Read obolo Efes 1 Bible Online

Efes 1 - obolo bible

Efes 1

¹Emi Pọọlu, ogwu òrere ogwu otuchieen̄ kè Jisọs Karais inan̄a me nkeek Awaji, nge ikpa etip yi ijet enyi bọn Awaji ìkup me Efesọs, enyi ebi ìtotoon̄ ejit me lek kè Karais Jisọs.

²Atata nnwọn mè esuuk eyi Awaji òrere Nte kiji mè eyi Okaan̄-ene Jisọs Karais ikup inyi enyi.

³Itọn̄ ikup inyi Awaji ogwu òrere Nte Okaan̄ kiji Jisọs Karais. Ọmọ onyi eji otutuuk ugbana kan̄ geelek ònan̄a me emen inyọn̄, inan̄a me lek eji ekupbe me irak ubọk kè Karais.

⁴Sabum înirom linyọn̄, îdasi igobo eji, inyi eji enere ebi kan̄ inan̄a me lek kè Karais, mè eji ekup me mbuban, mè ekakaan̄ nrọ-nlọ geege me lek me isi kan̄.

⁵Bene me ibebene, Awaji îwuuk lek isa me imumechieen̄ kan̄ igobo eji isibi kubọk ebi ọmọ obomọnọ isa irọ nsabọn kan̄, inan̄a me lek kè Jisọs Karais. Ikeyi ke îneme Awaji me nkeek kan̄ irọrọ.

⁶Eya orọ, eji etọn̄ Awaji mije atata nnwọn kan̄, òkakaan̄ ujamgbugbo, eyi îchebe inyi eji me ikike, me emen Gwun̄ kan̄ ogwu îmun̄be me chieen̄.

⁷Awaji ìsa eje Gwun̄ kan̄ ifaka eji isibi me usun̄ eyi ijo inu. Eyiyi ìsibi ibe, bak me lek Gwun̄ Awaji, ke Awaji îtele otutuuk ijo kiji inyi eji inan̄a me lek atata nnwọn kan̄ eyi òmimin enenen.

⁸Awaji înyi eji atata nnwọn kan̄ imin enenen. Îsa me iriọọn̄-inu mè uga ifuk-ibot kan̄

⁹irọ inyi eji eriọọn̄ nlelet nkeek kan̄ eyi îbenbe me ejit irọrọ iso me lek kè Karais,

¹⁰me mgbọ mgbọ isikem. Nlelet nkeek Awaji okaan̄be me ejit ìre ke ọmọ môgbaan̄ otutuuk inu geelek òkup me emen inyọn̄ mè echi òkup me linyọn̄ ititiin̄, mè isa ikana itap me ubọk ogwu ibot ge gaalek. Ogwu ibot ya ìre Karais.

¹¹Me emen kè Karais ke Awaji ogobo si eji isa irọ ebi kan̄. Îwuuk lek isan̄a eji isun̄ esese bene me ibebene igọọk me otitọt îtọtbe. Awaji ìkirọ inu geelek igọọk me nkeek kan̄, mè ike înemebe ọmọ.

¹²Awaji ìrọ ikeyi, inyi eji ebi ìdadasi itoon̄ ejit me lek kè Karais ekeluk ugwem eyi òbokirọ inyi ebi ene eketọn̄ ọmọ me ujamgbugbo kan̄.

¹³Enyi si mîgọọk ikaan̄ uche me emen kè Karais. Mije, enyi mîchieek me lek kè Karais, mgbọ enyi enọbe ata etip eyi atikọ ya, eyi òrere ata etip eyi òsasa unyan̄a ijet enyi. Awaji onyinyi enyi Ekwukwu Mbuban, eyi îchieekbe me use, kubọk iman̄ òriọọn̄ kan̄ me lek kinyi, isasa ijeen̄ ibe ke îre ọmọ okaan̄ enyi.

¹⁴Ekwukwu Mbuban ore inu ukarajit inyi eji ibe ke eji kpêlọlọ ibọbọkọ ìrot eyi Awaji ochieekbe use inyinyi ebi kan̄, mè ire si inu ukarajit inyi eji ibe ke Awaji mônyi ebi kan̄ òjot òjot utelelek. Eji etọn̄ Awaji me ujamgbugbo kan̄!

¹⁵Mije keyi, karake nnọbe inu ofolek ichechieek enyi ekaan̄be me lek Okaan̄-ene Jisọs, mè imumechieen̄ enyi ekaan̄be me lek otutuuk ebi ìchechieek,

¹⁶emi ǹkakilọ itọtọn̄ Awaji me ibot kinyi, ǹkakilọ si ikekeek enyi me uriaak n̄a mgbọ geelek.

¹⁷Ǹkibeek Awaji Okaan̄ kiji Jisọs Karais, òrere Ute òkaan̄ otutuuk ujamgbugbo, ibe inyi enyi Ekwukwu Mbuban ogwu òkinyi ene iriọọn̄-inu, mè ikichili inu geelek ijeen̄ ene, inyi enyi esa me ikeya eriọọn̄ ọmọ egak ubọk enyi eriọọn̄be.

¹⁸Ǹkiriaak si uriaak ibe mè Awaji ichili ifuk-ibot kinyi, inyi enyi eriọọn̄ utoon̄-ejit ya eyi ọmọ obak me lek igwen enyi, mè eriọọn̄ si inu ubọọn̄ eyi ujamgbugbo, eyi Awaji ochieekbe use inyinyi ebi kan̄,

¹⁹mè eriọọn̄ si ikpele unye kan̄, eyi îkisa isi ikwaan̄ me emen kiji ebi ìchechieek, eyi kpunube ofifi unye geege ebesa itọ me lek. Unye yi, eyi Awaji okisa isi ikwaan̄ me emen kiji,

²⁰ọmọ ore ikpele unye ya eyi îsabe isi ikwaan̄ me emen kè Karais mgbọ îjomobe Karais me mkpa, mè isa isi, inyi isi isiki ikweek me agan̄ ubọk ulom kan̄, òrere irek òmimin ichit, me emen inyọn̄, ere òbebene ichit.

²¹Ere ya Karais okupbe îbene enenen igak otutuuk mkpulu geelek, mè ebi ibot geelek, mè ebi unye geelek, mè ebi ibot mkpulu ìkup esese esese. Erieen̄ kan̄ si obene ichit me etete otutuuk erieen̄ ebi ibot mkpulu geelek, bene me linyọn̄ keyi re linyọn̄ eyi òkinu me isi.

²²Awaji onenikana otutuuk inu itap me irak ukot kè Karais, mè isa ọmọ irọ ogwu ibot me otutuuk inu geelek inyi ntitiin̄ kan̄.

²³Ntitiin̄ ya ìre akpalek kè Karais eyi Karais orọbe ijot. Karais me lek kan̄ ore ogwu òkirọ inu geelek ijot me ere geelek.