Read obolo Gal 2 Bible Online

Gal 2 - obolo bible

Gal 2

¹Akọp mè acha ini iraraka, nnenikpọk isi Jeruselem, emi melek Banabas. Nsa Taitọs si igbaalek isi.

²Ǹsi Jeruselem ya, mije, Awaji ojeen̄ emi ibe emi ǹsi. Mgbọ nrebe, nnenichichini melek ebi ibot ntitiin̄ Awaji gaalek me ere ònọnọọn̄, mè inikpa ata etip nlookbe ebi ekarege ebi Ju ijeen̄ ema, inyi ema enọ, mè eriọọn̄ inu njeen̄be. Ǹrọ ikeyi, mije, ǹkaweek ibe otutuuk ikwaan̄ nsibe, mè echi nkisi me mgbọ keyi ikana inu ikike.

³Ubọk geelek Taitọs ogwu melek n̄a ejebe ikarege ogwu Ju, ema kpetet ọmọ ibe inifieek afi.

⁴Ire, ubọk geelek si, mîgwen ikọ yi isibi me emen ntitiin̄ ya, mije, îkaan̄ usini ene ebi ìnwenween̄ lek ikup me emen ntitiin̄ Awaji ya, ire, kpere bọn Nte. Ife chi enin̄ ntitiin̄ yi me nlelet, mè ifiaan̄ ikirọ kubọk ema ìre bọn Nte, inyi ema enekpọ utelelek eyi eji ekaan̄be me emen kè Karais. Ema ekiweek ibe eji ekpọkpọ ebia me irak Ikan kè Mosis melek orọmijọn̄ ebi Ju, kubọk ebi usun̄.

⁵Ire, eji kpechieek inyi ema kubọk mgbọ ge, inyi eji ekọt esun̄ òjot òjot atikọ òkup me emen ata etip enyi enyi ebi ekarege ebi Ju, me wọlọwọlọ geege ikanin̄ge me emen.

⁶Ire me lek ebi ìkup kubọk ebi isi cha, ǹkamun̄ esese inu geege òkup me etete kiban̄ mè ebi ofifi ife, mije, Awaji ìkakikpọ inu ene orebe me akpalek. Mgbọ mkpabe otutuuk ata etip ya eyi nkilook ijeen̄ ema, kpunu ayaya inu geege ema etapbe isọkọ me lek.

⁷Kpan̄asi ikeya, ema enenimun̄ ibe ke Awaji îgwen emi me atikọ iria ibe ǹsa ata etip ǹsi ǹlook ebi ekarege ebi Ju kubọk îgwenbe Pita iria ibe ilook ebi Ju ata etip.

⁸Mije, ema mîmun̄ ibe ke îre Awaji ya ogwu ònyinyi Pita unye ibe ire ogwu otuchieen̄ kè Karais me etete ebi Ju, onyi si emi unye ibe emi ǹre ogwu otuchieen̄ kè Karais me etete ebi ekarege ebi Ju.

⁹Jemis, mè Pita, mè Jọn, ebi bọn Nte ekimọnọ kubọk ebi ibot me etete kiban̄ enenimun̄ ibe ke Awaji îsa me atata nnwọn kan̄ inyi emi ikwaan̄ yi me atikọ. Mije keyi, ema enyinyi emi melek Banabas ubọk, isasa ijeen̄ ibe ke eji melek kiban̄ ekigbaan̄ ubọk isi ikwaan̄ yaage. Ema enenichieek ibe mè eji esi elook ata etip me etete ebi ekarege ebi Ju, mè ema si esi elook ata etip yaage me etete ebi Ju.

¹⁰Inu ge gaalek ema ebe eji erọ ìre mè eji ekawuuk itatap ubọk inyi ebi ugbọọn̄ me emen ntitiin̄ kiban̄ me Jeruselem. Inu yi si ìre inu nkiweweek irọrọ.

¹¹Me ike mgbọ ge Pita onube Antiọk, ngana ikọ inyi ọmọ me isi otutuuk ebi ìchechieek, mije îrọbe inu ikatatge.

¹²Me mgbọ Pita onube Antiọk ayaya, ìkigọọk bọn Nte ebi ekarege ebi Ju igbaan̄ irie inorie. Ire, mgbọ yaage ebi ikwaan̄ Jemis oriabe inu erebe Antiọk, Pita otataba lek isan̄a me etete ife cha, mè ijit iyayaka igọọk ebi ife cha igbaan̄ irie inorie, mije ukpook îkaan̄be me lek ebi ìkibe ke ebi ekarege ebi Ju geelek ìchechieek me lek kè Karais mêfieek afi.

¹³Ikeya si ke bọn Nte, ebi Ju ìkup me ere ya, egọọk si Pita irọ inu isi iba ya. Ìrere Banabas me lek kan̄, ife chi mîrọ inyi igọọk ema ikaan̄ ijo ugwem ebi isi iba ya.

¹⁴Me mgbọ mmun̄be ema ekiluk ugwem ya, eyi ikatatge me lek atikọ eyi ata etip okijeen̄, ntutumu inyi Pita me isi otutuuk kiban̄ ibe, “Kpọ, me atikọ, owu ìre ogwu Ju. Ire, owu òkirọ inu kubọk ogwu ikarege ogwu Ju. Ire owu ogwu Ju òkarọ inu kubọk ogwu Ju, owu òjeje inikisa me unye ubọk itet ebi ekarege ebi Ju ibe ekerọ orọmijọn̄ ebi Ju?”

¹⁵Me atikọ, eji ìre ebi Ju inan̄a me iman kiji. Eji kpere ebi ofifi ido ìkirọ ijo inu.

¹⁶Me mgbọ keyi, eji ebi Ju mîra iniriọọn̄ ibe ke ene ìkakikana ata ene me isi Awaji sa me lek isusun̄ Ikan kè Mosis. Eji mîra iniriọọn̄ ibe ke îre nan̄a me ichechieek me lek kè Jisọs Karais gaalek ke ene obosa ikana ata ene me isi Awaji. Mije keya, eji ebi Ju si mîgọọk ichieek me lek kè Jisọs Karais, inyi eji esa me lek ichechieek eji echieekbe me lek kè Karais ekana ata ife me isi Awaji. Ìkare mije isusun̄ Ikan kè Mosis. Mije, kpunu ene geege òkikana ata ene me isi Awaji inan̄a me isusun̄ Ikan kè Mosis.

¹⁷Kubọk mgbọ keyi, eji mêkiweek ikakana ebi ata ife me isi Awaji inan̄a me lek ichechieek me lek kè Karais. Ire inisibi utoon̄ ibe, mije eji kpeyaka ikisun̄ Ikan kè Mosis, ke eji ekpọkpọ ibia me emen ijo inu kiji me isi Awaji, ìre eya ìsibi ibe ke Karais ìbe mè eji ekerọ ijo inu? Ìkasibi ikeya kubọk ge, mije, Karais ìkpokọt irọ inyi ene irọ ijo inu.

¹⁸Ire, ire emi njit Ikan kè Mosis, mije ìkakirọ ene ikana ata ene me isi Awaji, mè iyaka inigwu ikom ifo lek Ikan ya isi ikpọk ibene ikisun̄, me atikọ, emi ìre ogwu òfiat Ikan.

¹⁹Îre nan̄a me lek Ikan cha ke nsa iriọọn̄ ibe ke emi ǹkwukwu isan̄a mije nkakọtge ìsun̄ otutuuk Ikan cha. Mije keya ke njit iyayaka itoon̄ ejit me lek Ikan cha, inyi ǹkọt ǹluk ugwem ǹnyi Awaji.

²⁰Mîgbaan̄ emi melek Karais igon ikpan̄ me inyọn̄ uti nkwurieen̄. Eya orọ, emi ǹkayaka ìkup me ugwem. Îre Karais okiluk ugwem me emen n̄a. Ugwem eyi nkiluk me linyọn̄ me mgbọ keyi, ǹkiluk nan̄a me lek nchieekbe me lek Gwun̄ Awaji, ogwu òmumun̄ emi me chieen̄, mè isa ugwem kan̄ igwa ngwugwa me ibot n̄a.

²¹Emi m̀kpajit atata nnwọn eyi Awaji kubọk ge, mije, ire isusun̄ Ikan kè Mosis môkọt irọ inyi ene ikana ogwu ata irọrọ me isi Awaji, ìsibi ibe ke mkpa Karais okwube ìre inu ikike.