Read obolo I Kọr 5 Bible Online

I Kọr 5 - obolo bible

I Kọr 5

¹Ukpatu òkitaan̄ ikana ere me mgbọ keyi ibe ke îkaan̄ ebi ìkiluk ugwem barabat me etete kinyi ebi ntitiin̄ Awaji. Ebe ke ugwem barabat ya îfieek ire lek, kperarak imun̄ ojelek kan̄, ìrere me etete ebi ekariọọn̄ge Awaji. Ebe ke enerieen̄ ge me etete kinyi òkigọọk nwa ogwu ute ilaak.

²Ìre enyi ejeje ikigumu lek, kpan̄asi enyi mekikup me ufieejit? Ogwu òkup ikeya ìre ogwu enyi melalap isibi me emen ntitiin̄ kinyi!

³Ubọk geelek nkakupge me etete kinyi isi mè isi, ire, me emen ejit n̄a, emi melek kinyi ekup me ere ya. Sa me erieen̄ Okaan̄-ene Jisọs, emi mwuuk lek ifieek oyerebet isan̄a inyi ogwu òrọrọ inu ya. M̀fieek oyerebet ya kubọk ǹkukup me ere ya melek kinyi.

⁴Enyi ebi ntitiin̄ Awaji ìgbaan̄ ìtitiin̄ me ere ge. Me emen ejit n̄a, mâgọọk enyi ikup. Unye Okaan̄ kiji Jisọs môkup si melek kinyi. Ìsa me unye Okaan̄-ene,

⁵ìkana ene ya ìtap me ubọk Setan, inyi ijijaka akpalek ijo inu ene ya, mè Awaji inyan̄a ibot ejit kan̄ me usen Okaan̄-ene Jisọs môkpọkbe inu.

⁶Gogolek kinyi ìkatat. Ìre enyi kperiọọn̄ urọk ge ekito ibe, “Sọntiik olat etapbe me emen akpa ekọkọk okirọ inyi otutuuk owut fituru iwuku?”[7]

⁷Ìsan̄a ijo inu ya ìsan̄a me etete kinyi, inyi enyi etana kubọk ayaya akpa ekọkọk, eyi kpunube olat geege me lek. Me atikọ, enyi mîtana isan̄a, mije, Karais îkwu mkpa mije kinyi. Karais ìkup kubọk arọọn̄ ekisa igwa ngwugwa inyi Awaji me mgbọ ijọk Iraraka.

⁸Eya orọ, eji esan̄a lek kiji me lek otutuuk ijo inu geelek, kubọk njijọ ejit mè inu ikpak, inyi eji ekakup kubọk fituru òkakaan̄ oka olat me lek. Kpan̄asi ikeya, eji ekeluk ugwem eyi atikọ, eyi ofiaan̄ geege ikakupge me emen, inyi eji ekup kubọk fituru eyi kpunube olat geege me lek, eyi ebi Ju ekisa irie ijọk Iraraka. Sa me ikeya, eji mêre ebi ìkirie ijọk ya ubọk ògbegbe.

⁹Me emen ikpa ngebe ijet enyi, ntumu ibe mè enyi ekagọọk ebi barabat ìgbaan̄ ìrọ inu geege.

¹⁰Ǹkatumu ikọ yi ìbak ebi linyọn̄ ebi kpechieek me lek kè Karais, ebi ìrere ebi barabat, mè ebi ejit ile, mè ebi ofiaan̄, mè ebi ìkiriaak mkpọmfaka. Mije, ire ebiba, kpunu ubọk geege enyi ebesa iluk me linyọn̄ keyi, mè ilọ ichichichini ema. Îtata mè enyi enanan̄a isibi isi ge, kpeyaka iluk me linyọn̄ keyi.

¹¹Ire, ǹkitumu ibe enyi ekagbaan̄ inu geege ìrọ melek ene geelek òbebe ke ọmọ ìre gwun̄ Nte, mè ire ogwu barabat, mè ogwu ejit ile, mè ogwu òkiriaak mkpọmfaka, mè ogwu òkitumu ene ifiat, mè ogwu usa-miin̄, mè ogwu mfeen̄. Ikagọọk ojelek kè ebiba ìgbaan̄ ìrọ inu geege. Ìrere inorie ikike, ikagọọk ema ìgbaan̄ ìrie.

¹²Ìkare ikwaan̄ n̄a itatap chieen̄ me emen ugwem ebi kpere ebi ntitiin̄ Awaji ikikpọ mè ìre ema mêkirọ inwọn, mè ìre kperọ inwọn. Ire, îre ikwaan̄ kinyi iwọwọlọ ugwem ebi ìkup me emen ntitiin̄ Awaji ikpọ, mè ìre ema mêkirọ inwọn, mè ìre kpekirọ inwọn.

¹³Awaji gaalek ore ogwu òbotumu oyerebet inyi ebi kpekup me emen ntitiin̄ Awaji. Ire enyi, kubọk egebe me Ikpa Mbuban, “Ìsan̄a ogwu ijo ene ya ìsibi me etete kinyi.”[8]