄ ebi Ju ya, ubọk îkiwuuk lek irọ me ere geelek îsibe. Usen Mbuban ita ke îkup me ere ya ikitumu ikọ inyi ife cha inan̄a me inu egebe me Ikpa Mbuban,

³mè ikikpa iwele inyi ema ibe ke mîwuuk lek ige ibe ke ogwu Awaji otọkọbe aran̄ me ibot môbọkọ ufialek, mè ijomo me mkpa. Sa me ikeya ke îtumu inyi ema ibe, “Jisọs yi ogwu nkitumu ikọ ofolek inyi enyi, ọmọ ore ogwu Awaji otọkọbe aran̄ me ibot ya.”

⁴Usini me lek ebi Ju cha echechieek ikọ ya, mè ikana igọọk Pọọlu mè Sailas. Ubọk yaage si, owuwa ebi Giris, ebi ukpook Awaji okupbe me emen egọgọọk ichieek. Owuwa ebibaan̄ ebi eriọọn̄be isi me ama ya si mîgọọk ichieek.

⁵Ire, ebi ibot ebi Ju ekakaan̄ njijọ ejit me lek kè Pọọlu mè Sailas, mije owuwa ebi ene echieekbe ikọ kiban̄, mè inin̄ emen ewe isi ititen̄e ebi ijo ife, mè ebi una ubọk ikwaan̄ igbaalek kiban̄, mè ibene ikpele ufialek me emen ama ya. Ema egbugbuku inin̄ uwu kè Jasin isi iweek Pọọlu mè Sailas ibesan̄a isibi inyi ebi ama.

⁶Mgbọ ekamun̄ge Pọọlu mè Sailas me uwu ya, ema etataba Jasin mè usini bọn Nte isa isi me isi ebi ibot ama, mè ikitaan̄ ukpo itumu ibe, “Ebi ife chi ebi ìkifiat otutuuk linyọn̄ igwook mînu me ama kiji,

⁷Jasin obọbọkọ ema itap me uwu kan̄. Ife chi ere ebi ìkifiat ikan geelek ogwu Sisa okitap, mè ikibe ke ofifi ogwu ubọọn̄ ge ọmọ òwa, ogwu ekigwen Jisọs.”

⁸Mgbọ ebi ibot ama, mè ebi ogbogbo ene cha enọbe ikọ ya, okput obebene, ama odidimi.

⁹Ebi ibot ama mè ebi ogbogbo ene cha efefieek mkpukpe inyi Jasin mè ebi melek kan̄ kubọk ata-ikọ ibe ke ema kpebeyaka itap ufialek ofifi. Ema ekpekpe mkpukpe cha. Ife cha etetele inyi ema efon.

¹⁰Egwe ififit, bọn Nte cha esasan̄a Pọọlu mè Sailas isibi me ama ya ibe esi Beria. Mgbọ yaage ema erebe Beria, ema eraraka isi uwu ntitiin̄ ebi Ju òkup me ama ya.

¹¹Ire, ebi Beria kpekaan̄ ijo ejit kubọk ebi Teselonaika ekaan̄be. Ema mîchili ejit ibọkọ ata etip ya, mè ikaan̄ ikpele ulọk me lek, mè ikiwọlọ Ikpa Mbuban usen geelek ikikpọ mè ìre ikọ Pọọlu okitumu cha ìre atikọ.

¹²Sa me ikeya, owuwa ebi Ju echechieek me lek ata etip ya. Owuwa ebibaan̄ ebi Giris ebi eriọọn̄be erieen̄ me ama, mè ebirieen̄ kiban̄ si mîgọọk ichieek.

¹³Mgbọ ebi Ju ìkup me Teselonaika enọbe ibe ke Pọọlu òkitumu si ikọ Awaji me Beria, ema enanan̄a inu Beria, mè initumu ikọ ifiat ebi ene ibot, mè ibene itap ufialek.

¹⁴Mgbọ yaage, bọn Nte ìkup me Beria esasan̄a Pọọlu isibi me ama ya iria ifo agba okwaan̄ ile. Ire, Sailas mè Timọti ekukup me Beria.

¹⁵Ebi ìsasa Pọọlu ije iban egọgọọk ọmọ ije inire ama Atens, mè igwu ikom ifo Beria. Mgbọ ema ebefo, Pọọlu ololook ema ibe etumu enyi Sailas mè Timọti ibe egwat lek enu me lek kan̄ me Atens.

¹⁶Mgbọ Pọọlu okupbe me Atens ikikpọ ibe Sailas me Timọti enu, ejit kan̄ îsisik enenen mije owuwa isi yọk îmun̄be me ama ya.

¹⁷Mije keya, ikekinin̄ uwu ntitiin̄ ebi Ju òkup me ama ya ikisi itumu ikọ Awaji melek ebi Ju mè ebi ofifi ido ìkakaan̄ ukpook Awaji me emen, mè ikisi itumu si me oyet ewe usen geelek melek ebi geelek îchichinibe.

¹⁸Mgbọ Pọọlu okitumu ikọ Awaji ikana ama ya, usini ebi uga ifuk-ibot ìnan̄a me otu ogbo kè Epikurọs mè otu ogbo ebi ekigwen ebi Sitọyik ebebene ikigọọk ọmọ iwut ifan̄a. Usini kiban̄ ekekido ibe, “Ìre keke ke ogwu una ifuk-ibot yilọ okiweek itutumu?” Usini kiban̄ ebebe ke ìkup kubọk ìkitumu ikọ ofolek awaji ebi ofifi ido. Ema etumu ikọ ya mije Pọọlu okilook ema ata etip ofolek kè Jisọs, mè ikijeen̄ si inu ofolek ijojomo me mkpa.

¹⁹Ema enenisa Pọọlu isi me emen ntitiin̄ ebi Oru eyi ekigwen Ariopagọs. Ebi ife cha enenibe Pọọlu, “Tumu aya ijejeen̄ okijeen̄ yi nyi eji nu, inyi eji enọ.

²⁰Mije, aya ijejeen̄ kwun̄ yi ìkup eji me utọn̄ uyeke uyeke. Eji ekiweek irọriọọn̄ inu ijejeen̄ chi osibibe.”

²¹(Otutuuk inu ebi Atens mè ebi ichen geelek ìluluk ama kiban̄ ekima irọrọ ìre ifafiat mgbọ ikup ikitumu ikọ ofolek aya ifuk-ibot, mè ikigban̄ si ojelek ikọ kecha.)

²²Pọọlu onanan̄a ikeke me isi ebi ntitiin̄ Ariopagọs ya, mè itumu inyi ema ibe, “Enyi ebi Atens, emi mmun̄ ibe, me oniin̄ geelek, ke enyi ìre ebi ìmama ikekitọbọ ebum.

²³Mije, mgbọ nkijijen̄e ikana me ama kinyi, mè ikikpọ ere enyi ekitọbọ ebum, mmun̄ ntook ge egebe me lek ibe, EYI ÌKUP INYI AWAJI EYI EKARIỌỌN̄GE. Me mgbọ keyi, inu ya eyi enyi ekitọbọ ebum inyi kubọk inu enyi ekariọọn̄ge ke mbatumu inu ofolek inyi enyi.

²⁴“Awaji ogwu òrorom linyọn̄, mè otutuuk inu geelek òkup me emen kan̄, ọmọ ore Okaan̄-ene ogwu òkaan̄ emen inyọn̄ mè linyọn̄ keyi. Awaji ya ìkakiluk me uwu mbuban echi ubọk ebilene onamabe.

²⁵Kpunu si inu geege ònanan ọmọ, eyi ebilene mêkọtbe isi ikwaan̄ inyi ọmọ, inyi ọmọ inan̄a me ikeya ikaan̄ inu ya. Mije, îre ọmọ me lek kan̄ okinyi ebilene ugwem, mè efuuk, mè otutuuk inu geelek òkup esese esese.

²⁶Inan̄a me lek adasi ene ge îrombe ke îsan̄a otutuuk ido ebilene isibi ibe eneluk ejot otutuuk linyọn̄, mè isun̄ mgbọ inyi ebi ido geelek, mè idọmọ si ere inyi ido geelek eluk.

²⁷Awaji ìrọ inu yi inyi ebilene esa me ikeyi eweek ọmọ, mè elibi egọọk ọmọ. Usini mgbọ, sa me ikeya, mêweek ọmọ imun̄, ubọk geelek ọmọ ikajọn̄ọge ere me lek kiji me ge me ge.

²⁸‘Mije, me emen kan̄ ke eji ekiluk ugwem, mè ikijijen̄e ikana, mè ire si ebilene eyi eji erebe.’ Ikeya si ke usini ebi ìge usem kinyi etumu ibe, ‘Eji ìre bọn kan̄.’

²⁹“Eya orọ, kubọk eji erebe bọn Awaji, ìkagbe ibe eji ekeek ibe ke Awaji ìbet lek inu alata araran̄ mè ìre alata okuket, mè ìre ewuuk, echi ebilene esabe ubọk kiban̄ irom igọọk me ifuk-ibot kiban̄ mè ubọk ikwaan̄ kiban̄.

³⁰Awaji îkpọ chieen̄ ilọ me lek inu chi geelek ebilene erọbe mgbọ òraraka me ekariọọn̄ge. Ire, mgbọ keyi, Awaji ìkinyi otutuuk ene me ere geelek ikan ibe egwu ekom, mè etele ijo inu kiban̄ geelek.

³¹Mije, Awaji îsan̄a egwe ge isun̄, mgbọ ìbosa me ata irọrọ isibi oyerebet me ibot otutuuk ebi linyọn̄. Ogwu òbosibi oyerebet yi ìre ogwu enerieen̄ ge Awaji ogobobe isibi. Ijojomo me mkpa eyi ene ya ojomobe ore inu ata-ikọ ibe ke ene ya ore ogwu Awaji ogobobe isibi me atikọ.”

³²Mgbọ ema enọbe ikọ ijojomo me mkpa ya, usini kiban̄ echachak ikọ ya ifiin̄ me lek imọm. Ire, usini kiban̄ ebebe mè Pọọlu iyaka inu inikpa ikọ ya inyi ema ofifi usen.

³³Pọọlu oneninan̄a me ere ntitiin̄ ya isibi.

³⁴Usini ebirieen̄ echechieek, mè ibene ikigọọk Pọọlu. Ene ge me lek ebirieen̄ cha ìre Dayọnisiọs ogwu oru Ariopagọs. Ogwu enenwaan̄ ge ekigwen Damaris, mè owuwa ebi ofifi ene si mîgọọk ichieek, mè igọọk Pọọlu.