Read obolo Gal 3 Bible Online

Gal 3 - obolo bible

Gal 3

¹Iyak, enyi burubut ebi Galesia kechi! Ìre ekene orom enyi ikeyi? Ìre ìkare enyi kechi ke ekpa otutuuk inu ijeen̄ ike esabe igon Jisọs Karais ikpan̄ me inyọn̄ uti nkwurieen̄?

²Inu ge gaalek ke emi mweek me otu kinyi! Mgbọ enyi ebọkọbe Ekwukwu Awaji, ìre enyi ebọkọ Ekwukwu ya sa me isusun̄ Ikan kè Mosis, sà ìre sa me ichechieek me lek ikọ Awaji eyi etumube inyi enyi?

³Ìre enyi ejeje ibubut ikeyi? Mgbọ enyi ebenebe, enyi esa Ekwukwu Awaji itoon̄ ejit. Ìre keke orọ mè enyi etele Ekwukwu Awaji ya, mè eyaka enetoon̄ ejit me lek unye kinyi gaalek me mgburudun̄ mgbọ?

⁴Ìre enyi ekimọnọ ibe ke otutuuk ikpele inu cha enyi ejebe itibi ìre me ikike? Me atikọ, ìkare me ikike!

⁵Ekwukwu Awaji, ogwu Awaji okinyi enyi, mè ikpele uyeke inu eyi Awaji okirọ me emen kinyi, ìre ìnan̄a mije Ikan kè Mosis echi enyi ekisun̄, sà ìre mije ata etip eyi enyi enọbe, mè ichieek me lek?

⁶Ìkpọ-nu Ebereyam! Ege me Ikpa Mbuban ibe ke Ebereyam îchieek ikọ Okumugwem otumube inyi ọmọ. Okumugwem osasa mije ichechieek ya ifuk Ebereyam kubọk ogwu ata irọrọ me isi kan̄.[1]

⁷Eya orọ, ìriọọn̄ ibe ke ebi ìkakaan̄ ichechieek keyi ere bọn kè Ebereyam me atikọ.

⁸Sa me unye Awaji, ebi ìgege Ikpa Mbuban me ukot ikaan̄ mîmọọn̄ itibi, ibe ke Awaji môsa me ichechieek irọ inyi ebi ekarege ebi Ju ekana ebi ata irọrọ me isi kan̄. Mije keya ke Awaji otumu inyi Ebereyam ibe, “Îre nan̄a me lek kwun̄ ke mâgbana otutuuk ido geelek.”[2]

⁹Eya orọ, ike Awaji ogbanabe Ebereyam mije îchieekbe me lek ikọ kan̄, ikeya si Awaji môgbana ene geelek òchechieek me lek ikọ kan̄.

¹⁰Ire, Awaji îfieek otu inyi ebi geelek ìkitoon̄ ejit ibe ke isusun̄ Ikan kè Mosis môrọ inyi ema ekana ebi ata irọrọ me isi Awaji. Mije, ege me Ikpa Mbuban ibe, “Awaji îfieek otu inyi ene geelek ogwu ìkakisun̄ otutuuk Ikan geelek egebe me emen Ikpa Ikan kè Mosis ìso mgbọ geelek.”[3]

¹¹Ikeya si, îbook otutuuk ene chieen̄ ibe ke kpunu ene geege òbokana ogwu ata ene me isi Awaji sa me isusun̄ Ikan kè Mosis, mije, ege me emen Ikpa Mbuban ibe, “Ogwu òsasa me ichechieek ikana ogwu ata irọrọ, ene ya môluk ugwem.”[4]

¹²Ire, isusun̄ Ikan ìkabieen̄ me lek ikakaan̄ ichechieek. Kpan̄asi ikeya, ege me emen Ikpa Mbuban ibe, “Ogwu òkirọ inu Ikan otumube môluk si ugwem igọọk me lek Ikan.”[5]

¹³Ikan îbọp eji, mije, eji kpekọt irọ otutuuk Ikan iso. Ire, Karais îsa lek kan̄ ibọkọ ufieek-otu ya me ibot kiji. Sa me ikeya, Karais îfaka eji isibi me emen ufieek-otu eyi Ikan. Mije, ege me Ikpa Mbuban ibe, “Awaji îfieek otu inyi ene geelek ejeen̄be me otu ọfọkọ.”[6]

¹⁴Jisọs Karais ìfaka eji isibi, inyi, sa me lek kan̄, ugbana eyi Awaji ogbanabe Ebereyam ire lek ebi ekarege ebi Ju, mè eji esa me ichechieek ebọkọ Ekwukwu Mbuban eyi Awaji ochieekbe use inyinyi ebi kan̄.

¹⁵Bọn Nte n̄a, mâsa inu òkirọ me ugwem keyi usen geelek ijeen̄ enyi inu. Inu geelek ebilene egbaan̄be ichieek me lek, mè igbaan̄ inyan̄a ibot me lek, kpunu ene geege òbokọt igwak, kpunu si ene geege òbokọkọt itap inu isọkọ me lek.

¹⁶Ubọk yaage si ke îkup me lek use keyi. Awaji îchieek use, mè inyan̄a ibot inyi Ebereyam mè mfut owot iman kan̄. Ikpa Mbuban ìkatumu ikọ ìbak owuwa mfut, òrere owuwa bọn owot iman. Ìtumu ikọ ibak mfut ge, eyi òrere gwun̄ owot iman ge gaalek.[7] Gwun̄ owot iman ge kè Ebereyam ya ìre Jisọs Karais.

¹⁷Ibot ikọ n̄a ìre ikeyi: Awaji ìdasi inyan̄a ibot inyi Ebereyam me ukot ikaan̄. Efit acha ini mè akọp ita îraka me lek, sabum Awaji oninyi ebi Ju Ikan kan̄. Ikan chi ònunu me mgburudun̄ ìkpokọt inigwak inyan̄a-ibot eyi Awaji onyan̄abe inyi Ebereyam. Ìkpokọt si ifiat use ya eyi Awaji ochieekbe Ebereyam.

¹⁸Ire Awaji ikinyi ene ìrot ya sa me isusun̄ Ikan kè Mosis, ìsibi ibe ke ìkayaka ìre me use ke ekisa ikaan̄ ìrot ya. Ire, Awaji ìche ìrot ya inyi Ebereyam me ikike inan̄a me lek use îchieekbe Ebereyam.

¹⁹Ire ikeya me atikọ, ìre Awaji ìbak me lek keke inyi Ikan cha? Awaji ìnyi Ikan cha inigbaalek inyan̄a-ibot kan̄, inyi ebi ene esa eriọọn̄ inu nrọ-nlọ orebe. Ikan cha ìkpulu eji me sọntiik mgbidim mgbọ gaalek inire mgbọ Gwun̄ Owot Iman kè Ebereyam ya, ogwu Awaji ochieekbe me use onube. Îre ebi osat Awaji esa Ikan ya inu. Ene ge onenikup kubọk ogwu nteek me etete Awaji melek ebilene, mè ibọkọ Ikan cha me ubọk ebi osat cha isa inyi ebilene.

²⁰Ogwu nteek ìkikup me ere agan̄ iba ekirọ inu. Ere ene ge gaalek okirọ inu, eya ìkado ogwu nteek geege. Îre Awaji gaalek me lek kan̄ ochieek Ebereyam use ya, ìkaweek ogwu nteek geege.

²¹Ire ikeya, ìre Ikan kè Mosis îje ikeme use eyi Awaji ochieekbe? Ìkaje ìkeme kubọk ge! Mije, mebe ke îkaan̄ Ikan eyi môkọtbe inyi ene ugwem ikakaan̄ge itata, eya monijeen̄ ibe ke Ikan kè Mosis môkọt irọ inyi ene ikana ogwu ata irọrọ. Ire, kpunu Ikan geege òkup ikeya.

²²Kpan̄asi ikeya, ege me Ikpa Mbuban ibe ke îre unye eyi ijo inu okikpulu otutuuk ebilene me linyọn̄. Îre ebi ìkakaan̄ ichechieek gaalek ebebọkọ use eyi Awaji ochieekbe inyinyi ebi ìchechieek me lek kè Jisọs Karais.

²³Me adasi mgbọ, sabum mgbọ ebi ene enibene ikichieek me lek kè Jisọs Karais, Ikan ìtetet otutuuk kiji itap me mkpọn, mè igon isotu ikwek eji. Eji ekukup me mkpọn ya mege inire mgbọ Jisọs Karais onube, eji enenibene ikichieek me lek kan̄.

²⁴Sa me ikeya, Ikan ìyaka inikup kubọk ogwu òkijeen̄ eji inu, mege inire mgbọ Karais onube. Mgbọ keyi Karais onube, ene geelek òchechieek me lek kan̄ môkana ata ene me isi Awaji.

²⁵Mgbọ keyi irek osibibe inyi eji ekọt echieek me lek kè Karais, Ikan ìkpoyaka ire ogwu òkijeen̄ eji inu ofifi.

²⁶Enyi otutuuk ebi ìchechieek me lek kè Jisọs Karais, enyi ìre bọn Awaji inan̄a me lek ichechieek kinyi.

²⁷Otutuuk kinyi ebi ìgwogwook mun̄, mè isa me ikeya igọọk Karais igbaan̄ ire ge, enyi mîra itap orọmijọn̄ kè Karais kubọk ofọnti.

²⁸Eya orọ, me etete kinyi, kpunu esese inu òkukup me etete ebi Ju mè ebi ekarege ebi Ju, mè ebi usun̄ mè ebi ekarege ebi usun̄, mè ebirieen̄ mè ebibaan̄. Otutuuk kinyi mîgbaan̄ ire ge me emen kè Jisọs Karais.

²⁹Eya orọ, ire enyi ire ebi eyi Karais, enyi ìre bọn owot iman kè Ebereyam me atikọ. Enyi si mêrie ìrot ya eyi Awaji ochieekbe use inyinyi Ebereyam.