Read obolo I Kọr 2 Bible Online

I Kọr 2 - obolo bible

I Kọr 2

¹Bọn Nte n̄a, mgbọ nnube me ere kinyi inilook enyi etip ofolek udọk udọk atikọ eyi Awaji, ǹkasa utop otu ikọ mè uga iriọọn̄-inu ìnitumu ikọ isasa inwene enyi ejit.

²Mije, mgbọ nkupbe melek kinyi, ǹtutumu ifieek me ejit n̄a ibe ke ǹkabakeek ekiket ofolek inu geege, ilọ me lek kè Jisọs Karais, ògak ge, mkpa eyi ọmọ okwube me inyọn̄ uti nkwurieen̄.

³Ǹnu me lek kinyi kubọk ogwu òwọwọ idek, mè ikitet ukpook, mè ikiran enenen mije ukpook.

⁴Mgbọ nnube inijeen̄ enyi inu, mè ilook enyi ata etip, ǹkasa me iriọọn̄-inu mè ikọ ekisa inwene ene ejit ìnu me lek kinyi. Ire, ǹnu melek ikpele unye eyi Ekwukwu Mbuban eyi enyi emun̄be.

⁵Eya orọ, ichechieek kinyi ìkanan̄a me lek iriọọn̄-inu ebilene, ìnan̄a me lek unye eyi Awaji.

⁶Eji ekitumu ikọ òkinyi ene iriọọn̄-inu inyi ebi ìmimiin̄ iso me emen inu eyi Awaji. Ire, ìkare iriọọn̄-inu eyi linyọn̄ mgbọ keyi, ìkare si iriọọn̄-inu eyi ebi ibot mkpulu eyi linyọn̄ mgbọ keyi, ebi unye kiban̄ obokana inu ikike.

⁷Ire, eji ekitumu ikọ ofolek nlelet iriọọn̄-inu eyi Awaji, eyi Awaji oletbe me chieen̄ ebilene mè itumu ifieek, karake sabum enirom linyọn̄, ibe ke ọmọ môchili ijeen̄ eji me ukot keyi, inyi eji esa me ikeya ekaan̄ ujamgbugbo kan̄.

⁸Me etete ebi ìkikpulu linyọn̄ me ukot keyi, kpunu ogwu òkọkọt igobo iriọọn̄-inu ya itet. Ire ema mekọt igobo itet, ema kpemetet Okaan̄-ene, ogwu òkaan̄ otutuuk ujamgbugbo, igon ikpan̄ me inyọn̄ uti nkwurieen̄.

⁹Ubọk geelek, mîge si me Ikpa Mbuban ibe, “Inu echi Awaji onen̄ebe isun̄ iban ebi ìmumun̄ ọmọ me chieen̄, kpunu chieen̄ ene geege òrarak imun̄, kpunu utọn̄ ene geege òrarak inọ, kpunu ejit ene geege òbokọkọt ikeek ubọk inu cha osabe ikup.”[3]

¹⁰Ire, îre eji ke Awaji ochili inu chi ijeen̄, sa me unye eyi Ekwukwu Mbuban kan̄. Mije, îre Ekwukwu Mbuban okimọọn̄ inu geelek itibi, ìrere nlelet udọk udọk inu òkup Awaji me ejit.

¹¹Mije, kpunu ene geege òkikọt iriọọn̄ inu òkup ene me ejit, îtata ekwukwu ene ya gaalek obokọt iriọọn̄. Ikeya si, kpunu ogwu òrọriọọn̄ ekiket Awaji, ilọ me lek Ekwukwu Awaji, ọmọ gaalek obokọt iriọọn̄.

¹²Ekwukwu eyi Awaji onyibe eji ìkanan̄a me linyọn̄ keyi, îre Ekwukwu Awaji me lek kan̄. Ekwukwu ya okirọ inyi eji eriọọn̄ otutuuk uche geelek Awaji ochebe inyi eji me ikike.

¹³Eya orọ, ikọ eji ekitumu ìkare ikọ ònan̄a me ifuk-ibot ebilene. Eji ekitumu ikọ eyi Ekwukwu Mbuban ojeen̄be eji. Eji ekikpa atikọ eyi Ekwukwu Mbuban inyi ebi ìkakaan̄ Ekwukwu Mbuban me emen kiban̄.

¹⁴Ire, ogwu ikakaan̄ge Ekwukwu Mbuban me emen kan̄ ìkpokọt ibọkọ inu Ekwukwu Mbuban Awaji okinyi ene, mije, inu cha ìre inu burubut me lek kan̄. Ìkpokọt igobo inu cha si itet, mije, ekisa me unye Ekwukwu Mbuban gaalek igobo inu cha itet.

¹⁵Ogwu òkakaan̄ Ekwukwu Mbuban me emen gaalek okikọt iweek inu geelek iriọọn̄. Ire, ọmọ me lek kan̄, kpunu ene geege òkikọt iweek ọmọ iriọọn̄.

¹⁶Ege me Ikpa Mbuban ibe, “Ìre ekene oriọọn̄ inu òkup me ejit Okumugwem? Ìre ekene obokọt iteme ọmọ nteme?”[4] Ire, eji ebi ìkakaan̄ Ekwukwu Awaji me emen kiji, eji mîkaan̄ ekiket kè Karais me ejit kiji.