Read obolo Gal 5 Bible Online

Gal 5 - obolo bible

Gal 5

¹Karais îra irọ inyi eji enwọnọ me irak Ikan kè Mosis, inyi eji ekayaka ìre usun̄ ofifi. Eya orọ, ìkeke ìnye! Ikayaka ìchieek ibe ene geege ikpọk iben akpan usun̄ inikeme enyi ofifi.

²Ìtap iman̄ me lek ikọ n̄a! Emi Pọọlu nkitumu inyi enyi ibe, ire enyi ichieek ibe efieek enyi afi, ìsibi ibe ke ikwaan̄ Karais osibe me ibot kinyi ìre inu ikike.

³Ǹkikpọk itaba otutuuk kinyi ubọk me utọn̄ ibe, ene geelek òchechieek ibe efieek ọmọ afi, ene ya ìkaan̄ irọrọ otutuuk inu geelek egebe me Ikan iso.

⁴Enyi ebi ìkiweek ikakana ebi ata ene me isi Awaji inan̄a me isusun̄ Ikan kè Mosis, ìriọọn̄ ibe ke mîche enyi isan̄a me lek kè Karais. Enyi kpeyaka ikup me irak atata nnwọn eyi Awaji.

⁵Eyi kiji, inan̄a me unye eyi Ekwukwu Awaji, eji ekikpọ chieen̄ ibe ke Awaji mômọnọ eji kubọk ebi ata irọrọ, mije eji echieekbe me lek kè Karais.

⁶Mije, me emen kè Karais Jisọs eji ekupbe, ifefieek afi mè ekafieekge afi ìkakup me uyọt. Otutuuk inu òkup me uyọt ìre ichechieek me lek kè Jisọs Karais, eyi òkijeen̄ lek kan̄ isibi sa me imumun̄ ene me chieen̄.

⁷Me ibebene, enyi mîkirọ ijaan̄ enenen. Ìre keke orọ mè enyi ekayaka ìsiki ibot ìnyi ata etip ya eyi òrere eyi atata?

⁸Inwenwene ejit enyi enwenebe ìkanan̄a me ubọk Awaji ogwu ògwegwen enyi.

⁹Ebi ene ekito urọk ibe, “Sọntiik olat okirọ inyi otutuuk ikpele fituru iwuku.”

¹⁰Ire, mije eji ekupbe me emen kè Karais, ejit n̄a înye ibe ke ekiket kinyi ìkponwene me lek eyi n̄a. Nriọọn̄ si ibe ke ebi geelek ìkiwuwọlọ enyi ibot mêbọkọ osusut me ubọk Awaji. Ebi geelek ema erebe, kpelọlọ ibọbọkọ osusut.

¹¹Bọn Nte n̄a, ire emi nkijeen̄ inyi isi ibe ke îgbe ibe ebi ene ekefieek afi, ìre keke orọ ekpọkpọ ikisisaak emi? Ekisisaak emi mije ǹkakijeen̄ ene ikeya. Mebe ke ǹkijeen̄ ibe ekefieek afi, ata etip nkilook òfo me lek uti nkwurieen̄ kè Karais kpomoyaka ikinaan̄ ebi ene ejit.

¹²Me lek ife cha ebi ìkisisaak enyi, ire ulọk ifefieek afi imalek imin ema ikeya me ejit, ema esan̄a lek kiban̄ òsok isi ge ma!

¹³Bọn Nte n̄a, Awaji ìgwen enyi ibe enyi enekaan̄ utelelek, mè esibi me usun̄ eyi Ikan kè Mosis. Ire, ikasa me irak utelelek yi ìtele ibe oka ijo ubọk iluk ugwem kinyi ikitọ ikọ inyi enyi. Kpan̄asi ikeya, ìmun̄ lek kinyi me chieen̄, mè ìkisi ikwaan̄ ìnyi ebi melek kinyi.

¹⁴Otutuuk Ikan kè Mosis ìkitumu ikọ yaage ibe, “Mun̄ ebilene ogbo kwun̄ me chieen̄ kubọk akpalek kwun̄.”[10]

¹⁵Eya orọ, ire enyi ikpọkpọ ikiloon̄ lek kinyi igwak itaka kubọk anam oron, ìgbala chieen̄. Ire enyi kpegbala chieen̄, enyi mêkpan̄ lek kinyi isan̄a.

¹⁶Eya orọ, ǹkitumu inyi enyi ibe, ìtele mè Ekwukwu Awaji ikijeen̄ enyi oniin̄ me emen inu geelek, inyi enyi ekakirọ ijo inu eyi akpalek ijo inu kinyi okitọ inyi enyi.

¹⁷Mije, inu òkilọk akpalek ijo inu ìkare inu Ekwukwu Awaji okiweek. Inu Ekwukwu Awaji okiweek si ìkare inu òkilọk akpalek ijo inu. Ema chi agan̄ iba, ge ìkakichieek ìnyi ge. Eya orọ, inu owu okirọ, ìkare eyi owu oweekbe irọrọ.

¹⁸Ire, ire Ekwukwu Awaji ikijeen̄ owu oniin̄ me ugwem kwun̄, Ikan kè Mosis ìkayaka ìkaan̄ unye me emen ugwem kwun̄.

¹⁹Irọrọ echi akpalek ijo inu ìkakilet. Irọrọ chi ìre ugwem barabat, mè ifafiat lek, mè ijo bukubuku ugwem,

²⁰mè irariaak mkpọmfaka, mè ifit ibọk, mè ichacha ene, mè ibaak mè etim, mè chieen̄ ile, mè unaan̄-ejit, mè iweweek nnwọn inyi lek ene gaalek, mè icheche lek, mè ikekikaan̄ agan̄,

²¹mè itoto mba, mè inwọnwọ miin̄ isa, mè ijo ifit miin̄ mè òje oyet, mè owuwa ofifi ijo inu òkup kubọk kechi. Ǹkitaba enyi ubọk me utọn̄ mgbọ keyi si kubọk mwuukbe lek itaba iraka, ibe ke ebi geelek ìkirọ inu òkup ikechi kpebekaan̄ mkpulu eyi Awaji me ìrot.

²²Ire, inu Ekwukwu Mbuban okisa inu me emen ugwem kiji ìre imumechieen̄, mè unwọọn̄, mè esuuk, mè ukarajit, mè ikakaan̄ ata ejit, mè inwọnwọn nnwọn, mè igbegbe utoon̄-ejit,

²³mè irọrọ inu esuuk esuuk, mè itetet lek. Kpunu ikan geege ògbagban ibe ene ikakirọ ata inu kechi.

²⁴Ebi geelek ìrere ebi eyi Jisọs Karais mîjit oka akpalek ijo inu kiban̄ mè otutuuk ulọk geelek eyi oka akpalek ijo inu ya okima. Ìkup kubọk ema egogon akpalek ya mè ijo ulọk cha me inyọn̄ uti nkwurieen̄ kè Karais.

²⁵Mije îrebe Ekwukwu Mbuban okinyi eji ugwem, eji esa otutuuk ugwem kiji enyi ọmọ si ikikpulu.

²⁶Eji ekakigumu lek. Eji ekakirọ inyi ene inaan̄ ejit. Eji ekakikaan̄ si chieen̄ ile me lek ebi melek kiji.