Read obolo I Kọr 7 Bible Online

I Kọr 7 - obolo bible

I Kọr 7

¹Nteme mbanyi enyi ofolek ikọ ya enyi etumube me emen ikpa enyi egebe ijet emi ìre ikeyi: Ire ogwu enerieen̄ ibe ke ọmọ ìkpokaan̄ nwa, ìkpochak si ubọk me lek enenwaan̄ geege, înwọn.

²Ire, mije ugwem barabat omalek iwa, îgbe ibe enerieen̄ geelek ikaan̄ nwa eyi kan̄, mè enenwaan̄ geelek ikaan̄ si olom eyi kan̄, inyi enyi ekanan̄a ìrọn̄ ìnin̄ me ijo inu.

³Olom inyi ogwu nwa inu geelek òrere unen ogwu nwa kubọk nwa òbat olom. Nwa si inyi ogwu olom inu geelek òrere unen ogwu olom kubọk olom òkaan̄ nwa.

⁴Mije, akpalek nwa ìkakup ìnyi nwa, ìkup inyi ogwu olom. Ikeya si, akpalek olom ìkakup ìnyi olom, ìkup inyi ogwu nwa.

⁵Owu olom, kajit inyinyi nwa kwun̄ akpalek kwun̄, îtata mè ìre enyi egbagbaan̄ ichieek ibe ke enyi ebetap lek kinyi me uriaak. Ikeya si, owu nwa, kajit si inyinyi nlom kwun̄ akpalek kwun̄, îtata si mè ìre mije uriaak yaage. Uriaak ya ikakup ìfiin̄ ìraka sọntiik mgbidim mgbọ gaalek. Sọntiik mgbọ ya isiraka, ìyaka ìgbaan̄ ìtitiin̄. Mije, ire enyi ikup ikeya ifiin̄, mè kpeyaka ikọt itet lek kinyi ikaan̄, Setan mônitọ enyi ikpọ, enyi mênanan̄a irọn̄.

⁶Ikọ yi nkitumu, ǹkatatap kubọk ikan. Ǹkitumu ibe, ogwu iweek ibabat olom, ibat. Ogwu iweek idodo nwa, ido, ke ibabat olom, mè idodo nwa ìkare ijo inu.

⁷Mebe ke otutuuk ene ekup kubọk emi nkupbe, kpekaan̄ nwa, kpekaan̄ olom, kè oneme emi enenen. Ire, Awaji ìnyi ene uche esese esese, kpa ogwu mè eyi kan̄. Ene ge ikaan̄ uche keyi, ofifi ene òyaka òkaan̄ uche keyilọ.

⁸Ire, me lek ebi kpedo nwa, mè ebi kpebat olom, mè ebi nwakpa, ǹkitumu inyi ema ibe ke înwọn ibe ema ekup ikeya, ekado nwa, ekabat olom, kubọk emi nkupbe.

⁹Ire, ire ema kpekọt itet lek ikaan̄, ema edo nwa, mè ebat olom. Mije, înwọn ibe ogwu enerieen̄ ido nwa, mè ogwu enenwaan̄ ikaan̄ olom, igak ema itetele inyi ijo ulọk ilaak ebibaan̄ mè ebirieen̄ ikitaka ema kubọk ukan̄.

¹⁰Ebi ìkaan̄ olom mè ebi ìkaan̄ nwa ke nkinyi ikan ibe: Nwa ikayaak ogwu olom. Ìkare emi nnyi ikan keyi, îre Okaan̄-ene onyi.

¹¹Ire, ire ogwu enenwaan̄ iyaak ogwu olom, ikayaka ìbat ofifi olom. Ikup me lek kan̄ gaalek. Ire ìkaweek ikeya, igwu ikom isi irọ esuuk melek ogwu olom. Olom geege ikayaak si ogwu nwa!

¹²Ebirieen̄ mè ebibaan̄ ìkibat ebi ekachieekge me lek kè Karais ke nkinyi nteme keyi. Nteme keyi, ìkare Okaan̄-ene onyi, îre emi nnyi ibe: Ire ogwu enerieen̄ òchechieek me lek kè Karais ikaan̄ nwa ogwu ikachieekge me lek kè Karais, mè ire ogwu nwa ya ichieek ibabia melek ogwu olom, ogwu olom ya ikayaak ogwu nwa.

¹³Ubọk yaage si, ire ogwu enenwaan̄ òchechieek me lek kè Karais ikaan̄ olom ogwu ikachieekge me lek kè Karais, mè ire ogwu olom ya ichieek ibabia melek ogwu nwa, ogwu nwa ya ikayaak ogwu olom.

¹⁴Mije, Awaji îbọkọ olom ya ogwu ikachieekge me lek kè Karais itap mije ogwu nwa ogwu òchechieek me lek kè Karais. Ikeya si, Awaji îbọkọ nwa ya ogwu ikachieekge me lek kè Karais itap mije ogwu olom ogwu òchechieek me lek kè Karais. Ire Awaji ìkarọ ikeya, bọn kiban̄ ebekup kubọk bọn ebi kperiọọn̄ Awaji. Ire, mije Awaji orọbe ikeya, Awaji îbọkọ bọn kiban̄ itap kubọk ebi ìchechieek me lek Karais.

¹⁵Ire, me etete olom mè nwa chi, ire ogwu ikachieekge me lek kè Karais ya iweek iyayaak, ogwu òchechieek itele inyi iyaak. Ire iyaak, ikan geege ìkatet ogwu òchechieek me lek kè Karais ya, mè ìre enerieen̄, mè ìre enenwaan̄. Mije, Awaji ìgwen eji ibe eji eneluk me esuuk.

¹⁶Owu nwa, ogwu òchechieek me lek kè Karais, ìre oriọọn̄ mè ìre me lek kwun̄ ke Awaji obosa inyan̄a nlom kwun̄? Owu olom, ogwu òchechieek me lek kè Karais, ìre oriọọn̄ mè ìre me lek kwun̄ ke Awaji obosa inyan̄a nwa kwun̄?

¹⁷Òfo me lek ikọ ido-nwa mè ibat-olom, îgbe ibe ene geelek irọ inu igọọk me lek uche Okaan̄-ene ochebe inyi ọmọ, mè ifo isi ikiluk ugwem kan̄ ubọk îkiluk me mgbọ Awaji ogwenbe ọmọ. Eyiyi ore ikan nkinyi me otutuuk ntitiin̄ Awaji geelek.

¹⁸Ire ikaan̄ ogwu òwuwuuk lek ifieek afi sabum Awaji onigwen ọmọ, ene ya ikayaka ìweek ikakana ogwu ekafieekge afi. Ire iyaka ikaan̄ ogwu ikawuukge lek ìfieek afi sabum Awaji onigwen ọmọ, ene ya ikaweek ifefieek afi.

¹⁹Ifefieek afi mè ekafieekge afi ìkakup me lek inu geege. Inu òkup me uyọt ìre irọrọ inu Awaji obe erọ.

²⁰Eya orọ, ene geelek ifo isi ikup ubọk ọmọ okupbe me mgbọ Awaji ogwenbe ọmọ.

²¹Ire owu ore usun̄ me mgbọ Awaji ogwenbe owu, kachieek ibe eya isisaak owu. Ire owu môkọt ikaan̄ lek kwun̄, kaan̄ lek kwun̄!

²²Mije, ogwu geelek òrere usun̄ me mgbọ Okaan̄-ene ogwenbe ọmọ, ene ya îkana ogwu òkaan̄ lek kan̄ me emen Okaan̄-ene. Ikeya si, ogwu òkakaan̄ lek kan̄ me mgbọ Okaan̄-ene ogwenbe ọmọ, ene ya îkana ogwu usun̄ inyi Karais.

²³Awaji ìlep enyi me unye otu ewe. Eya orọ, ikayaka ìnin̄ usun̄ ìnyi ebilene.

²⁴Bọn Nte n̄a, òfo me lek inu chi, irek geelek ene okupbe me mgbọ Awaji ogwenbe ọmọ, ene ya ikup si me irek ya ifo isi, mè ikeke inye melek Awaji.

²⁵Ire me lek ebi ekabatge olom nu, mè ebi ekadoge nwa nu, Okaan̄-ene ìkanyi emi ikan geege òfo me lek kiban̄. Ire, emi mâtumu ejit n̄a inyi enyi, kubọk ogwu ògbegbe utoon̄-ejit sa me ejit nsan Okaan̄-ene.

²⁶Me ekiket n̄a, m̀be ke înwọn ibe enyi ekup ubọk enyi ekupbe, mije ikpele ufialek òkukup mgbọ kechi.

²⁷Ogwu òdo nwa ikayaak ogwu nwa. Ogwu ikadoge nwa, ikaweek idodo nwa.

²⁸Ire, ire owu odo nwa, owu òkarọ ijo inu geege. Ire gwun̄ enenwaan̄ ibat olom, ìkarọ si ijo inu geege. Ire, ebi ìkaan̄ olom mè ebi ìkaan̄ nwa mêbọkọ owuwa ufialek me linyọn̄ keyi. Eya orọ nkitumu inyi enyi ibe ke mônwọn ibe enyi ekado nwa, mè ekabat olom, inyi ufialek kecha iraka enyi me ibot.

²⁹Bọn Nte n̄a, ibot ikọ n̄a ìre ke mgbọ eji ekaan̄be migbidim. Eya orọ, bene me mgbọ keyi nyi isi, ebi ìkaan̄ nwa, ekeluk ugwem kubọk ema kpekaan̄ nwa.

³⁰Ebi ìkifieek ejit, ekup kubọk ema kpefieek ejit. Ebi ìkibele ejit, ekup kubọk ebi kpebele ejit. Ebi ìlelep inu, erọ kubọk inu cha ema elepbe ìkare echi kiban̄.

³¹Ebi ìkisa inu linyọn̄ isi ikwaan̄, erọ kubọk ema kpesa otutuuk inu cha igwen inu geege. Mije, linyọn̄ keyi, kubọk eji eriọọn̄be, ìboraraka isan̄a kpai.

³²Ǹkiweek ibe inu geege ikayaka ìsisaak enyi kubọk ge. Ejit ogwu enerieen̄ ikadoge nwa ìkikup me lek inu eyi Okaan̄-ene. Mgbọ geelek, ìkiweek irọrọ inyi Okaan̄-ene ibele ejit.

³³Ire, ejit ogwu òkaan̄ nwa ìkikup me lek inu linyọn̄ keyi, mè inu ọmọ môrọbe inyi ogwu nwa ibele ejit.

³⁴Mije keya, ulọk kan̄ îbum iba. Ikeya si, ejit ogwu enenwaan̄ ogwu ikakaan̄ge olom, mè ìyaka ire enenwaan̄ ikariọọn̄ge enerieen̄ ìkikup me lek inu eyi Okaan̄-ene. Inu òkup ọmọ me uyọt ìre isasa otutuuk ejit kan̄, mè akpalek kan̄ inyi Okaan̄-ene. Ire, enenwaan̄ òbat olom ìkikeek inu ofolek linyọn̄ keyi, mè inu ọmọ môrọbe inyi nlom kan̄ ibele ejit.

³⁵Ǹkitumu ikọ chi isasa itap ubọk inyi enyi. Ǹkaweek ikwekwek enyi. Ǹkiweek ibe enyi eluk ugwem me oniin̄ òtatat, mè igbe, mè esa otutuuk ejit kinyi enyi Okaan̄-ene.

³⁶Ire gwun̄ enerieen̄ itet gwun̄ nsabọn ibaan̄ itele ibodo, mè imun̄ ibe ke ọmọ gwa òkirọ inu ikatatge me lek gwun̄ enenwaan̄ ya, mè ire ke ogwu enenwaan̄ ya îlọk ọmọ igana, ọmọ okekeek ibe ke îgbe ibe ema ebat, gwun̄ enerieen̄ ya ido gwun̄ enenwaan̄ ya, ubọk îweekbe irọrọ. Eya ìkare ijo inu.

³⁷Ire, ire gwun̄ enerieen̄ ya ikọt itet lek kan̄ ikaan̄, mè itumu ifieek me ejit kan̄ ibe ke ọmọ ìkpodo ogwu nsabọn ibaan̄ ya îtetbe itele, me ikarege etetet ọmọ me unye, gwun̄ enerieen̄ ya îrọ si inu òtatat.

³⁸Eya orọ, ogwu òdodo gwun̄ nsabọn ibaan̄ îtetbe itele îrọ inwọn. Ire, ogwu ikadoge gwun̄ nsabọn ibaan̄ îtetbe itele orọ inwọn igak.

³⁹Ogwu enenwaan̄ òbat olom ìkaan̄ ibabia melek ogwu olom otutuuk mgbọ ogwu olom okupbe me ugwem. Ire, ire ogwu olom ikwu, ogwu enenwaan̄ ya îkaan̄ unen isisi ibat ofifi olom. Ire, olom ìbobat ya ikalọlọ irere ogwu òchechieek me lek kè Karais.

⁴⁰Ire, me nkeek n̄a, mmun̄ ibe, ire ogwu enenwaan̄ ya ìkayaka ìsi ìbat ofifi olom, ke môbele ejit igak ire ibat ofifi olom. Nchieek ibe ke nkeek n̄a yi ìnan̄a me ubọk Ekwukwu Awaji ogwu òkup emi me emen.