Read obolo Ikwaan̄ 5 Bible Online

Ikwaan̄ 5 - obolo bible

Ikwaan̄ 5

¹Ire, ogwu enerieen̄ ge ekigwen Ananayas mè Safira ogwu nwa eneninyam ijọn̄ uko kiban̄.

²Mgbọ ema enyambe ijọn̄ ya, ọmọ melek ogwu nwa eninin̄ otitọt, mè ifele usini me lek ikpoko ya isun̄ inyi lek kiban̄, mè isa eyi òsisik inu ininyi ebi otuchieen̄ kè Jisọs.

³Mgbọ îsabe ikpoko ya inu, Pita obebe ọmọ, “Ananayas, ìre keke orọ ochieekbe ibe Setan inin̄ ijot owu ejit ikeyi, mè irọ inyi owu òfele usini me lek ikpoko obọkọbe me lek ijọn̄ kwun̄ onyambe òsun̄ ònyi lek kwun̄, mè ònu ònokan̄ ataak ònyi Ekwukwu Mbuban?

⁴Ijọn̄ ya ìre eyi kwun̄ sabum oninyanyam. Mgbọ onyambe, mè ibọkọ ikpoko, ikpoko ya si ìre eyi kwun̄, owu okaan̄ unye me lek. Ìre keke orọ mè owu òkeek irọrọ ojelek inu òkup ikeyi? Ataak keyi owu okan̄be, òkakan̄ ìnyi ebilene, îre Awaji ke okan̄ inyi.”

⁵Mgbọ yaage Ananayas onọbe ikọ ya Pita otumube, irọrọn̄ me ijọn̄, mè ikwu. Ikpele ukpook otetet otutuuk ebi geelek ìnọnọ inu ya òrọrọ.

⁶Nsabọn irieen̄ enanan̄a isibi inu, mè inisa ekwut-ufuun̄ ikat nkwukwu kan̄, mè iben isibi isi ifuun̄.

⁷Mbubak mgbọ ita iraraka, Safira ogwu nwa okakana inin̄ uwu ya, ìkariọọn̄ inu òrọrọ ogwu olom.

⁸Pita ododo Safira ibe, “Tumu-nu atikọ nyi emi. Ìre otutuuk ikpoko owu mè Ananayas nlom kwun̄ ekaan̄be me lek ijọn̄ ya enyi enyambe ire eyi?” Ifọfọọk ibe, “Iin̄, otutuuk ire eya.”

⁹Pita otutumu inyi ọmọ ibe, “Ìre keke orọ mè enyi olom mè nwa egbaan̄ echieek inenitọ Ekwukwu Okaan̄-ene ikpọ? Kpọ! Ebi ìbeben nlom kwun̄ isi ifuun̄ ere echilọ me otu isotu. Ema mêben si nkwukwu kwun̄ isibi isi ifuun̄.”

¹⁰Mgbọ yaage Pita otumube ikọ ya isan̄a, Safira orọrọn̄ me ijọn̄, me ukot kè Pita, mè ikwu. Nsabọn irieen̄ cha eninin̄ uwu, mè inimun̄ ibe ke ọmọ si îkwu, mè iben si nkwukwu kan̄ isibi isi ifuun̄ me agba lek ogwu olom.

¹¹Ikpele ukpook otetet otutuuk ebi ntitiin̄ Awaji mè otutuuk ebi geelek ìnọnọ inu ya òrọrọ.

¹²Ebi otuchieen̄ kè Jisọs ekekirọ owuwa ikwaan̄ ukechieen̄ mè uyeke uyeke inu me etete ebi ene. Otutuuk kiban̄ ekekititiin̄ me emen ọfọ kè Solomọn me Uwu Mbuban.

¹³Ubọk geelek ebi ene ekitumu atikọ ibak ema, kpunu ofifi ene geege ikarege ogwu melek kiban̄ òkọkọt isan̄a ukpook me lek ikigọọk ema ije.

¹⁴Ire, owuwa ene, ebirieen̄ mè ebibaan̄, ekekichieek me lek Okaan̄-ene, mè inikigọọk ema inin̄ isọkọ me otu ifuk kiban̄.

¹⁵Mije ikwaan̄ ukechieen̄ chi ebi otuchieen̄ cha ekirọ, ebi ene ekekiben ebi kiban̄ ebi lek ikanyege me inyọn̄ okpọkpọ mè inyọn̄ ufo isa iniyik itele me agba oniin̄, inyi Pita isinije iraka, ogugo kan̄ ire lek usini ife cha, mè lek kiban̄ inye.

¹⁶Ogbogbo ebi ene si ekpukpulu ebi kiban̄ ebi orukan̄ òkup esese esese okifiak, mè ebi ijo erumun̄ okisisaak, isa inan̄a me asabọn ama òkup ikana Jeruselem inu me lek kiban̄. Ema egwagwa otutuuk ife cha isan̄a.

¹⁷Ire, ogwu òban Awaji, mè otutuuk ebi melek kan̄ geelek ebi ìrere ebi Sadusi, enenikaan̄ njijọ ejit enenen me lek ebi otuchieen̄ kè Jisọs.

¹⁸Ema etetet ebi otuchieen̄ cha isi igon me uwu mkpọn ere ekitap ene geelek.

¹⁹Ire, me ejit eririeen̄, ogwu osat Okumugwem onunu inichili otutuuk isotu òkup me uwu mkpọn ya, mè isan̄a ebi otuchieen̄ cha isibi, mè itumu inyi ema ibe,

²⁰“Ìje ìsi ìkeke me oyet egep Uwu Mbuban ìlook otutuuk ebi Ju otutuuk òjot òjot ata etip eyi ayaya ugwem yi.”

²¹Me otu ewelegwe, ebi otuchieen̄ cha ejeje inin̄ emen oyet egep Uwu Mbuban, mè ibene ikilook ebi ene ata etip ya kubọk ogwu osat Okumugwem ya obe ema erọ. Ogwu òban Awaji mè ebi melek kan̄ enunu, mè igwen ntitiin̄ ebi Oru ebi Ju, òrere ntitiin̄ ile ebi ugane ama Ijeren, mè inisan̄a ikwaan̄ iria ibe esi esan̄a ebi otuchieen̄ cha esibi me uwu mkpọn esa enu me isi kiban̄.

²²Ire, mgbọ ebi eriabe ikwaan̄ ya erebe uwu mkpọn ya, kpemun̄ ebi otuchieen̄ cha. Ema egwugwu ikom inilook ebi Oru ibe,

²³“Eji mîre ere ya, mè imun̄ ebi ìkibem ere ekekebe ikana me isotu cha, mè imun̄ si ibe ke egogon otutuuk isotu uwu mkpọn ya ikam. Ire, mgbọ eji egwukube isotu cha, mè iraka inin̄ uwu mkpọn ya, eji kpemun̄ ene geege me emen.”

²⁴Mgbọ ogwu ibot ebi ìkibem Uwu Mbuban, mè ebi ibot ngwugwa cha enọbe ikọ yi, lek okwukwu ema enenen. Ema ebebene ikikeek ibe mè ìre eyi ìbosa keke inu mọnọ.

²⁵Mgbọ ema ekikeek ikeya, ene ge okakana isibi, mè inilook ebi Oru ibe, “Ìna ìnisi ìkpọ, ke ife cha enyi etetbe itap me uwu mkpọn ere echilọ ìkijeen̄ ebi ene inu me oyet egep Uwu Mbuban.”

²⁶Mgbọ yaage ogwu ibot ebi ìkibem Uwu Mbuban onọbe ikọ ya, ikpukpulu ebi ibot akọn̄ kan̄ isa ije isi ere ya, mè isi igwen ema ibe enu. Ema kpesa unye ubọk itet ebi otuchieen̄ cha, mije ufieek-owot ibe ke ebi Ju mêteen̄ ewuuk itọọn̄ ema.

²⁷Ema enenisa ebi otuchieen̄ cha inu me isi ebi Oru, inyi ogwu òban Awaji ido ema ikọ.

²⁸Ogwu òban Awaji onenitumu inyi ebi otuchieen̄ cha ibe, “Eji mînyi enyi ikan ibe enyi ekayaka ìjeen̄ ene geege inu me erieen̄ yi. Ire, enyi ekpọkpọ ichit utọn̄, mè ikijeen̄ otutuuk ebi Jeruselem inu me erieen̄ yi, mè iben si me ejit irọrọ inyi eje ene yi initoon̄ eji me ibot.”

²⁹Pita melek otutuuk ebi otuchieen̄ cha efọfọọk ibe, “Eji ebesiki ibot inyi Awaji, ìkare ebilene!

³⁰Awaji ogwu ebi nte nte kiji etọbọbe ebum inyi îrọ inyi Jisọs, ogwu enyi egonbe ikpan̄ me inyọn̄ uti, ijomo me mkpa,

³¹mè ibene ọmọ ifo inyọn̄, mè isun̄ ọmọ me agan̄ ubọk ulom eyi unye kan̄, mè irọ ọmọ Ogwu Ibot Mkpulu mè Ogwu Unyan̄a ogwu òborọ inyi ebi Ijeren egwu ekom, inyi Awaji itele otutuuk ijo kiban̄ inyi ema.

³²Eji me lek kiji ìre ebi ata-ikọ inyi otutuuk inu chi, eji melek Ekwukwu Mbuban ogwu Awaji onyibe ebi geelek ìsisiki ibot inyi ọmọ.”

³³Mgbọ ebi Oru cha enọbe ikọ chi, ema enanaan̄ ejit enenen, mè iweek ikpakpan̄ ebi otuchieen̄ kè Jisọs cha.

³⁴Ire, ogwu Farisi ge, ogwu òjeen̄ Ikan, ekigwen Gamalien, oneninan̄a ikeke me etete ebi Oru. Gamalien yi ìre ogwu otutuuk ene ekinyi ulibi. Ineninyi ida ibe esan̄a ebi otuchieen̄ cha esibi-nu me etete kiban̄ sọnja mgbọ.

³⁵Mgbọ esan̄abe ebi otuchieen̄ cha isibi isan̄a, inenitumu inyi ebi Oru ogbo kan̄ ibe, “Ebi Ijeren, ìriọọn̄ ubọk ìfuk ifuk-ibot ofolek inu yi enyi etọtbe irọrọ ife chi.

³⁶Me ike mgbọ ge òraraka, gwun̄ enerieen̄ ge ekigwen Tiyudas înan̄a isibi, mè ijeen̄ lek kan̄ kubọk ene ilile. Inu òsoso efit ebirieen̄ ini ekekigọọk ọmọ me udun̄. Ìkafiin̄ mgbọ, ekpakpan̄ ene ya. Ebi udun̄ kan̄ cha eyiyiyala isan̄a kpai. Ebi ene kpeyaka inọ inu geege ofolek kan̄.

³⁷Mgbọ ogwa orakabe, ogwu Galili ge ekigwen Judas onanan̄a si isibi me mgbọ efukbe ifuk ene, mè itaba owuwa ene inyi lek kan̄. Mîkpan̄ ọmọ si. Ebi udun̄ kan̄ eyayat si ita.

³⁸Eya orọ, me lek keyi òbebene mgbọ keyi, m̀be enyi, ìtele ife chi mè efon. Ikarọ ema inu geege. Mije, ire inu ife chi ekirọ ìnan̄a me ubọk ebilene, môchep me ikafiin̄ge mgbọ.

³⁹Ire, ire inan̄a me ubọk Awaji, kpunu ubọk enyi ebesa ikọt ida ife chi ito. Kpan̄asi ikeya, enyi mêmun̄ ibe ke ìkayaka ìre ebilene ke enyi ekigọọk itim etim, ke îre Awaji me lek kan̄.” Ebi Oru ya ebọbọkọ nteme kè Gamalien ya itap,

⁴⁰mè igwen ebi otuchieen̄ cha itap me uwu, mè inyi ida ibe esa njijan̄ esulu ema. Mgbọ esulube ema isan̄a, etatap ikan ibe ema ekayaka ìtumu ikọ geege ìnyi ene geege me erieen̄ kè Jisọs, mè itele ibe ema efon.

⁴¹Ebi otuchieen̄ cha enanan̄a me isi ebi Oru ya isibi, mè ikibele ejit ibe ke Awaji îfuk ema kubọk ebi ìgbegbe ibọbọkọ esip mije erieen̄ kè Jisọs.

⁴²Ire, me usen me usen, ema kpekitele itititiin̄ me oyet egep Uwu Mbuban, mè uwu ebi ene, ikijeen̄ inu, mè ikilook ata etip ibe ke Jisọs ore ogwu Awaji otọkọbe aran̄ me ibot ya.