Read obolo I Kọr 6 Bible Online

I Kọr 6 - obolo bible

I Kọr 6

¹Ire gwun̄ Nte ge me etete kinyi ikaan̄ ikọ melek ofifi gwun̄ Nte, ìre ìjeje itat ibe ene ya isi igwen gwun̄ Nte kan̄ oyerebet me isi ebi ekariọọn̄ge Awaji, kpan̄asi ìbosa ikọ ya isi me isi bọn Nte?

²Ìre enyi kperiọọn̄ ibe ke îre ebi eyi Awaji ebesibi oyerebet inyi ebi linyọn̄? Ire, ire ke îre enyi ebesibi oyerebet inyi ebi linyọn̄, ìre keke orọ enyi kpebekọt isibi oyerebet me lek asabọn ikọ òsisibi me etete kinyi gaalek?

³Ìre enyi kperiọọn̄ ibe ke îre eji ebesibi oyerebet inyi ebi osat Awaji? Ire ikeya, ìre keke orọ enyi kpekọt isibi oyerebet me lek inu eyi linyọn̄ keyi?

⁴Eya orọ, ire ojelek gọlọgọlọ òkup ikeya ikpọk ikup me etete kinyi, ìgwen bọn Nte, ìrere ebi ìsisiki ichit me emen ntitiin̄ Awaji, inyi enesibi oyerebet ya.

⁵Ǹkitumu ikọ yi inyi esip itet enyi! Ìre ìkakakaan̄ kubọk ene ge me etete kinyi ogwu òkakaan̄ ifuk-ibot ire lek môkọtbe isibi oyerebet me lek gọlọgọlọ òkup me etete ebi ìchechieek me lek kè Karais?

⁶Ìkatatat kubọk ge ibe gwun̄ Nte ge isi igwen ogwu ngwan̄ oyerebet me uwu oyerebet, inyi ebi ekachieekge me lek Okaan̄-ene enekup ekesibi ema oyerebet me ibot!

⁷Me atikọ, eyi enyi ekigwen bọn Nte kinyi oyerebet me uwu oyerebet, eya ìkijeen̄ ibe ke enyi mîrọn̄ inin̄ emen ijo inu isan̄a. Kpan̄asi uwu oyerebet, kè ònwọn ibe enyi eme ijo inu bọn Nte kinyi erọbe enyi. Kè ònwọn si ibe enyi etele inyi bọn Nte kinyi efeen̄ enyi.

⁸Ire, kpan̄asi ebi ofifi ife mekifeen̄ enyi, ìyaka inire enyi me lek kinyi ekifeen̄ ene, mè ikirọ ene ijo inu, mè ikirọ si ire lek bọn Nte kinyi gaalek!

⁹Ìre enyi kperiọọn̄ ibe ke ebi ìkirọ ijo inu kpebekaan̄ uche geege me mkpulu eyi Awaji? Ikachieek ibe efiaan̄ enyi! Ebi barabat, mè ebi ìkiriaak mkpọmfaka, mè ebi ugan-nwa, mè ebirieen̄ ebi ìkilaak ebirieen̄, mè ebibaan̄ ebi ìkilaak ebibaan̄,

¹⁰mè ebi inọ, mè ebi ejit ile, mè ebi usa-miin̄, mè ebi ìkitumu ene ifiat, mè ebi mfeen̄ geelek kpebekaan̄ uche me mkpulu eyi Awaji kubọk ge.

¹¹Ubọk usini kinyi ekupbe ire eya me adasi mgbọ. Ire, mîgwọk enyi isan̄a me emen ijo kinyi, mè irọ inyi enyi ekup me mbuban, mè irọ si inyi enyi ekana ebi ata irọrọ sa me erieen̄ Okaan̄-ene Jisọs Karais, mè unye eyi Ekwukwu Awaji kiji.

¹²Usini kinyi ekitumu ibe, “Emi mâkọt irọ inu geelek, ikan ìkatet emi.” Iin̄, îre ikeya. Ire, ìkare otutuuk inu geelek okaan̄ oruru. Emi me lek n̄a si, mâkọt irọ inu geelek, ikan ìkatet emi. Ire, m̀kpatele ibe inu geege isa emi irọ usun̄, mè ikitọ ikọ inyi emi.

¹³Usini kinyi ekitumu ibe, “Inorie ìkup inyi owot, owot ìkup inyi inorie!” Iin̄, îre ikeya. Ire, owot mè inorie ìre inu Awaji obojijijaka isan̄a kpai. Akpalek ene ìkakup ìnyi ugwem barabat, ìkup inyi Okaan̄-ene Jisọs Karais. Okaan̄-ene si ore ogwu òkinyi akpalek ene inu îweekbe.

¹⁴Awaji ìsa me unye kan̄ ijomo Okaan̄-ene me mkpa. Ikeya si ke ìbojomo eji me mkpa.

¹⁵Ìre enyi kperiọọn̄ ibe ke akpalek kinyi ìre nriro lek kè Karais me lek kan̄? Ìre îgbe ibe emi ǹsa nriro lek kè Karais ǹchim ǹriaak me lek ogwu òje oyet?

¹⁶Ìre enyi kperiọọn̄ ibe ke ene geelek òsasa lek kan̄ isi ichim iriaak me lek ogwu òje oyet îkana akpalek ge melek ogwu òje oyet ya? Mije, ege me Ikpa Mbuban ibe, “Ema ene iba mêkana ire akpalek ge.”[9]

¹⁷Ire, ene geelek òsasa lek kan̄ ichim iriaak me lek Okaan̄-ene îkana ge melek Okaan̄-ene me emen ekwukwu.

¹⁸Ìlibi ìnan̄a me lek ugwem barabat! Otutuuk ofifi ijo inu geelek eyi ene okirọ ìkakigbaan̄ me lek akpalek ogwu òkirọrọ. Ire, ene geelek òkirọ ugwem barabat ìkirọ ijo inu ya ikeme akpalek kan̄.

¹⁹Ìre enyi kperiọọn̄ ibe ke akpalek kinyi ìre Uwu Mbuban, ere Ekwukwu Mbuban òkup enyi me emen okiluk? Îre Awaji onyi enyi Ekwukwu Mbuban ya. Ìkare enyi ekaan̄ lek kinyi. Îre Awaji okaan̄ enyi!

²⁰Awaji ìlelep enyi, mè ikpe ewe! Eya orọ, ìsa akpalek kinyi ìmin Awaji.