Read obolo I Kọr 9 Bible Online

I Kọr 9 - obolo bible

I Kọr 9

¹Ìre emi ǹkafat ìkaan̄ lek n̄a? Sà ìre ǹkafat ìre ogwu otuchieen̄ kè Karais? Ìre ǹkafat ìsa chieen̄ ìmun̄ Okaan̄ kiji Jisọs? Sà ìkafat ìre enyi chi ere mfut ubọk ikwaan̄ emi nsibe inyi Okaan̄-ene?

²Ire emi ǹkarere ogwu otuchieen̄ kè Karais me isi ebi ofifi ife, me lek kinyi, emi ìre ogwu otuchieen̄ kè Karais. Mije, ugwem kinyi, ebi ìchechieek me lek Okaan̄-ene, ore iman̄ òriọọn̄ òkijeen̄ ibe ke emi ìre ogwu otuchieen̄ Okaan̄-ene me atikọ.

³Îre ikọ keyi ke nkisa ifọọk otu ebi geelek ìkifieek emi ikọ.

⁴Ìre ìkafat ìgbe ibe ebi ene ekenyi eji inorie mè inu enwọnwọ mije ikwaan̄ kiji?

⁵Ìre keke obokput eji ibe eji ekakaan̄ nwa òchechieek me lek kè Karais ìsa ìkaan̄ me ubọk ìkijijen̄e, kubọk Pita mè ebi otuchieen̄ kechilọ mè ebi ngwan̄ Okaan̄-ene ekirọ?

⁶Sà ìre emi mè Banabas gaalek ere ebi ìbekisa ubọk kiji ikikwukwulu isa ikikpọ owot kiji?

⁷Ìre ebi akọn̄ ebi owa ekitim akọn̄, mè ikisa ikpoko ubọk kiban̄ ikpọ lek? Ìre ebi owa ekiwop uko, kpekirie inorie ònan̄a me uko kiban̄? Sà ìre ekene okikpukpo eriembuuk, ìkakinwọ mun̄ ebe ònan̄a me lek eriembuuk ya?

⁸Ìkare ifuk-ibot ebilene ke nkisa ìtumu ikọ yi, mije, Ikan kè Mosis ìkitumu si ikọ yaage.

⁹Mije, ege me Ikan kè Mosis ibe, “Katobo otu eriembuuk ìchit me mgbọ îkijak mfufe isan̄a me lek akpa.”[10] Ìre enyi ekikeek ibe ke Awaji ìkitumu ikọ yi ikpọ me lek eriembuuk?

¹⁰In̄-in̄, îre eji ke ìkitumu ikọ ya ibak, ìkare eriembuuk ikike! Îre mije kiji ke ege inu yi. Mije, ebi ikwaan̄ ìkiwop inu me uko mè ebi ìkirọkọ inu me uko ekikpọ chieen̄ ibe ke ema mêgọọk ikaan̄ uche me lek inu ònan̄a me uko ya.

¹¹Ikeya si, kubọk eji ewopbe mfut eyi òrere ikọ Awaji me etete kinyi, ìre ìkafat ìtat ibe eji egọọk ekaan̄ uche me lek ugbana eyi inu linyọn̄ keyi eyi Awaji onyibe enyi?

¹²Ire ebi ofifi ife ikaan̄ unen ikakaan̄ ntap-ubọk me ubọk kinyi isa ikikpọ lek kiban̄, eji mîkaan̄ unen yi igak ebi ofifi ife cha. Ire, eji kpegbini unen kiji yi. Kpan̄asi ikeya, eji ekpọkpọ ikime inu geelek, inyi eji ekakana ukput ìnyi ata etip kè Karais.

¹³Ìre enyi kperiọọn̄ ibe ke bọn ikwaan̄ Uwu Mbuban ekirie inorie inan̄a me Uwu Mbuban? Sà ìre enyi kperiọọn̄ ibe ke ebi ìkigwa ngwugwa me inyọn̄ ntook inyi Awaji ekirie inorie ònan̄a me lek inu ebi ene esabe inigwa ngwugwa me inyọn̄ ntook ya?

¹⁴Ikeya si, Okaan̄-ene înyi ida ibe ke ebi ìkilook ata etip mêkikaan̄ inu ema ebesa ikikpọ lek kiban̄ inan̄a me ubọk ebi ìbọbọkọ ata etip ya itap.

¹⁵Ire, emi ǹkasa unen chi Okaan̄-ene onyibe eji ìrọ inu geege. Ìrere ikpa yi nkige ijet enyi, ǹkage ìsa ìweek ibe enyi erọ inu chi enyi emi. Mije, ǹkaweek ibe ene geege inirọ inyi nkayaka ìkaan̄ inu yi nkisa igugo lek. Kpan̄asi ikeya, ire nkwu, înwọn igak!

¹⁶Ire, ilolook ata etip ìkare ikwaan̄ mâkọtbe isa igugo lek. Mije, Awaji ìnyinyi emi ikwaan̄ yi kubọk ikan. Ire ǹkalook ata etip, môfieek inyi emi enenen!

¹⁷Ire nsa me ejit n̄a gaalek ikilook ata etip, mâkọt ikpọ chieen̄ ibe ke mâbọkọ mkpukpe. Ire, ìkare me ejit n̄a gaalek ke nkisa ilook, îre ikwaan̄ Awaji otapbe emi me ubọk gaalek ke nkirọ.

¹⁸Ire ikeya, ìre keke ore mkpukpe n̄a? Mkpukpe n̄a ìre ilolook ebi ene ata etip yi me ikike, me nkagbinige unen eyi makaan̄be inan̄a me lek ikwaan̄ ilolook ata etip.

¹⁹Me atikọ, nkaan̄ lek n̄a, ǹkare usun̄ ìnyi ene geege. Ire, emi ǹsasa lek n̄a irọ usun̄ inyi otutuuk ene, inyi ǹkọt ǹkaan̄ owuwa ene ǹsa ǹnyi Okaan̄-ene.

²⁰Me etete ebi Ju, ǹkirọ inu kubọk ebi Ju, inyi ǹkọt ǹkaan̄ ebi Ju ǹnyi Okaan̄-ene. Ubọk geelek nkakupge me irak Ikan kè Mosis, ire, me etete ebi ìkisun̄ Ikan kè Mosis, ǹkirọ inu kubọk ebi ìkisun̄ Ikan kè Mosis, inyi ǹkọt ǹkaan̄ ebi ìkisun̄ Ikan kè Mosis ǹnyi Okaan̄-ene.

²¹Me etete ebi kpere ebi Ju, òrere ebi kpekisun̄ Ikan kè Mosis, emi ǹkirọ inu kubọk ebi kpere ebi Ju, inyi ǹkọt ǹkaan̄ ebi kpere ebi Ju ǹnyi Okaan̄-ene. Eyi ìkasibi ibe ke emi ǹkakisun̄ Ikan Awaji, mije, ǹkisusun̄ ikan kè Karais mgbọ geelek.

²²Me etete ebi kpekeke inye me ichechieek, ǹkirọ inu kubọk ebi kpekeke inye me ichechieek, inyi ǹkọt ǹkaan̄ ebi kpekeke inye me ichechieek ǹnyi Okaan̄-ene. Irek geelek ife geelek ekupbe, nchieek ikukup kubọk ife cha ekupbe, inyi ǹkọt ǹsa me oniin̄ geelek nriọọn̄be ǹrọ mè Awaji inyan̄a usini me lek kiban̄.

²³Ǹkirọ otutuuk inu chi mije ata etip ya, inyi emi si ǹgọọk ǹkaan̄ uche me lek ugbana ebi ene ekikaan̄ inan̄a me lek ata etip ya.

²⁴Enyi mîriọọn̄ ibe, me ere ekiwut ifan̄a ekot, ke îre owuwa ene ekilibi, ire, ke ene ge gaalek okilibi igak otutuuk ene, mè ibọkọ mkpukpe. Eya orọ, ìlibi ekot ìjaan̄, inyi enyi ebọkọ mkpukpe.

²⁵Ene geelek òbogọọk iwut ifan̄a ekot ìkisasa ata mgbọ ikikween̄ ekot, mè ikitọ lek kan̄ ikpọ me oniin̄ òkup uyọt uyọt, sabum usen ekot ya. Ema ekibọkọ otutuuk ufialek cha, inyi ema ebọkọ mkpukpe eyi òrere inwan̄ ikike eyi kpofukbe, eyi ekisa ikwuun̄ ene me ibot kubọk okpibot ubọọn̄. Ire, eji ekibọkọ ufialek eyi kiji, inyi eji ebọkọ atata okpibot ubọọn̄ eyi òbofufuk ire mgbọ ikakaan̄ge itata.

²⁶Eya orọ, emi ǹkakpọkpọ ìkilibi ekot ubọk geelek, kubọk ogwu welewele. Ǹkilibi igọọk me ikan ekot, mè iben chieen̄ n̄a igwuun̄ me ere ekot ya obota. Ikeya si, ǹkakpọkpọ ìkisulu akpọ welewelewele kubọk ogwu òkiwum akpọ me lek efet ichep ikike, ìkakisulu ìtat.

²⁷Ǹkibọbọkọ otutuuk ufialek geelek isa isulu akpalek n̄a itap me irek, inyi ikirọ inu geelek ntọbe inyi, kubọk ogwu usun̄ okirọ. Ǹkirọ ikeyi, inyi, nsilook ebi ofifi ife ata etip, mè ema isibọkọ itap, mè ikaan̄ unyan̄a, emi nkayaka ìnikana ogwu kpogọọkbe ibọkọ mkpukpe.