Read obolo I Kọr 12 Bible Online

I Kọr 12 - obolo bible

I Kọr 12

¹Bọn Nte n̄a, mgbọ keyi, ǹkiweek ibe enyi eriọọn̄ ubọk eriọọn̄ inu ofolek uche echi Ekwukwu Mbuban okinyi ene.

²Ìkeek ibe, sabum enyi enichieek me lek kè Karais, ke ebi ene mîsa enyi ije ilọ oniin̄, enyi ekekitọbọ ebum inyi mkpọmfaka, echi kpunube ugwem geege me emen.

³Eya orọ, ǹkitumu inyi enyi ibe ke ene geelek òkitumu ikọ sa me unye eyi Ekwukwu Awaji ìkpokọt itumu ibe, “Ifieek inyi Jisọs!” Kpunu si ene geege òbokọt itumu ibe, “Jisọs ìre Okaan̄-ene,” îtata mè ìre Ekwukwu Mbuban onyi unye ibe itumu.

⁴Uche echi Ekwukwu Mbuban okinyi ene ìkup esese esese, ire, îre Ekwukwu Mbuban yaage gaalek okinyi ema otutuuk.

⁵Ikwaan̄ ebi ene ekisi inyi Okaan̄-ene ìkup esese esese, ire, îre Okaan̄-ene yaage gaalek ke ekisi otutuuk ikwaan̄ cha inyi.

⁶Owuwa oniin̄ ọmọ òwa eyi Awaji okisi ikwaan̄ me emen ebi ene, inyi ekekọt erọ owuwa ikwaan̄ òkup esese esese enyi Awaji. Ire, Awaji yaage gaalek okirọ otutuuk ikwaan̄ chi geelek me emen otutuuk ene.

⁷Inu geelek Ekwukwu Mbuban ochilibe inyi ene geelek, ìchili inu ya, inyi ene ya inyi otutuuk ebi eyi Awaji ekaan̄ oruru me lek.

⁸Ekwukwu Mbuban înyi usini ene unye isasa itumu ikọ òkijeen̄ iriọọn̄-inu eyi Awaji, mè inyi si ebi ofifi ife ifuk-ibot isasa ikpọk mbum nlelet inu eyi Awaji ijeen̄ ebi ene. Îre Ekwukwu Mbuban yaage gaalek okinyi ema otutuuk unye isasa irọ inu chi geelek.

⁹Ekwukwu Mbuban yaage okinyi usini ene ikpele ichechieek isasa ikọt itoon̄ ejit ibe ke Okaan̄-ene ìkpolọlọ irọrọ inu òkup me uyọt me mgbọ inu oyọtbe. Ekwukwu Mbuban yaage si okinyi usini ene unye isasa igwa ebi orukan̄,

¹⁰mè inyi usini ene unye isasa irọ inu ukechieen̄, mè inyi usini ene unye isasa iben nriran, mè inyi usini ene unye isasa ikọt iriọọn̄ inu echi ònan̄a me ubọk Ekwukwu Mbuban, mè echi ikanan̄age me ubọk Ekwukwu Mbuban. Ekwukwu Mbuban yaage si okinyi usini ene unye isasa itumu ikọ me nke nke usem, mè inyi si usini ene unye isasa ikana nke nke usem cha, inyi ebi ene eriọọn̄ inu îsibibe.

¹¹Îre Ekwukwu Mbuban yaage gaalek okinyi ebi ene otutuuk uche chi. Ìkinyi ene geelek esese uche igọọk me ubọk înemebe ọmọ.

¹²Karais ìkup kubọk akpalek ene, eyi òrere ge gaalek, mè ikaan̄ owuwa nriro. Ubọk geelek nriro cha owabe, ema otutuuk egbaan̄ ire akpalek ge gaalek.

¹³Ikeya si, me mgbọ egwookbe eji mun̄, eji otutuuk ene, ebi Ju mè ebi kpere ebi Ju, ebi usun̄ mè ebi kpere usun̄, Ekwukwu Mbuban îrọ inyi eji otutuuk ene ekana akpalek ge gaalek. Ekwukwu Mbuban yaage gaalek si ke Awaji otap eji otutuuk me emen ejit, me ene me ene.

¹⁴Nriro òkup me akpalek ene îwa, ìkare nriro ge gaalek.

¹⁵Ire ukot inibe, “Mije nkarege ubọk, ǹkakup me akpalek,” eya ìkasibi ibe ke ukot ìkayaka ìre ge me lek nriro òkup me akpalek ene.

¹⁶Ikeya si, ire utọn̄ initumu ibe, “Mije nkarege chieen̄, ǹkakup me akpalek,” eya ìkasibi ibe ke utọn̄ ìkayaka ìre ge me lek nriro òkup me akpalek ene.

¹⁷Ìkpọ-nu, ire otutuuk akpalek ene ire chieen̄ gaalek, ìre ene ìbojeje ikinọ ikọ? Ire otutuuk akpalek ene ire utọn̄ gaalek, ìre ene ìbojeje ikinọ olu inu?

¹⁸Ire, me atikọ, Awaji ìnenen̄e otutuuk nriro òkup me akpalek ene isun̄ me irek me irek, mè isun̄ ema otutuuk me irek kiban̄ ubọk înemebe ọmọ.

¹⁹Mebe ke îre nriro ge gaalek okup, akpalek kpomokup!

²⁰Me atikọ, nriro òkup me akpalek ene îwa, ire, ema otutuuk egbaan̄ ire akpalek ge gaalek.

²¹Eya orọ, chieen̄ ìkpokọt itumu inyi ubọk ibe, “Ǹkaweek owu!” Ibot si ìkpokọt itumu inyi ukot ibe, “Ǹkaweek enyi.”

²²Kpan̄asi ikeya, nriro lek ene echi ekimọnọ ibe ke îre ema ewọ ichit, ema ere echi òkukup me uyọt ichit.

²³Ikeya si, nriro echi eji ekimọnọ ibe ke kpekup me lek inu geege, ema ke ekinyi umin ichit. Nriro echi ikagbege ibe chieen̄ imun̄, ema ke eji ekikpọ chieen̄ me lek ijaan̄ ichit.

²⁴Nriro echi òjajaan̄ mè igbe ibe chieen̄ ene imun̄, echicha ìkado ojelek ata ubọk ikpọkpọ keya. Ire, Awaji ìsun̄ nriro lek ene ikeya, inyi eji ekesa ikpele umin enyi nriro echi ikakaan̄ge umin geege.

²⁵Awaji ìkaweek ibe icheche lek ikup me etete nriro cha. Ìkiweek ibe ema otutuuk ekekpọ chieen̄ me lek kiban̄ ìkike. Ge ikakpọ chieen̄ me lek ge ìgak ofifi.

²⁶Ire nriro ge ikup me ufialek, otutuuk nriro kechilọ ekup si me ufialek melek kan̄. Ire ebi ene itọn̄ nriro ge, otutuuk nriro kechilọ mêgọọk nriro keya inwọọn̄ unwọọn̄ si.

²⁷Mgbọ keyi, enyi otutuuk ene ìre akpalek kè Karais. Ene geelek me etete kinyi ìre nriro ge me akpalek kè Karais ya.

²⁸Me emen ntitiin̄ Awaji, Awaji îgobo ebi ene ito ibe ekerọ ikwaan̄ òkup esese esese. Eyi adasi ìre ebi otuchieen̄, òso iba ìre ebi nriran, òso ita ìre ebi ijejeen̄. Îgobo si ebi ene ito ibe ekerọ inu ukechieen̄, mè igobo si ebi ìbekigwa ebi orukan̄, mè ebi ìbekitap ubọk inyi ebi ene, mè ebi mkpulu, mè igobo si ebi ìbekitumu ikọ me nke nke usem.

²⁹Ìkare otutuuk ene ere ebi otuchieen̄! Ìkare otutuuk ene ere ebi nriran! Ìkare otutuuk ene ere ebi ijejeen̄! Ìkare si otutuuk ene ekaan̄ unye isasa ikirọ inu ukechieen̄.

³⁰Ìkare otutuuk ene ekigwa ebi orukan̄! Ìkare si otutuuk ene ekitumu ikọ me nke nke usem! Ìkare otutuuk ene ke enyi unye isasa ikọt ikikana nke nke usem cha, inyi ebi ene ekeriọọn̄ inu îsibibe.

³¹Ire, ìsa otutuuk ejit kinyi ìweek uche cha echi òkukup me uyọt ichit. Mgbọ keyi, mânijeen̄ enyi inu ònwọnwọn ichit.