Read obolo I Kọr 15 Bible Online

I Kọr 15 - obolo bible

I Kọr 15

¹Mgbọ keyi, bọn Nte n̄a, ǹkiweek itataba ekiket kinyi ifo lek ata etip ya eyi nlookbe enyi, eyi enyi ebọkọbe itap, mè isa me ikeya ikeke inye me emen ichechieek kinyi.

²Îre nan̄a me lek ata etip yi ke Awaji okinyan̄a enyi, mè ire enyi itet ata etip ya nlookbe enyi inye. Ire enyi kpetet inye, otutuuk ichechieek enyi echieekbe me lek kè Karais ìre inu ikike.

³Mije, ata etip mbọkọbe me ubọk kè Jisọs Karais ke nkana itap enyi me ubọk, kubọk adasi inu òkup me uyọt ichit. Ata etip ya ìre ikeyi: Karais îkwu mkpa mije ijo inu kiji, kubọk egebe me Ikpa Mbuban ibe ke môrọ.

⁴Mîfuun̄ ọmọ, Awaji ojojomo ọmọ me mkpa me òso egwe ita, kubọk egebe me Ikpa Mbuban ibe ke môrọ.

⁵Ọmọ okakana isibi me isi kè Pita, mè isibi si me isi akọp mè ebi otuchieen̄ kan̄ iba.

⁶Mgbọ eya orakabe, isisibi si me isi ogbogbo bọn Nte ìwawa iraka efit ene go, me mgbọ yaage. Owuwa me lek bọn Nte cha me ugwem mgbọ keyi. Ire, usini kiban̄ mîkwaan̄.

⁷Ofifi mgbọ, isisibi me isi kè Jemis, mè isibi si me isi ebi otuchieen̄ kechilọ.

⁸Me òta kan̄, isisibi si me isi n̄a me oniin̄ òsibi esese. Sa me ikeyi, me etete ebi otu chieen̄, emi ǹkup kubọk gwun̄ emanbe me ulọ mgbọ.

⁹Emi nsip ichit me etete ebi otuchieen̄. Me atikọ, emi ǹkagbe ogwu ebegwen ogwu otuchieen̄, mije, nsisaak ntitiin̄ Awaji enenen.

¹⁰Ire, îre sa me atata nnwọn eyi Awaji ke nre inu nrebe mgbọ keyi. Atata nnwọn ya ìkachep me ikike. Mije, me atikọ, emi nsi ikwaan̄ igak otutuuk ebi otuchieen̄. Ire, ìkare me unye n̄a ke nsa irọ ikwaan̄ cha. Îre atata nnwọn Awaji eyi òkup melek n̄a osa emi irọ otutuuk ikwaan̄ cha.

¹¹Eya orọ, mè ìre me otu n̄a, mè ìre me otu ebi otuchieen̄ kechilọ, îre ata etip ge yi gaalek ke eji otutuuk ekilook. Ọmọ si ke enyi echieek me lek.

¹²Ire ata etip eji ekilook ikitumu ibe ke Awaji îjomo Karais me mkpa, usini ebi kinyi ejeje ikitumu ibe ke ebi ìkwakwaan̄ kpebejomo me mkpa?

¹³Ire ebi ìkwakwaan̄ kpebejomo me mkpa, kubọk enyi ekitumu, ìsibi ibe ke Awaji ìkajomo Karais me mkpa.

¹⁴Ire Awaji ìkajomo Karais me mkpa, ata etip eji ekilook îkana inu ikike, ichechieek kinyi si ìkasibi inu geege.

¹⁵Ògak ge, ire Awaji ìkajomo Karais me mkpa, ìsibi ibe ke eji otutuuk ene ekikan̄ ataak ikeme Awaji, me lek eji ekitumu ibe ke Awaji îjomo Karais me mkpa. Mije, ire ebi ìkwakwaan̄ kpebejomo me mkpa, ìsibi ibe ke Awaji ìkajomo Karais me mkpa.

¹⁶Ire Awaji ìkpojomo ebi ìkwakwaan̄ me mkpa, ìsibi ibe ke ìkajomo si Karais me mkpa.

¹⁷Ire Awaji ìkajomo Karais me mkpa, ìsibi ibe ke ichechieek kinyi ìchechep ikike; ke Awaji ìkatele ijo kinyi geege ìnyi enyi.

¹⁸Ìsibi si ibe ke otutuuk bọn Nte cha ìchechieek me lek kè Karais, mè ikwaan̄, echechep.

¹⁹Ire ikpọchieen̄ eji ekaan̄be me lek kè Karais ìyaka me lek inu linyọn̄ keyi gaalek, nsan lek kiji gaalek omin ichit me etete otutuuk ebilene me linyọn̄ keyi.

²⁰Ire, Awaji îjomo Karais me mkpa me atikọ. Awaji ìdasi ijomo Karais me mkpa isasa ijeen̄ ibe ke ọmọ môjomo si otutuuk ebi ìkwakwaan̄ me mkpa.

²¹Mije, ike mkpa onin̄be linyọn̄ sa me ubọk ene ge, òrere Adam, ikeya si, ijojomo me mkpa mônu si inan̄a me ubọk ene ge.

²²Ike otutuuk ebilene ekikwaan̄ mije ema enan̄abe me owot iman kè Adam, ikeya si ke Awaji môjomo otutuuk ebilene me mkpa inin̄ me ugwem, mije ema echieekbe me lek kè Karais.

²³Ogwu ikup, ìbojomo me mgbọ eyi kan̄. Karais ore ogwu adasi. Ọmọ isikpọk inu, otutuuk ebi eyi kan̄ mênenijomo me mkpa eyi kiban̄.

²⁴Eya isiraka, òta inu geelek me linyọn̄ keyi môneninu. Mgbọ ya, Karais môtim ikpan̄ otutuuk ibot mkpulu geelek òkup me linyọn̄ keyi, mè echi òkikpulu me isinyọn̄, mè otutuuk unye geelek, mè inikana mkpulu kan̄ itap me ubọk Awaji Ute.

²⁵Mije, Karais môkikpulu mege ire mgbọ Awaji môtimbe ikpan̄ otutuuk ebi ochicha kè Karais, mè isa ema irọ inu ibene ukot inyi Karais.

²⁶Òta ogwu ochicha, ogwu Karais môkpan̄be, ìre mkpa.

²⁷Mije, ege me Ikpa Mbuban ibe, “Awaji îkeme otutuuk inu isiki itap me irak ukot kan̄.”[16] Ubọk geelek egebe ikeya, îsibi utoon̄ ibe ke Awaji me lek kan̄, ogwu òtatap otutuuk inu me irak kè Karais, ìkakup me otu ifuk otutuuk inu cha îtapbe me irak kè Karais.

²⁸Awaji isitap otutuuk inu me irak mkpulu ogwu Gwun̄ isan̄a, ogwu Gwun̄ ya me lek kan̄ mônenikup me irak ogwu Ute ogwu òtatap otutuuk inu me irak kan̄. Mgbọ ya, Awaji mônenikana Ogwukaan̄ otutuuk inu geelek, mè ire Ogwu Ibot Mkpulu me inu geelek.

²⁹Ire ebi ìkwakwaan̄ kpebejomo me mkpa, ebi ene ejeje ikigwook ebi ìkup me ugwem mun̄ me useen̄ ebi ìkwakwaan̄? Ìre keke orọ mè ekegwook ojelek mun̄ òkup ikeya ire ife cha ebi ekigwook mun̄ ya inyi kpebejomo me mkpa?

³⁰Ire ebi ìkwakwaan̄ kpebejomo me mkpa, ìre keke orọ eji me lek kiji ekijeen̄ ojelek ijejeen̄ òkup ikeya, mè ikitap lek kiji, mgbọ geelek, me emen inu môkọtbe isa mkpa ijet eji?

³¹Bọn Nte n̄a, me atikọ, ǹkikup me irak ubọk mkpa egwe geelek, ǹkafiaan̄ enyi. Ikeya si ke nkinwọọn̄ unwọọn̄ mgbọ geelek me ibot kinyi, mije enyi otutuuk ene erebe ebi eyi Okaan̄ kiji Jisọs Karais.

³²Ufialek mbọkọbe me Efesọs ìkup kubọk ǹtim etim me lek ijo anam oron. Ire ke îre mije ulọk eyi akpalek ebilene ikike ke mbọkọ ufialek ya, ìre kpasi oruru ke mbakaan̄? Ire ebi ìkwakwaan̄ kpebejomo me mkpa, “Eji erie, mè enwọ! Mije, iyakwut, eji mêkwaan̄ ita,”[17] kubọk egebe me Ikpa Mbuban.

³³Ikachieek ibe ene geege ifiaan̄ enyi, “Ijo otu ogbo, ìkekifiat ata ugwem.”

³⁴Ikayaka ìbubut! Ìluk ugwem kubọk ebi ìkakaan̄ ifuk-ibot, ikayaka ìrọ ijo inu ìfo isi. Mije, îkaan̄ usini ene me etete kinyi ebi ekariọọn̄ge Awaji kubọk ge. Ǹkitumu ikọ keyi inyi esip itet enyi.

³⁵Usini mgbọ, ebi ene mêkọt ido ibe, “Mọmọ ubọk ebi ìkwakwaan̄ ebesa ijomo me mkpa? Ìre kpasi akpalek ke ife cha ebekaan̄?”

³⁶Eya ìre ikọ ebi burubut! Ìre enyi kperiọọn̄ ibe ke mfut ewopbe ìkakitibi ìsibi, ire ìkadasi ikwu?

³⁷Mgbọ ekiwop mfut me uko, ìkare uti òbotitibi isibi ya me lek kan̄ ke ekitap me ijọn̄. Inu ekitap me ijọn̄ ìre ukwuuk mfut uti ya, môkọt ire ukwuuk akpa, mè ìre ukwuuk ofifi mfut uti.

³⁸Îre Awaji obonyi mfut ya akpalek ubọk òneneme ọmọ. Awaji ìkinyi ukwuuk mfut geelek akpalek igọọk me lek uti eyi òkito mfut ya.

³⁹Otutuuk inu òkup me linyọn̄ keyi kpegbaan̄ ikaan̄ akpalek ìkike. Ebilene mîkaan̄ akpalek eyi kiban̄ esese, anam si îkaan̄ eyi kiban̄, unọn îkaan̄ si eyi kiban̄. Ikeya si ke irin̄ okaan̄ eyi kiban̄ esese.

⁴⁰Otutuuk inu òkup me isinyọn̄ îkaan̄ akpalek eyi kiban̄. Ikeya si, otutuuk inu òkup me linyọn̄ îkaan̄ si akpalek eyi kiban̄. Uja eyi akpalek eyi inu echi òkup me isinyọn̄ ìkup esese. Uja eyi akpalek eyi inu echi òkup me linyọn̄ ìkup si esese.

⁴¹Ura îkaan̄ uja eyi kan̄ esese, onyan̄ si îkaan̄ eyi kan̄. Ikeya si ke ebi kè ntoronyan̄ ekaan̄ uja eyi kiban̄ esese. Uja ntoronyan̄ ge okaan̄be înwene me lek uja ofifi ntoronyan̄ okaan̄be.

⁴²Ikeya si ke ìbokup me mgbọ Awaji môjomobe ebi ìkwakwaan̄. Akpalek eyi ebenbe ifuun̄ ìre akpalek òbojọjọ, ire, Awaji isijomo akpalek ya me mkpa, môkana akpalek eyi kpojọbe.

⁴³Mgbọ efuun̄be akpalek ya, ìkakaan̄ umin geege, ire, Awaji isijomo akpalek ya me mkpa, akpalek ya môkaan̄ ujamgbugbo. Mgbọ efuun̄be akpalek ya, ìkpọkpọ idek, ìkakaan̄ unye geege. Ire, Awaji isinijomo akpalek ya me mkpa, akpalek ya môkaan̄ unye.

⁴⁴Mgbọ efuun̄be akpalek ya, îre akpalek ikike ke efuun̄. Ire, Awaji isinijomo akpalek ya me mkpa, ìbore akpalek eyi erumun̄. Ire ke akpalek eyi linyọn̄ keyi òwa, ìsibi ibe ke akpalek eyi erumun̄ òwa si.

⁴⁵Mije, ege me Ikpa Mbuban ibe, “Adam, adasi ene Awaji orombe, okakana ogwu ògat ugwem.”[18] Ire, òta Adam, òrere Karais, onenikana Ekwukwu òkinyi ebilene ugwem.

⁴⁶Ìkare akpalek eyi erumun̄ odasi inu. Îre akpalek eyi linyọn̄ keyi odasi inu, sabum akpalek eyi erumun̄ oninu.

⁴⁷Adasi Adam ìnan̄a me ntitaak ijọn̄ eyi linyọn̄ keyi. Ire, Adam ogwu òso iba ìnan̄a me emen inyọn̄.

⁴⁸Ubọk ogwu Awaji osabe ntitaak ijọn̄ linyọn̄ keyi irom okupbe, ikeya si ke ebi ìrere ebi linyọn̄ keyi ekup. Ubọk ogwu ònan̄a me emen inyọn̄ okupbe, ikeya si ke ebi ìkup ìnyi ogwu ònan̄a me emen inyọn̄ ekup.

⁴⁹Ike eji ekupbe mgbọ keyi me mbet ogwu esabe ntitaak linyọn̄ keyi irom, ikeya si ke eji ebekup me mbet ogwu ònan̄a me emen inyọn̄.

⁵⁰Bọn Nte n̄a, ǹkirọ inyi enyi eriọọn̄ ibe ke akpalek mè eje ikike ìkpokọt inin̄ emen mkpulu eyi Awaji. Ikeya si, inu eyi môjọbe ìkpokọt ikaan̄ inu eyi kpojọbe.

⁵¹Eya orọ, ìgban̄ utọn̄! Mânitumu nlelet inu ge inyi enyi! Eji otutuuk kpebekwaan̄ isan̄a. Ire, ebenwenwene eji otutuuk ene mgbọ yaage.

⁵²Òta mgbọ isi ire, ida otita môtaan̄. Òta ida otita isitaan̄, mgbọ yaage, chit chieen̄ mè bolo, bọn Nte ebi ìkwakwaan̄ mêjomo me mkpa me akpalek eyi kpoyakabe ijọ. Mêneninwene eji ebi mêkupbe me ògat ugwem mgbọ ya, inyi eji enekaan̄ ayaya akpalek. Inu chi geelek ìborọ mgbọ yaage kubọk utoon̄ okebe mgbọ ge mèrèp.

⁵³Mije, akpalek eyi òkikwukwu môkana akpalek eyi kpoyakabe ikwu. Akpalek yaage eyi òkijọjọ môkana akpalek eyi kpoyakabe ijọ.

⁵⁴Mgbọ akpalek keyi eyi òkijọjọ isinikana akpalek eyi kpoyakabe ijọ, mè akpalek keyi eyi òkikwukwu isinikana akpalek eyi kpoyakabe ikwu, mgbọ ya ke inu egebe me Ikpa Mbuban mônirọ iso, ibe, “Awaji îtim ikpan̄ mkpa isan̄a kpai!”[19]

⁵⁵“Jei mkpa, mọmọ unye kwun̄ ya okisa itim ikpan̄ ebilene? Jei mkpa, iwot kwun̄ ya ìkup me owa?”[20]

⁵⁶Iwot eyi mkpa okisa ikpan̄ ene ìre ijo inu. Unye eyi ijo inu okaan̄be ìre Ikan kè Mosis.

⁵⁷Ire, itọn̄ ikup inyi Awaji ogwu òkirọ inyi eji etim ekpan̄, inan̄a me unye Okaan̄ kiji Jisọs Karais.

⁵⁸Eya orọ, bọn Nte n̄a, ìkeke ìnye! Ikachieek ibe inu geege isisik enyi. Ìkisa lek kinyi ìtap me ikwaan̄ Okaan̄-ene mgbọ geelek. Mije, enyi mîriọọn̄ ibe ke kwulukwulu geelek enyi ekwukwulube inyi Okaan̄-ene ìkpochep me ikike.