Read obolo I Kọr 4 Bible Online

I Kọr 4 - obolo bible

I Kọr 4

¹Îgbe ibe ebi ene ekemọnọ eji ebi ìkijeen̄ enyi inu kubọk ebi ìkisi ikwaan̄ inyi Karais, ebi Awaji okanabe nlelet udọk udọk atikọ kan̄ itap me ubọk ibe esa ejeen̄ ebi ene.

²Ute-uwu geelek ìkikpọ chieen̄ ibe ke gwun̄ uwu kan̄ ogwu ọmọ okanabe inu kan̄ itap me ubọk môre ogwu ọmọ môkọtbe itoon̄ ejit me lek.

³Inu geelek enyi, mè ìyaka ire ebi ofifi ife, ekikeek ofolek n̄a ìkasisaak emi kubọk ge. Mè ìre ekitọtọn̄ emi, mè ìyaka ire ekifefieek emi ikọ, eya ìre sọntiik inu me lek n̄a. Emi me lek n̄a si, ǹkakikeek inu geege òfo me lek n̄a, mè ìyaka ire ikwaan̄ n̄a.

⁴Ejit n̄a ìkafieek emi ikọ. Ire, eya ìkasibi ibe ke emi ǹkariọọn̄ ijo inu. Okaan̄-ene me lek kan̄ ore ogwu òbosibi oyerebet me ibot n̄a.

⁵Eya orọ, ikasibi oyerebet ìnyi ene geege me mgbọ usen ikakemge-nu. Ìtele re mgbọ Okaan̄-ene môkpọkbe inu. Me usen ya, Okaan̄-ene isinu, mônikpọk mbum otutuuk nlelet inu geelek ebi ene ekirọ me emen udun, mè ikpọk mbum otutuuk nlelet otitọt geelek òkup me ejit ebilene. Me mgbọ ya, ogwu geelek ògbegbe itọn̄, môbọkọ itọn̄ inan̄a me ubọk Awaji.

⁶Atata bọn Nte n̄a, ǹkitumu inu chi ibak Apọlọs melek n̄a, mije kinyi, inyi enyi esa me lek kiji ekween̄ inu, mè ekasaba ìraka inu egebe. Sa me ikeya, enyi kpebeyaka ikisa ene ge igugo lek, mè ikpọ ogwulọ chieen̄ isiki.

⁷Ìre keke ke owu osa inwene me lek ofifi ene? Ìre îkaan̄ inu owu okaan̄be eyi ikarege Awaji onyi owu? Ire, ire ke enyinyi owu otutuuk inu owu okaan̄be, ìre keke orọ okigugo lek kubọk ke îre mije ata ikwaan̄ osibe ke okaan̄ inu chi; ke ìkare echeche inyi owu?

⁸Eyi kinyi, mgbọ keyi mgbọ keyi mege, enyi mîbene ikimọnọ ibe ke inu geege ìkayaka ìnan enyi; ke enyi mîbọọn̄ ubọọn̄, mè ikana ebi ubọọn̄ itele eji. Kè obele emi ejit enenen, mebe ke enyi mîkana ebi ubọọn̄ me atikọ, inyi eji si egọọk enyi ekana ebi ubọọn̄.

⁹Mije, ìkup me lek n̄a kubọk Awaji ìgogobo eji ebi otuchieen̄ ito me irek òsisiki ichit. Eji ekup kubọk ebi etipbe oyerebet mkpa, mè ikpulu igwook me eden̄ oyet me isi otutuuk inu geelek Awaji orombe, me isi ebi osat Awaji, mè isi ebilene, ibe ekenu enekpọ eji kubọk ekikpọ ifit.

¹⁰Eji mîkana ebi burubut mije kè Karais! Ire, me emen kè Karais, enyi ekimọnọ lek kinyi kubọk ebi ìriọọn̄ inu! Iin̄, eji mîwọ, mè idek! Ire, enyi mînye lek! Enyi ke ebi ene ekinyi umin! Sà eji ke ekikpọ chieen̄ isiki!

¹¹Mege inire mgbọ keyi, eji ekikup me uraafiọọn̄, mè urak-ebek, mè ikisa oka ekwut mè oka ofọnti ichit lek, mè ikibọkọ osusut me ubọk ebilene. Eji kpekaan̄ ere iluluk.

¹²Eji ekisa ubọk iba kiji ikwukwulu, inyi eji ekọt ekpọ owot kiji. Ebi ene isigbo eji, eji ekigbagbana ema. Ema isikisisaak eji, eji mîra ikime.

¹³Ebi ene isikitumu eji ifiat, eji mîra ikisa ata otu ikifọọk ema. Mege inire cherekeyi, eji ekup kubọk nsak inu eyi ebi linyọn̄ echanbe isa isi ifiin̄ me inyọn̄ otiton. Me chieen̄ ebi linyọn̄, eji ìre njijọ inu ikagbege ibe etele me ere ebilene elukbe.

¹⁴Ǹkage inu chi isasa itap enyi esip me isi. Ire, ǹkiweek iteteme enyi nteme, mije, enyi ìre bọn n̄a ebi mmabe.

¹⁵Enyi mêkọt ikaan̄ obop obop ebi ijejeen̄ ebi ìkikpukpo enyi me oniin̄ eyi Karais. Ire, ute ge gaalek ke enyi ekaan̄, ìkare owuwa. Emi nre nte kinyi me emen kè Jisọs Karais. Mije, emi nre adasi ene ogwu òsasa ata etip kè Jisọs Karais inilook enyi, eyi enyi ebọkọbe itap.

¹⁶Eya orọ, soso nriaak enyi, ìkikpọ inu me ubọk n̄a ìrọ.

¹⁷Îre mije keyi ke nria Timọti, òrere gwun̄ n̄a me emen Okaan̄-ene, inu me lek kinyi. Emi mmun̄ ọmọ me chieen̄ enenen. Ọmọ ìre ogwu òkigban̄ utọn̄, mè ikisa otutuuk ejit kan̄ irọ ikwaan̄ inyi Okaan̄-ene. Ọmọ môyaka inirọ mè enyi ekeek ubọk nsabe ikiluk ugwem me oniin̄ kè Jisọs Karais. Ubọk iluk-ugwem yi si ke emi nkijeen̄ ebi ene me ntitiin̄ Awaji me ere geelek nsibe.

¹⁸Usini kinyi mîbene ikigumu lek, mè ikikeek ibe ke emi m̀kpayaka igwu ikom inu me lek kinyi.

¹⁹Ire, ire ineme Awaji, mâgwat lek inu inikpọ enyi. Mgbọ ya, mâniweek iriọọn̄ ojelek ikọ ebi ìkigumu lek cha ekitumu, mè iriọọn̄ si unye ema ekaan̄be.

²⁰Mije, mkpulu eyi Awaji ìkije melek unye, ìkare me ikọ otu gaalek.

²¹Ìre eyi owa ke enyi eweek? Ìre enyi eweek ibe emi ǹsa njijan̄ ǹkaan̄ me ubọk ǹnu? Sà ìre enyi mênwene ugwem, mè ǹnu me imumechieen̄, mè ekwukwu eyi irọrọ inu esuuk esuuk?