Read obolo I Kọr 8 Bible Online

I Kọr 8 - obolo bible

I Kọr 8

¹Mâtumu ikọ si òfo me lek inorie esabe icho me isi mkpọmfaka. Eji mîriọọn̄ ibe ke eji otutuuk ene mîkaan̄ ifuk-ibot, kubọk enyi ekitumu. Ire, ojelek ifuk-ibot keyi ìkirọrọ mè ene igumu lek. Îre imumechieen̄ okinama ene ibene.

²Eya orọ, ire ogwu ikeek ibe ke îkaan̄ inu ọmọ oriọọn̄be, ene ya ìkariọọn̄-nu inu ubọk îgbebe ibe iriọọn̄.

³Ire, ogwu òmumun̄ Awaji me chieen̄ ke Awaji oriọọn̄ kubọk gwun̄ kan̄.

⁴Eya orọ, ire me lek ikọ ofolek irerie inorie esabe igwa ngwugwa inyi mkpọmfaka, eji mîriọọn̄ ibe ke ìkakaan̄ inu geege eyi mkpọmfaka orebe me linyọn̄ keyi. Ire, eji mîriọọn̄ si ibe ke ìkakaan̄ ofifi Awaji geege òkukup, ilọ me lek Awaji ge gaalek.

⁵Ubọk geelek, owuwa inu ọmọ òwa me inyọn̄ mè ijọn̄, echi ebi ene ekimọnọ kubọk awaji melek okaan̄-ene. Me atikọ, owuwa awaji mè owuwa okaan̄-ene òwa si.

⁶Ire, me lek kiji, Awaji ge gaalek okup. Ọmọ ore Ute, ogwu òrorom otutuuk inu geelek. Ọmọ si ke ugwem eji ekiluk okup inyi. Okaan̄-ene ge gaalek si okup. Ọmọ ìre Jisọs Karais, ogwu Awaji osabe me lek kan̄ irom otutuuk inu geelek. Sa me lek kan̄ si ke eji ekiluk ugwem.

⁷Ire, ìkare otutuuk bọn Nte eriọọn̄ inu yi ikeyi. Usini kiban̄ mîwuuk lek ikiriaak mkpọmfaka iraka lek sabum enigwu ikom igọọk Okaan̄-ene. Mege inire mgbọ keyi, ejit kiban̄ ìkanye. Ema isikitaka anam esabe igwa ngwugwa inyi mkpọmfaka, ema mîra ikikeek ibe ke îre mkpọmfaka ya okaan̄ anam ya. Eya orọ, ema ekimọnọ ibe ke itataka anam ya môrọ inyi ema ekatana me isi Awaji.

⁸Irerie inorie mè ekariege ìkakirọ mè eji enwọn me isi Awaji. Ire eji kperie, eya ìkporọ ibe eji ekana ebi ijo. Ire eji irie, eya ìkporọ ibe eji enwọn egak.

⁹Ubọk geelek, ìgbala chieen̄, inyi unen eyi enyi ekaan̄be ikọkọt irie inorie geelek ikakana ukput ìnyi ebi kpekeke inye me emen ichechieek.

¹⁰Mije, ire ogwu ejit ikanyege me lek ojelek inorie òkup ikeya inimun̄ owu ogwu òrọriọọn̄ inu ofolek inorie ya okupbe me emen uwu yọk ikigọọk irie inorie esabe igwa ngwugwa inyi mkpọmfaka, usini mgbọ, eya môrọ inyi ukpook ita ene ya me lek irerie inorie esabe igwa ngwugwa inyi mkpọmfaka si.

¹¹Sa me ikeya, gwun̄ Nte kwun̄ yi ogwu ikakekege ìnye me ichechieek, ogwu Karais okwube mkpa mije kan̄, môchep, mije iriọọn̄-inu kwun̄.

¹²Enyi isikirọ ijo inu ikeme bọn Nte kinyi me ojelek oniin̄ òkup ikeyi, mè ikirọ inyi ema eje elọ, me mgbọ ejit kiban̄ ikakekege ìnye me emen ichechieek, îre Karais me lek kan̄ ke enyi ekirọ ijo inu ya ikeme.

¹³Eya orọ, ire mmun̄ ibe ke inorie nkirie môrọ inyi gwun̄ Nte n̄a irọ ijo inu, mâtele inorie ya, m̀kpayaka irie, inyi nkarọ mè gwun̄ Nte n̄a inan̄a irọn̄.