Read obolo Gal 4 Bible Online

Gal 4 - obolo bible

Gal 4

¹Ibot ikọ n̄a ìre ikeyi: Mgbọ gwun̄ òbobọkọ inu ubọọn̄ ogwu ute me ìrot orebe sọntiik, ubọk geelek îrebe ọmọ okaan̄ otutuuk inu geelek ogwu ute okaan̄be, ọmọ melek ogwu usun̄ ìre ìkike.

²Ebi ofifi ife ebekikpọ ọmọ chieen̄ me lek, mè ikikpọ si chieen̄ me lek inu ubọọn̄ kan̄ cha mege ire mgbọ ogwu ute osun̄be inyi ọmọ.

³Ikeya si ke îkup me lek kiji. Me adasi mgbọ, mgbọ eji ekupbe kubọk nsabọn ekagoboge inu geege ìtet, eji ekup kubọk usun̄ inyi asabọn inu òkup kubọk ikan mè orọmijọn̄ cha, ofolek ubọk iriaak Awaji, echi ònan̄a me linyọn̄ keyi.

⁴Ire, me mgbọ mgbọ okembe, Awaji oneniria Gwun̄ kan̄ inu me linyọn̄. Enenwaan̄ oman ọmọ, ineniluk si ugwem me irak Ikan kè Mosis, mije ọmọ orebe ogwu Ju.

⁵Awaji ìria Gwun̄ kan̄ yi inu ibe inifaka ebi ìkup me irak ubọk Ikan isibi, inyi otutuuk kiji enekana bọn Awaji.

⁶Mije enyi erebe bọn Awaji, ke Awaji oria Ekwukwu Gwun̄ kan̄ initap eji me ejit. Ekwukwu ya okikup me emen kiji ikitaan̄ ukpo igwen Awaji, “Papa! Nte n̄a!”

⁷Eya orọ, owu òkayaka ìre usun̄ ofifi. Ire, owu ìre gwun̄ owot. Mije owu orebe gwun̄ Awaji, Awaji îmọnọ owu isa irọ gwun̄ kan̄ ogwu môgọọkbe ikaan̄ uche me lek ìrot eyi îsun̄be inyi bọn kan̄.

⁸Me mgbọ òraraka, mgbọ enyi ekariọọn̄ge Awaji, enyi ekup me usun̄ inyi asabọn awaji cha echi kpekaan̄ ugwem geege.

⁹Ire, me mgbọ keyi enyi eriọọn̄be Awaji, eyi Awaji oriọọn̄be enyi kubọk bọn kan̄, ìre keke orọ mè enyi eyaka ekegwu ekom efo lek ikan mè orọmijọn̄ cha òkup njijin njijin, kpekaan̄ unye mè efuuk geege me emen? Ìre enyi ekiweek ikpọkpọk isi inin̄ usun̄ inyi inu cha?

¹⁰Enyi ejeje ikimin usini usen, mè aya onyan̄, mè acha, mè ibot mgbọ, kubọk inu òsibi esese?

¹¹Ukpook îtet emi me lek kinyi! Ìkikup emi me lek kubọk otutuuk ikwaan̄ nsibe me etete kinyi mônikana inu ikike.

¹²Bọn Nte n̄a, soso, nriaak enyi, ìkup kubọk emi nkupbe, mije, emi ǹkup si kubọk enyi ekupbe. Enyi kperọ emi ijo inu geege.

¹³Kubọk enyi eriọọn̄be, adasi mgbọ nnube inilook enyi ata etip, îre mije lek n̄a ikanyege ke ngọọk enyi ikup, mè ikilook enyi ata etip ya.

¹⁴Ubọk geelek orukan̄ n̄a ya oyaka inikana ntọ-mkpọ inyi enyi me mgbọ ya, enyi kpejit emi, kpekpọ si emi chieen̄ isiki. Kpan̄asi ikeya, enyi ebọkọ emi itap kubọk ogwu osat Awaji, mè ibọkọ si emi itap kubọk emi ìre Jisọs Karais me lek kan̄.

¹⁵Me mgbọ ya, enyi mînwọọn̄ emi enenen. Ìre unwọọn̄ kinyi ya ìnikup me owa mgbọ keyi? Me mgbọ ya si, mebe ke îkup mfufet ibe enyi erọkọ chieen̄ kinyi enyi emi, kè enyi èrọkọ enyi emi.

¹⁶Ìre enyi eyaka inimọnọ emi kubọk ogwu ochicha kinyi mgbọ keyi, mije ntumube atikọ inyi enyi?

¹⁷Ife cha mêkisa enenen iweek irọrọ inyi enyi ekana egọọk ema. Ire, ìkare me ata ejit ke ema ekirọ. Otutuuk inu ema ekiweek ìre ileleke enyi isan̄a me lek kiji, inyi enyi enekaan̄ ulọk me lek kiban̄ kubọk ema ekaan̄be me lek kinyi.

¹⁸Înwọn ibe ene ikaan̄ ulọk me lek ene, ire inu ekibak me lek ikaan̄ ulọk ya ire ata inu. Mônwọn si ibe enyi ekekaan̄ ojelek ulọk keya otutuuk mgbọ, ìkare mgbọ nkupbe me etete kinyi gaalek.

¹⁹Atata bọn n̄a ebi mmun̄be me chieen̄, ike uman okifiak nwa-owot, ikeya si ke emi mkpọk ikup me emen ufiak mije kinyi. Ufiak yi ìbokpọkpọ ikifiak emi ikeyi mege ire mgbọ Karais môrebe ogwu ibot mkpulu me agan̄ geelek me emen ugwem kinyi otutuuk ene.

²⁰Me atikọ, ìkup emi me lek kubọk ke kè ǹkup me etete kinyi mgbọ keyi, inyi ǹriọọn̄ ubọk mâsabe itumu ikọ melek kinyi. Mije, owot îfieek emi enenen mije kinyi.

²¹Enyi ebi ìkiweek ikukup me irak Ikan kè Mosis, ìna-nu ǹdo enyi! Ìre enyi kperiọọn̄ inu egebe me Ikan me Ikpa Mbuban?

²²Ege ibe ke Ebereyam ìbon bọn ebirieen̄ iba. Ene ge ke enenwaan̄ usun̄, ekigwen Ega, oman. Sà ogwulọ ke enenwaan̄ ogwu ikarege usun̄, ekigwen Sera, oman.

²³Gwun̄ Ebereyam obonbe me owot ogwu enenwaan̄ usun̄ ya, eman kubọk ekiman otutuuk ene. Ire, gwun̄ ogwu îbonbe me owot ogwu enenwaan̄ ikarege usun̄ ya, eman inan̄a me lek use eyi Awaji ochieekbe Ebereyam.

²⁴Ǹsasa mfufuk yi ito kubọk urọk. Ebibaan̄ iba chi ekeke inyi inyan̄a-ibot iba echi Awaji onyan̄abe. Ega, okeke inyi inyan̄a-ibot eyi Awaji onyan̄abe inyi Mosis me inyọn̄ ogoon̄ Saina. Otutuuk bọn îmaan̄be ìre ebi usun̄.

²⁵Ubọk Ega okekebe inyi inyan̄a-ibot eyi Awaji onyan̄abe me inyọn̄ ogoon̄ Saina me agan̄ Arebia, ikeya si ke îkeke inyi ama ile Jeruselem me chereyi. Mije, Jeruselem melek otutuuk ebi ìluk me emen kan̄, ekup me usun̄ me irak Ikan eyi Awaji onyibe ebi Ju.

²⁶Ire, Jeruselem eyi òkup me emen inyọn̄ ìkakup me usun̄. Ọmọ si okup kubọk uga inyi eji otutuuk ene.

²⁷Mije, ege me Ikpa Mbuban ibe, “Nwọọn̄ unwọọn̄, owu enenwaan̄ òra! Bọn̄ okoko, owu ogwu enenwaan̄ uman ikarakge ìtet! Mije, ogwu enenwaan̄ ejitbe itele môkaan̄ bọn iwa igak ogwu enenwaan̄ òkaan̄ olom.”[8]

²⁸Eya orọ, enyi bọn Nte n̄a, enyi ìre bọn echi Awaji ochieekbe me use, kubọk Ajiki orebe.

²⁹Me ike mgbọ ya, gwun̄ ogwu emanbe kubọk ekiman otutuuk ene îsisaak gwun̄ ogwu emanbe me unye eyi Ekwukwu Mbuban. Ikeya si ke îkup me mgbọ keyi.

³⁰Ire, ìre keke ke Ikpa Mbuban otumu? Ikpa Mbuban ìbe, “Lap ogwu enenwaan̄ usun̄ ya, melek ogwu gwun̄ sibi. Mije, gwun̄ ogwu enenwaan̄ usun̄ ya ìkpogọọk gwun̄ ogwu enenwaan̄ ikarege usun̄ igbaan̄ ikaan̄ uche me lek ìrot eyi nte kiban̄.”[9]

³¹Eya orọ, bọn Nte, eji kpere bọn ogwu enenwaan̄ usun̄. Eji ìre bọn ogwu enenwaan̄ ikarege usun̄.