Read obolo I Kọr 3 Bible Online

I Kọr 3 - obolo bible

I Kọr 3

¹Bọn Nte n̄a, me mgbọ nkupbe melek kinyi, ǹkakọt ìtumu ikọ melek kinyi kubọk ebi ìkakaan̄ Ekwukwu Mbuban me emen. Kpan̄asi ikeya, ǹkitumu ikọ melek kinyi kubọk ǹkitumu inyi ebi linyọn̄ ikike, ebi ekariọọn̄ge Awaji, mije, mgbọ ya, enyi ìre asa nsabọn emanbe ayaya me oniin̄ eyi Karais.

²Me mgbọ ya, mfufet ikọ Awaji òbet lek mun̄ ebe ikike ekisa inyi nsabọn ke nsa ikinyi enyi. Ǹkanyi enyi echi udọk udọk cha òbet lek unye unye inorie ebi ugane ekirie. Mije, enyi kpemiin̄-nu iso ebi ìberie ojelek inorie òkup ikeya. Mege inire mgbọ keyi si, enyi kpemiin̄ iso-nu.

³Mije, enyi ekiluk si ugwem kubọk ebi linyọn̄. Eyi enyi ekikaan̄ chieen̄ ile me lek ebi melek kinyi, mè ikibaak ibaak, ìre eya ìkajeen̄ ibe ke enyi ìre ebi linyọn̄, ebi ìkiluk ugwem igọọk me lek orọmijọn̄ ebilene ikike?

⁴Ire ene ge me etete kinyi ikibe, “Emi ìre ogwu kè Pọọlu,” ofifi ene otutumu ibe, “Emi ìre ogwu kè Apọlọs,” ìre eyi ìkajeen̄ ibe ke enyi ìre ebilene ikike?

⁵Ìre ekene ore Apọlọs? Sà ìre ekene ore Pọọlu? Ema ìre ebi usun̄ gaalek, ebi enyi esabe me lek kiban̄ inichieek me lek kè Karais. Ema ekirọ ikwaan̄ igọọk ubọk Awaji ochebe ikwaan̄ inyi ema, me ene me ene.

⁶Eji ekup kubọk ebi ikwaan̄ uko. Emi Pọọlu mwop mfut, Apọlọs onenigwook mun̄ me ebon mfut cha. Ire, Awaji gaalek ire ogwu òrọrọ inyi mfut cha itibi.

⁷Eya orọ, ogwu òwowop mfut mè ogwu ògwogwook mun̄ me ebon mfut kpekup me lek inu geege. Ire, Awaji ogwu òrọrọ inyi mfut cha itibi, ọmọ gaalek okup me uyọt.

⁸Ogwu òwop mfut mè ogwu ògwook mun̄ me ebon mfut ìre ìkike. Ire, ogwu ikup, môbọkọ mkpukpe ubọk ikwaan̄ kan̄ igọọk me ikeke ikwaan̄ îsibe.

⁹Mije, eji ìre ebi melek Awaji ekigbaan̄ isi ikwaan̄. Enyi ìre uko eyi Awaji, mè ire si uwu eyi Awaji okinama.

¹⁰Sa me atata nnwọn eyi Awaji onyibe emi, ntọbọ ọdọ uwu kubọk ogwu usọ ikwaan̄ uwu, ogwu òrọriọọn̄ ikwaan̄ kan̄ ijaan̄. Ebi ofifi ife enenikinama uwu ya me inyọn̄ ọdọ ntọbọbe ya. Ire, ogwu geelek òkinama uwu me inyọn̄ ọdọ ya, igbala chieen̄ iriọọn̄ ubọk îkisa inama.

¹¹Mije, kpunu ofifi ọdọ ebeyaka itọbọ, ilọ me lek ọdọ ge ya gaalek eyi Awaji me lek kan̄ otọbọbe, eyi òrere Jisọs Karais.

¹²Inu geelek ene geelek osabe inama uwu me inyọn̄ ọdọ ya, mè ìre alata araran̄, mè ìre alata okuket, mè ìre ewuuk unye otu ewe geelek, mè ìyaka ire uti, mè ìre mbubet, mè ìre nchat uti akpa,

¹³ubọk ikwaan̄ ene ya môkpọk mbum me Usen Okaan̄-ene môkpọkbe inu. Mije, Awaji me lek kan̄ môsa ukan̄ itọ ikwaan̄ ene geelek ikpọ. Sa me lek inu ukan̄ ya môrọbe me lek ubọk ikwaan̄ cha, ene geelek mômọọn̄ ijaan̄ lek ike ikwaan̄ ọmọ osibe okupbe.

¹⁴Ire ukan̄ ìkataka inu ene onamabe itoon̄ me inyọn̄ ọdọ ya, ene ya môbọkọ mkpukpe kan̄.

¹⁵Ire, ire ukan̄ itaka inu ene onamabe itoon̄ me inyọn̄ ọdọ ya iriọk, ene ya môkaan̄ ichep. Mênyan̄a ene ya me lek kan̄ isibi. Ire, ọmọ ìbokup kubọk ogwu òwuwulu isibi me emen uwu ukan̄ okitaka, mè inwọnọ me otu alọm ukan̄.

¹⁶Ìre enyi kperiọọn̄ ibe ke enyi ìre Uwu Mbuban eyi Awaji; ke Ekwukwu Awaji ìkiluk me emen kinyi?

¹⁷Ikaan̄ ogwu ijijaka Uwu Mbuban Awaji, Awaji môjijaka ene ya. Mije, Uwu Mbuban Awaji ìkup me mbuban. Enyi me lek kinyi ere Uwu Mbuban ya.

¹⁸Ene geege ikafiaan̄ lek kan̄! Ire ikaan̄ ene me etete kinyi ogwu òkikeek ibe ke ọmọ îriọọn̄ inu me linyọn̄ mgbọ keyi, ene ya ikana ogwu burubut, inyi isa me ikeya ikana ogwu òriọọn̄ inu me atikọ.

¹⁹Mije, iriọọn̄-inu eyi linyọn̄ keyi ìre burubut me isi Awaji. Mije keya ke ege me Ikpa Mbuban ibe, “Awaji îtet ebi ìriọọn̄ inu me emen ngan kiban̄,”[5]

²⁰mè ige si ibe, “Okumugwem îriọọn̄ ibe ke ekiket ebi ìriọọn̄ inu ìkasibi inu geege.”[6]

²¹Eya orọ, ikayaka ìsa ubọk ikwaan̄ ebilene ìgugo lek. Mije, otutuuk inu geelek ìre eyi kinyi.

²²Îre enyi ekaan̄ Pọọlu, mè Apọlọs, mè Pita, mè ikaan̄ si otutuuk linyọn̄, mè ugwem, mè mkpa, mè inu geelek òkukup mgbọ kechi, mè echi òkup me isi. Otutuuk inu chi geelek ìkup inyi enyi.

²³Sà enyi otutuuk ekup inyi Karais. Karais me lek kan̄ okukup inyi Awaji.