Read obolo Ikwaan̄ 24 Bible Online

Ikwaan̄ 24 - obolo bible

Ikwaan̄ 24

¹Usen go iraraka, Ananayas ogwu òban Awaji oneninan̄a me Jeruselem inu me Sisaria, ọmọ melek usini ebi ugane ama, mè ogwu usọ ikan ge ekigwen Tetulọs, ibenikpa otutuuk ikọ ema ekaan̄be ikeme Pọọlu me isi kè Filikis ogwu ibot mkpulu.

²Mgbọ ema enube me isi ogwu ibot mkpulu ya, ogwu ibot mkpulu ya oraria ibe esa Pọọlu enu. Mgbọ Pọọlu onube, Tetulọs onenibene ikọ kan̄ itumu me isi ogwu ibot mkpulu ya, mè ibe, “Filikis ogwu otutuuk ene ekinyi umin! Eji otutuuk ene mîluk me esuuk ijọn̄ọ mgbọ me irak ubọk mkpulu kwun̄. Owu osasa ata ifuk-ibot kwun̄ inen̄e si owuwa inu òlọlọ isun̄ itat me ido yi.

³Me oniin̄ geelek, eji otutuuk ene me ere geelek mîbele ejit, mije inu chi owu orọbe, mè ibe owu, usọ! Owu onirọ!

⁴Me nkafiatge mgbọ kwun̄, ǹkibeek owu ibe, soso, nye lek kat ejit gban̄ mgbidim ikọ keyi eji ebetumu.

⁵“Adasi irek, eji emun̄ ogwu enerieen̄ yi kubọk ogwu òkitap uyọrọlek. Ene yi ìkitap uyọrọlek, mè òto etim ijọn̄ me etete ebi Ju me ere geelek îsibe me linyọn̄. Ọmọ gwu ore ogwu ibot me otu ogbo ebi ìkigọọk ogwu Najeret ge.

⁶Ene yi îkat ejit iraka inin̄ emen Uwu Mbuban ibosi ichaka mbuban me lek uwu ya. Eji etetet ọmọ, [mè ibesibi ọmọ oyerebet me ibot igọọk me lek Ikan kiji.

⁷Ire, Lisias ogwu ibot otutuuk ebi akọn̄ osasa ebi akọn̄ inu, mè inisa me unye ubọk ibọkọ ọmọ isan̄a me ubọk kiji,

⁸mè inyi ida ibe ebi geelek ìkakaan̄ inu ebetumu ikeme ọmọ enu me isi kwun̄.] Ire owu me lek kwun̄ odo ọmọ ikọ, owu môweek imun̄ me otu kan̄ gaalek ibe ke otutuuk ikọ eji ekitumu ikeme ọmọ ìre atikọ.”

⁹Otutuuk ebi Ju ìkup me ere ya egọgọọk itap otu, mè itumu ibe ke ikọ chi etumube ìre atikọ.

¹⁰Ogwu ibot mkpulu ya oneniwuwum ubọk inyi Pọọlu ibe itumu ikọ. Pọọlu otutumu inyi ogwu ibot mkpulu ya ibe, “Emi nriọọn̄ ibe ke owu osibi oyerebet inyi owuwa ene me ido yi owuwa acha. Eya orọ, ejit îbele emi itutumu ikọ ibot n̄a me isi kwun̄.

¹¹Do, ke mêtumu inyi owu ibe, me ikarakage akọp mè usen iba chereyi, emi nje isi Jeruselem ibasi itọbọ ebum inyi Awaji.

¹²Ebi ìkitoon̄ emi ikọ mgbọ keyi kpemun̄ emi nkigọọk ene geege iwut ifan̄a me Uwu Mbuban, kpemumun̄ si ubọk nkitap wọlọwọlọ me etete ebi ene me emen uwu ntitiin̄, mè ìyaka ire me ofifi ere geege me emen ama yi.

¹³Me atikọ, me lek otutuuk ikọ chi ife chi ekitumu itoon̄ emi, kpunu inu geege eyi ene geege me lek ife chi obokọt ichak ubọk me lek ibe ke îre ikan eyi emi nrọn̄be ire eyi.

¹⁴Ubọk geelek, emi nchieek me isi kwun̄ ibe ke ǹkitọbọ ebum inyi Awaji ebi nte nte kiji igọọk me ijejeen̄ eyi Oniin̄ ya eyi ema chi ekibe ke îre ijo otu ogbo. Emi nchieek si me lek otutuuk inu geelek òjeje itat me lek Ikan kè Mosis, mè inu egebe me emen ikpa ebi nriran.

¹⁵Emi ǹkaan̄ si ikpọchieen̄ yaage eyi ife chi ekaan̄be me lek Awaji ibe ke otutuuk ebi ìkwakwaan̄ mêjomo me mkpa, ebi ata irọrọ mè ebi ijo irọrọ.

¹⁶Mije keyi ke nkisa iluluk ugwem n̄a mgbọ geelek me isi Awaji mè isi ebilene me oniin̄ eyi ejit n̄a kpofieekbe emi ikọ.

¹⁷“Emi nnan̄a me ido kiji ijọn̄ọ acha, mè inika inu Jeruselem ibaniche owuwa uche inyi ebi kiji, mè igwa si ngwugwa igọọk me lek orọmijọn̄ kiji.

¹⁸Ǹdadasi ifaka mfaka igwọk-lek, mè itana si igọọk me lek Ikan kiji sabum njebe isi inin̄ emen Uwu Mbuban isi igwa ngwugwa ya, eyi ema enube inimun̄ emi me lek. Ebi ene kpefan̄a igọọk emi, kpunu si okput geege òninin̄ me ere ya.

¹⁹Ire, usini ebi Ju ìnan̄a me agan̄ Esia inu Jeruselem òwa si me ere ya. Kè ònwọn ire ema mekup me isi kwun̄ mgbọ keyi, ikitumu ikọ itoon̄ emi, ire ke îkaan̄ inu ge ema ebetumu ikeme emi.

²⁰Ìrere mgbọ esabe emi isi me isi ebi Oru, ire ikaan̄ ikan ge eyi eweekbe imun̄ òtetet emi, ife chi ebi ìkup me ere yi etumu esibi-nu.

²¹Otutuuk inu ife chi mêsabe itumu ikeme emi ìre inu ge yi gaalek ntaan̄be ukpo itumu me isi ebi Oru ibe ke îre mije nchieekbe ibe ke ebi ìkwakwaan̄ mêjomo me mkpa ke etet emi inisibi oyerebet me ibot.”

²²Pọọlu itutumu ikọ kan̄ isan̄a, Filikis obebieen̄ oyerebet ya ifo isi, mè itumu inyi ema ibe ikaan̄ mgbọ Lisias ogwu ibot akọn̄ ya isinu, ke ọmọ môfieek oyerebet kiban̄. Filikis me lek kan̄ îriọọn̄ inu ofolek Oniin̄ Okaan̄-ene ya ijaan̄ lek.

²³Filikis oneninyi ida ibe mè ogwu ibot akọn̄ ge isa Pọọlu igwu ikom, mè ito ebi akọn̄, inyi ekebem, mè inyi irek, inyi ebi unene kè Pọọlu ekenu enesi ikwaan̄ enyi, mè ekeche inu enyi.

²⁴Usen inen mè inen iraraka, Filikis osasa ogwu nwa, òrere ogwu Ju, ekigwen Durusila, inu, mè iniria ibe esa Pọọlu enu. Pọọlu onunu, mè inikpa inu ofolek ichechieek me lek kè Jisọs Karais inyi ema, ema egbagban̄.

²⁵Ubọk Pọọlu okitumu ikọ ofolek ata irọrọ, mè itetet lek, mè oyerebet Awaji eyi òbonunu, ukpook otetet Filikis. Itutumu inyi Pọọlu ibe, “Ikup ikeya mgbọ keyi nu! Gwu kom fo! Mgbọ geelek irek osibibe, mâyaka igwen owu.”

²⁶Me mgbọ ya, Filikis ìkikpọ chieen̄ ibe ke Pọọlu mônyi ọmọ ikpoko udun̄. Eya orọ ikpọkpọ ikiria ikwaan̄ igwen Pọọlu igọọk ikpa ukpatu me mgbọ me mgbọ.

²⁷Mgbọ acha iba orakabe me lek, enwenwene Filikis, mè iria ofifi ogwu ibot mkpulu ekigwen Pọsiọs Fesitọs inu inyi inibọkọ irek kè Filikis. Ubọk Filikis oweekbe irọrọ inyi ebi Ju ebele ejit melek kan̄, itetele inyi Pọọlu ibia me mkpọn.