Read obolo I Kọr 14 Bible Online

I Kọr 14 - obolo bible

I Kọr 14

¹Ìsa otutuuk efuuk kinyi ìweek ikekimun̄ ene me chieen̄. Ìsa si ejit ge ìweek uche echi Ekwukwu Mbuban okinyi ene, ògak ge, uche eyi ibeben nriran.

²Ene geelek òkitumu ikọ me nke nke usem ìkitumu ikọ melek Awaji, ìkare melek ebilene. Mije kpunu ogwu òbokọt igobo ikọ kan̄ itet. Ìkitumu udọk udọk inu eyi Awaji sa me unye eyi Ekwukwu Mbuban.

³Ire, ogwu òkiben nriran ìkitumu ikọ inyi ebilene ogbo kan̄, isasa irọ ema inye, mè itap ema efuuk me emen, mè ikat ema ejit.

⁴Ogwu òkitumu ikọ me nke nke usem ìkinama ichechieek kan̄ inye. Ire, ogwu òkiben nriran ìkinama ebi ntitiin̄ Awaji inye me ichechieek.

⁵Môneme emi ibe ene geelek me etete kinyi ikitumu ikọ me nke nke usem. Ire, môneme emi igak ikeya ire ene geelek ikiben nriran. Ogwu òkiben nriran îmin igak ogwu òkitumu ikọ me nke nke usem, îtata mè ìre îkaan̄ ofifi ene ogwu òbokọt ikana etip ya itap me usem ebi ene ekinọ, inyi inama ichechieek otutuuk ebi ntitiin̄ Awaji inye.

⁶Bọn Nte n̄a, ire nnu me etete kinyi, mè ibene ikitumu ikọ me usem eyi enyi ekariọọn̄ge, ìre kpasi oruru ke ìbonin̄ inyi enyi? Ìkponin̄ oruru geege. Kpan̄asi ikeya, ire ntumu nlelet inu ge eyi Awaji ochilibe ijeen̄ emi inyi enyi, mè ìre ifuk-ibot ònan̄a me ubọk Awaji ke nchili ijeen̄ enyi, mè ìre m̀beben nriran inyi enyi, mè ìyaka ire ǹjejeen̄ enyi ikọ Awaji, echichi obonin̄ oruru inyi enyi.

⁷Ìkpọ-nu, kubọk òja mè uneen̄, òrere inu ikakaan̄ge ugwem me lek, ire ida nkwukwak chi ikitaan̄ wọlọwọlọwọlọ, ìre ebi ene ebejeje iriọọn̄ okwa ebi ìkikwak nkwukwak cha ekifit? Kpebekọt iriọọn̄, îtata mè ida nkwukwak cha ìtataan̄ itop me utọn̄ ene.

⁸Ofifi si, ire ida akama ikitaan̄ wọlọwọlọwọlọ, ìre ebi akọn̄ ebejeje iriọọn̄ ibe ke mênisi akọn̄, mè ibem lek?

⁹Ikeya si ke îkup me lek kinyi. Ire enyi itumu ikọ me usem ebi ene ekakọtge ìgobo ìtet, ìre ekene obokọt itet ibot me lek ikọ enyi ekitumu? Eya ìre ikpọkpọ ikitumu ikọ igwook me emen efet ikike.

¹⁰Me atikọ, owuwa esese usem òwa me linyọn̄. Ire, ìkakaan̄ eyi ekitumu mè ebi ene ekariọọn̄ inu ekitumu.

¹¹Ire ene ikitumu usem, mè ǹkanọ inu ene ya okitumu, emi m̀bakup kubọk ogwu ichen me lek ene ya. Ene ya si ìbokup kubọk ogwu ichen me lek n̄a.

¹²Ikeya si ke îkup me lek kinyi. Ike enyi ekaan̄be ulọk ikakaan̄ uche echi Ekwukwu Mbuban okinyi ene, me etete uche cha geelek, ìweek ikakaan̄ uche echi òkinama ntitiin̄ Awaji ibene ìgak otutuuk.

¹³Mije keyi, ogwu òkitumu ikọ me nke nke usem, iriaak uriaak ibe Awaji inyi ọmọ unye isasa ikikana ikọ ya inyi ebi ene ekeriọọn̄ inu ọmọ okitumu.

¹⁴Mije, mgbọ nkiriaak uriaak me nke nke usem, îre ekwukwu n̄a gaalek okiriaak uriaak ya. Ǹkasa ekiket n̄a ìgbaalek ìriaak uriaak ya.

¹⁵Eya orọ, ìre keke ke mbayaka inirọ? Mâriaak uriaak me ekwukwu n̄a, ire, mâsa ekiket n̄a si igbaalek iriaak. Mâkọt okwa me ekwukwu n̄a, ire, mâsa ekiket n̄a si igbaalek ikọt.

¹⁶Ire owu okitọn̄ Awaji me ekwukwu kwun̄ me emen ntitiin̄, ire, ogwu ikike ògọgọọk ikup me emen ntitiin̄ ya ìkanọ inu otumube, ìre ene ya ìbojeje ikọt igọọk ichieek igwook ibe, “Ikup ikeya,” me lek uriaak ya owu oriaakbe isa itọn̄ Awaji? Ìkpokọt, mije, ìkariọọn̄ inu owu otumube.

¹⁷Môkọt ire ibe ke owu òkinyi Awaji itọn̄ me atikọ, ire, itọn̄ ya ìkanama ichechieek ene ya ìbene.

¹⁸Ntọn̄ Awaji n̄a ibe ke emi ntumu ikọ me nke nke usem igak otutuuk kinyi.

¹⁹Ire, me emen ntitiin̄, ire ntumu ikọ go gaalek me usem otutuuk ene enọbe, isa iteme ebi ene nteme, eya înwọn igak itutumu akọp obop ikọ me nke nke usem, eyi ene geege ikariọọn̄ge inu îsibibe.

²⁰Bọn Nte n̄a, ikayaka ìkikeek ekiket kubọk nsabọn! Ìkup kubọk asa nsabọn me lek irọrọ ijo inu gaalek. Ire, ìkikeek ekiket kubọk ebi ugane.

²¹Ege me Ikan kè Mosis ibe ke Okumugwem ìtumu ibe, “Mâtumu ikọ inyi ife chi inan̄a me otu ebi ìkitumu usem ema ekariọọn̄ge, mè otu ebi ichen. Ire, nriọọn̄ ibe, ìrere ikeya si, ke ema kpebegban̄ ikọ n̄a.”[15]

²²Eya orọ, itutumu ikọ me nke nke usem ìre inu ijejeen̄ inyi ebi kpechieek me lek kè Karais, ìkare inu ijejeen̄ ìnyi ebi ìchechieek. Ire, ibeben nriran ìre inu ijejeen̄ inyi ebi ìchechieek, ìkare inu ijejeen̄ inyi ebi kpechieek.

²³Ire otutuuk ebi ntitiin̄ Awaji inigbaan̄ ititiin̄ ibetọbọ ebum, mè ikitumu ikọ me nke nke usem, mè ire ebi ekariọọn̄ge inu ife cha ekitumu, mè ìyaka ire ebi ekachieekge me lek kè Karais inin̄ inu, ìre kpebetumu ibe ke otutuuk ife cha ìre ebi iraak?

²⁴Ire, ire ogwu ikachieekge me lek kè Karais, mè ìyaka ire ogwu oyet, inin̄ emen uwu ntitiin̄ Awaji mgbọ otutuuk ene ekiben nriran, ikọ otutuuk ene cha ekitumu môfieek ọmọ ikọ, mè irọ inyi iriọọn̄ ibe ke ọmọ ìre ogwu ijo.

²⁵Ikọ cha si môkpọk mbum otutuuk nlelet inu geelek òkup ene ya me ejit. Sa me ikeya, ene ya môgwook ekpe me ijọn̄, mè itọbọ ebum inyi Awaji, mè isa otu kan̄ itumu ibe, “Jei, Awaji òwa me etete kinyi, me atikọ!”

²⁶Bọn Nte n̄a, ìtet ibot me lek nteme keyi nkinyi enyi. Enyi isigbaan̄ ititiin̄ ibetọbọ ebum inyi Awaji, ene ge inyi okwa, ene ge itumu ikọ Awaji, ene ge iben nriran itumu inu Awaji ochilibe ijeen̄ ọmọ, ene ge itumu ikọ me nke nke usem, ene ge ikana ikọ ya, inyi otutuuk ene enọ. Inu geelek mêrọbe môre inu òbonama ntitiin̄ Awaji ibene.

²⁷Ire ebetumu ikọ me nke nke usem, ene ge, mè ìre ene iba gaalek etumu. Imalek iwa ifiat, ire ene ita. Ebekitumu si, ene ge, mgbọ ge, otutuuk ene ekagbaan̄ ìtumu mgbọ ge. Ene ge isitumu isan̄a, ogwu Awaji onyibe unye isasa ikana ikọ ya, ikana, inyi otutuuk ene eriọọn̄ inu îtumube.

²⁸Ire kpunu ogwu òbokọt ikana nke nke usem cha inyi ebi ene me ere ya, ebi ìkitumu usem cha echit otu me emen ntitiin̄, mè etumu ikọ me nke nke usem cha me emen ejit kiban̄ enyi lek kiban̄ melek Awaji.

²⁹Ire me lek ebi nriran, ene iba, mè ire ene ita gaalek eben nriran, mè ebi nriran kebilọ ekegban̄, mè eketọ ekpọ-nu, mè ìre ìnan̄a me ubọk Awaji, mè ìkare.

³⁰Ire Awaji ichili ayaya etip ijeen̄ ofifi ene òsisiki ikweek me mgbọ ene ge okiben nriran, ogwu adasi ya isiki ikweek, mè inyi ogwu òso iba ya irek, inyi itumu ikọ.

³¹Mije, enyi otutuuk mêkọt iben nriran, ene ge, mgbọ ge, inyi ene geelek ibọkọ ikween̄-inu, mè inu enyi ekitumu itap si otutuuk ene efuuk me emen.

³²Ogwu Awaji onyibe unye isasa ikiben nriran, ọmọ okaan̄ itọtọ ikọ inyi unye ya.

³³Mije, Awaji ìkakima wọlọwọlọ. Kpan̄asi ikeya, ìkima ibe eji ekegbaan̄ erọ inu me esuuk. Inu ògbegbe ibe ekerọ me emen otutuuk ntitiin̄ ebi eyi Awaji geelek ìre ikeyi:

³⁴Ebibaan̄ ekeriaan̄ ere me emen ntitiin̄ Awaji. Kpenyi ebibaan̄ unye itutumu ikọ me ere ya. Ikeya si ke ege me Ikan kè Mosis ibe mè ebibaan̄ ekesiki lek kiban̄, mè ekare ebi ibot.

³⁵Ire ikaan̄ inu enenwaan̄ geelek oweekbe idodo ikọ ofolek, ido ogwu olom me uwu. Mije, ebibaan̄ itutumu ikọ me emen ntitiin̄ Awaji ìre inu esip.

³⁶Iyak! Ìre ikọ Awaji ìbene me lek kinyi? Sà ìre enyi gaalek enọ ikọ Awaji?

³⁷Me etete kinyi, ire ikaan̄ ogwu imọnọ ibe ke ọmọ ìre ogwu nriran, mè ìyaka ire ke ọmọ îkaan̄ uche eyi Ekwukwu Mbuban okinyi ene, ene ya iriọọn̄ ibe ke inu chi nkige ijet enyi ìre ikan Okaan̄-ene.

³⁸Ire ikaan̄ ogwu ìkasa ikan chi ìgwen inu geege, ikamọnọ ene ya kubọk inu geege.

³⁹Eya orọ, bọn Nte n̄a, ìsa otutuuk ejit kinyi ìweek ibeben nriran. Ire, ikakput ibe ene ikatumu ikọ me nke nke usem.

⁴⁰Ire, ìkirọ inu geelek me onineen̄, me oniin̄ ògbegbe.