Read obolo Gal 6 Bible Online

Gal 6 - obolo bible

Gal 6

¹Bọn Nte n̄a, ire ene ge me etete kinyi irọn̄ inin̄ me emen ijo inu, enyi ebi ìkakaan̄ Ekwukwu Awaji me emen, ìsa me ugwem eyi esuuk ìsi ìsa ene ya ìgwu ìkom ìnu me ata oniin̄. Ire, ìgwuun̄ chieen̄, inyi ene geege me etete kinyi ikarọn̄ ìnin̄ si me ntọ-mkpọ.

²Ìkitap ubọk ìnyi ebi melek kinyi me emen ufialek kiban̄. Mije, sa me irọrọ ikeya, enyi mêkirọ ikan kè Karais iso.

³Ire ikaan̄ ogwu ikikeek ibe ke îkaan̄ inu ọmọ orebe, me mgbọ ọmọ ikarege inu geege, ene ya ìkifiaan̄ lek kan̄.

⁴Ogwu ikup, itaak chieen̄ ikpọ irọrọ kan̄. Ire irọrọ kan̄ inwọn, mgbọ ya ke ìbobele ejit me lek inu îrọbe. Ikasa lek kan̄ ìtọ me lek ofifi ene.

⁵Mije, ene geelek ìbobeme akpan eyi kan̄.

⁶Îgbe ibe ene geelek òkikween̄ ikọ Awaji ikiche ata inu geelek îkaan̄be inyi ogwu òkijeen̄ ọmọ ikọ Awaji ya.

⁷Ikachieek ibe efiaan̄ enyi. Kpunu ogwu òbokọt ifeen̄ Awaji. Inu geelek ene owopbe, eya ke ìborọkọ.

⁸Ene geelek òkirọ inu akpalek ijo inu kan̄ okiweek, ene ya ìborọkọ mkpa kubọk mfut uko eyi ònan̄a me akpalek ijo kan̄ inu. Ire, ene geelek òkirọ inu Ekwukwu Mbuban okiweek, ene ya môkaan̄ ugwem ikakaan̄ge itata, eyi ònan̄a me ubọk Ekwukwu Mbuban.

⁹Eji ekawọ lek me irọrọ ata inu, mije, ire eji kpewọ lek, mgbọ isikem, eji mêbọkọ ata mkpukpe mije ata ikwaan̄ kiji.

¹⁰Eya orọ, eji ekerọ ata inu enyi otutuuk ene mgbọ geelek irek osibibe inyi eji. Ògak otutuuk, eji ekerọ ata inu enyi ebi ngwan̄ kiji ebi ìchechieek me lek kè Jisọs Karais.

¹¹Emi gaalek nsa ubọk n̄a igwat ere keyi me lek ikpa yi ijet enyi. Ìkpọ ike ubọk ikpa n̄a osabe imiin̄ iyaka!

¹²Ebi ife chi, ebi ìkiweek ichechieek ata erieen̄ me isi ebilene, ekiweek itetet otutuuk kinyi me unye ubọk ifieek afi. Ema ekirọ ikeya, inyi ebi ene ekasisaak ema mije ata etip òfo me lek mkpa eyi Jisọs Karais okwube me inyọn̄ uti nkwurieen̄.

¹³Ema me lek kiban̄ ebi ìchieek me lek ifieek-afi kpekọt isun̄ otutuuk Ikan kè Mosis iso. Ire, ema ekekiweek ibe enyi enefieek afi, inyi ema ekesa egugo lek ibe ke enyi mîsiki ibot inyi Ikan kiban̄, mè isa lek kinyi inyi ibe efieek enyi afi.

¹⁴Ire, eyi n̄a, Awaji ikachieek ibe emi ǹsa ofifi inu geege ǹgugo lek, ilọ me lek uti nkwurieen̄ eyi Okaan̄ kiji Jisọs Karais. Mije mkpa kè Karais, inu linyọn̄ keyi îkana nkwukwu inu me lek n̄a. Emi si nkakana nkwukwu ene me lek inu linyọn̄. Ìkup kubọk ebeben inu linyọn̄ cha igon ikpan̄ me inyọn̄ uti nkwurieen̄ kè Karais.

¹⁵Ifefieek afi mè ekafieekge afi ìkasibi inu geege. Inu òkup me uyọt ìre ke Awaji îra ikpọk eji irom ayaya me emen kè Karais.

¹⁶Esuuk mè ejit nsan eyi Awaji ikup inyi ebi geelek ìkiluk ugwem igọọk ubọk ayaya ugwem yi oweekbe. Esuuk mè ejit nsan eyi Awaji ikup si inyi otutuuk ebi Awaji ogobobe inyi lek kan̄, ebi ìkup kubọk atata ebi Ijeren inyi Awaji.

¹⁷Òta ikọ n̄a ìre ikeyi: Ene geege ikayaka ìkpọk ìsisaak emi. Mije, akpat unan òkup me akpalek n̄a ìre iman̄ òkijeen̄ ibe ke emi ìre usun̄ kè Jisọs.

¹⁸Bọn Nte n̄a, atata nnwọn eyi Okaan̄ kiji Jisọs Karais ikup melek kinyi. Ikup ikeya!