Read obolo I Kọr 11 Bible Online

I Kọr 11 - obolo bible

I Kọr 11

¹Ìkigọọk akpat ukot n̄a, kubọk emi si nkigọọk akpat ukot kè Karais.

²Ntọn̄ enyi, mije enyi ekikeek otutuuk inu geelek njeen̄be enyi, mè ikirọ si igọọk me ubọk njeen̄be enyi.

³Ire, ǹkiweek ibe enyi eriọọn̄ ibe ke Karais ore ogwu ibot inyi ogwu enerieen̄ geelek. Olom ore ogwu ibot inyi ogwu nwa. Awaji onenire ogwu ibot inyi Karais.

⁴Eya orọ, ogwu enerieen̄ geelek òchichit ibot me mgbọ ìkiriaak uriaak, mè ìre mgbọ ìkiben nriran, ìsibi ibe ke ìkanyi Karais, ogwu òrere ogwu ibot kan̄, umin.

⁵Ogwu enenwaan̄ geelek ikachitge ibot kan̄ mgbọ ìkiriaak uriaak, mè ìre mgbọ ìkiben nriran, ìsibi ibe ke ìkanyi ogwu olom, ogwu òrere ogwu ibot kan̄, umin. Eyi ogwu enenwaan̄ ya ikachitge ibot, ìkup kubọk ekwọkwọkọ otutuuk ijeek òkup me ibot kan̄ isan̄a.

⁶Ire ogwu enenwaan̄ ibe ke ọmọ ìkpochit ibot, ikwọkọ ijeek isan̄a me ibot kan̄ ma! Isọsọp ijeek, mè ikwọkwọkọ ijeek isan̄a me ibot, ìre inu esip me lek ebibaan̄. Eya orọ, îgbe ibe ogwu enenwaan̄ ikichit ibot.

⁷Ìkagbe ibe enerieen̄ ikichit ibot mgbọ ìkiriaak uriaak. Mije, Awaji ìrom enerieen̄ me mbet kan̄, ọmọ si okijeen̄ ujamgbugbo eyi Awaji. Ire, ogwu enenwaan̄ ìkijeen̄ ujamgbugbo eyi ogwu olom.

⁸Mije, Awaji ìkarom enerieen̄ ìnan̄a me lek enenwaan̄, ìrom enenwaan̄ inan̄a me lek enerieen̄.

⁹Ikeya si, Awaji ìkarom enerieen̄ ìnyi enenwaan̄, ìrom enenwaan̄ inyi enerieen̄.

¹⁰Eya orọ, îgbe ibe enenwaan̄ geelek ikichit ibot, isasa ijeen̄ ibe ke ọmọ ìkup me irak enerieen̄, inyi ebi osat Awaji ekanaan̄ ejit.

¹¹Me lek kiji ebi ìchechieek me lek Okaan̄-ene, eji mîriọọn̄ ibe, ire enerieen̄ ìkakup, enenwaan̄ ìkpokup. Ikeya si, ire enenwaan̄ ìkakup, enerieen̄ ìkpokup.

¹²Mije, ike erombe enenwaan̄ inan̄a me lek enerieen̄, ikeya si ke enenwaan̄ okiman enerieen̄. Ire, otutuuk inu chi geelek ìnan̄a me ubọk Awaji.

¹³Enyi gaalek ìfieek-nu oyerebet keyi! Ìre îgbe ibe ogwu enenwaan̄ ikachit ibot me mgbọ ìkiriaak uriaak?

¹⁴Ubọk Awaji osun̄be, ire ijeek itibi ijọn̄ọ me ibot enerieen̄, îre inu esip.

¹⁵Ire, ujọn̄ọ ijeek ìre inu uja mè umin inyi enenwaan̄. Mije, Awaji ìnyi enenwaan̄ ujọn̄ọ ijeek, inyi ikisa ichit ibot.

¹⁶Ire ikaan̄ ogwu iwut ifan̄a me lek ikọ yi, ene ya iriọọn̄ ibe ke îre ikeyi ke eji otutuuk, mè otutuuk ntitiin̄ Awaji geelek ekirọ. Eji kpeyaka ikaan̄ ofifi orọmijọn̄ ofolek ikọ keyi igak ikeya.

¹⁷Me ofifi ibot ikọ mbanyi enyi nteme ofolek, m̀kpakọt itọn̄ enyi. Mije, mgbọ enyi ekigbaan̄ ititiin̄ ikitọbọ ebum inyi Awaji, ugwem enyi ekikaan̄ me ere ya ìkisa ijo inu inu, ìkakisa ata inu ìnu.

¹⁸Me adasi irek, nnọ ibe ke enyi isikigbaan̄ ititiin̄ kubọk ntitiin̄ Awaji, ke icheche lek îkikup me etete kinyi. Mâkọt ichieek ibe ke ikọ ya ìre atikọ.

¹⁹Me atikọ, icheche lek môkup me etete kinyi, inyi ebi ene esa me ikeya eriọọn̄ ebi ìkirọ inu òkibele Awaji ejit me etete kinyi.

²⁰Mgbọ geelek enyi ekigbaan̄ ititiin̄ iberie inorie Okaan̄-ene, ìkare inorie Okaan̄-ene ke enyi ekirie.

²¹Ǹkitumu ikọ yi, mije, me mgbọ enyi isiberie inorie ya, ìkire ogwu ikup òkwuun̄ isi òrie inorie kan̄. Kpunu ogwu òyaka ikiraan̄ chieen̄ ikpọ mè ìre ogwu melek kan̄ òkirie, mè ìkarie. Îre eya orọ usini ene ekiran̄ ọfiọọn̄ ikwu, me ere ebi ofifi ife ekirie inorie, mè ikinwọ miin̄ igak lek.

²²Iyak! Ìre enyi kpekaan̄ uwu, ere enyi mekọtbe ikikup irie inorie, mè inwọ miin̄ kinyi ubọk òneme enyi? Ìre keke orọ enyi ekikpọ ebi ntitiin̄ Awaji chieen̄ isiki, mè ikirọ ebi ìkup me una inu esip? Ìre enyi ekikeek ibe ke m̀batumu keke inyi enyi? Ìre enyi ekiweek ibe emi ǹtọn̄ enyi mije ijo irọrọ òkup ikeya ni? In̄-in̄, m̀kpatọn̄ enyi kubọk ge!

²³Mije, ijejeen̄ echi Okaan̄-ene ochilibe ijeen̄ emi ke nsa iyaka ijeen̄ enyi. Me eririeen̄ yaage elekebe Okaan̄-ene Jisọs Karais inyi ibe ekpan̄, Okaan̄-ene ìmọmọnọ fituru,

²⁴mè inyi Awaji itọn̄ me lek, mè ikpọkọ, mè itumu ibe, “Eyi ìre akpalek n̄a eyi esabe inyi mije kinyi. Ìkirọ ikeyi ìfo isi ìsa ìkikeek emi.”

²⁵Ubọk yaage si, mgbọ ema eriebe inorie ikakwun̄ ya isan̄a, ibeben miin̄ me emen ekpen̄, mè itumu ibe, “Ekpen̄ miin̄ keyi ìre aya inyan̄a-ibot eyi Awaji osabe eje n̄a inyan̄a melek ebilene.[13] Mgbọ geelek enyi mênwọbe miin̄ yi, ìkirọ ikeyi, inyi enyi esa ekekeek emi.”

²⁶Mije, mege ire mgbọ Okaan̄-ene môkpọkbe inu, enyi isikitaka fituru yi, mè ikinwọ miin̄ ònan̄a me emen ekpen̄ yi, enyi ekilook ebi ene ibe ke Okaan̄-ene îkwu mkpa mije kiji.

²⁷Eya orọ, ene geelek òtataka fituru yi, mè inwọ miin̄ ònan̄a me emen ekpen̄ yi me oniin̄ ikagbege, ene ya îrọn̄ ikan ikeme akpalek Okaan̄-ene mè eje Okaan̄-ene.

²⁸Mije keyi, îgbe ibe ogwu geelek òbotaka fituru ya, mè inwọ miin̄ ònan̄a me emen ekpen̄ ya, ene ya idasi itaak chieen̄ ikpọ emen ugwem kan̄, mè ọmọ îgbe, mè ọmọ ìkagbe, sabum ònotaka, mè ònwọ.

²⁹Mije, ene geelek òtataka fituru ya, mè inwọ miin̄ ònan̄a me emen ekpen̄ ya, me ikariọọn̄ge inu akpalek Okaan̄-ene mè eje Okaan̄-ene osibibe, îre itip-oyerebet Awaji ke ene ya otaka, mè inwọ itoon̄ me ibot kan̄.

³⁰Îre eya orọ owuwa ene me etete kinyi ekiwọ idek, mè ikifiak orukan̄. Mije inu yi si, usini kinyi mîkwaan̄.

³¹Ire, ire eji idasi itaak chieen̄ ikpọ emen ugwem kiji sabum ènerie inorie Okaan̄-ene, Awaji ìkpotip eji oyerebet.

³²Okaan̄-ene isikisulu eji osusut, ìkisasa ijeen̄ eji ibe ke eji mîje ilọ, inyi ọmọ ikagbaan̄ eji melek ebi linyọn̄ ìtip oyerebet me mgburudun̄ usen.

³³Eya orọ, bọn Nte n̄a, mgbọ geelek enyi ekigbaan̄ ititiin̄ iberie inorie Okaan̄-ene, ikakirie kubọk ekifufum, ìkikup ìban ebi melek kinyi.

³⁴Ire ikaan̄ ogwu uraafiọọn̄ okitaka, ene ya idasi irie inorie me uwu kan̄ sabum, inyi enyi ekasa itip-oyerebet ìnyi lek kinyi me mgbọ enyi isigbaan̄ ititiin̄ ikirie inorie Okaan̄-ene. Nsinu, mâteme enyi nteme ofolek inu kechilọ geelek òsisik.