Read obolo I Kọr 16 Bible Online

I Kọr 16 - obolo bible

I Kọr 16

¹Eyi ìre nteme ofolek ititip otitip ebekisa itap ubọk inyi bọn Nte ìkup me agan̄ Judia. Ubọk ntemebe otutuuk ntitiin̄ òkup me agan̄ Galesia ibe ekerọ, enyi si ìkirọ ikeya.

²Me usen ògọọk Usen Mbuban geelek, ene geelek me etete kinyi ikisan̄a ikpoko isun̄ esese ikpọ me lek mkpukpe îkaan̄be me ubọk ikwaan̄ kan̄ me nde ya. Ire enyi ikirọ ikeya, kpebeyaka ikije ikana ikitip ikpoko ya mgbọ nsinu.

³Ìgobo ebirieen̄ ebi enyi etoon̄be ejit me lek ìsibi. Mgbọ nsinu, mâninyi ema ikpa unye ebesa iriọọn̄ ema, mè iria ema isibi, inyi ema esa inu cha enyi enyibe ejet bọn Nte me Jeruselem.

⁴Ire nnu, mè imun̄ ibe ke îgbe ibe emi ǹsi Jeruselem ya si, ema mêgọọk emi ije.

⁵Nsijijen̄e ije n̄a ikana agan̄ Mesidonia isan̄a, mânu me lek kinyi. Mwuuk lek itọt isan̄a isisi ije me agan̄ Mesidonia.

⁶Nsinu, mâgọọk enyi ikup ifiin̄. Usini mgbọ mâgọọk enyi ikup ita mgbọ utọọk, inyi enyi etap ubọk enyi emi, mè ǹkọt ǹsi ofifi ere geelek mbasi.

⁷Ire nnu me lek kinyi, ǹkaweek ikpọkpọ igba, mè iraka mgbọ yaage, ǹkiweek igọgọọk enyi ikup ifiin̄ sọnja, ire ineme Okaan̄-ene.

⁸Ire, mâkup me Efesọs mege ire mgbọ ijọk Pentikọs.

⁹Mije, irek îsibi iwa enenen inyi emi itutumu ikọ Awaji me Efesọs yi nkupbe, ubọk geelek owuwa ebi ene ekirọ ikeme emi.

¹⁰Ire Timọti inu me lek kinyi, ìbọkọ ọmọ ìtap, mè ìrọ inyi ejit ibele ọmọ, mije, ọmọ ìkisi ikwaan̄ Okaan̄-ene si, kubọk emi nkisi.

¹¹Ene geege ikakpọ ọmọ chieen̄ ìsiki. Kpan̄asi ikeya, ìtutuun̄ ọmọ itap me oniin̄ me esuuk, inyi igwu ikom ika igọọk emi. Mije, emi gwa ǹkikpọ chieen̄ ikaka kan̄, ọmọ mè bọn Nte ebi melek kan̄.

¹²Òfo me lek gwun̄ Nte kiji Apọlọs, nriaak ọmọ enenen ibe igọọk bọn Nte kebilọ inu inikpọ enyi, ire, usini mgbọ ìkatat me lek kan̄ inunu mgbọ keyi. Mgbọ geelek îkaan̄be irek, mônu.

¹³Ìgbala chieen̄, mè ìkeke ìnye me ichechieek! Ikatet ukpook me lek inu geege! Ìnye lek!

¹⁴Ìkirọ inu geelek me imumechieen̄.

¹⁵Enyi mîriọọn̄ ibe ke îre Sitifanas mè ototun̄ ukan̄ kan̄ ere adasi ebi ìgwugwu ikom ichieek me lek Okaan̄-ene me otutuuk agan̄ Akaya. Ema mîsa otutuuk efuuk kiban̄ ikisi ikwaan̄ inyi ebi eyi Awaji.

¹⁶Eya orọ, bọn Nte n̄a, ǹkibeek enyi ibe, soso ìkisiki ibot ìnyi ebi ìkup ikeyi, mè ebi geelek ìgọgọọk ema ikisi ikwaan̄ yi, mè ikeke inye ikikwukwulu.

¹⁷Ejit îbele emi enenen mgbọ Sitifanas, mè Fọtunetọs, mè Akaikọs enube inire ere keyi. Eyi enyi ekakupge me agba lek n̄a, inunu kiban̄ îkat emi ejit enenen. Ìyaka inikup kubọk ema enu me irek kinyi.

¹⁸Ema mîtap emi unye me emen, kubọk ema erọbe inyi enyi. Îgbe ibe enyi eriọọn̄ ebi ìkup ikechi me etete kinyi, mè ekemin ema si.

¹⁹Otutuuk ebi ntitiin̄ Awaji ìkup me agan̄ Esia mîtọp enyi amọn. Akwila mè Pirisila ogwu nwa mîtọp enyi amọn enenen, enyi ebi melek kiban̄ egbaan̄be ire ge sa me lek Okaan̄-ene. Ebi ntitiin̄ Awaji eyi òkititiin̄ me uwu kiban̄ si mîtọp enyi amọn.

²⁰Otutuuk bọn Nte ìkup me ere keyi mîtọp enyi amọn. Ìtọp lek kinyi amọn, mè ìkat lek kinyi me erieen̄ Awaji.

²¹Îre emi Pọọlu nsa ubọk n̄a gaalek ige amọn keyi.

²²Ikaan̄ ogwu ikamun̄ge Okaan̄-ene me chieen̄, ifieek inyi ene ya. Jei, Okaan̄-ene, na!

²³Kè atata nnwọn Okaan̄-ene Jisọs Karais ikup inyi enyi.

²⁴Kè imumechieen̄ n̄a ikup melek kinyi otutuuk ene, enyi ebi ìrere ebi eyi kè Jisọs Karais.