Read obolo I Kọr 10 Bible Online

I Kọr 10 - obolo bible

I Kọr 10

¹Bọn Nte n̄a, ìkeek inu ebi nte nte kiji ejebe itibi mgbọ Mosis okisa ema ije me emen èwê isibi me Ijipiti. Îre oduku inyọn̄ osa otutuuk kiban̄ ijeen̄ oniin̄. Ema otutuuk ejeje ukot ukot isaba okwaan̄ Anyiaan̄.

²Ìkup kubọk esasa oduku inyọn̄ ya mè okwaan̄ ya igwook otutuuk kiban̄ mun̄, inyi ema ekana ebi udun̄ kè Mosis.

³Ema otutuuk ene mîgbaan̄ irie inorie ònan̄a me ubọk Awaji,

⁴mè igbaan̄ inwọ mudim ònan̄a me ubọk Awaji. Mudim ya ìnan̄a me lek ewuuk Awaji onyibe ema, eyi òkukup melek kiban̄ otutuuk mgbọ ema ekije me oniin̄ ije kiban̄. Ewuuk ya ìre Karais me lek kan̄.

⁵Ire, ubọk geelek Awaji orọbe otutuuk inu chi inyi ema, owuwa kiban̄ mîrọ inu ònanaan̄ Awaji me ejit, mè ikwaan̄ irurọn̄ọ me emen èwê.

⁶Inu chi ìre inu ikween̄-inu eyi òkitaba eji ubọk me utọn̄, inyi eji ekakaan̄ ulọk irọrọ ijo inu kubọk ebi nte nte kiji cha erọbe.

⁷Enyi si, ikatọbọ ebum ìnyi mkpọmfaka, kubọk ema erọbe. Inu ofolek kiban̄ ke ege me Ikpa Mbuban ibe, “Ebi ife cha esisiki ikweek ikirie, mè ikinwọ, mè inan̄a ikeke ikijop okwa mfaka ebi yọk.”[11]

⁸Ofifi si, eji ekaluk ugwem barabat kubọk usini ebi nte nte kiji cha erọbe, eyi akọp obop ene iba mè obop ita egbaan̄be ikwaan̄ me usen ge gaalek.

⁹Eji ekatọ Ogwukaan̄-ene ìkpọ kubọk usini kiban̄ erọbe, eyi ulu otọkbe ema ikpan̄ isan̄a.

¹⁰Eji ekakinunuun̄ kubọk usini kiban̄ enunuun̄be, eyi ogwu osat òkikpan̄ ene okpan̄be ema isan̄a.

¹¹Otutuuk inu cha òrọrọ ema ìre inu ebi ene ebesa ikween̄ inu inyi lek kiban̄. Ege inu cha me Ikpa Mbuban kubọk inu isasa itaba eji ubọk me utọn̄, mije eji ekupbe me ugwem me mgbọ keyi, mgbọ òta mgbọ orebe isan̄a.

¹²Eya orọ, ogwu òkikeek ibe ke ọmọ îkeke inye, ene ya igbala chieen̄, inyi ọmọ ikanan̄a ìrọn̄ mgbọ ntọ-mkpọ isinu.

¹³Kpunu ntọ-mkpọ geege òkinu inyi enyi, eyi ikarege eyi òkinu inyi ebilene. Ire, Awaji ìkakilọ irọrọ otu ikọ kan̄ iso. Ìkpotele ibe enyi erọn̄ enin̄ emen ntọ-mkpọ eyi òbololobo igak enyi ibebeme. Ire, ntọ-mkpọ isinu, Awaji mônyi enyi unye isasa ikeke inye, mè isan̄a oniin̄ isibi me emen ntọ-mkpọ ya, inyi enyi etim ekpan̄.

¹⁴Eya orọ, atata bọn Nte n̄a, ìsan̄a lek kinyi me lek irariaak mkpọmfaka.

¹⁵Ǹkitumu ikọ inyi enyi kubọk ebi ìriọọn̄ lek. Eya orọ, ìkpọ me lek kinyi, mè ìre ikọ nkitumu ìre atikọ, mè ìre ìkare.

¹⁶Mgbọ eji ekigbaan̄ irie inorie mbuban, eji ekinyinyi Awaji itọn̄ me lek ekpen̄ miin̄ ugbana ya eji ekinwọ. Eji isikinwọ miin̄ ya, eji ekigọọk Karais igbaan̄ ire ge sa me lek eje kan̄. Eji isikikpọkọ fituru ya itaka, eji ekigọọk Karais igbaan̄ ire ge me akpalek kan̄.

¹⁷Mije fituru ya orebe owut ge gaalek, ìsibi ibe ke eji owuwa ene ebi ìkitaka fituru ya mîgbaan̄ ire akpalek ge gaalek. Mije, eji otutuuk ene ekigbaan̄ itaka owut fituru ge gaalek.

¹⁸Ìkeek-nu inu ofolek orọmijọn̄ ebi Ju. Ebi geelek ìtataka anam ònan̄a me inyọn̄ ntook ngwugwa, mîgọọk Awaji, ogwu egwabe ngwugwa ya inyi, igbaan̄ ire ge.

¹⁹Ìre keke ore ibot ikọ nkitumu? Ìre ìsibi ibe ke îkaan̄ inu ngwugwa egwabe inyi mkpọmfaka okupbe me lek? Sà ìre ìsibi ibe ke îkaan̄ inu mkpọmfaka cha okupbe me lek?

²⁰In̄-in̄, ìkare ikeya! Ibot ikọ n̄a ìre ke ngwugwa geelek ebi ekariọọn̄ge Awaji ekigwa, ekigwa inyi ijo erumun̄. Ìkare Awaji ke ekigwa inyi. Emi ǹkaweek ibe enyi egọọk ijo erumun̄ egbaan̄ ere ge.

²¹Enyi kpebekọt inwọ miin̄ inan̄a me ekpen̄ Okaan̄-ene, mè iyaka isi inwọ si miin̄ inan̄a me ekpen̄ ijo erumun̄. Enyi kpebekọt irie inorie me inyọn̄ ikasi Okaan̄-ene, mè iyaka isi irie si me inyọn̄ ikasi ijo erumun̄.

²²Ìre eji ekiweek irọrọ mè Okaan̄-ene inaan̄ ejit ikeme eji? Sà ìre eji mînye lek igak Okaan̄-ene ni?

²³Usini kinyi ekitumu ibe, “Emi mâkọt irọ inu geelek, ikan geege ìkatet emi.” Ikeya ke ire! Ire, ìkare inu geelek eji ekirọ okikaan̄ oruru. Iin̄, enyi ekitumu ibe, “Emi mâkọt irọ inu geelek, ikan ìkatet emi.” Ire, ìkare inu geelek okinama ene ibene me inu eyi Okaan̄-ene.

²⁴Ene geege ikakirọ inu òbotap ubọk inyi lek kan̄ gaalek. Ire, ene geelek ikirọ inu òbokitap ubọk inyi ebi ofifi ife si.

²⁵Ìkpọkpọ ìtaka anam geelek ekinyam me ewe. Ikado ikọ geege ofolek anam ya, eyi môsisaakbe enyi me ejit.

²⁶Mije, ege me Ikpa Mbuban ibe, “Linyọn̄ keyi mè otutuuk inu geelek òkup me emen kan̄, îre Okumugwem okaan̄.”[12]

²⁷Ire ogwu ikachieekge me lek kè Jisọs Karais igwen enyi ibe enyi enegọọk ọmọ erie inorie, ìkpọkpọ ìrie inorie geelek eyikbe inyi enyi. Ikado ikọ geege ofolek inorie ya, eyi môsisaakbe enyi me ejit.

²⁸Ire, ire ene ge initumu inyi enyi ibe ke inorie ya ìre inorie esabe igwa ngwugwa inyi mkpọmfaka, ìtele inorie ya. Mije ene ya ogwu òkpakpa inu ya ijeen̄ enyi, ikarie inorie ya, inyi ogwu ejit ikanyege ikanan̄a ìrọn̄.

²⁹Îre ejit ogwu òkpakpa inu ya inyi enyi ke nkitumu, mije, ene ya îmọnọ ibe ke îlọ irerie ojelek inorie òkup ikeya. Ìkare ejit kinyi ke nkitumu, mije, ejit kinyi înye ibe ke enyi mêkọt irie inorie geelek. Usini ebi ene mêkọt ido ibe, “Ìre îtat ibe emi nkarie inu òneme emi irerie mije inu ofifi ene okikeek?

³⁰Ire nnyi Awaji itọn̄ isan̄a me lek inorie, mè irie inorie ya, ebejeje ifieek emi ikọ mije inorie nnyibe Awaji itọn̄ me lek?”

³¹Eya orọ, me inu geelek enyi ekirọ, mè ìre inorie ke enyi ekirie, mè ìre miin̄ ke enyi ekinwọ, ìkirọ me oniin̄ òbosa itọn̄ inyi Awaji.

³²Ìgbala chieen̄! Ikarọ inu òborọ mè ene geege ije ilọ oniin̄, mè ìre ebi Ju, mè ìre ebi ekarege ebi Ju, mè ìyaka irere ebi ntitiin̄ Awaji.

³³Ikeya si ke emi nkisa iweek irọrọ. Ǹkiweek irọrọ inyi ejit ibele otutuuk ene me inu geelek nkirọ. Ǹkakikeek inu òbokaan̄ oruru inyi emi gaalek. Ǹkikeek inu òbokaan̄ oruru inyi owuwa ebi ofifi ife, inyi Awaji isa me ikeya inyan̄a ema isibi.